اللي عنده شغل يرعص رجوع ويروح ترى ما عندي شي بس أبخرط عليكم شوي
واللي ماعنده شغل
وراه ما عنده شغل ؟
ورى ما يصير عنده شغل ؟
وشوله قولوا لي ؟
أنتم ما تدرون إن اللي ما عنده شغل ويجلس تسذا فاضي
يمكن يتعرف على صديق سوء وإلا صديقة سوءة << يسمع بالمؤنث
يمكن وأنت هالحين جالس فاضي لا شغل ولا مشغله
ما تدري إلا يمرك صديقك فهد << حاقد على أي واحد أسمه فهد
المهم يمرك ويدق عليك بالجوال يعني أطلع عند الباب
همن تجي تبي تطلع وأمك تمسك ثوبك
وتقول لك أمك : لا .. لا .. لا يا بُني لا تخرج مع أصدقاء السوء
وأنت تقول لأمك : لا.. سوف أخرج .. ألآ تعلمين أن فهد معه جيب ربع ألفين وتسعة وجوال (( إن 95 ، N95 ))
أمك وهي متعلقتن بثوبك : أرجوك ياولدي لاتخرج << تكفون صيحوا معي
أنت تقول لأمك : أتركينن دعينن أخرج مع صديق عمري أيتها العجوز
مير تفلت أنت منها وتطلع وتركب مع صديقك فهد وأمك دمعته على خده
همن يروح بك فهد للمقاهي اللي بطريق إمليدا
وتخبرون أنتم أن هاك المنطقة قريبة من مدرج مطار بريدة
والطيارات إذا جن يوقعن يمرن من فوق المقاهي عشان يوقعن على المدرج
المهم وأنتم جالسين تشيشون وتناظرون التلفزيون ما تدرون إلا الطيارة
شاقتن أم الجدار حق المقهى وداخلتن عليكم
همن تدهمكم كلكم وتموت وأمك زعلة عليك
وأنتِ يالشيفة لا تتعرفين على صديقات السوء
ما تدرين يمكن من كثر المكالمات والسواليف اللي على الفاضي تنفجر الطبلة ما أدري الطار اللي بإذنتس
أو يمكن تخرب الأذن اللي بجنب الأذن الوسطى
وإلا يمكن يجيتس غرغرينة بأصبعتس السبابة حق يدتس اليسرى من كثر ما تدخلينه بخشمتس أثناء المكالمة لا منتس بغيتي تفكرين
قايل لكم اللي عنده شغل يتوكل على الله
المهم !!!
أدري أن بعضكم لا شاف أني وفيت بوعدي بالنسبه لوصف الأعضاء << تراني وفيت بوعدي يا ورده مديني
يمكن يستغرب ويقول وشلون صار لـ (( عبدالله )) ضمير وذمه
وأنا هالحين أحب أطمن الجميع وأقول لهم : ترى (( عبدالله )) تغير وصحا ضميره وصارت ذمته تمام التمام
بعضكم يمكن ما يصدق !!
لكن أنا أبعلمكم وش اللي غير (( صاحي و رايق ))
القصه بإختصار ؟؟
أني بهالفايت تعرفت على شخص أسمه (( صديق الملك )) عضو بمنتدى بريدة
شخص حبيب قوة ويباري الساس ولا يتعرض لأحد ولا يطلع من بيتهم إلا للضرورة << كثر منها بس
وأنا من يوم تعرفت عليه وأنا متغير .. خصوصآ بمسأله الذمة والضمير
الرجال مهذب مرة وتأثرت به وهالحين هو قدوتي
ياحليلة هـا (( الصديق )) ضميره حي وأنا أبقولكم موقف صار لي أنا واياه يوضح لكم ذمة الرجال !!
مرة مسافرين أنا واياه للبحرين رايحين نركب كفرات للدتسن حقته
وأول ما طلعنا من الرياض ونوقف عند محطه وناخذ أغراض
أثره أخذ حلاوة اللي بربع ريال وحطه بأثمه << عساه للسوسه
ويوم حاسب نسى يحسب حساب الحلاوة
المهم يوم مشينا يجي لنا تقريبآ ميتين وخمسين كيلو وهو يتذكر
قال : يا عبدالله أرجع للمحطه اللي تو شرينا منها أغراض !!
