دوحي ولولي 00 وش اللي صار بعد شهر العسل 00؟؟

[مدرعمهـ]

ياقليبي يالولي على نياته ماتدري وش وراه
دحيم قلعته هالداشر طاح بشر اعماله
يلا نتتظر كيف رقعه

[SAGA]

سهله مايبيلها شي
يقولها حبيبتي أنا حافظ الرقم السري بملف بالجهاز بكرا أوريك إياه
ويضيعها هالليله خصوصا بهالأجواء اللي ذكرتها يسهل عليه التضييع
ولا أصبح يسوي له إيميل ثاني ويضيف إمام المسجد خخخخ أو أي أحد عاقل
ويعطيها رقمه والأول يقولها أنه لشغله ..والحرمه سهله يقدر الرجال ينصب عليها
وأنا أنصح كل بنت تعرف لبرامج الإتصال قبل ماتتزوج حتى ماتصير مثل لولي
أنا الحمدالله قسمي حاسب يعني ابن أمه اللي يفكر تفكير دوحي ويجي يخطبني ككككك
متابعه للقصه أي شي ولي عودة

[مدير خبرة]

اقتباس:  المشاركة الأصلية كتبت بواسطة سجى تركي     سهله مايبيلها شي يقولها حبيبتي أنا حافظ الرقم السري بملف بالجهاز بكرا أوريك إياه ويضيعها هالليله خصوصا بهالأجواء اللي ذكرتها يسهل عليه التضييع ولا أصبح يسوي له إيميل ثاني ويضيف إمام المسجد خخخخ أو أي أحد عاقل ويعطيها رقمه والأول يقولها أنه لشغله ..والحرمه سهله يقدر الرجال ينصب عليها وأنا أنصح كل بنت تعرف لبرامج الإتصال قبل ماتتزوج حتى ماتصير مثل لولي أنا الحمدالله قسمي حاسب يعني ابن أمه اللي يفكر تفكير دوحي ويجي يخطبني ككككك متابعه للقصه أي شي ولي عودة

والله ذهينه ياسجى
والله يستر على اللي بتصرفينه يوم من الايام

بس ترا بعض الرجال
حتى لو تخصصك بيل جيتس براسه
يقدر يدودهك بالكومبيوتر
وماتقدرين تدرين وش يسوي ووش يزين...

["غرك غلاك"]

اتصور عطاها ايميل صديقة عبيّد بالاستراحة اللي ماله بالغزل

[مدير خبرة]

[quote="غرك غلاك";3342295][center][size=4][color=blue]اتصور عطاها ايميل صديقة عبيّد بالاستراحة اللي ماله بالغزل [/color][/size][/center]





[center][size=4][color=blue][/color][/size][/center][/quote]



[center][size="5"]برضه تخمين يمكن يكون صحيح
اخوي غرك غلاك
بس مثل ماقالوا السوريين
ماحزرت

تجيك السالفة وانا اخوك[/size][/center]

[لمعةالألماس]

نقول لدوحي..


,,,, إذا لمـ تستح فاصنع ماشئت ,,,,

>>

عَنْ عَبْدِ اللَّهِ بْنِ عُمَرَ، اَنَّ رَسُولَ اللَّهِ صلى الله عليه وسلم

(مَرَّ عَلَى رَجُلٍ وَهُوَ يَعِظُ اَخَاهُ فِي الْحَيَاءِ فَقَالَ رَسُولُ اللَّهِ صلى الله عليه وسلم ‏

‏ دَعْهُ فَإِنَّ الْحَيَاءَ مِنَ الإِيمَانِ)

قـــــــــــال الشاعر:

ورُبَّ مذمة ماحال بيني *** وبينها إلا الحيـــــــــــــــاءُ

فكان هو الدواء لها ولكن ***اذا ذهب الحياء فلا دواءُ

اذا لم تصن عٍرضاً ولم تخش خالقاً ***وتستحي مخلوقاً فاصنع ما تشاء

>>><<<

شكرا لكـ..

