من بــلآد سيـــــــــلان .. இலங்கை ..!!\= ▌ موضوع مُشارك▌

[سيميــآء \=]

<< خشة وحدة تلهث .. توه ماشية 350 عشان تلحق هه..!
|,இலங்கை

سلامون عليكم .. مسائكم مغفرة ..!
تقريري عن بلاد سيلان (سري لانكا ).. .. وقبل ست شهور ضبط نزلت موضوع عن رحلتي بهالقسم ! ..
بس لعيون ريداوية حبيت اشارك بهالمسابقة .. واخترت دولة سري لانكا لان المعلومات جاهزة بعض الشئ اكثر من غيره ..< تبي تغش من موضوعها الاول ..!
وبحكم فضاوتي بهالعطلة قلت اوسع صدري عليه.. يعني هالموضوع السواليف تغلب على المعلومات .. < تسني اشوف يد سلفر تآشر للاسترآحة ..!
لا نمزح .. بنسولف <به به الهمق + ونعطي معلومات وافية ( بالعنابي ) < ماله داعي نخقل يعني !..

والموضوع يحتوي على اكثر من 80 صورة .. يعني اذا مشغولين ماودنا نقطعكم فافتحوا الموضوع واركنوه على جنب لين يكمّل تحميل ..! واللي فاضي اقوى شي يقوم يزين له استكانة شاي ولا يتمشى ببيتهم بدال مايحتري !!

كم صورة ع السريع قبل ماندخل بالغويط < مسوية فيها اغراء ..!..

اكثر شيين استغربتهن بهالدولة .. نص الشعب يمشي حآفي .. ونص طلابهم طالعين رحلة ..!<شسالفة !
يوم سألنا السواق .. عن المشي بدون جزمة .. ماعطانا اجابة وقال عادي وش فيها اذا الواحد مشى حافي !!
ايه عادي دارين ..بس عاد بالشارع وعلى السفلت مايسويه الا المهابيل يارجل ..!
والطلاب اللي مانروح لمكان الا نلقى مدرسة طالعين رحلة ..هذا غير اللي بالشوارع يتمشون ..تقولون فاتحين المدرسة للهواء والشمس..!
برضوا سألنا السواق قال يومهم طويل بالمدرسة .. من الصبح الى العصر تقريبا .. فيخلون نص اليوم دراسة والنص الثاني رحلة ..!!<ياعيني ع هيك ترفية ..
انتهى ....<الاستغراب اللي انتهى مهوب التقرير يعني لااحد يرد الله يقويكم ..!<خخ يابرده ..!

[سيميــآء \=]

|,இலங்கை

العاصمة : كولمبو
اللغة: السنهالية , التاميلية .. ولغة السياح الانجليزية ..!
المساحة: 65,610 كم2
السكان : 22,238.000
العملة : روبية سري لانكية
100 روبية = 1 دولار امريكي
30 روبية = 1 ريال سعودي
المنطقة الزمنية :

.ـ +6 عن توقيت قرينتش .. +3 عن توقيت مكة المكرمة

|,இலங்கை

بالبدآية ..

تقع جزيرة سري لانكا شمال المحيط الهندي إلى الجنوب.. من شبه القارة الهندية.. حيث يفصل بينها وبين الهند خليج مانار ، وإلى الجنوب الشرقي من خليج البنغال ، وتبعد أفقياً عن مدينة الرياض حوالي 4030 كم تقريباً... وتشبه الجزيرة في شكلها ثمرة الكمثرى ، وتتكون من غابات استوائية وساحلية وشبه استوائية تغطي معظم أراضي الجزيرة.
تشتهر الجزيرة بإنتاج وتصدير الشاي والبن والمطاط وجوز الهند، وسريلانكا تنتقل بشكل تدريجي إلى الاقتصاد الصناعي الحديث ويتمتع سكانها بأعلى دخل للفرد في جنوب اسيا .. كما تشتهر سريلانكا بالجمال الطبيعي من المتمثل في الغابات الاستوائية والشواطئ والمناظر الطبيعية، فضلا عن التراث الثقافي الثري، ما جعلها مقصد سياحى عالمي شهير...

خريطتهآآ ..!

هنـــآ ..