قلت : وراه ؟؟
و يجي يعلمن السالفه
قلت : أقول أعقل بس ترى راس ماله حلاوة بربع ريال
قال : حرام عليك وشلون أخذ أموال الناس هالحين
تلقى راعي المحل خسر وقفل المحل
قلت : الله وأكبر كل ذا بسبة حلاوة
قال : وقف وقف وقف
وأوقف على جال الخط وهو ينزل ويبدأ يدخل يده بأقصى حلقه ويَرجع اللي أكل (( الله يكرمكم )) لما بغت تطلع المعده
ويوم خلص لزّم علي إلا نرجع للمحطه
وأنا واياه شيل وحط وضرب وضريب مير عجزت عنه
آخر شي رجعنا ميتين وخمسين كيلو وعطى راعي البقاله ريال كامل
ربع عن الحلاوة وثلاثة أرباع تعويض
المهم أنه بعد هالموقف صحا ضميري وصرت أقتدي بـ (( صديق الملك ))
وصار مثلي الأعلى ومن حظكم أن صحوة الضمير جت بوقت وصفي لكم
حتى أني من قوة صحوة الضمير خفت أني أظلم حدا الأعضاء باللي راح تشوفونه
عزيزي القارئ .. بعدياً عن المصاله والبربسة والمطاريس وكثرة الحتسي
خلونا ندخل بموضوعنا
أنا اليوم جايب لكم من كل بستانن قحشة
فهلم معي عزيزي القارئ وأقربوا لي شويا نبربس سوياً في موضوع خفيف وعلى الطاير ...
وعلى إتفاقنا الزعل مرفوض والأخذ بالخاطر يكون خارج الخدمة
بسم الله نبدأ
(( 1 ))
(( فتاة نادرة .. رزه,,مرتزه ))
العجوزتان (( فتاة نادرة ووو رزه,,مرتزه )) تنقلان بسطتيهما إلى مفرق عروق الطرفية << أروح وطي مع الفصحى
نقلت العجوز البثرة (( فتاة نادرة )) وصديقتها السعلوة (( رزه,,مرتزه )) بسطتهن من شارع الصناعة (( قبة رشيد )) إلى المفرق الي يودي لعروق الطرفية
على بال أمهن يبي يستغلن موسم الكشتات والمخيمات
وسون تجديد للبضاعة
وحطن (( بقل )) بدال الشامبو الأحمر حق العجز
وكليجا بدال الميدليات اللي عليهن صور ماجد عبدالله وصالح النعيمة
وحطن معمول بدال الرشاد والحلب
بس إلى الآن والكمختين الآنف ذكرهن ماطلعن قيمة اللومزينات يروحن بأربعين ويجن بأربعين
وكل ربحهن اليومي ستين ريال
وهالمكسب أصلا من شايب بدوي خاقن مع البثرة (( فتاة نادرة ))
ويجي يشتري كل يوم عشان يكحل عيونه << من جد ماعنده ذوق
وهذا خلى الحكومة تشك بوضعهن !!
