بدون زعل .. نقد للمواضيع المكتوبة في منتدى بريدة

[خالد الحربي]

السلام عليكم يا أهل منتدى بريدة ..

مشرفين و أعضاء وزوار ..

عسى الفطور اليوم زين
(( قبل الدخول في الموضوع بقولكم هالذكريات الخاصة ))

بقولكم ذكرياتي الخاصة مع منتدى بريدة

وهي ذكريات أمتدت لأكثر من أربع سنوات ونص ..


البداية كانت دعوة من قبل المقرود السكب روح الشفق (( محمد الحربي مدير مكتب جريدة الأقتصادية في القصيم ))

قالي تعال لمنتدى بريدة وشف صوري اللي انا مصورها ..

كان طاف في التصوير وقتها .. وكل ما شاف شجرة ولا لوحة صورها
كان على بداياته الصحفية

بقولكم سر عنه .. حتى يدي كان يصورها .. طاف بعيد عنكم

وما خلى من البشر والحجر إلا وصورة .. حتى مره شاف جرادة على حصاة وكان بسيارته .. ما دريت إلا وهو ماسك بريك ومن قو المسكة قلت صدمنا

ما ودي أكمل عشان ما يزعل علي

المهم ..

شفت مواضيعه اللي تحوم التسبد .. كلها صور حشرات وسيارات وشوارع

قلت ما بدهاش لازم أسجل بهالمنتدى ..

أول أسم سجلت فيه كان أسمي توني بلير

وقتها سببت ضجة هائلة في هالمنتدى .. بسبب هالأسم
وكانت علي رقابة شديدة من قبل المشرفين
أي نعم كانت مشاركاتي دون المستوى المأمول .. بس كنت أبي أكسب شهرة بأي طريقة ..
وكل مواضيعي كانت موجهة ضد هالمنتدى ومشرفينه .. والكثير من الاعضاء .
وأي موضوع كنت أكتبه كانت عدد القرآءات بساعة وحدة تصل للألف قرآءة .. (( وهذا عبدالله الحلوة يشهد ))

وكنت حاط المشرفين أعداء لي .. مافيه موضوع إلا وأسفل فيبهم (( مع الأعتذار لهم ولكل شخص ناله شيء مني ))
وكنت مكون حزب أو لوبي معي .. كان من ضمنهم الله يذكره بالخير (( أبو الطيب .. والسكب روح الشفق .. والرمادي بس على خفيف )) ..

وطبعا بما أن أسمي كان توني بلير .. كانت الرسايل تجيني بالهبل .. أكثرها تطالبني بتغيير أسمي .. وقله كانت تؤيد مواضيعي

وأمام الضغط المتواصل من المشرفين والأعضاء .. قررت أغير أسمي من توني بلير إلى إقلاع حتى الضياع ..
بس الأسلوب ما تغير .. والهجوم على المشرفين وخصوصا المشرفات ما تغير ..

وكانت الإدارة لابد أن تتدخل لوقف (( المهازل اللي كانت بمواضيعي )) سواء بالحذف .. أو تحرير .. وآخر العلاج كان توقيفي ..

(( ولا أنكر أن السكب روح الشفق كان بصفي بقوة عند أي إيقاف يصدر لي )) .. وأبو الطيب كان له دور بدعمي (( الطيور على أشكالها تقع )) ..
وطبعا أغلب مواضيعي كلها خربشات وخرابيط (( مال أمها داعي )) .. هذا تراه أعتراف مني
وأغلب المشرفين كونوا حزب ضدي (( طبعا لهم الحق ولا ألومهم من اللي جاهم مني ))

ومع أزدياد مواضيعي (( التافهة )) .. كان الإقاف النهائي صدر ضدي .. (( خسارة كل مشاركاتي الــ 500 راحت ))
ومع هالإقاف أبتعدت عن المنتدى فترة 6 شهور ..(( يقالي زعلان )) ..

وبعدها هالفترة الطويلة .. كلمني السكب وأبو الطيب وأثنين من المشرفين عشان أرجع لهم
وبما أن أسمي السابق موقف نهائي .. سجلت بنفس النك بس بمد شوي ..

