كوميديا اجتماعية: الدحمي.. والكيان.. ورفية..!!

[المعروف]

[align=center]
الدحمي مشجع رياضي خطيرررر
حتى مباريات أشبال (الكيان) مايفوتها..
طبعا الكيان هذا للي مايعرفه هو ميلان بريدة.. الرائد
واللي وينهو عند مشجعيه..ومابه مثله أحد بالقصيم ..
واذا جاء الدحمي يتكلم يحط رجل على رجل ويبدا: اللللحقيقة.... ولانه فاهم كوره زين ماينسى يقول (ماتها..)
يقلد نجيب الامام.. على باله انه مصطلح تحليلي..
مره رفع رجله مثل العادة.. وقال: يا اخي الجوهر هذا مايفهم تدريب !
قالوا له: ليش.. وشفيه ..؟
قال: أجل ياخذ المرشدي ويخلي التايب..؟


ولان الدحمي مخلص قوووة للكورة .. فهو نادر مايقعد مع اهله
بيتهم صاير مثل الفندق.. اكل ونوم بس..
وكثير امه تحاول فيه يوديهم هنا والا هناك.. ومع الاغراءات يوافق
بس انه ينكبهم وينسى يرجعهم.. اما يكون عند مباراة والا منسجم بجلسة تحليل مع خوياه اللي بس يرددون (أوميرر..)
حاثين اياه على ان يواصل..

مرررة وداهم للملاهي الي بالاسكان.. وصادف ان ابوه رايحن يصيد مع خوياه... واخوه عزيز مسافر بالحلقة لمكة..
وعشان كذا احتاطت امه كثيررر.. وماطاعت البنات يروحون للملاهي الا وهي متاكدة ان الدحمي بيرجعهم..
وأكدت عليه انه يجيهم الساعة 11 بالليل.. ومايخليهم مثل بعض المرات
وعشان تضمن جيته قالت ترا (رقية) بنت خالك بترجع معنا..
عااااد هو يمووووت برقية حييل.. مع انه ماقد كلمها بكلمة..
بس تعود يوم كان يشوف الافلام المكسيكية انه يفكر فيها اذا جاء طاري الحب
وبعد ماجت مهند ولميس ذااااب من كثرة الخمخمة والكلام الي يدوخ
خاصة وهو شايف نفسه انه وسيم.. وكان كل ماشاف أحد يتابع مهند ولميس معه.. يسأله: بذمك .. من يشبه..؟
وقبل مايجاوب اللي معه.. يرفع كتفه.. ويرجع على وارء.. ويرز كشرته.. يعني شفن..
وكثير من الشباب اللي معه بالاستراحة ساحبين عليه الحركة..
واذا جاءهم ضيف جديد.. اقرب واحد منهم (ينغزه) قبل مايجاوب..


أبو الشباب وداهم.. وراح للاستراحة.. وخيالات رقية ماتفارقه أبدددد..
وجلس عند مركاته العادية.. حقت التحليل اليومي..
وللامانة أول ماجلس كان كل شوي يشوف الساعة..
ومن زود الحرص.. ربط في ايده اليمنى (مغاط) عشان ماينسى أهله..
المهم ومن زود الحماس ومن عادة الدحمي.. اذا تحمس بالنقاش يرمي شماغه وعقاله.. وينسى اللي عنده..
وهو اللي صار وهو يتابع مباراة ميلان وانتر ميلان.. وهو ميلاني متعصب
يقول انه يحبه عشان الكيان...! ويقول أنه بيحاول يقنع كاكا انه مايروح تشلسي ويجرب الرائد هالسنة..
ويراهن ان مستواه راح يطوور ويمكن ياخذ الكرة الذهبية مرة ثانية..
ويصير كابتن.. ويمكن يضمونه لمنتخب ايطاليا الي فاز بكاس العالم..
الي صاااار ان ابو الشباب لبس امه وخواته... ولاعزاء لك يارقية..
وبلشت امه تدقدق على عيال خواته وعمومتهم حتى لقت احد يجيبهم..
مع ان امه لزمت عليه مرااات انه يعطيهم نسخة من جدول الدوري عشان مايتوهقون معه..


ومثل ماقلت... الدحمي مقصر مع اهله كثيررررر.. مع انه الولد الكبير لهم
والمشكلة انه ذابحهم بكثر العزايم.. اذا فاز الكيان.. وكله من كيس ابوه..
واذا وافقت مباراة برا بريدة... ونوا يروح مع الشباب.. لازم يجهزون له الشاي والقهوة والتمر...


مرة من المرات دخل البيت .. وشاف اهله توهم رادين من عزيمة..
وأومير.. يشوف اخته فطوم.. لابسة ذاك الفستان الي رفع ضغه..
اصفر بأسود.. وفيه خطوط زرق...!!
يااااااااساتر..!! قضى السوق الا من هالثوب... وقضت الالوان..
سواااااها سالفة.. وقال انكم قاصدين تستفزونن.. وتجرحون مشاعري..
وامه عاد طايرة به... وكلش الا زعله.. مع انه ماينفع ابد..
وتقعد ترضيه.. وتساحره.. ويابن الحلال.. ووالله انه ماتدري.. وناسيه.. وهلم جرا..
وأخيرا قال ما أنام الا وهي فاصخة هالي عليه.. ومعطيتن اياه اقصصه بالمقص هالحين..
ولانه ذرب .. وحقاني.. حلف انه يشري له ثاني غيره بكره..
عاااد فطوم مهب ناقصة الدحمي اذا حط براسه شيء..
وعلى طوووول.. والدموووع اربع اربع... راحت وفصخته.. وعطته اياه..
وماكذب خبر ابو الشباب.. وخذ ياقص وقصيص بهالفستان..
فطوم وهي كاتمة زعله.. وقاعد اتحلطم.. وتضرس من الداخل
قالت له: نشوووف اذا جت رقية وش بتسوي.. اذا مالبسك انت هالالوان بانتحر..!!
ولانها دايم تخاف من تحليلاته وفلسفاته المتخرمة.. ماقعدت ولا دقيقة وعلى طوووول لغرفته..[/align]

[align=center]ترقبوا الجزء الثاني... [/align]