لأن ماعليهن سوق وخسرانات والمسافه بعيده ومع كذا مستمرات بالحضور يوميآ
والحكومة شاكتن وبقوووة إنهن يبيعن (( شروخ )) ويتسترن بالكليجا والبقل
وبعد أن تزايدت الشكوك وتزايد إطلاق الشروخ في المخيمات المجاورة للبسطة
قامت الحكومة بمداهمة بسطة المدعوتين
وبعد التفتيش وجدت السلطات الأمنية مجموعة كبيرة من الشروخ
(( 72 )) دستة صواريخ وخيشتين طرطعان أم ديتس و (( 84 )) دسته شروخ من نوع الخداعة و (( 66 )) دستة من نوع الفراشة
وأثناء المداهمة لاذت البثرة (( فتاة نادرة )) بالفرار جرياً على الاقدام << قايلكم أن رجلينه مخشبات بس ما تصدقونن
وقام عدد من أعضاء الشرطة بلحقها كعابي
لكن يوم طلعت للشارع العام مادروا إلا يوم جت ددسن زرقاء موديل أربع وثمانين وأعترضت طريق العساكر
وبسرعة البرق طمرت البثرة (( النادرة )) بحوض الددسن
ثم أنطلقت الددسن وأختفت عن الأنظار
وتبين بعد التحري أن راعي الددسن يدعى أبو مناحي << الشايب الي خاقن مع (( النادرة ))
وتم القبض على النسرة (( المرتزة )) وتم جدعها بسجن الطرفية إلى أن يتم القبض على (( النادرة ))
(( الناردة )) تحاول تغطية وجهها أثناء الهروب بحوض ددسن أبو مناحي
خوفآ من إرعاب المارة من الأطفال والأجانب بسبب تقاسيم وجهها كأنها لابسه قناع مايع من حرارة الشمس القارصة
أبو مناحي يوم يخق على (( الناردة )) كان مو بوعيه << ضاربها كويس خمره
يوم شرب البينة نادك وصحصح شاف أنه ماخذ مقلب (( بالنادرة ))
وعلى طول جرها من عند قناصيعه للمخفر القريب من عشته
وتم الحكم على البثره والسلعوه الآنف ذكرهم بـ (( 15 ))
وصارن بالسجن داشرات يبيعن كل شيء ممنوع من حبوب وحشيش
وأقل الاشياء اللي يسونها شرب الشيشه
ودامن ضايعات لا سكن ولا مأوي لهن إلا المقاهي
وكل يوم لهن مقهى ثاني .. يشربن شيشه ولا يحاسبن
وعلى هالمنوال ياحول .. والحين ضايعات ينامن بالشوارع وريحتهن مخيسه محتاجات كر من أول وجديد ما يعرفن التروش أبد
وأنتشرت سيرتهن على كل لسان
لحد ما حكم عليهم بالقصاص بحكم أنهن من المفسدات في الأرض
والآن ينتظرن قص رقبة كل وحدة منهن
والناس فرحانه بهذا الحكم العادل ... أنتهى !!
(( 2 ))
(( قصة صلاتي مع العضو الدلوع عطر الليل ))
من المعروف بأن الشخص يؤمر للصلاة بعمر سبع سنوات ويضرب عليها عند العاشرة !
عندما كان عمري (( 7 )) سنوات كنت سهرانن مع (( عطر الليل )) والذي كان يكبرني في العمر بسنتين
أردنا أن نصلي الفجر , فما كان منا إلا أن توضأنا أنا و (( عطر الليل ))
وعندما جئت أصلي به .. لأنه كان وقتها مهستر ويشرب تتن بغصون عنب
قال لي : أنا بصلي بك لأني أنا الكبير !
قلت له بدون نفس : يالله صل بي ياخي متى أصير أكبر منك ؟!
كبر تكبيرة الإحرام ثم سكت وسكت وسكت وسكت
إلى أن ألتفت عليه وقلت له : ما يصلح كذا ياخي .. لازم تقرأ صورةالفاتحة
شكلك ما تعرف تصلي ! خلني أصلي بك
, فما كان منه إلا أن رد علي وقال : إلا أعرف أصلي
وبعدها كبر مره ثانية تكبيرة الإحرام وقرأ سورة الفاتحة وبعدها سكت وسكت وسكت وسكت وسكت << طيب ما ودك تسكت انت !!