وأول موضوع اكتبه كان عن المنتدى والإدارة والمشرفين والأعضاء بهجوم .. (( أو طبيع ما يجوز عن طبعه .. الطبعة الثالثة )) ..
وكان أستقبال من الأخ الفاضل (( السعودي )) لموضوعي برحابه صدر وتفاعل ..
وبما أن هالشي ما يعجبني .. قررت أزيد في جرعة النقد والهجوم .. وقليل من المواضيع الجادة
كتبت كم مشاركة وكم موضوع عن مواضيع مكتوبه بالمنتدى .. ما لقيت إلا وهاك التوقيف يصدر ضدي بسبب موضوع كتبته عن مشرفة (( الله يذكرها بالخير )) .. موضوع كان سخيف شوي ..

وكان الفراق بيني وبين هالمنتدى لمده امتدت لأكثر من سنة ..

وبما أن الشاعر يقول (( وما الحب إلا للحبيب الأول )) ..
قررت الرجوع .. بطلب من السكب .. وكانت هذي الرجعة الثالثة .. (( واللي انا فيها الحين )) ..
بس عقب ما عقلت ومسكت أرضي .. قررت أني ما أتعرض للمنتدى ولا للمشرفين ولا للأعضاء بسوء ..
وبما أن يدي مقروصة ..وفيها (( حتسة )) .. قررت أني أنتقد بعض المواضيع المكتوبة في هالمنتدى .. بس بدون تجريح لأحد .. (( ومثل ما يقولون النقد هو الهدف للوصول للبناء )) ..

بصراحة ..

جلست اناقز بين أقسام المنتدى .. ولقيت أن أغلب المواضيع .. مالها سنع ..أو مكررة .. أو منقولة .. أو الفكرة هي هي ما تغيرت .. مافيها جديد .. ولا مفيد .. أو ما تناقش فكرة .
وإذا كانت فيه فكرة ممتازة لنقاش .. الأغلبية تهاجم صاحب الفكرة ولا تناقش الفكرة أو الرأي ..

وأكثر الأقسام في هالمنتدى اللي مواضيعهم منقولة أو مالها سنع .. هو قسم النكت والطرائف .. في هالقسم 98% من المواضيع منقولة أو مكررة .. وعليه أقبال كبير .. (( وانا أعتبر هالقسم من وجهه نظري أنه مضيعة للوقت بلا فائدة تذكر ولا ينقاش أفكار أو يطرح رأي)) . بعض المواضيع الردود تتجاوز الألف وأكثر ..

ويأتي في المرتبة الثانية .. القسم العام .. هالقسم مواضيعه المنقولة أو المكررة أكثر من مواضيعه اللي تحمل صيغة الكاتب نفسه .. حتى الردود على هالمواضيع لها نفس التكرار .. (( يسلمو على هالموضوع الطيب ))

وقسم المرأة .. (( له جاذبية هه ))
ممكن المواضيع المنقولة مفيدة لمن تحمل صفة (( نون النسوة )) ..
بس انا عندي أستغراب من بعض اليوزرات الرجالية .. اللي تكتب مواضيع تخص المرأة .. مثل الثياب .. أو (( الجزدانات النسائية )) .. أو الملابس الداخلية .. الخ من المواضيع اللي تختص في المرأة بسسسسس
كيف رجل يكتب مثل هالمواضيع ؟ .. أحد يقنعني ؟

القسم السياسي .. له وضعه الخاص .. حتى لو كان الموضوع منقول . بس مع الأسف أغلب الردود تكون هجومية أكثر من كونها عقلانية على كاتب الموضوع ..

القسم الرياضي .. أعتبر هالقسم منبع التعصب المقيت سواء بالمواضيع أو الردود .. وش الهدف من مواضيع تجرح في اللاعب الفلاني أو النادي الفلاني أو رئيس نادي .. لكل شخص ميول رياضية (( والرياضة أخلاق )) بس مع الأسف اكثرية اللي يكتبون بهالقسم لا تعترف في هالمبدأ .. (( كنت أعتبر ان عندنا رياضة فعلا .. بس بعد وفاة الأمير فيصل الله يرحمه .. غسلت يدي من الرياضة السعودية سواء أندية أو منتخبات ))

بقية الأقسام .. تتراوح بين جيد ومقبول ..