[مدير خبرة]

اقتباس:  المشاركة الأصلية كتبت بواسطة @جمرة@     نقول لدوحي.. ,,,, إذا لمـ تستح فاصنع ماشئت ,,,, >> عَنْ عَبْدِ اللَّهِ بْنِ عُمَرَ، اَنَّ رَسُولَ اللَّهِ صلى الله عليه وسلم (مَرَّ عَلَى رَجُلٍ وَهُوَ يَعِظُ اَخَاهُ فِي الْحَيَاءِ فَقَالَ رَسُولُ اللَّهِ صلى الله عليه وسلم ‏ ‏ دَعْهُ فَإِنَّ الْحَيَاءَ مِنَ الإِيمَانِ) قـــــــــــال الشاعر: ورُبَّ مذمة ماحال بيني *** وبينها إلا الحيـــــــــــــــاءُ فكان هو الدواء لها ولكن ***اذا ذهب الحياء فلا دواءُ اذا لم تصن عٍرضاً ولم تخش خالقاً ***وتستحي مخلوقاً فاصنع ما تشاء >>><<< شكرا لكـ..

هلا جمره
تدرين يابنت الحلال
شباب .. وفراغ.. وطاقة
وتهيأ لهم هالاختراع العظيم النت
طبيعي بينفسون فيه

ومافيه احد يسوي خطا
وهو مرتاح له ومبسوط

ثانك فور يو
لتذكيرك

والله يهدي الجميع

[مدير خبرة]

والله اني خايف ان تتحول سالفة دحومي ولولي الى مسلسل مكسيكي.. بس لازم ساعتها نغير اسم دحومي الى دحمونتياوا ولولي الى اسم لوليتانا عشان تمشي مع المسلسلات المكسيكية..
وطارين لي ان ازود الرومانسية شوي في السالفة.. عشان اذا فكرنا نحولها مسلسل تركي نلقى شي لمهند ويحي ونور ولميس يهكون به على البنيات اللي ماغير مصدقات اعمارهن وهن يشوفن هالحب والحبيب..
بس اني محتار وش اختار اسم لدحومي ولولي.. ؟ لان اسامي الاتراك حلوه.. ورومانسية.. يعني نقول دحند.. ينفع.. ولوليس.. فيها شبه من مهند ولميس..

طيب .. طيب
داري اني ابعدت عن الموضوع .. بس وش اسوي هذا طبعي
الشباب يقولون لي لاعمرك تسولف علينا ابد.. لاننا مانفهم وش ودك تقول.. ماغير تدخل بنا لسالفة وتطلع بنا لسالفة ثانية.. وبالاخير ما نستفيد شيء.. ماغير تصج آذاننا وتدوخ روسنا..

المهم شكلكم متحمسين تبون تدرون وش سوى دحومي ..
وعلى فكرة ترى دحومي مهب هين.. وذهين قوة.. وماتمشي عليه هالحركات.. وحنا يوم بمتوسط كنا نسميه أرخميدس خب العوشزية.. لانه ماشاء الله عليه كل مانسبح ببركة والا مسبح تجيه فكرررة خطيرة.. وجهنمية..
اذكر ذاك اليوم كنا نسبح ببركة استراحة واحد من الشباب .. وكان الوقت مسيان.. فجأة لاحظت دحومي يناظر فوق.. وسااااهم... ويوم ركزت فيه.. لقيته يتأمل القمر.. رغم انه كان هلال وبأول الشهر.. بس حسيته منسجم... قلت أكيد بنطلع بقصيدة ألحين.. وبدر عبدالمحسن بيطيح سوقه.. وماراح يلقى احد يسمع له.. وبعد ماطول.. فاجأته وقلت (أحلى يابو الرومانسيات.. هاه كم بيت وصلت..؟) قال وش ابياته أنت ووجهك.. أنا قاعد أتأمل القمر وأفكر باختراع يفيد البشرية.. ووقتها تذكرت اننا في البركة وان حالات الوحي العلمي مايجي دحومي الا بالماء.. حتى انه كان يحب يذاكر بالبركة.. ويوم هو بزر كان يحط بحوش بيتهم طشت ويملاه ماء.. ويقعد يذاكر فيه.. طبعا هالهرج قبل ظهور البانيو.. المهم تدرون وش طلع دحومي يفكر فيه..؟ يقول هالحين وكالة ناسا متعبين ارواحهم طالعين نازلين للقمر.. ومكلفين ارواحهم مركبات وصواريخ والصاروخ الواحد يكلفهم 25 مليون دولار.. وانا عندي لهم حل مايخليهم يخسرون الا أقل من 1000 ريال.. وبالكثير الكثير.. خمسة ألاف..!!
ولاني متعود على سوالف دحومي وافكاره الجهنمية.. قلت هات وش تفكر فيه..؟
قال هالحين ليس مايستغلون اول الشهر واخره اذا صار القمر هلال وعلى شكل قوس.. ويربطون فيه حبل قووووي ومتين.. وينزلونه للارض.. وثمن يربطون بالحبل عربة حقت التلفريك.. ويطلعون اكثر من مرة.. ويمكن يغطون تكاليف الصاروخ من رحلات الناس للقمر.. هي صراحة فكرة جهنمية.. بس مشكلتنا اننا ماكنا نعرف رقم ناسا عشان نوصل لهم الفكرة..