التفت عليه للمرة الثانية وقلت له : شكلك ما تعرف تصلي ؟؟
لازم تقرأ لحين ما تيسر من القران يعني صورة الإخلاص وإلا صورة الناس
رد علي وقالي : أييييه صح الحين تذكرت طيب طيب يالله بكبر الحين وبقراء الفاتحه و ما تيسر من القرآن << لا تخلون بزران يصلون لحالهم ثاني مره تكفون
كبر تكبيرة الإحرام للمره الثالثة ومع إن الصلاة كانت مجرد ركعتين إلا أننا جلسنا نصليها حوالي الساعة
كل شوي يغلط في شيء وأنا ألتفت عليه وأعلمه لأنه صار ما يعرف شيء غير تكبيرة الإحرام
ومع ذلك كان عنيد وما خلاني أصلي به عشان كذا واصلنا الصلاة وأنا كل شوي أعلمه وش يسوي
حتى أني سلمت التسليمة قبله عشان يفهمه ذا الدلخ وإلا لو بنتظره كان للحين وأنا وياه جالسين للتشهد !
طبعاً بحكم إنا كلنا صغار مره وما كان عندنا أحد يعلمنا اللي صار هو أنه غلط وجلس للتشهد الأول بعد الركعة الأولى .. يعني صلينا ركعه بعدين جلسنا للتشهد بعدين كملنا
ومع إني كنت دارس كيفية الصلاة في المدرسة ومع إني كنت أعرف أن (( عطر الليل )) دلخ إلا أن هالحركة رسخت في ذهني وصرت أصلي كذا لمدة سنة تقريباً
إلين ما شافني أبوي وفهمني الطريقة الصحيحه بأسلوب راقي وحضاري << أشوى أن مقاس (( الزبيرية )) حقت أوي للحين طابعة في جبهتي ..... أنتهت !!
ملاحظه / وفيه كلمة ودي أوضحها عشان يمكن فيه ناس مايعرفونها وهي كلمة (( زبيرية ))
والزبيرية هي نوع من أنواع النعال (( الله يكرمكم ))
مصنوعة من جلد الديناصور .. ولا فيه أمل تنعفط ولو صبخت فيها (( عجوز سمنسي )) مع الظهر بيجيه شلل نصفي
أما إذا صبخته مع الراس فنسبة حياته (( 2% ))
وهالحين شركات الطيران ما تسمح لك تركب الطيارة وأنت لابسن زبيريات
لأنهم يعتبرونها من ضمن السلاح الأبيض
حتى تسان تذكرون اللي خطفوا الطيارة السعودية وراحوا فيها للعراق تراهم خاطفينها بزبيريات !!
(( 3 ))
معيارة العضو (( الزنون )) من أكتشافاتي
عندما كان (( الزنون )) طفلاً صغيراً حيث البراءة تتكبّكبّ منه في كل غرفة من غرف المنزل
لدرجة أن أهله كانوا يمشون خلفه ومعهم مكنسة كي يكنسوا براءته المهدورة
طبعآ كلها رحمة من أهله .. لأن راسه بوقت ولادته معاق صايرن جروه على جنب
كان راسه يميل للشكل الهرمي قليلاً ((( قل مثلث وفكنا ))
فأصبح الأطفال في المدرسة (( يعيرونة )) بذي الرأس المثلث
وكانت تنهال عليه العديد من العبارة الصبيانية الجارحة
مثلآ / يا (( الزنون )) أول ما ولدوك أهلك حطوك في مهادّ مثل البزران ولا حطوك في علبة هندسة !
بالله يا (( الزنون )) ممكن نتسلف منك راسك اليوم عندنا واجب رياضيات ونبي نرسم المثلثات براسك !
(( الزنون )) سؤال صريح ؟؟ .. شركة لافشكري للحين ما عرضوا عليك تجي تصور لهم إعلاناهم ؟!