المدن اللي زرتهآ...!
العاصمة والجو شبه حآر ,, كولومبو:
ثاني مدينة من حيث المساحة وعدد السكان بعد كولومبو وجوها متوسط,, كاندي:
مدينة جبلية باردة بها مزارع ومصانع الشاي,, نوراليا:
مدينة ساحليه جميلة جدآ الجو رطب ,, بنتوتا:

الديانة..
السنهالييين وهم مجموعة عريقة اصله من سري لانكا معظمهم بوذيين وديانات اجدادهم القديمة ..
البوذية يعتنقها معظم سكان سري لانكا ومع مجموعة من اعراق مثل التايلانديون ..
الهندوسية وهم اقلية في سري لانكا عددهم 650 هندوسي وهم من التاميل ..
الاسلام وهم اقلية ايضا واقل من الهندوس واكثرهم ماليزيون وهنود وعرب واكرآد ..
المسيحية وهم النسبة الاقل في سري لانكا بي كل الديانات واكثرهم من اجناس اوربية ..
وديانات اخرى ,,!

[سيميــآء \=]

|,இலங்கை

رحلتنا كانت ..!ـ
الانطلاق من القصيم للرياض ..
ومن الرياض للشارقة بالخطوط السعودية ساعتين الا ربع ..
ومن الشارقة لمطار كولمبو بالخطوط العربية الاماراتية اربع ساعات ..!
والمطار مب بكولومبو بالضبط بين كولومبو ومدينه ساحلية اسمهآ نيقمبو..

تخطيط الرحلة كان ..!
نيقمبو = ليلة واحدة
كاندي = 3 ليال
نوراليا = 4 ليال
بنتوته =4 ليال
كولمبو = ليلة واحدة
المجموع= 13 يوم

*وصلنآ للمطآر مع شروق الشمس .. بسم الله اول مادخلت لقيت أمه صافين بكراسي يمكن 15 في 6 ..< عدد لكراسي يعني / .. و خامين شناطهم وبهم نوم .. وكلهم سمراان .. احسبنا غلطين وجينا للسودان ..اشكالهم تجيب الشؤم .. قلت لاهلي مايمدينا نرجع ..!
بدينا نمشي نبي مكتب سياحي .. وكل من شافنا سيدآ.. السلامو عليكم انا موسلم الهمدو لله < بشر امك ياشيخ ..!
لقينا شويب كافن خيره وشره وقاعد يمكتبه .. ومع الخلق به نوم .. دخل ابوي عليه وتفاهم معه .. ونادان اعطيه لسته الفنادق اللي نبي .. عطيته
واتفقنا معه على 2400 دولار لمدة 13 يوم للسكن _ 5 نجوم غرفتين مع دورتين مياه _ مع افطار صباحي والسائق معنا 24 ساعة السيارة فآن ..
والمكتب وقضينا منه .. ..
جآ السواق المصون وركبنا ودعسة بنزين على نيقمبو ..

وصلنا نيقمبو وسكنّابـفندق (بلو بيتش هوتل) مدينة كئيبة الى اقصى الحدود وتجيب النوم ..صكيناه نومه الى العصر يوم قمنا نزلنا نتغدآ .. دخل الليل قلنا نطلع نشوف الديرة رجليه يعني نطلق رجليننا.. واثره ميب لم قلم تجيب المر ظلما الشوارع وكله شلل سرابيت مسوين فيها خفيفين دم .. آربيانو هلوو .. السلامو أليكم .. ويكهكهون ..! رجعنا وقلنا هالديرة مايصلح له الطلعة بالليل ..!< الى الحين متشآئمة وماطلعت كاميرته ..وتحضرم انا وش مطلعني من بريدة .. لو اني قاعدة عند جدتي كان ابرك ..!

|,இலங்கை
يوم صار من بكرى شدينا الرحال لــكاندي..!
هي مدينة في وسط سريلانكا. وهي عاصمة المحافظة الوسطى لسريلانكا ومنطقة كاندي... يعتبر وادي كاندي منطقة زراعية استوائية، يزرع فيها الشاي. تأسست كاندي في القرن الرابع عشر. بلغ عدد سكانها 110049 في عام2001. وهي من أكثر المناطق في سريلانكا ذات مناظر خلابة، وهي من مواقع التراث العالمي...