طيب قل يا إقلاع وش الهدف من هالموضوع ولا تكثر الحتسي ؟ .. (( ترى هالسؤال انا أسأله لنفسي ))

الهدف بكل تأكيد .. هو تميز منتدى بريدة عن بقية المنتديات .. سواء بالأعضاء أو المشرفين أو المواضيع والردود ..
ماهو حط الموضوع لمجرد الكتابة والسلام .. أو رد لمجرد زيادة عدد المشاركات (( وياكثرهم في هالمنتدى )) ..
مثل (( يسلموووو .. ويعطيك العافية .. موضوعك جيد .. رهيب ..الخ ))
(( وانا متأكد أن أغلب أصحاب الردود اللي مثل النوعية أعلاه .. ما قروا الموضوع .. حطوا ردهم وبس ))

(( هذا مررتن من المرات حبيت أكشف أصحاب هالردود اللي ما يقرون الموضوع .. كتبت موضوع طويل عريض .. وبنص الموضوع كتبت .. اللي قرا الموضوع يكتب رقم واحد .. 80% من الردود ما كتب هالعبارة ))

إذا ما عندك القدرة على قراءة الموضوع لا ترد .. وإذا حبيت ترد ناقش الكاتب بموضوعه لا بشخصه ..ولا ترد عشان تشجعه .. الموضوع ما كتب إلا للمناقشة .. أو أطلع وأقرأ بس ..
(( البعض إذا كتب موضوع ويعتبره موضوع جيد .. ومتحمس لهالموضوع ممكن ينصدم ويزعل لأنه ما لقا رد واحد لموضوعه .. لا يزعل ولا يحزن او يصاب بالأحباط .. لأن بعض المواضيع للقراءة فقط مو محتاجة لردود .. وفيه بعض المواضيع تحتاج لنقاش ..))
وله نصيحة مني ..
(( حاول قدر الإمكان أن موضوعك يكون له تأثير على القارئ .. وحاول تستفزه لرد (( طبعا الأستفزاز ماهوب سب )) بفكرة الموضوع .. وأن يكون موضوعك مدخل لنقاش .. والمهم والأهم هو عنوان الموضوع .. لازم يكون غريب وجذاب.. ما تشوف الجرايد كلها المانشيت حقها عنوانه قوي .. خلك مثلها )) ..

(( ولكل اللي يكتبون يسلموووو .. ردكم يصيب بالإحباط ولا هو مستساغ .. إذا عندك القدرة رد زي الناس .. أو لا ترد ))


للادارة مع التحية ..(( شيلوا قسم النكت والطرائف .. إذا الهدف هو تميز منتدى بريدة )) ...

للمشرفين مع التحية (( أنتم واجهة منتدى بريدة والمرآة العاكسة له .. عاملوا الأعضاء كل الأعضاء بعدل ))

لكل الكتاب اللي كانوا في منتدى بريدة العظام .. (( مع الأعتذار أن نسيت أسم أحد ))

أبو الطيب .. تاج القصيم .. هاوي لا غااوي .. عنوان الحقيقة .. والكثير ممن فقدناهم .. أنتم أساس هالمنتدى أشتقنا لكم ياليت نشوفكم ولو بالأسبوع مره (( مانيب طماع )) ..

وللي معنا يكتبون .. كيف حالكم ؟ .. لا تروحون


تعبت وانا أكتب

[الذاهبة]

اقتباس: قررت الرجوع .. بطلب من السكب .. وكانت هذي الرجعة الثالثة .. (( واللي انا فيها الحين )) ..

الله يستر

يعني لو طردوك هالمرة خلاص تطلق !





أحداث حياتك هنا في المنتدى مثيرة

و لسوء حظي ما لحقت عليك سابقاً ..


لكن ..

أعجبتنا بمواضيعك الجريئة حديثة الطبع ..

و بــ هويتك اللبنانية .. هه






**

ملاحظاتك يا استاذ إقلاع كلها صحيحة ..

لكن أحياناً ترى تحكمك الظروف .. و تلبية رغبات الاعضاء الكرام المختلفة ..



شكراً لــ موضوعك و نصائحك ..