وللحين هو متعقد من معيارته هذي
صح أنه سوى تعديل لجوانب راسه
بس للحين يطلقون عليه أبو راس مثلث
وهو للحين حمق بعد كل التغييرات والسمكره لراسه يقول ليه الناس يسوون فيني كذا << --- إنهار يا قلبي عليه
باع كل اللي حوله بسبب معيارتهم له
وسجل بالمنتدى وسمى روحه (( الزنون )) عشان اللي فيه ما يعرفونه
ويدخل في عالم آخر بمسمى (( الزنون )) ........... أنتهى
(( 4 ))
(( معاناة العضوة حكاية إحساس مع النحف العظيم ))
(( حكاية إحساس )) فتاة حباها الله بنحف لا ينافسها فيه إلا سلك الكهرباء(( 2ملي حق النجفات )) ،
لدرجة أنها عندما تحضر مناسبات لا تستطيع أن تجلس دون أن تضع حقيبتها أمامها فوق الطاولة حتى يعرف الجميع أن هناك فتاة تمكث على ذلك الكرسي المسكين
تحملت (( حكاية إحساس )) ملاغة أخوتها بسبب معايرتها بهذا النحف با (( المصير )) << يعيرونه هيك
مرت الأيام ويأتي نصيبها ويتقدم لها رجل سمين أسمه (( جعفر ))
يبلغ وزنه (( 150 )) بعد الرجيم << نادوها يا أعضاء بزوجة جعفر
كان يعمل في شركة الكهرباء لتدخل عليه في النظرة الشرعية وتخرج بسرعة ليقول والد (( حكاية إحساس )) وش رايك يا ولدي ؟؟
ليتنحنح (( خطيبها جعفر )) بإرتباك
وهو يقول لوالدها : يا عمي بكيفكم إذا ودكم إنها تدخل وإلا براحتها لا تضغطون عليها << دخلت عليه وجلست يوم عنده وهو ماشافها من النحف اللي فيها
أجابه والدها بتعجب .. البنت دخلت قبل شوي وطلعت ما شفتها
تبي أدخلها ثاني مرة ؟؟
تردد فارس أحلامها (( جعفر )) قليلا ليقول بالنفي .. ما يحتاج يا عمي الظاهر أني كنت سرحان وما أنتبهت
عالموم أنا شاريكم وتوكلوا على الله ...
يكذب عليهم (( جعفر )) ما شراهم
بس عشانه دب محد قبل فيه ووقتها نزلت عليه الرحمه يحسب أهلها مجوعينه
وفكر أنه يتزوجها عشان يوكله وتسمن وتصير أنثى بحق وحقيقه
وتم الزواج وبلغوا من المده سنه وتوه تظهر له وتبان زوجتة (( حكاية إحساس )) بعد ما سمنت شوي
وإلا جلسوا سنه وهو ما يطالعها إلا بمكبر وحبل رابطه برجلينه
والحين مستانس الدب (( جعفر )) أنه صارت واضحه له الحين
بس هي صارت نذله وطلبت الطلاق عشان تقهر أخوانه وتنسيهم هم المعياره اللي كانوا ينادونها فيه
مسكين هذا (( الجعفر )) بذل الغالي والنفيس عشان تشرف نفسه ولا تحط شطنه قدامها وبالأخير تبيعه بكلب سرق أهله .......... أنتهى
(( 5 ))
(( سالفتي مع عاشقة القصيم و سبيعيه هيبة و ساره ))
قبل أسبوع كنت في ريال مدريد عاصمة أسبانيا << يسمع بها
المهم كنت أتمشى في شارع الثمانين اللي بحي مشعل حقهم << لاأحد يقول تسذب ترى صدز عندهم مثل اللي عندنا
حتى عندهم سوق أسمه أسواق (( الغد )) يبيعون فيه إفري وبشوت وسديريات حتى زيدان أول مايشتري فروته إلا منهم
المهم إني كنت أتمشى وأقزقز طبعاً بهالوجيه السمحه وهالفرافير اللي تشرح الصدر
مو بالدوافير اللي عندما مخبيات شينهم من ورا هالعبي
مادريت الا يوم شفت هاك الوجيه اللي من شينهن
ينقطع خبز السلمان عن بريدة ثلاثة أيام
لا وبعد أنا شايفن هالوجيه بس وين وين وين وين ؟؟؟؟
يوم دققت الاهن خوياتنا الهدره (( سبيعيه هيبه )) وأم أربع وأربعين لسان (( عاشقة القصيم )) والعنبة حقتنا (( سارة ))
مير أصد عنهن
وقلت كرررره يا هالوجيه الودرة
لكن هن يوم شافنن جن وسلمن علي وعزمنن على العشاء << أول مرة يشوفن واحد مزيون
بس أنا صرفتهن بس لزمن علي وأنشبن بحلقي نشبة عظم بالحلق (( ساره )) بالتلزيم
قلت تسان تبن أنتقهوى عشر دقايق مابه مشكلة المهم رحنا لمقهى وقعدنا أنتقهوى ونشيش
وراحت وجت بنا السواليف مير أسألهن !!
