هل التسوق برفقة الآهل يعتبر خطأ او عيباً ..

[قارئة الفنجان]

اقتباس:  المشاركة الأصلية كتبت بواسطة أبن القصيم البار     السلام عليكم ورحمة الله وبركاته . . اريد ان اتوجة اليكم بسؤال هل الذهاب مع الاهل الي المجمعات والاسواق تعتبر خطا او عيب ؟ كنت برفقة الاهل في احد الاسواق وشاهدت العجب العجاب .. المحل التجاري كلة نساء يمينا ويسارا الا ماندر من الرجال وبعد ان انتهينا وذهبت مع اهلي الي السيارة وجدت احد الشباب الذي اعرفة ينتظر في السيارة حتي خروج العائلة الكريمة من السوق وقد استغربت عدم نزول زميلي مع اهلة هل هو خجلان من اهلة ام ماذا ؟ وهل هذة الطريقة المثلي في التسوق ؟ . . ان ترك الاموار بهذا الشكل قد تحصل اشياء لاتحمد عقباها وللجميع التحية ,,,

[align=center]سيدي العزيز أبن القصيم البار ،،الذهاب مع الأهل للأ سواق مو عيب ولا خطاء بالعكس شيء يشرف ،،لكن خلينا نكون واقعيين ،،كثير من الرجال يروح مع زوجته او اخته لسوق على علشان ايه !!علشان خايف عليها من الي مايخافون ربهم وهذا حقه وهذا دليل على محبته لها وغيرته على محارمه ،،،لكن وين المشكله !!!المشكله انه يروح معها السوق هي تدخل المحل وهو يجلس برى عند باب المحل او على الكراسي الي تكون في ساحة السوق ،،كذا ماستفدنا زوجتك او اختك جوا بالمحل مع الرجال الي يبيعون البضاعه واحياناً يكون عددهم كثير وتلاقيه بس يلاحق النساء عشان يبين لهم البضاعه ومواصفاتها ،،بس فعلاً هم يحرجون النساء بطريقتهم هذي ،،وفيه كثير من الحالات الزوجه او الأخت ترفض ان محرمها ينزل معها ،،ممكن لأن الرجل يوترها ومايخليها تتسوق زين او لأنها تكون خايفه عليه من بصبصة النسوان هذي لزوجه ،،ولا الأخت ماعندها مشكله إذا طالعوا البنات بخوها ،،،،، او لأنه يحرجها ترى بعض الرجال للأسف الشديد يحرج اهله بالسوق ،،مثلاً تلاقيه يخانقها بصوت عالي او يرفض انها تشتري الغرض الي تبغاه بطريقه مو حلوه ابداً ،،في النهاية اخي العزيز كل مانتمناه هو الهدايه من الله سبحانه وتعالى لنا ولجميع المسلمين

كل الود[/align]

[جناان]

لا والله لا خطا ولا عيب
لكن اذا كان مجموعه من النساء
اعتقد افضل من الرجال
لان ما عندهم تحمل بسرعه تشين النفسيه
والحريم تتسوق بالاربع ساعات عاادي
وهم نصف ساعه ويتعبون

[&نجدية كووول&]

من وجهه نظري أذا فيه أحد كبير يروح مع البنت أوكيه...

لكن أنا دائم أروح مع أختي أو مع أمي وبعض الاحيان مع أخوي أذا حاجة صغيرة لانه مو فاضي وراة

ألتزامات..

وبعد حسب البنت أذا هي موضع ثقه أوكيه تقدر تروح لحالة أذا لزم الامر أما أذا كانت رجة لابد أحد معه

تشكـــــــــــرااااااااااات...

[سدو]

طيب لحظه البس اخواني عبايات وأسألهم هل ودكم ارافقكم لسوق
اصلا ماعندي خوات ....تي تي تي تي مسكين الي ماعنده خوات
اوصيكم ياشباب باخواتكم ترى في بيتنا معاناة من هالسالفة
>>>ماتلاحظون اني راعي سويلفات قرقر كثير
من العايدين المقبولين عموما

[&نجدية كووول&]

همز ليت من يجيبك عندنا حنا عندنا نقص من يروح بنا ويجيبنا>>>ههههههههه

[ღعبدالله العطيشانღ]

والله يابن الحلال الذاهب للسوق مع رفقه هالحريم غثاء ووجع راس !
ألا إذا كان الشخص يروق معاهم وموسع صدره ممكن هذي .
أما من حيث إنك خايف على بناتك أو خواتك .. فهذه نسبه بسيطه راح تأثر على الوضع
لإن البنت إذا ما صانت نفسها بنفسها ,, تأكد لا أخوها ولا أبوها قادر أنه يسيطر على على هذه البنت !
أما إذا أنت خايف على مضايقة بعض الرجال .. ما راح يضايقها أبن أبوه دامه ماخذه جميع أحتياطاته من التستر والمحافظه وعدم إظهار بعض الحركات التي تلفت النظر بهذا الموقف !