طيب .. تبون السالفة
دحومي يوم قالت له لولي ذاك الكلام.. خاصة انها قالته برومانسية ودلال.. وهو ضعيف قدام اغراء الانثى.. وأي انثى اذا صارت مثل لولي.. صح اني ماشفته بس دحومي يقول انها اجمل من جنيفر انستون.. وعيونها اواسع من عيون سميرة توفيق.. وخصرها أطلق من خصر سمية الخشاب.. وبياضها ابيض من لميس شووي..
عاد من الأصل أنا ماصدقته.. لاني متأكد ان مافيه أمل يصير من بناتنا بهالمواصفات أبد..

دحومي على طوووول طقها ذيك الضحكة.. كههههه كهههه.. وعلى طول مسك ايديها.. وضمها لصدره.. ثمن رفعها لفمه وقبلها.... وأخذ زفرررررة عميقة.. وتنهيده سااااخنة.. وقال (بسسسسسسس.... تامرين أمر.. انا كلي لك.. أصلا من عندي غير لولي الدلولي..؟) ويوم جاء يقوم.. مسكته لولي برقه.. وقالت ( مو الحين.... ) وطبعا ما اقدر اكمل المشهد.. عشان الرقابة ماتلقى علينا شيء ومراعاة لمشاعر المراهقين .........

بس هو صار من بكره الظهر... وبعد مادخل دحومي ومعه لبن المراعي.. وفصخ شماغه.. وحطهن فوق الكنبة.. لقى لولي قاعدة على الكنبة.. ورجليها تحتها.. وقاعدة تشوف مسلسل اجنبي.. ومنسجمة معاه على الاخر.. عاد دحومي من خبرته يعرف ان اكثر البنات ثقافتهن أفلام اجنبية.. وتالي طالعات علينا بالمسلسلات الكورية واليابانية.. المهم دخل يغير ثوبه.. ويوم طلع للصالة لقى لولي قاعده عند الكومبيوتر.. وطاقه ذيك الابتسامه الجنان.. قالت له (تعال هنا حبيبي..) وعرف انها ناويه له على نية.. بس قال انا دحومي والأجر على الله..
وطبعا ماكان فيه الا كرسي واحد عند الكومبيوتر .. فقامت لولي تبي دحومي يجلس.. وجلست هي في حضنه.. قالت له (يالله....!!) سوا فيها عبيط.. ورد عليها (يالله وشو...؟؟) قالت (اماك قلت بتخليني اشوف ايميلك..) قال (آآآآآه... صح.. نسيت..) وأمير يشغل الموديم.. ولولي قاعده في حجره تناظر وتتأمل... وطبعا مراعاة للمراهقين نتجاوز عن الرومانسيات اللي يمكن تصير