وش جابكن بذا ؟؟
قالت العنبة (( سارة )) : مذكرون لنا دختورن زين بذا وجايين نسوي عملية ربط لسان لـ (( عاشقة القصيم ))
(( عاشقة القصيم )) بعد الربط
قلت أنا : الله يبشركن بالخير بس وش جاب هالطرمبه معكن؟ << أنتِ ياسبيعيه هيبة
قالت العنبة (( سارة )) : ذي دليلتنا بذا
قلت أنا : لا والله اللي ضعتوا دام ذي الدليلة إلا بزعه ونفخة صدر على غير سنع
قعدنا شوي بس أنا أنسدت نفسي ولا قدرت أكمل القهوة من شين وجيههن
همن قلت يالله أنا بروح عندي موعد << أدور الفكة
وأجي أقوم وهن ينادنن وينادنن وأنا مزلبهن ولا أدري وش صار عليهن بعده
وعلى طول حجزت طياره لأبليس وبزنه من ردة الفعل اللي شفتها منهن
جاين بونس وأستانس بمدريد
وأشوف هالكشابير وراي وراي وين ما أروح
ديرة به الهدرة وأم لسانين والعنبه تنعاف
وعلى هاك الشوفة الحمد لله ما شفتهن
قطيعه تقطعهن عكوز بكوز بكل ديرة مركوز حتى هنا يلاحقنن ..... أنتهت !!
(( الفتى الذهبي )) يوم كان عمره (( 12 )) سنة تقريبا
كانت عائلتة صديقة بالقرب من عائلة (( صاحي و رايق )) مرررره وكنا نجتمع معهم مرتين أو ثلاث سنوياً ..
كانت عائلة (( صاحي و رايق )) في مدينة ثانية وتبعد عن عائلة (( الفتى الذهبي )) ساعتين ..
(( الفتى الذهبي )) و (( صاحي ورايق )) أصدقاء بدرجة ما توصف
في مره من المرات وبينما (( الفتى الذهبي )) يفكر فيني كعادتة
جاء في باله سؤال وعلى طول راح عشان يسأل أبوه ؟؟
وقال : يا يبه الحين فيه فرق بينا وبين (( صاحي و رايق )) في الوقت ؟! ولا هم مثلنا ؟!
ولأن أبوه كان مشغول أو بالأصح يدري أنه ولده بثر وثقيل دم صرّفه وقال له أبوه : بينا وبينهم ساعتين يالله قم طس عن وجهي كالعادة !!
راح (( الفتى الذهبي )) يركض من عند أبوه وعلى طول على التليفون وأتصل علي
وقال : هلا (( صاحي و رايق )) كيفك ؟!
ياخي بسألك الحين وش جالسين تناظرون في التلفزيون ؟!
حنا يا (( صاحي و رايق )) جالسين نناظر أفلام كرتون (( بباي ))
أنت وش تناظر ؟! وكم الساعة عندكم الحين ؟! ليل وإلا نهار ؟!
أذن المغرب عندكم مثلنا ولا توه يذن العصر ؟!