قبل مانوصل له بالطريق يعني, فيه عرض للفيله ..ارضآعه , وتسبيحه_( Pinnewala Elephant Orphanage_من الساعة 1الى 3 العصروقفنا عنده وحضرنآه حلو وممتع الواحد يطلع كاميرته وهو هاجن خشته .. وفيه محلات للمصنوعات الجلدية بذيك المنطقة..!!
هذي صوره //

بعده كملنا الطريق لكاندي

وصلناه يووو على كاندي نشيطة وكله حركة الواحد يحس انه حي .. موب نيقمبو هالميته هي واهله وع .. < هدي هدي طيب ../ المهم سكنّآ بفندق (محولّي ريتش هوتل_Mahaweli Reach, Kandy) .. فندق حلو ومتكتك ..
هذي صور من الفندق والغرفة//

هذا مطل الغرفة .. اهم شي القطار لاجا قمنا نتصابخ بالبلكونة عشان نشوفه ..!

رحنا بنفس اليوم لمصنع الاحجار الكريمة .. تقل ماله داعي هالروحة ..حسيت انه رحلة مدرسية وبنسوي عليه بحث..!
هذي صورة للمصنع

طلعنا من المصنع ورحنا (الحديقة الكبرى_Royal Botanical Garden)وهي من اكبر الحدائق في العالم ..تمشينآ فيها 4 ساعات ولا انتصفنآ حتى !!حللللوة بجد وكبيرة وكل مانتخيل من الاشجار لقينآه ..! يوم تعبنا جآبوا قهوتهم وتقهووا رغم معارضتي الشديدة على هالفعل بحكم ان اهل البلد وذفيين وماسووه .. نجي حنا يالسياح الاجانب نسويه.. بس من احتسي عليه ياحظي..! اللي يقول صكن راسي نبي تقهوا ماعلينا منهم .. واللي يقول ميخالف عشانتس بس قهوة ماحنب منزلين الفرشة < ريضين بعد ..!

هذي صور مدرسة مسوين رحلة .. <بدينا

8
ركزوا ودققوا ع هالصورة الله يخليكم اخذت من وقتي الكثير الحقيقة .. ساعة اصفهم هالشياطين .. وماهجدوا الا يوم قلتلهم ترى الصورة تبي تطلع بالتلفزيون ..!

8
هذولا مدرسة مسلمة مسوين رحلة ..!

من بكرى رحنا نتمشى بذا الديرة .. زي ماقلت مدينة نشيطة وماتتوقف عن الحركة وعلى فكرة هي تحت العاصمة على طول ..نزلنا السواق ودكيناه رجليه تمشي بالشوارع والاسواق كم ساعة ..!

وبعده رحنا حضرنآ(العرض الفلكوري _traditional cultural dance)يبدأ الساعة 6 وينتهي 8 مسآء.. طقطقة واستعراض وهيصة .. حلو ..!

بآخر ليلة كنّآ بكاندي كانوا يجهزون الفندق لزواج لليلة بكرى..وحنا بنمشي بكرى الصباح .. < أي يالقهر .. طيب قدموا يوم وش يبي يضر يعني !!
عاد صورت التجهيزات ..!

ثلاث ايام بكاندي وقضينا منه ....

[سيميــآء \=]

|,இலங்கை
وبعده مشينآ لنوراليا ..

والطريق من كاندي لنوراليا كل السالفة شلالات .. بالبداية نختب لاشفنا شلال .. واوقف ياسواق نبي نصور ويالله انزلوا ويآلله من فضلك ومدري وشو .. واخر شي طلعن مع اذاننا قلنا له لاتاقف الا عند الفندق طقت تسبدنآ من برابيسكم !..<
هذي صور من الشلالات ..

وحنآ بالطريق وقفنا عندمصنع شاي .. وفيه محل على جنب يبيع شاي بآنواعة .. اذكراخذت منه هدايا للصبآيآ .., وفيه
هذي بعض الصور للمصنع والمعرض //

8 اللي حاط ايده على خصرة ذا السواق .. والله من الدبرة والحرارة بهالراس بعد ..!

8 ام بني شيطانية .. بالبداية نصور ونضحك ووش حليلنا يوم قضينا بدت تشحذ ..قلت مامعي انا مثلتس فقيرة .. قال اجل عطين حق الصورة ..!< تمسكي اقول ..مصورة مع بينولوبي وانا مادريت !!
وصلنا لـنورآليا

وهي منطقة جبليه مآطرة طوال العآم وبآآردة تصل درجة الحرارة فيها تحت الصفر بدرجتيين..

