بسم الله والحمدلله ولا اله الا الله ..
الحمدلله على التمام والخلاص الحسن , قسم بالله الواحد معد يبي معدلات وبلا .. يبي ينتهي وبس ؟ > ماجاكم هالشعور ؟
المهم بعيد عن عن كلام الامتحانات والشكاوي اللي ماتودي وتجيب .. علومكم ؟ ان شاء الله مب بخير ( نذلة لاتهمكم )
كلكم في مرحلة وفترة ما بغيتو شي ونشبتو بأنفسكم قبل الكم انكم تبونه سواء كان روحة أو سيارة او سفرة .. كلنا البنات والاولاد ..
تجيك حالة يأس وتردد ياربي وشلون اقولهم مسج ولا فيس تو فيس .. ياربي اني مااعرف وشلون اطلب ..
لا وعاد ان صارت امك ولا أبوك من النوع اللي يحب التفصيل والتدقيق .. عاد يالله خذلك .. ليه ووشو له وحركات مالها داعي واسراف وكلامن مايسر ..
اجل تجيييين ماغطة يماه ممكن اروح بيت صديقتي ولا اطلع معها ؟ ترد امك : نعم وليه ان شاء الله .. روحي لبنات خالتك الله يكثرهم .. وبعدين وشو له تروحين أصلن ..
بني ماتنعطون وجه .. ولايكفيكم شوفة بعض بالجامعةوالمدرسة اقول اربضي بس
!
تجي لأبوك تبوس في راسه تبووووويس ويعنني المحترم ومن تقعد وانت تذكر الله ويبا تامر بشي وسم طال عمرك .. بعد الترزز والرسمية .. يبا الله يخليك ويطول بعمرك ياليت لو تجي معي في معرض سيارات قريب من البيت ..
: ماشاء الله أجل افتحوه ..
: ايييه ايييه ( وانت تقول الحمدلله فيه أمل )
: ماشاء الله الله يخليه لهم ويربحهم وانت وانا ابوك انقلع صل و رح جب لأمك اغراض ازين لك ..
: يبا بس السيارة اللي بببالي فيه ..
: خلها ببالك ازين مهب لازم تظهر
: مشكور يجي منك أكثر
..
تعددت طرق اخبار الأم والأبو بالمطلوب بس في كل مرة يتشابه الرد من قبلهم .. وكلها طبعا ردود تجيب المر ولاتمت بالفرحة بأي صلة .. لدرجة بعض الأيام ودك تقول (
بأعرس عشان اتحرر ) > احذفو هالكلمة وكأنكم ماقريتوها
!
طبعا من طرق البنات الغبية ي اخبار الأم بالمطلوب انها تمسك لها ورقة وتكتب فيها امي الغالية اود اخبارك برغبتي الشديدة في الذهاب مع رفيقتي منيرة الى برجر بوتيك لو سمحتي يعني لاتقولين لا ..
بكل بساطة ترسل لها الأم لا ولوى ان شاء الله .. > كاتبته في الورقة طبعا
ترسل البنت : ليه لا يعني ماتبين بنتك تنبسط ؟
الأم : الا ابيها تنبسط بجلستها مع امها في البيت وروحتها لبنات خالتها > وش هالبنات خالات ..
؟
البنت : ياكلون تبن لاعادهم الله من بنات خاالات هونت معدنيب احبهم الله ياخذهم مير ماخرب روحاتي الا هم
..
الأم : بسلامتك المهم بنكشي لجدتس العصر البسي ..
البنت : منيب طالعه هالأسبوع كله ..
( بعد دقيقتين تطلع الأم من الغرفة و تلقى بنتها سابقتها بالعباية عند الباب وكانه لم يحدث شيء بينهم على الورق
)
مرة حمامي الله يكرمكم جاه تشنج مدري زهايمر المهم انه جاه بلا .. وعيا يزين الله يكرمكم .. طبعا من اشوف ابوي وانا اقول يبا الحمام
على الغدا على العشاء المغرب الظهر .. مع القهوة واثناء احتساء الشاي > برا يااحتساء انتي ..
المهم واني ماشفت من ابوي اي استجابة مدري انا ماطلبت زين ولا مااصريت المهم وارسلت مسج
مافي كلمة فيها رجاء الا حطيتها ولا كلمة تجيب الصياح الا دخلتها عطيكم الزبدة من كلامي :
( يبا ايرضيك اني الآن ذاهبة لجدتي وكلي شوق لحمامهم المصون لان ماعندي حمام يخدمني )
> لا حظو انتم بس اني نسيت كل حمامات البيت ووقفت على حمامي بس ..
قمت بكرة الصبح لقيت السباك جوا الحمام > اموت على الخدمات أنا .. يالله انني اغرق
وحدة من صديقاتي ارسلت لهم ورقة تحت الباب تحمل طلب شكله خايس مثلها لان امها وبكل بساطة جتها بالغرفه وبيدها الورقة مشقووقة > قوية الأم ..
من اهم الاشياء والنقاط في اوراق الطلبات أو االأوامر اللي تلقى على الوالدين .. انك تحطهم قدام خيارين لاثالث لهما ياام انك توافق او توافق .. أجل قبل خمس سنين كنت ابي لاب توب
ارسلت ورقة طابعتها لوسمحتو واهم شي الكلام بلون تفاحي .. .. وآخرتها حاطة ضحع قرارك هنا .. وحاطة خيارين أوافق .. والثانية لا أرفض
< الله يصبر اهلي على مابلاهم ..
موضوعي هنا مايتكلم عن الطلبات وبس يتكلم عن اي شي ينكتب بورقة اي شي ينرسل ويوصل باوراق بدون كلام سواء طلب أو امر او عقاب أو خبر ..
من اهم الأمثلة على ذلك الاوراق اللي تتعلق بمعلاق حديد على دربزين الدرج عشان اللي يقوم يشوفها من أمي و أبوي او اي فرد في الاسرة ..
تدرون ان الاوراق يمكن تصير وسيلة للموافقة وعدم المشاحنة والبغضاء أكثر من الكلام والحديث .. يعني بتعلم ولدك انه اليوم مافي طلعة وبتنطق بالبيت ..
بدال ماتتلاسنون انت وياه قله بـ مسج ولا ورقه انت في الصالة وهو في الملحق والمرسال بزرانكم اكيد ..
حتى بالفصل او قاعة الدراسة تلقون الأوراق تصير فكاهية وتؤدي الغرض اكثر من الكلام وتلقين نفسك ماتمسكين نفسك عن الضحكة أبد .. خصوصا لا صار حش استغفر الله ولا سؤال بايخ !
لااا مرة جنبنا سورية أول مرة نشوفها انا ورفيقتي ومن الصبح نراقبها تقول اني سعودية ومدري وش
المهم وترسل لي صديقتي : تهقين اكواعها بيض ؟
< قسم ذا الوقت ضححكت ضححححك
الحين وش دخل وش جاب لجاب ؟
أخيرا هالموضوع اهداء الى كل من اقلقته برسايلي ..
المهم شاركونا طرائفكم وعاهاتكم المستديمة ابد الآبدين .. وكل عام و طلباتنا اكثر
وان الحمدلله رب العالمين وسبحانك الله وبحمدك اشهد ان لا اله الا انت اشتغفرك واتوب اليك