ياشباب .. خواتكم وزوجاتكم .. وحتى امهاتكم

[زمن الغرباء]

من الأشياء اللي تضيق الصدر
تعودوا _ بعض _ الناس ان اي شي بالبيت ينكسر أو شي ينتثر
او شي ينحاس يبي ترتيب أو أي عمل ( منزلي ) يبي يزين
لازم تنادى انسانة لها مشاعر وأحاسيس اسمها ( انثى) عشان تمسح أو ترتب اللي انحاس !!! والمصيبة انها احيانا تكون امه
يالله عاد هذي اللي ماطار طيرها ..

ياشباب .. والله لو اللي يحوس عمره سنة أو سنتين
ورب الكعبة ماراح اقول شي لكن رجل طول وعرض .. صعبة شوي !!
ليه يعني مايقدر أو مايعرف!!

ياشباب ..
والله ماطلبنا منكم تتعبون انفسكم
والله اني ماقلت اطبخوا ولا سبعوا ولانظفوا حنا نسوي كل ذولي وعلى روسنا من فوق وحق وواجب ولا سوينا شي بعد
لكن ماتوصل لدرجة ان الواحد عاد مايعرف يشيل اللي عقبه ويوديه للمطبخ او يحوس الشي ولا يعرف يرتبه .. هذا مو شغل اهلك هذا شغلك انت .. حتى غرفتك يرتبونها اهلك .. أحسها مو من الاحترام..
ورب الكعبة انه شي يحز بالخاطر ان الشاب يحوس والبنت هي اللي تتعب .. هذا كأنه يقول لأخته انتي ولا شي ..


لايجي أحد ويقول الشغالات اللي يزينن كل شي
حنا من طلعتنا على الدنيا مانعرف الشغالات _ الله يديم علينا _
وان شاء الله مايجي اليوم اللي تطب فيه بيتنا شغالة ..
وبعدين حتى اللي عندهم شغالة هذا مايمنع ان الانسان يخدم نفسه
الشغالة الأصل انها تساعد أهل البيت مو تسوي كل شي عنهم ..

العجيب بالموضوع _ ان بعضهم _ مع اصدقائه بالبر والاستراحة يتحول لشخص ثاني .. قرامة وخفة وسنع .. يعني بالبر يقطع ويطبخ ويقلط ويشيل ويحط
همن يجيب المواعين والكواتم للبيت كلهن رز ودسم !!!!!!!!!
يعني يعرف يطبخ بس مايعرف يسبع .. يعني الشغل على الهوى !!

واللي أعجب _ ان بعضهم _ دايم يقولون النبي عليه الصلاة والسلام عدد بالزوجات نبي تقتدي به ..
وانا أقول النبي عليه الصلاة والسلام كان يساعد أهل بيته بشغل المنزل رغم ضغوطاته وأعماله الشاقة _ فداه نفسي وروحي


ثاني شي ..
قراشيع السيارات اللي ماتنتهي
.. من حق أهل البيت ان البيت تكون مرتبة ونظيفة
يعني صعبة شوي جزء من الحوش يتحول لورشة
والمشكلة انه بعضهن مايبغن بس محطوطات منظر !!
والله اني يضيق صدري اذا شفت الحريم يشتكن من فوضى اخوانهن وأزواجهن وعيالهن

ثالث شي ..
ياشباب .. اذا تعبن زوجاتكم او خواتكم أو اذا انضغطن مثل ايام رمضان .. طلعوا قرامتكم وسنعكم
معليش لو تعبتوا بس مايصير ان كل شي يصير وسخ لأنها تعبانة
بالعكس هذي فرصتكم لزيادة الأجر وعشان تكبرون بعيونهن بعد

ياشباب والله لو يكون تكاتف وتعاون بين أهل البيت .. كان خف استقدام الشغالات ..

ياشباب ..
والله الموضوع جااااااد
راجعوا انفسكم

الله يسخرنا لاخواننا ويسخرهم لنا ياااارب

موفقين .....