و بالتوفيق ..

[خالد الحربي]

تصحيح ..

اقتباس: وكنت حاط المشرفين أعداء لي .. مافيه موضوع إلا وأسفل فيبهم (( مع الأعتذار لهم ولكل شخص ناله شيء مني )) وكنت مكون حزب أو لوبي معي .. كان من ضمنهم الله يذكره بالخير (( أبو الطيب .. والسكب روح الشفق .. والرمادي بس على خفيف )) ..

الرمادي كان من حزب إقلاع حتى الضياع .. مو من حزب توني بلير ..

ما قدرت أحرر ..

هذا لتوضيح وعليه نصادق

[تراحيب]

(( هذا مررتن من المرات حبيت أكشف أصحاب هالردود اللي ما يقرون الموضوع .. كتبت موضوع طويل عريض .. وبنص الموضوع كتبت .. اللي قرا الموضوع يكتب رقم واحد .. 80% من الردود ما كتب هالعبارة ))


هههههههههههههههههههههههههههههههههههههههههههههههههه ههههههههههههههههههههههههههههههههههههههه
بصراحة مت من الضحك




أجل أنت توني بلير؟؟؟؟؟!!!!!!! والسكب صديقك ؟؟؟؟وأنا أقول وش سالفته هذا يدافع عنه ؟؟
وأذكر معك كان فيه وحده اماراتيه نسيت وش اسمها أظن تاتشر لا تصير فيمتو بس ؟؟؟؟؟؟

هههههههههههههههههههههههههههههههههههههههههبصراحة موضوعك مسكت

والله اشتقنا لأبو الطيب والتاج وهاوي لا غاوي


تحياتي لمصداقيتك المتأخرة شوي

[نقد التعليم]

[align=center]

تراني قريت موضوعك وجاز لي << تقولون محلوف عليها ترد !


*


*


( ردي ) هذا بس ( تكثير ) لعدد مشاركاتي << تبي تصيبه بالاحباط




[/align]

[خالد الحربي]

اقتباس:  المشاركة الأصلية كتبت بواسطة الذاهبة     الله يستر يعني لو طردوك هالمرة خلاص تطلق ! أحداث حياتك هنا في المنتدى مثيرة و لسوء حظي ما لحقت عليك سابقاً .. لكن .. أعجبتنا بمواضيعك الجريئة حديثة الطبع .. و بــ هويتك اللبنانية .. هه ** ملاحظاتك يا استاذ إقلاع كلها صحيحة .. لكن أحياناً ترى تحكمك الظروف .. و تلبية رغبات الاعضاء الكرام المختلفة .. شكراً لــ موضوعك و نصائحك .. و بالتوفيق ..

هلا الذاهبة

الحمدلله أنتس ما لحقتي عليها ولا تسان الحين حاطتني من ضمن الأعداء

هويتي اللبنانية .. من هوية الحكومة السعودية



الظروف أي ظروف .. إذا قصدك ظروف الأعضاء اللي يكتبون مثل هالشي .. انا أعتبره هو الفشل بحد ذاته .. لأن مافيه إبداع بالكتابة.. مواضيع تكرر نفسها .. وردود ما ترتقي أبدا بهذا المنتدى ..

سؤال جاوبيني عليه ..

وش الفايدة من مثل هالمواضيع المذكورة ، أو فائدة قسم النكت والطرائف ، إذا فيه ياليت تنوريني ؟

تحياتي لتس

[خالد الحربي]

اقتباس:  المشاركة الأصلية كتبت بواسطة تراحيب     (( هذا مررتن من المرات حبيت أكشف أصحاب هالردود اللي ما يقرون الموضوع .. كتبت موضوع طويل عريض .. وبنص الموضوع كتبت .. اللي قرا الموضوع يكتب رقم واحد .. 80% من الردود ما كتب هالعبارة )) هههههههههههههههههههههههههههههههههههههههههههههههههه ههههههههههههههههههههههههههههههههههههههه بصراحة مت من الضحك أجل أنت توني بلير؟؟؟؟؟!!!!!!! والسكب صديقك ؟؟؟؟وأنا أقول وش سالفته هذا يدافع عنه ؟؟ وأذكر معك كان فيه وحده اماراتيه نسيت وش اسمها أظن تاتشر لا تصير فيمتو بس ؟؟؟؟؟؟ هههههههههههههههههههههههههههههههههههههههههبصراحة موضوعك مسكت والله اشتقنا لأبو الطيب والتاج وهاوي لا غاوي تحياتي لمصداقيتك المتأخرة شوي