اييه يانوراليا ماذا عساني قائلة عنهآ ....!!
سكنا بفندق(جرآند هوتل_ Grand Hotel) <
هذا الفندق مبني على الطراز الاوربي قديم ومافيه مصعد ,, سووا له توسعه مبنى حديث ومتطور,,فصار الفندق جزءين ,قديم و جديد ,
انتبهو لاتغلطون و تاخذون من القديم.. لان محسوبتكم نكبت اهله وسكنتهم بالقديم .. غلطت وانا املّي الفنادق لحق المكتب السيآحي .. نمنا ليلة بالقديم ومن بكرى فضوا لنا غرفة بالجديد .. ابوي نشب بحلوقهم ..!
صور من الغرفة بالجزء الجديد طبعآوالفندق..//

زرنآ(حديقة الزهور_ Hakgala Botanical Gardens)حديقة كلها زهوووور..
موقعه نازل شوي وميب باردة مرة .. عاد حنا جايبين حيلنا و متدحملين بالثياب من الحماس وبلشنا من هوبه نتفصخ خخ..!
هذي صور للحديقة//





احدىمحلات بيع الشايفي نوراليآ

8
على طاري .. يوم جينا ننزل كان الجو مطر فطلعوا لنا حقين المحل وعطونا شمسيات.. يعني بالله ذا وقت الشمسية اللي تزن عشرة كيلو لو امسكه بكل يديني ماقويته ..مع الشنطة يؤ يؤ.. مع العباة اللي ترفع عن المطر وحآآله.. فوق هذا المسافة ولا سته متر يعني ماتستاهلهالزعبلة ! .. فمشينا ولا اخذنا منهم شي ..! ولا الشنبات اخذوا شمسية .. عاد السواق مسك اخوي ..قال ورا حريمكم عادي يمشن تحت المطر ..قال اخوي هن تسذا حريمنا قويآآت ..!

بعده رحنا لـ (حديقة الحليب)<على كلام السوآق..بس يوم رحنا له كأنه الصافي كذا, يعني شركة ألبان.. وبااردة جدا ماله داعي الروحة له بس لعب بنا البرد ورجعنا ..

8 ماصورت الاهالطابور ..تذكرت بقرة خوالي الله يرحمه !!
طلعنا من حديقة الحليب ورحنا للفندق .. وحنا بالطريق وقف السواق يبي ستروبري من ذا المحل ..!

اربع ايام بنوراليا .. باقي الايام نطلع نتمشى بالسيارة ونرجع..!

[سيميــآء \=]

|,இலங்கை

وبعده حركنآ لــ بنتوته..
مدينة ساحلية .. باردة الى حد مآ ..!
وحنّآ بالطريق له مرينا منقرى فقيرة , ونآس فالين ام امه تسبح بالشلال ويبربسون بهالماء ,وناس تطبخ بالشارع عاد مدري ذي الكشتة عندهم ولا من الفقر .. وأثار تسونآمي, وقبوور ..
صور للي يسبحون بالشلال _ وعائلة تطبخ بالشآرع//

صورةقبر احدى الضحآيآ..ولاحظواالجدآر اللي ورا القبر مرسوم عليه اشكآل تحكي الموقف ,لتخليد الذكرى الحزينة..//

زرنا (الاثآر الهولندية)قريبة من بنتوتة ..هذي صور له//

بعده اتجهنا للفندق(فندق تاج _ (Taj Exotica<هذا الفندق بحد ذآته سياحه كبير جدا ويطل على شاطئ,,وفيه مجموعة محلات بالبهو ومطاعم.. وفيه ملعب كرة طائرة وسلة ومسبح.. هذي صور للفندق والغرفة//

هذا الشاطئ اللي عليه الفندق ..