بايوووووووووووووووو

[سدو]

ليت من يجيبك >>>تخيلت نفسي خاروف الله يهديك يانجدية
بس لاتعيدينه ترى اصدق

سلام

[من ولاية قصيمونا]

لاخطاء ولا عيب
الخطاءوالعيب ان تترك اهلك بدون محرم

[عاشقة الطير]

ابد يا خوي الكريم .. لاهوب عيب ولا حرام .. من قاله .. إلا الحرام تخلي أهلك .. وخصوصا إذا كانو بنوتات وصغار .. وإذا والله معهم حريمن يسنعونهم ويجسرون يمشون بلايا رجال فا مايخالف ..
بس انا افضل ان الرجال يصير مع اهله .. وهذا وجهة نظري ..
تقبل مروري اخي الكريم

[نجم في سماء]

صراااااااااااااااااحه
سعادت البيه زوجي مايفضل التسوق معي ..............ابد
مادري يمكن عشان هو سمين شوي............
والتسوق لحالي افضل اخذ راحتي وبسرعه وبدون زعل(اهم شئ)

[شهد الحياة]

السلام عليكم

موضوع حساس

واشكرك عليه

اقولك وش يقلون لقنا انزلو معنا للسوق

يقول عيب اخف احد من زملائي يشوفني معكم

احيان نسال ليش عيب هل نحن نكره

واحين مو فاضين لشغلاتنا

ويخلون بناتهم وازواجهم بالسوق لاحسيب ولا رقيب

وفاضين لطلعتهم وسهراتهم

نحن مانقول لاتطلعون وتسهرون

لكن حطو وقت لاهلكم

لكن وش تقول

كاانك تتكلم على حجر اذا الحجر سمع الكلام وتحرك من مكانه رجالنا تغيرت طبائعهم

وللمره الثانيه اشكرك على الموضوع الحساس

[ملاك الحبر]

بكيفهم......

[قلب الأسد]

اخي ابن القصيم ...هذا ماتكلمنا عنه في مواضيع سابقه من فتن وبلاوي ولباس لايرضي الله
ولا رسوله ان ترك الاهل في الاسواق دون وجود الأب والأخ هو سبب الفتن والغزل ولصياعه
لبعض البنات التي قل دينها وحيائها ..
العيب هو من يترك اهله داخل السوق دون رقيب بعد الله ,,

[شخصية]

الصراحة سؤالك بالنسبة لي يعتبر غريب جدا ..
بعض القضايا والتساؤلات التي تطرح هنا تجعلني فعلا أشك هل عقليتي سعودية أم غير ذلك ...
عموما إجابتي هي : ذهابي يعتمد على مزاج البنت , إذا تبيني أروح معها فأنا رحت , وإذا حسيت أنه ماتبيني أنزل معها لأنها مثلا يمكن تطول بالسوق فأنا اشكرها وأتمنى لها تسوق ممتع وموفق وأنصرف ...


أجل بعض الناس يستحون أحد يشوفهم بالسوق مع أهلهم !!
..أمممم يمكن يحتاجون لزيارة أقرب مرشد نفسي ..

[ملاك الحبر]

أحلى شيء بالتسوق أنك تآخذ شخص أفكارك زي أفكاره ...ورايق ومو مستعجل
واحيانا لحالك افضل عشان ماترجع كل اشتريت بسبب اتخاذ القرار بسرعه
السوق مكان عادي ..طالما كنت عارف طريقك ومحدد المحلات اللي بتدخلها ايضاً
لكن الكثير يطلعون مو للتسوق !! بل للتمشية وهذا مو مرفوض
لكن التصرفات الصادرة منهم مرفوضة درجة أولى ... لأنهم اما يتدخلون بالناس الرايحه والجاية
واما يسرفون بالنظر ،،

احيانا السوق يسبب مضايقات لبعض الرجال،، لكثرة الحريم الموجودات
والاحسن ما يطلع مو مكانه
لكن اذا كان مكان عام في محلات مختلفة للجنسين مو مشكلة



تحيتي لك