آيه صح << ريض هالبثر
وقبل لا أنسى !! أنتم تعشيتوا وإلا ما بعد تعشيتوا
وللحين مواعين الغداء في الصالة وتنتظرون الشغالة تشيلها مثلنا ؟! << يا عيني على البراءة يا ناس بس أحسها دلاخه من الفتى صح
لاحظو يا ناس كيف أندثرت برائة هذا الطفل (( الفتى الذهبي ))
وأصبح درجاً ودلخآ لا يفقه شيئا في أموره الحياتية
لاحظو كيف تغيرت مفاهيمه للوقت وكل هذا بسبب كلمة قالها له أبوه وهو مشغول لكي يسكته بها
وترا هذا الشيء بس محصور (( للفتى الذهبي ))
لو هو طفل غيره كان خلاص أتعدل مخه وبدأ يفتهم مثل الناس .... أنتهى !!
أخيرآآآآآآ !!
(( مــخــرج ))
رسالة
حرفين و الباقي دموع
غدرين
زماني ووو فاله
آآآآآآه ...... وش بقى يالطعون ؟
غير النفس و شوية ظنون
وقلباً جريح
يذرف أمواج الألم
محدٍ يجيب هالوقت كلن أصم
لا أخو ... لا صديق ... لا عم
ما غير ذكرى
بقية إنسانٍ أنعدم
واللي بقى منه عرق بليا دم
يصيح
وعيبه صريح
المح بعيونه سؤال .. ?
وما أصعبه
وش السؤال
يقول بعد مارحل عنه الصبر
وش القبر .. ?
هو مريح .. ?
وليه الزمن دايم شحيح .. ?
والطيب طيره الريح .. ?
أتمنى بأني وفقت بشوية شخمطه وتعديلات بمساعدة جنط السفينة
أن أصبت فمن الله
وأن أخطأت فمنكم ومن الشيطان << طلع روحه منها
كان لدي صور كثيره لكن للآسف المنتدى لا يقبل إلا (( 45 )) صورة
وإذا حصلت تشجيع
راح أكمل بقية سردي ووصفي للأعضاء هنا
وللمعلومية : تراني بدأت بالأولويات في الترتيب من حيث الذين ردوا في الموضوع السابق
هنا
وريضه بعد بالزواج
عندك نية تبهذلين بهالرجال ياحووول
خلاص اللي سمنك مره
ما راح تلاقين مثل جعفر يهتم فيك
العود من أول ركزه
وجعفر هو الرجل المناسب للبنوتات اللي زيك
أرجعي له وخليك مره بس
قهر يجي رجل بعد جعفر ويقضي على كل الإنتاجات والبصمات اللي سواها فارس أحلامك جعفر
سلمتي على روحك الحلوه اللي تقبلتي وصفي لك بكل سعة صدر
وبلغي سلامي لجعفر
خشته فتنه بصراحه
يعني الله يعين اللي قلبه خفيف ويرفره على هيك فرافير
شوفه جبهته كيف خاليه من الشعر
يعني وهو بهذا العمر الشعر متساقط
اللي يشوفه يقول يوم هو صغير يحبي على راسه
إجل إذا صار كبريش وش راح يكون راسه
أتوقع وأبراي لله إذا وصل لـ 20 سنه راح يكون راسه تقل مقرصه
بس نسيت أقولك
ترا الفتى له معجبات كثر التراب هنياله
خبرك عارف الغنادير يخقن بقوووه على السمار اللي يميل للشهابه شوي
وأكبر دليل شوف الفنان راشد الفارس
المعجبان من كل حدب وصوب الله يدفع البلاء
ما خلا شيء للصفران اللي يلقون لق مثلي !!