وش أنت من لحية ؟

ذكرني .. إذا أنت مغير أسمك علمني ؟ .. بلتسي أنك كنت من ضمن الأعداء وانا ما أدري


السكب تقدر تقول قريب و صديق .. بس بالمنتدى يدافع عني .. وفي الحياة حرب بيني وبينه (( لعانة مني ))

تاتشر .. ما اعرفها .. منهي ذي ؟! (( أهب يا أنت للحين تذكر ))

لو ترسل رسالة خاصة وتعلمني من أنت أكون ممنون لك

[خالد الحربي]

اقتباس:  المشاركة الأصلية كتبت بواسطة نقد التعليم     [align=center] تراني قريت موضوعك وجاز لي << تقولون محلوف عليها ترد ! * * ( ردي ) هذا بس ( تكثير ) لعدد مشاركاتي << تبي تصيبه بالاحباط [/align]

نقد التعليم

يا حظي أجل موضوعي جازلتس
أجل أبشري باللي يسفل بوزير التعليم .. ويخلي عيونه ما تنام الليل

وبعد حتى مدير لتعليم في القصيم

لو تبين بعد مديرة مدرستس .. وكل المعلمات اللي ما تدانيين
وش تبين بعد ؟

بس لا تسوين مثلهم .. لأني ما أتوقعها منتس بلتسي أنتس تبين تردين رد ثاني غير هالرد

تحياتي لموروك الكريم

[تراحيب]

لست لحية ولا شارب ؟؟ ولم احتك بك أبداً في السابق لكن كنت اتفرج من بعيد لأني ((خوافة )) وأنت كنت شرِّي ((قوه ))

عموماً أنا من محبي هذا المنتدى لذلك اعرف المميزين ممن كتبوا فيه


تحياتي لك

[alnesf1]

اقتباس:  المشاركة الأصلية كتبت بواسطة اقلاع حـتى الضياع     السلام عليكم يا أهل منتدى بريدة .. مشرفين و أعضاء وزوار .. عسى الفطور اليوم زين

وعليكم السلام ورحمة الله وبركاته

<<<<<<<<<< شبعان من السبوسه وشرب التوت هههههههههه والحمد الله

اقتباس:  المشاركة الأصلية كتبت بواسطة اقلاع حـتى الضياع     كان طاف في التصوير وقتها .. وكل ما شاف شجرة ولا لوحة صورها كان على بداياته الصحفية ما ودي أكمل عشان ما يزعل علي

هههههه وشــ بقاء ماقلته فضحة الرجل هههههههههههه

اقتباس:  المشاركة الأصلية كتبت بواسطة اقلاع حـتى الضياع     شفت مواضيعه اللي تحوم التسبد .. كلها صور حشرات وسيارات وشوارع

خوش مدحه ههههههههههههه

اقتباس:  المشاركة الأصلية كتبت بواسطة اقلاع حـتى الضياع     أول أسم سجلت فيه كان أسمي توني بلير

خوشــ اسم خخخخخخخ لا وعدلته لااردي منه اقلاع حتي الضياع

اقتباس:  المشاركة الأصلية كتبت بواسطة اقلاع حـتى الضياع     وكانت الإدارة لابد أن تتدخل لوقف (( المهازل اللي كانت بمواضيعي )) سواء بالحذف .. أو تحرير .. وآخر العلاج كان توقيفي ..

ماينفع بك الى كذا هههههههههههههه لا تزعل امزح

اقتباس:  المشاركة الأصلية كتبت بواسطة اقلاع حـتى الضياع     قررت الرجوع .. بطلب من السكب .. وكانت هذي الرجعة الثالثة .. (( واللي انا فيها الحين ))

يالله حيه من جديد وان شاء الله تكون صفحه جديده

اقتباس:  المشاركة الأصلية كتبت بواسطة اقلاع حـتى الضياع     جلست اناقز بين أقسام المنتدى ..

