مشكلتي مع والدتي... كيف أرضيها..؟

السلام عليكم
انا بنت عمري 15 سنه
في ثالث متوسط..
اعيش مع امي وابوي ..
واختي واخوي
عائله بسيطه ..
ومابينا خلافات
بس انا بيني وبين كل افراد عائلتي مشاكل
مع امي خلافات تااافه انا اعترف والله العظيم موب انا سبب المشاكل
بس ان خالفتها بالرأي تصير مشكله
والله اني ادور رضاها بشتى السبل
وقلت لازم اصارحها
قلت لها يمه وش اللي مايعجبك فيني
قالت كل شيء
قلت لها طيب انا ممكن اقولك شي قالت اخلصي
قلت انا ابيك تتغاظين عن بعض اخطائي بس البسيطه منها
وماتشتميني نهائيا عشان امي تشتم كثير الله يهديها
وانا اتحسس من الشتيمه مرة يعني امي تذب عل كلمه
اروح اصيح بغرفتي عشان ذا الكلمه
قالت تحاكميني انتي كيفي انا امك واسوي فيك اللي ابي
رحت من عندها وانا اسمع انها تدعي علي
ماتدري ان دعاء الام مستجاب
وربي امي ماترحمني دعت علي مرة ان يدخلني جني
تخيل يادكتور
والله انا مااحب عدوي يكرهني
وشولون امي
ابوي مابينا مشاكل عشاني اصلا مااقدر اتكلم معه
وهذي مشكلتي الوحيده معه
جربت اني اتكلم معه يصرفني
جربت اعطيه هدايا اذا ترقى وبالعيد
يقعد يستهزي فيني
اختي عمرها 13 ام وجهين بمعنى الكلمه
تخليني اشكي لهاا وتروح تنشر كلامي
جربت معها كل الوسائل الطيب والهواش
واخوي عمره9 سنين مدلع عشانه الولد واخر العنقود
هو اللي يأمر علي وعلى اختي
يعني مسيطر على كل شيء
وطلبه ماينفرض نهائيا
يعني يطقني ويشتمني ومااقدر اسوي له شي نهائيا
وماعرفت وش اسوي معه
ادري طولت عليك يادكتور بس والله اني محتاجه نصيحتك والله
الله يجزاك كل خير على نصائحك وارشادك
والسلام عليكم ورحمة الله وبركاته