أثري مزيوووون يومي صغير .. وه بس فديت الضحكه الحلووه
أتحدك تضحك مثلي ياصاحي ورايق >> أدري أنك حقد علي يوم نلعب بالحاره واخذت لعبتك
ياويل تسبدي بس الا ليت الزمان يعود يومياً >> تدري ليش عبودي ؟
عشان أصطرك واهج
تبي الصراحه ماقريته كله .. لي عوده بعد كوباً من القهوه والحلآ >> تطورنا عقبك يالشايب خخخ[/align]
آآيه مزيونه .. وهل يخفى القمر يا غلاتي
يا ويل كبدك يا عبووودي
تبي الصدق
الولد كتكوت وأمور .. بس اللون يا قلبي مو رايق
لو أنا بنوته كان أصير ضل لك .. وأبحث عنك قبل لا تبحث عني
مو مشكله أغطك بكيس طحين .. أو الله يعز خلطه (( مـرايــا )) اللي غيرت بشرات بعض الناس
هين ضحكتك ظرررريفة جدآ .. بس لو تغطي سنونك عشان ما تبان البلاوي اللي داخل
لأنك بصراحة صاير تقل تشكيلة مع مادة فنية
كل جزء منك له لون
تقل ثوب أو سيارة واحد من الخوال
ناقص خشتك جسر وردي عشان تكمل الخقه شويا
عاد وش يلحقك إذا هجيت
معروفين أعيال الخوال .. أنواع اللياقه تقل زاروق
لو مر من عندك شطف تقل نمرقيني من سرعته الله يدفع البلاء
والله من المجاملات اللي بتشوف
بس لاتفرح ترى كلهااااااااااااااااا من وراء القلب
يرحمون هههههههههههه
هلا فيك
أي مجملات تقصدين ؟
وكيف لا أفرح الله يعافيك
هل كاشفه أنتِ هنا بما تخفية الصدور
سبحان من خلقك على هذه النظرة السوداوية
كلنا تحت رحمة رب العباد
لكن الحمد لله أن الرحمة مو بيدك يا أستاذه
ترا ردي هذا رؤوس أقلام
وسببه بأني لم أفهم ردك بشكله الصحيح
لانك عارف أن عبدالله فهمه على قده
فياليت تفصلين لي ردك هذا تفصيل واضح بدون همز أو لمز !!
ييسلآآآآآمـ عليكـ
إيه هيكـ المواضيع و إلا بلاش ملينا من الألعاب و المنقول : (
قريت الموضوع على السريع .. صراحة موضوع منتآآآآز و رآآآآيق على إسمك *_^
بإنتظار باقي السلسلة ..
ييسلآآآآآمـ عليكـ
إيه هيكـ المواضيع و إلا بلاش ملينا من الألعاب و المنقول : (
قريت الموضوع على السريع .. صراحة موضوع منتآآآآز و رآآآآيق على إسمك *_^
بإنتظار باقي السلسلة ..
هلا بالداج
ترا الميزانيه عندي فللي
إذا محتاج قرشين يا قلبي تسد فيهم ريقك
ترا الرقبه سداده
أنت تامر وأنا أطامر
ومن حيث المخ إذا هو صدق هاج
مو مشكله
عندك هنا بالمنتدى كومة بنات
واللي يعجبك فكرها وطريقة تفكيرها
أنت بس آشر عليها وأنا أسحب لك كل المخ اللي فيها بشفاط سانتوب وأحطه في راسك
لأن المرأة قليل جدآ تستخدم مخها
فا أخاف يصدي ولا يستفاد منه
وأنت أهم منها في هذا الوقت
يا بعدي تسلم لي على هذا التأييد
وهذي من نظرة عيونك الحلوه اللي تشوف بأن الموضوع حلوه
من حيث الباقي من الأعضاء
إن شا ءالله قريبآ راح يأخذ كل ذي حق حقه
وبالذات من الذين سجلوا في موضوعي السابق !!
والسواليف اللي على الفاضي تنفجر الطبلة ما أدري الطار اللي بإذنتس
مير عجزت عنه
!
وفهمني الطريقة الصحيحه بأسلوب راقي وحضاري << أشوى أن مقاس (( الزبيرية )) حقت أوي للحين طابعة في جبهتي ..... أنتهت !!
أمامها فوق الطاولة حتى يعرف الجميع أن هناك فتاة تمكث على ذلك الكرسي المسكين
ويتقدم لها رجل سمين أسمه (( جعفر )) 
؟؟؟؟
(( ساره )) بالتلزيم
عشر دقايق مابه مشكلة المهم رحنا لمقهى وقعدنا أنتقهوى ونشيش 
خخخخخخخخخخخخ
العرض المتطور
