ياهووو ياناس لا تلعبون عليّ صرت من الأطرش بالزفة

[جبل عمر]

ياهلا ويا غلا بكم

أبدش بالموضوع دووغري وهذا أول مرة أكتب موضوع رياضي

أخيّكم إذا جلس مع خوياوه يتكلمون بالكورة والتشجيع، ولا تحسبوني أدربي الدمييجة لالا أعرف الأندية وألوانهن، وفيني ميزة كل يوم فايز وكل يوم معزوووم حتى واحد يقول أنت فيك خلل نفسي ما لك رأي كل يوم لك فريق هذ واحد والثاني ما له خلقي لأني أدري وش هو يشجع همن أغثه هذا إذا صار فيه مباراة لفريقة اشجع الفريق الثاني وإذا ضاعت هجمة أقول يا خسارة وأحلت ألي بيدي همن تأتش معه يعني حق اللعانة طبعاً أكثر الوقت لاهي بهالابتوب وهو يتابع وأقوله كم النتيجة ومن بينه أسأله أربعين مرة وأخرتها صكن بالكاس قال أنت تنطم وتنثبر ولا تغثن إنزلع هناك أنت ولابتبّك

المهم قررت إني أشجع بصراحة بصراحة لا تزعلون مني قالوا لي شجع تعاون شجع رايد قلت لهم استحوا على أرواحكم لو أباريهم أنا وأبو صاح وأبو فهد صكينا بهم 10 وبتلوا يقنعونن كلن يجرن من جهه وجاء واحد ومسكن ع انفراد بصراحة خفت وشكيت قلت شكله شايفن عليّ شي شين قال شوري عليك شجع هلال وواحد أرسلي رسالة تحلف إن يدعوا واحد للاسلام من حرصه قال شجع نصر ما تعرف ماجد تراه من النصر طالع ووووووو

المهم قلت بنفسي إيه هين خابرن بالمنتدى قسم رياضي أشاورهم لاسيما إني يوم كنت رئيس مجلس الأعضاء الاستشاري كانت تجي مليون شكوى ومواضيع تحذف وتنقل وهذا يناقر هذا وهذا زعلن من هذا يعني خابركم ما تقصرون وعندكم خبرة وكلن وده يفزع لي وينصحن

المهم عطوني رايكم وش أشجع بصراحة مليت أقعد مثل الأطرشش بالزفة بعض المرات يفصل النت وإذا فصل مو معقولة أدربيها لازم أشارك إن استهبلت حلتوا الكيسان عليّ عطوني رايكم وش أشجع

يعني المباريات ما استفدت منها إلا بشيين
الأول إذا جيت أمشي للرياض يوم الجمعة وفيه مباراة يصير الخط فاضي أنواع الوناسة
والثاني دايم معزوم ولا فيه عداوات لي لأني يوم مع هذا ويوم مع هذا يعي أبو وجهين

عطوني رايكم وش أشجع مو معقولة بنات بالمنتدى يعرفن أحسن مني باتسر إذا جيت أخطب قالوا أهل البنت ما حنا مجوزينك ما تعرف الكورة واللاعبين وانا رجال ودي أعرس ولا ينفعبها كذب إذا سألتن البنت قالت وش تشجع أقول ما أدري أو إذا سألتن اللاعب الفلاني مع أي نادي ولا إذا قالت رح اشر لي شال أو فنيلة أو شي أجيب حقت نادي ثاني دبرون تراي بأزمة وهذا ألي خايفن منه أقل شيء لين أخطب وبعدها لها حلال

يله عطون رايكم