كيف استمتع بالسفر مع زوجتي و اولادي

[هلث]

لعل الكثير منا يتضايق من حلول الصيف الذي سيرغمه على السفر بعائلته (وش حيثنا)هذه عقلية المجتمع الآن ومن الأمور التي تضايق اكثر هو أننا لانعرف كيف نستمتع بالسفر مع زوجاتنا وأولادنا والتفكير الوحيد هومتى نرجع للشلة (مش حالك لمين تجي )لعلنا في هذا المقال نتناقش في اسباب هذه المشكلة

[قريب من القصيم]

برأيي المفترض الشخص يخلي له في الصيف سفرتين ..

وحدة مع الاهل ولهم الحق الاكبر

والثانية مع الربع ..

ولا شك فيه فرق انك تسافر مع اهلك ومع ربعك

[الفتـ الذهبي ـى]

عــــاده تعود عليها النااس ..!!

[خالد التويجري]

اقتباس: كيف استمتع بالسفر مع زوجتي و اولادي

عندما أنسى الشله ومشاكلهم وهمهم ..؟!
وأعطي زوجتي وعيالي حقهم لأنهم الآهم .,


تحياتي .,’

[قـهـرررر أحبه]

ما أظن أن هذه يبغى له سياسه
طريق سهله والكل عارفها
بس وين اللي يطبق !!!

[الاستاذ.د .]

أخي الكريـم هلث ..
هي ليست مشكلة ياعزيزي , بــل غـاية السهـولة متى ما اقتنعت أنك الآن لست {واحد نفـر }!!, إنـمــا - روحــان حللنا جسـدا _..
لو سألتك .. كيف تسعد نفسك؟ .. لرفعت حاجبيك سخرية بي!!.. أليس كذلك ؟
أنت الآن .. أسعد روحيــك -روح روحك وروح زوجـك- وربـمــا .. روح طفـلــك ..
إذا كنت جديــداً .. فثق أنــك ستتأقـلم مع الوقــت ومع الخبــرة ..

[أبو ريان القصيم]

يارجال طول عمرك تسافر مع اهلك وانت صغير تركب ورى باللددسن
وتستانس مع اهلك وتروح تعلم اخوياك انك سافرت ههههههه وبعد هههههه
قال وشلون اسافر قال

[ملاك الحبر]

أتوقع ان الشعور اللي يخليك تبحث عن كيفية إسعادهم
كفيل بأنه يجعلك أجمل زوج مسافر

ابتعد عن العصبية

حاول تفهم طبائعهم ولا تفرض عليهم طبعك

حاول تخصيص وقت لل(مهاوش) لانو الاطفال او المراهقين لابد ، انو يتهاوشون بالسفرة<<<يعني خلهم يحلون مشاكلهم مع بعض لا تخلي الجو مغيم

حاول تخليهم يختارون الاماكن اللي بتقصدونها عشان يحسون بالقيادة

حاول تعطيهم مجال للوناسة مو تنتظر اليوم الاخير
يعني حسافة تروح السفرة وانت ما استانست فيها معهم


بالنهاية اعتقد ان اللي يخليك تنتظر انتهاء السفرة شيء بداخلك مضايقك منهم
او من طبع معين من طبائع العائلة الكريمة عشان كذا حل المشكلة احيانا الاسباب تافهه




تحياتي

[ابوخالد382]

تستمتع إذا صار الرصيد البنكي مليان...تحيتي لك

[الذاهـبـة]

ياويل حالي .. يكسر الخاطر هالموضوع .. !!

منكم لله يا رجّالة .. !!

[ملاك الحبر]

اقتباس:  المشاركة الأصلية كتبت بواسطة الذاهـبـة     ياويل حالي .. يكسر الخاطر هالموضوع .. !! منكم لله يا رجّالة .. !!

تصدقين عاد يالذاهبة
عكسك تماما انا
حسيت ان الموضوع يجبر الخاطر

يعني شخص مستغرب ليه السفرة العائلية مو ممتعة، وبنفس الوقت حاب يتعرف على حلول تجعل السفرة مسلية وخفيفة على قلبه ، ياريت حتى النساء يبحثون في هالنقطة ويتجنبون الملل اللي يصير بالسفرة وبلعكس يستغلونها بنسيان الماضي اللي مليان مواقف تقهر قبل السفرة...واختلافات

يعني موضوع حلو وأنا اشوف اسلوب ابوي بحالاته المتعددة في السفر
اللي طلع معي ان كل شيء له مفتاح

ابتكري حياتك بنفسك ،، انتي ورسمك عاد!



تحياتي لك الذاهبة

[الذاهـبـة]

حياك حبيبتي ..
قطع قلبي كلامه .. يقول : طيب كيف استمتع مع عيالي !!
و كيف يقدر ينسى أصحابه في هالسفرية الإجبارية .. !!

بينما الوحدة منا حنا ياحبة عيني وش تقول ..؟ وكيف فرحتها و هي مسافرة مع زوجها و عيالها .. ؟!
و اصلاً ما تبي من هالدنيا غيرهم .. هالأشهب و عياله المقاريد .. !

[Queen of buraydh]

اقتباس: هالأشهب و عياله المقاريد .. !

هههه الله يقطع ابليسك

[إلينـ اليوم]

من زينكم ومن زين زوجاتكم وعيالكم يوم تسافرون
انطقو ببريده ياحلوين.

[ملاك الحبر]

اقتباس:  المشاركة الأصلية كتبت بواسطة الذاهـبـة     حياك حبيبتي .. قطع قلبي كلامه .. يقول : طيب كيف استمتع مع عيالي !! و كيف يقدر ينسى أصحابه في هالسفرية الإجبارية .. !! بينما الوحدة منا حنا ياحبة عيني وش تقول ..؟ وكيف فرحتها و هي مسافرة مع زوجها و عيالها .. ؟! و اصلاً ما تبي من هالدنيا غيرهم .. هالأشهب و عياله المقاريد .. !

تدرين الذاهبة

أنا احس من حق كل شخص أنه يعيش حياته اللي يحبها مع ربعه وناسه


وبنفس الوقت ،، أكيد فيه شيء مضايقه من تصرفات معينه يخليه ما يستمتع بسفرته

بس والله في ناس يوسعون الصدر ويردون الروح للي ماتت أحلامه ههه

بس اتوقع المفروض تخليه يختار وقت السفرة اللي تناسبه ويناسبها
يعني ما يضغط على نفسه ولا تضغط على نفسها بعد


للحين ما جربت ! بس من اللي أشوفه

موفقة الذاهبة يارب



تحياتي