ياجماعة ماودكم الواحد يضربها كبسه ويشرب لبن وينام الظهر وهو تعبان (أنواع الكوابيس والحلوم) وهذا ماحصل معي .
نمت ذيك النومه اللي يحبها قلبكم ويجيني ذاك الحلم وأحلم إننا صرنا دولة فقيرة مثل (النيجر وتشاد وبنجلاديش الخ...) وصار برميل البترول بريالين .
المهم صرنا مثل الدول الفقيرة ندور على فيزه ونبي نسافر للهند وبنجلاديش وباكستان ونيبال وأندونيسيا وهالدول ذي صايرة بالحلم دول غنية .
المهم ضاقت بي الدنيا وبعت كل ماأملك علشان أحصل فيزه لدخول بنجلاديش (بلد الحلم والثراء) وفعلا بعد جهد جهيد حصلت فيزه عن طريق (عجوز سمنسي ) اللي سابقني لبنجلاديش ويشتغل بمستوصف درجه ثالثه (عامل نظافه ) والعصر معه سيكل يدور بالحارات يقصقص شجر بيوت البنغاليين ....ماقصر سمنسي ضبط أموري وسافرت علشان أشتغل معه (عامل نظافه ) وفعلا وصلت بنجلاديش وتسلمت العمل والأمور تمام .....
سألت عجوز عن حبايبنا من أهل بريده ,,قال فيه مجموعه كبيرة يشتغلون هنا وفعلا تعرفت عليهم عند عجوز بغرفته البلكاش (تقل عشة حمام) وهضلوا الشله : البدر (معه سيكل وسطل وخرقه تمسيح) ويدوج بالشوارع يلقط رزقه (صراحة كسر خاطري) ...وشفت عشقشق هو الحضيض فينا يشتغل عند عائله بنجلاديشيه (سواق وينظف إذا صار فاضي) ....وشفت الخيالي يشتغل قصاب وماعنده محل يذبح تحت شجره .
وشفت قلب ضب ويشتغل ببوفية مدرسه وينظف المدرسه من القراطيس والوسخ .....وشفت برق الوسم ويشتغل بمزرعه بنجلاديشي يسقي ويحرث وطبعا الحراثه اللي معه هي (بقره ) خخخ
وشفت ماني مثل غيري (يعجبني مدوخ السلطات ببنجلاديش ) يشتغل بتمرير المكالمات وتزوير العمله ومطلوب بعدة قضايا أمنيه .
والمفاجأه اللي شفتها إن عضوات بالمنتدى شفتهن يشتغلن شغالات ببنجلاديش ...طبعا تبي تقولون وشلون عرفت؟؟؟ أصلا المكتب اللي جابني لبنجلاديش إتصلوا فيني للحضور وياللمفاجأه أشوف عضوات المنتدى بالمكتب :اللي هاربه من كفيلها واللي زعلانين عليها وتترجاهم علشان مايسفرونها للسعوديه وطبعا عرفتهن بأسمائهن الرمزيه بالمنتدى وكسرن خاطري الصراحه .......مالكم بطوالته وغثى وغرابيل وشغل وكرف وكل واحد فينا معه ألبوم صور وإذا صار بالليل قعدنا نطالع بالصور ونشغل أغاني ( أنواع العواطف والوله على أهلنا ) .......ويوم صحوني من النوم ويوم شفت روحي بغرفة نومي وكل هالحلم خرطي قلت (الحمدلله على هالنعمه ) ....تتوقعون من شفت من العضوات ؟!؟!؟!؟!؟ تراي صادق شايفهن هناك بمكتب الإستقدام هع هع
العرض الشجري