اربع ايام ببنتوته .. كل الايام كانت بالفندق ..!

|,இலங்கை

واخيرا رحنآ للعاصمة كولمبو ..
هي أكبر مدنسريلانكا، وعاصمتها الاقتصادية. تقع في الساحل الجنوبي الغربي، محاذيةلكوتي. وقد ذكرها الرحالابن بطوطةفيالقرن الرابع عشر... تتميز بالتسوق ومايميز هذا التسوق وجود جميع الماركات العالمية وبأسعار جدا رخيصه بسبب وجود مصانع هذه الماركات في كولومبو..
صورة لمجسم بالعاصمة ..

سكنّا بفندق(جاليداري هوتل_ The Galadari Hotel)الفندق كان ازعآج والاغآني صوتهآ عآلي وكله عرب فسقآنه ماأنصحكم فيه..
<من حومت التسبد مااصورت شي احس كاني مكتومة وانآ فيه والارض تبي تخسف بنآ..

8 ماصورت الا هالصورة .. جاز لي ابو لحية وطاقية ..!

بنفس اليوم زرنآ (حديقة حيوان تبعد عن كولومبو 11كم_ Zoological Garden - Dehiwela – Colombo)
هذي صور من الحديقة//

8هذي الوزة .. جنبي وحدة مسكة قلم وورقة وترسم ..!

8هذي صورة اللي ترسم .. وترسم من دون ماتناظر الكراسة ..عينه على الوزة ..! وبثواني قضت ماشاء الله ..!
<طابتن بخشته من النزة .. انا ربع ساعة وعساي ارسم لو كوخ هايدي ..!

8 الهجججة ..!

8هذا اذا قالوا طبلة ..!

8اناقة يااي ..!

8رابص هالليبتون ..!

8سيقان سلوى ..!!

هذولا طلاب روضة طالعين رحلة بحديقة الحيوان .. صفيتهم وصورتهم ..< استاثمت بعيالهم على كثر ماتصف وتصور ,,!!

فيهاسواق بكولومبو محلات لبيع الملابس العالمية المصنعة في سري لانكا
مثل(HOUSE OF FASHIONS اوODEL)وانا شخصيا اعجبن الثاني (اودل) اكثر!! بضاعته كأنه زارا وهالطقة وبنفس الوقت رخيييص ..!..

وكذا تصير قضت الثلاث طعش يوم .. رحنا نرتاح كم ساعة وبعده اتجهنا للمطار ..

هذا ماعندي اعزائي المشاهدين ..
أي استفسار او سؤال انا برسم الخدمة ..< .. شقصدك المراهق الكسلان مثلا..!

[سيميــآء \=]

|,இலங்கை

مقتطفآت من الرحلة ..!

هذا حيوان اسمه الترسير .. عندهم متواجد كثير .. ايي يهبل ياناس!!

تافلتن العافية ياعوينتي .. اقوله ارفعي وجهك خل اصور .. والله ولا كآني مخلوقة ..!

ولا هذي ماكسحتن ورفعت راسه .. بس ولو طاقتن تسبدة . احس تقول موب ذا وقتس !!

هذا معبد لبوذآ .. وقف عنده السواق له مرة <تحسبه ملاهي ../ ونزل يمارس طقوسه له شوي .. وركب يكلمنا عن دينه ..!
يوم قضى قالت امي تسذا العلم اجل دوكم عطوه ذولي واثره محرثة لكتب دعوية عندنا قدييييمه لشغالة نبيه تسلم بس عيت الله يخسه .. <الدعوا غصب .. /!!

هذا شايب وقفنا بالطريق .. يبي يبيع علينا ورد .. والورد بكل مكان ناخذ من الارض اذا بغينا < كسحة ..!
عاد يوم يئس منا تحولت مهنته للشحاذة .. وبدا يمدح السعودية وقال ان بنتي مشتغلة بالدمام وتعرف توين كبسة ومدري وش بعد ..يلله عطون عاد قرووش ..!

وهذي جردتهم .. اعجبتنا خضرته ووقفنا تشتري منه ..!



هذي اخر صورة صورته ..الذاكرة خلصت اخر يوم ..فقفلت الكام بالهفيس .. واشغلتن عشر مرات اعيد الصورة ..
.. رحت وهي تقول عيديه .. ضحيكة همن لاصورت قالت لا ميب زينة عيديه اصبري لمين اقضي ضاحكة ..! اهلي يحترونن حلمتن بتس اولااه !!