طقطق له بكم حرف.. وقال احفظي هذا ايميلي.. ثمن قال حطي رقم جوالي بمكان كلمة المرور.. واضغطي تسجيل الدخول.. وانتظري لين يفتح الماسن.. وماغير دقايق الا ويفتح الماسن... واثر مافيه الا ثلاثة نكات.. قالت ببراءة (منهم ذولا..؟) قال (أبد .. ربعي بالاستراحة..) قالت ايه.. ياحليلهم.. وحليل اساميهم... وأميررر تطق ذيك البووووسة على جبين دحومي وقالت له.. (يااااااااحبيلك.. والله أني أمووووت فيك..) وقبل مايتكلم بكلمه.. قالت (ايه .. حبيبي... انا ابي ايميلك ذاااااك... اللي يبدا بـdhl..) وأميررررر يتغيرررر دحومي.. وينشف حلقه.. وكنه ماشرب ماء من سنة..!! وعلى طول.. قال (وشو dhl ذا...؟؟ لايصير داخله شركة بريد سريع وغلطانه..؟ ) وبكل حنيه ورقة.. ورومانسية.. أخذت لولي الماوس وضغطت على المستندات.. وفتحتها.. ثمن فتحت.. (سجل محادثاتي) وبداخلها ذيك الحوارات...اللي كانت رحمة ربي كبيرة لدحومي وفرمت الجهاز قبل الزواج بايام... والا كاااااان راح فيها دهنة...!!!
دحومي اول شيء فكر فيه.. وجاء بباله... قال (وش ذي بنت اللذينا..؟ اثره طلعت ذيبه وأنا ما أدري..) وبعد تفكير قالها.. (الايميل هذا ناسي رقمه السري بس خلي ابحاول فيه .. بس ترااا راسي مصدع.. أبي بيالة شاهي..) قامت وقالت له من عيوني.. وقامت..وأمير يجيك دحومي يدخل بالعميق.. ويهديه تفكيره لخطة جهنمية.. وهي انه يحوس اعدادات الموديم.. عشان مايشتغل.. وبحركة وحدة سواها ابو الشباب... ويوم رجعت لولي بعد اقل من دقيقتين حصلته قاعد يلعن ويسب ويشتم (الله يلعن هالشركة.. يسرقوننا عيني عينك..؟ يخصمون علينا وخدمة زي الزفت..!!) قالت وش السالفة.. على طول رد عليها (النت عطلالالان..!) .. طبعا البنية ماقدرت تقول شي.. قالت ماعليه حبيبي وقت ثاني.. بعد مايصلح...

بعد صلاة العصر... واول ماطلع للمسجد... مارجع للبيت.. وعلى اقرررررب مقهى نت.. وهناك وبظرف خمس طعش دقيقة كان الماسن وش حليله نظيف... إلا من (الصتيمة وأبو عرب والمحترش .. وشلة الضبان أمثالنا..) ورااااحت سارونه.. ولميس.. ونونه.. وهيوفه...وووووووو إلى الحذف...
وقبل مايطلع من المقهى رن جواله.. واثاريها لولي قالت له (وينك..؟) قال بهدوء.. ونفسسسسس عااالي ... (أبد.. جارنا سيارته خربانه ورحت وديته الصناعية.. وهذاني جاااااي....)
وستر الله على دحومي.. وفكه من فضيحة قدام زوجته كادت تهدد حياته باول ايامها

عاد الفايدة
انتم يالرجال المتزوجين خصوصا
وايضا البنات..
هل من الممكن ان تعطي زوجك / زوجتك رقمك السري للماسن والايميل..؟؟؟

وعلى فكرة..
ترا كلللل هالهمق والخرط السابق.. عشان اطرح هالسؤالين...

[مدير خبرة]

اقتباس:  المشاركة الأصلية كتبت بواسطة مدرعمهـ     ياقليبي يالولي على نياته ماتدري وش وراه دحيم قلعته هالداشر طاح بشر اعماله يلا نتتظر كيف رقعه

ياما تحت السواهي دواهي
وبعض البنات براااءة من الظاهر
بس من الداخل
اللهم يااااكفي