أغبيـاء.. بدرجـــة كافيـــة...!!!

[مدير خبرة]

وصلني طلب إضافة في صفحتي بالفيس بوك..
عيون المها..
كان هذا اسمها..
وحينما استعرضت ملفها.. وجدت تلك الصورة التي تبرز مفاتن الجسم.. دون الوجه..!!
انتبهت أكثر كونها من ديرتي.. بريدة..!

بعد دقائق.. فوجئت بنافذة الحوار في صفحتي تومض باللون الأزرق..
فتحتها .. وإذا بها عيون المها..
سلام.. وكلمتين.. ومن وين.. ووش اسمك... ووو
وشوي... أنواع التأفف .. و " قهرررر " و " الله ياخذهم بسسس.. "
طبيعي أن أسأل وش السالفة..؟
لتقول لي أنها تريد أن تتصل لكن جوالها " محضور "..
طيب.. وش معنى محضور..؟ ليش مجضور..؟
" خل أشوف.. " هذا ماقالته.. ثم بعد قليل عادت لتقول.. " يقولون لازم تشحنين.. "
ثم أعقبت كلامها.. " والمشكلة ماعندي أحد الحين بالبيت.. ولازم أتصل "

الأكيد أني لست غبي.. وفهمت على طول .. وش تبي..!
بس بعض المواقف.. ودك تصير غبي.. عشان تشوف وش نهاية الموقف..!

تصنعت الذهول.. وانقهرت قوووة معها.. ولعنت الشركة لمن قلت بس ..
طيب .. قل شي.. ماعندك شي ثاني.. ويوم حست اني (يقالي) مافهمت..
قالت ماتقدر تخدمني بشحن الحين.. وارجعه لك.. ؟ ثم اردفت.. " ارجوك لاتفهمني غلط.."

على طول جت ببالي الصورة.. وأسالها... " الصورة اللي بملفك.. أكيد مو لك..؟"
على طول ردت وقالت " إلا... لي ..!!"
قلت معقول بنت من ديرتنا.. تطلع صورتها كذا.. ثم واصلت وقلت.. " شكلك أجل حيييل ايزي..!!"
برضه على طول ردت وقالت " ايه.. " سلسلة من " هههههههههههه " ..!!

عاد حولت الموجة.. وعقلت..
وتكلمت معها بكلام.. قوي شوي..
اولا من ناحية الاستغفال والضحك على الناس .. خاصة الشباب..
وثانيا.. على افتراض صحة كلامها.. وشلون تحط صورتها وكيف تنزل نفسها هالمنازل..؟؟

اللي صار خلاني اتذكر اكثر من قصة.. سمعتها .. وقريتها.. لشباب مخفات.. وماعندك أحد..
وكنت أتألم بعمق إذا قريت أو سمعت أن أحد الشباب حول قروش أو بطاقات شحن..
وتذكرت قصة الشاب اللي قضبوا عليه بالشرقية.. قبل سنة.. وحصل رزق كبير من هالمغفلين..
استدراج بالمنتديات .. ثم بالمسن.. وكم كلمة ناعمة وعزف على وتر الجنس..
والشاب جاهز... زي الدهنة إذا حطيتها عقب الظهر بالشمس... بفصل الصيف

ممكن ...
أقول ممكن نبرر وسيلة (النصب) لبعض البنات.. أو البنات (بشوارب)...
في وقت اختفت في القيم والاخلاق النبيلة..

لكن غير ممكن أني أتقبل أن الشاب يندفع لمن يستغفله.. ويستدرجه..
بطريقة ساذجة وغبية...!!!!!

في نفس الشي..
استغرب من بعض البنات.. اللي من تتعرف على وحده بمنتدى.. وتسولف معها مسن
تتصور أنها مع بنت جيرانهم.. أو بنات خالاتها...
وعلى طول تعرف بنفسها.. وتعرض صورتها...
وهي ماتدري ان اللي معاها.. بنت (بشارب).. وليست بنت حقيقية..
وقريت قصة بنت.. تمت مساومتها للخروج مع شاب.. بعد حصوله على صورها.. على اعبتار أنه صديقتها.. التي تعرفت عليها بالمنتدى..!!!!!