وبس ..\~

.. بالحسن والجمال والحب الملتهب ..!
كانت هنا سيميــآء \= معكم يومآ..
حرر في 23\8\2010 م .. – 11:41 م

[لبى سوريااا]

سؤال : كم كلفة الرحلة وكم مدتها ..؟

[سلفـsilverـر]

حي الله سيميآء ..

وإن كان المتصفح طرح من قبل الا انه فيه شي من التجديد والتعليقات المرحهـ ,,,

التقرير بالجملة ممتاز .. الا اني ارى بعض الصور ليس بدرجة وضوح البعض الآخر ..
التنقلات والتنوع بالمدن .. اضافة لمعلوماتك كلها اضفت الروعة والجمآآآل ..

لي تعليق بسيط



الحين هذي ايادي وحدهـ ترسم او وآآآحد !!

[الشجاع الصامت]

رحلة رآآآآآئعة

فيه سؤال محيرني الفان اللي تجولون به الدنيا هو هذا

[شـموخ انـسـآنـہ]

-
آهنن سيميـآء \=
رحله عن جد حلوووه وترتيب وروحك المرحه تضيف للموضوع جمالاً ،،،
لآحظتي أنتي مثل مالحظت ع طلاب مدارسهم كل النهار دوران > مالت
ماحضرتوا زواج فاتس حضرنا زواج لهم ههههههههههههه قسسم وناسه زواجاتهم .

[ămōяẻ]

روعة الروائع
تقرير مميز جدا
وتعليقاتك لحالها روعة

وفالك المليوون

[ريداويهـ]

**

أهلا بـ السيمياء وأهلا بالسيلان في منتدانا ’,.
<< من كثر ماصوّرتي مبزرتهم حسّيتهم صاروا منّا

اقتباس: فافتحوا الموضوع واركنوه على جنب لين يكمّل تحميل ..!

دقّه قديمة ذي يالحبيبة ’,.

الإغراءات التي على السريع كفتنا عن (الغويط) ’,.
فهي بحقّ صور أليمة حدّ الثماله ’,.

أمّا بالنسبة لكل التقرير فهو بلا شكّ مميّز ورائع ومتكامل ’,.
وماشاء الله لم تنسيء شيء من تيك الرحلة ’,.
وكتبتي كل شيء بحذافيرة ’,.
بالإضافة إلى ظرافتك دائما تعطي مواضيعك نكهة ثانية ’,.
يعطيك العافيه أخيّتي ’,.
وبالتوفيق لك ’,.

لكن لاحظت أن نسبة العنّابي للأزرق قليلة ’,.
وش رايك له داعي ( الخقل ) ’,.........

[>ريانه<]

هههههههههه تخيلت شكلك وانتي تصففين المبزره

مايدرون وين الله حاطهم ههههههههه

تقرير رائع ماشاءالله

يعطيك الف عافيه

[ابونورة]

سيرلانكـا بـلد استطاع أن يفرض نفسـه سياحيـا
وهذا التقرير الرائـع والممتـع يدعونا إلى زيارة هـذا البـلد
إلا أن كان لك رأي أخـر أختي سيمياء !
يعني هـل تنصحيننا بزيارتهـا ؟
وما الذي اعجبـك فيها أكثر ؟ وما الذي لم يعجبك ؟

تحيتي وتقديري لك أختي سيمياء على هذا التقرير الأكثر من رائـع ،،

[سيميــآء \=]

لبى سوريا ..
الرحلة كلفت بحدود الخمس وعشرين الف .. والمدة 13 يوم !!
حياك الله ..

سلفر ..
شكرا لك .. ووضوح الصور بلاهن من زين الكاميرا ياسعدي ..!
لاا ذي يد وحدة بس هن يديهن يبيلهن حصد يابعدي ..!
حياك الله ..

الشجاع الصامت ..
شكرا لك .. لا وش دعوا بساسة !!
هذا تك تك .. من وسائل المواصلات عندهم بحكم بساطة الحالة للسكان..!
والفان ماعندي له صورة ..حياك الله !!*

شموخ انسانه ..
الله يخليك .. ايه بغيت اتهور واضيع جوازي عشان اقعد عندهم يختي فلة !!
هههههههه والله !! انا مرة شفت بالتلفزيون زواج لهم .. طقوسهم غريبة عاد ودي اشوفه عالطبيعة.. بس مآش مازبطت !! حياك الله ..