من اولها مناقز ؟؟؟؟

مالحظاتك كلها صحيحه وجميله

ولاكن ارضاء الاعضاء دائمآ صعب

تحيتي لك

[مباشر]

بصراحه مدري ليه أستمر في القراءه الى لآخر حرف تكتبه . أنت نوعيه نادره ؟

بس فيه شي واحد

اقتباس: ........للادارة مع التحية ..(( شيلوا قسم النكت والطرائف .. إذا الهدف هو تميز منتدى بريدة )) ...

هذا لا أتفق معك بتاتاً يمكن قصدك الالعاب ههههههههههه كم عمرك وكم وزنك وأرمي الجحه ولعبة السجن ومن اللي بعدك الخ الخ

[انسان ثاني]

الاخ الغااالي : اقلاع حتى الضياااااع



ا قلع وووا صل الا قلاع اتنمنى لك دوما الابدااع في سماااء الاقلاع موضوع فيه جهد وحياااة كفاااح


صاحبها الكثير من الاحداث والاضطربات المفجعة خاصة وأنت تحمل اسم



مثير يحمل مدلاولات بعيدة الا فق


قرأت المشوار وتحيااتي لصبرك اتمنى ان تقبل مروري تحيااتي لقلمك ودعواتي لك بان تقدم الجديد وأن


تبتعد عن بلير وبوش هههههه



دعوواتي لك باالتوفيق دمت اخا عزيز و تقبل مروري

[تراحيب]

اقتباس:  المشاركة الأصلية كتبت بواسطة اقلاع حـتى الضياع     نقد التعليم يا حظي أجل موضوعي جازلتس أجل أبشري باللي يسفل بوزير التعليم .. ويخلي عيونه ما تنام الليل وبعد حتى مدير لتعليم في القصيم لو تبين بعد مديرة مدرستس .. وكل المعلمات اللي ما تدانيين وش تبين بعد ؟ بس لا تسوين مثلهم .. لأني ما أتوقعها منتس بلتسي أنتس تبين تردين رد ثاني غير هالرد تحياتي لموروك الكريم

انت ما تخاف يمسكون صديقك محمد الحربي ويضغطون عليه عشان يجيبك ويعاقبونك على سب الوزير والمدير؟؟؟

[خالد الحربي]

اقتباس:  المشاركة الأصلية كتبت بواسطة تراحيب     لست لحية ولا شارب ؟؟ ولم احتك بك أبداً في السابق لكن كنت اتفرج من بعيد لأني ((خوافة )) وأنت كنت شرِّي ((قوه )) عموماً أنا من محبي هذا المنتدى لذلك اعرف المميزين ممن كتبوا فيه تحياتي لك

بغيت أطيح بمطب

وش هالبراءة

تراني ما كنت شري على الأعضاء بس كنت شري على المشرفين والمشرفات خاصة

تحياتي للمرور الثاني لك

[خالد الحربي]

اقتباس:  المشاركة الأصلية كتبت بواسطة alnesf1     وعليكم السلام ورحمة الله وبركاته <<<<<<<<<< شبعان من السبوسه وشرب التوت هههههههههه والحمد الله هههههه وشــ بقاء ماقلته فضحة الرجل هههههههههههه خوش مدحه ههههههههههههه خوشــ اسم خخخخخخخ لا وعدلته لااردي منه اقلاع حتي الضياع ماينفع بك الى كذا هههههههههههههه لا تزعل امزح يالله حيه من جديد وان شاء الله تكون صفحه جديده من اولها مناقز ؟؟؟؟ مالحظاتك كلها صحيحه وجميله ولاكن ارضاء الاعضاء دائمآ صعب تحيتي لك

يالله حيه ..

تراني الحين صرت حبيب ومؤدب .. بس شراني على أكثر مؤسسات الدولة


بغيت انسى

غيرت ألأسم لإقلاع لعده أسباب ..
إقلاع عن واقع مزيف فيه الكثير من الفساد المنتشر .. لضياع بين عالم غير موجود إلا بقصص ألف ليلة وليلة

ألف تحيه وود لمرورك الكريم