كل واحد يدخل يقول الدعاوي اللي يسمعها من الاهل؟؟

[بنت منيره]

--------------------------------------------------------------------------------
موضوعي اليوم خفيف عن الدعاوي الي تسمعها من اهلك
سواء الدعووه صادره من امك او جدتك كله واااحد 000
الكل يعرف انها متوارثه بين الاجيال ابا عن جد

باختصااار راااح ادخل بالموضوع على طول 000
بالنسبه لجدتي دعوتها تجي على حسب نوع المشكله اذا خفيفه او ثقيله
والدعوه تجي مناسبه لاخر فعل سويته >> ماشاء الله هذا يسمى نوع من البلاغه والفصاحه

لكن الحمد الله بعد ماكبرت صرت نادرا ما اسمع دعووه منهااا
حتى صارحتها مرره قلت من كثر مااااااتدعين عليناااا انا واخواني
استغرب كيف الى الان ماااافطسناااا !!!


...مثلاً:

اذا ابغى اروح مشوار وهي مارضت قالت:
وين بتروحين ريح ام حمد <<< اموت واعرف منهي ام حمد
=================

واذا بغى اخوي يسبح وهي برضوا مارضت لانها متاخره على مشوار

قالت:

سبحة لولوه ان شاء الله <<< الظاهر لولوه سبحت وغرقت

=================

واذا كنت فوق وهي تحت وتبيني قالت:

حولي حالت رجليتس .. >> عادي صار عندي مناعه ما اخاااف تعودت
===================

واذا بغتني اشيل شي ودرت انه مالي خلق
قالت:
شيليه شالتس الرخ...

واذا بغتني احطه قالت:
حطيه حطاط ان شاء الله...

===================

واذا بغت تصحيني من النوم وماصحيت قالت :
قومي قامت عصبتس حنت ركبتس

===================

واذا بغتني ارقد قالت:

ارقدي جعلتس السهاد <<< قمة التناقض !!!وشلون ارقد وفيني ارق .

====================
واتمنى الصراحه ..
الموضوع ملطوش للفضائح هع

[صريح بريده]

نم نامت عليك الريح هذي دايم تقولها لي امي يوم انا بزر بس يوم كبرت صارت تستحي مني ههههههه

[ツ • بسْـطـَويِـسـْي]

والله اغلب دعاوي امي الله يهديك والله يستر عليك ومن هالكلام.

وشكرا لتس.

[سيــده عبــده]

هههه
يامن الباحص << وشو الباحص مادري
يامن الي منب قايله <<شي هالدعوه
عساتس تطيرين ولا توقعين << وراه الخطوط الجويه
يامن الدقم << الي يدري وشو الدقم يعلمن
يامن النقاز
وابتلي ومطولك ياليل
شوكرن لتس

[amįЯЋ]

ههههههههههههههههههاااي ..

عساك بجفره...
وامي يوم هي صغيره كانت تقول لامه..الله يطهر بيتنا من عيالك..هع
يامن الماحي ..

شكريااات منورتي ..<<شفتي بديت ادلعك..
يسلمووو...

[موسى العناز]

[align=center]نومة عنقّا ماسمعتها

شكل عنقا على هالنومه ههه

يسلمو يامتألقه[/align]

[ااالشماسي]

مازقك ولعنك وشين طبايعك من بد اخوك كره يابيلك سرخ....هذي الى الحين وابوي يقولها

[بنت عز وما تنهز]

ههههههههههههههههههه
لا انا امي تقولي
اذا ما قمت وتاخرت عليها
قومي قانت طحلتس والعقارب تبطحلتس

والا اذا ما نمت تقولي
جعلتس نومت جدي قولي امين

وفيه دعاوي غريبه تقولها هي وجدتي عجست احفضها

[≈ Śķőőŋ »]

لا والله امي وابوي دايم

يمال الصلاح الله يهديتس يمآال العرس

وهيك ياحبيلهم


يسلموووووو

[الزنون]

يا كثر ما سمعت من دعاوي

منها

اذا قلت يوه بنام >تقول نومت عنقا
يوه بروح>راحت روحك
او
يالله قم قامت طحولك
قطيعه تقطع بليسك


وفيه كثار بس لي عشر سنوات ما سمعتهن وانقطعن او عشاني ابعدت فترة عنهم

تحياتي لك

[فهد الرويلي]

انا الحمدلله

كل الدعووي حلووة

ياااجعلك في الجنه
اكثر شي

[ل د ع]

شكلنا أبنقرر أحسن دعاء لها جائزه خخخخخ

اقتباس:  المشاركة الأصلية كتبت بواسطة سيــده عبــده     عساتس تطيرين ولا توقعين << وراه الخطوط الجويه

هههههه

حلووووه ماشاء الله ياخطيرهـ

[بنت منيره]

اقتباس:  المشاركة الأصلية كتبت بواسطة صريح بريده     نم نامت عليك الريح هذي دايم تقولها لي امي يوم انا بزر بس يوم كبرت صارت تستحي مني ههههههه

اجل انت فرحان انك كبرت صارت تستحي منك ولا تدعي عليك هههههههههههههأ

منور

[ماجد544]

اهلي مايدعون

يدعون علي وانا وحيد امي وبوي