سأعترف لكم...لقد كنت مضطهدة..!

[..روز..]

السلام عليكم...

كيف الحال..إن شاءالله الجميع بخير..؟

من زمان ماكتبت موضوع..


قبل عشر سنوات تقريباً ..كنت أعيش مأساة.. ماهي بسبب مرت أبوي الشريرة ولازوج أمي المتوحش..!!
كانت بسبب أخوي!!

كرهت مجتمع العيال كله في ذاك الوقت ..

ليه الأولاد يتسلطون على البنات؟..ليه يستقوون عليهم؟
ليه كل شي جميل في الحياة يحولونه لقبح؟

علاقة اليهود بإخواننا الفلسطينيين غاية في الحب والمودة مقارنة بعلاقة أخوي بي..
من يصبح الصباح لين يخلص الليل وهو يستلذ بتعذيبي..

_مايمد إيده_...
بس يقول كلام يرفع الضغط وينرفز ، وأحلى يوم في حياته اليوم اللي يلقط فيه اسم وحده من صديقاتي..
يستاااانس!!







ويبدأ مسلسل التعليقات :-


أمي / روز.. تعالي تعشي..


أنا / لايمه ما أبغى.

هو / يمه تراها تقلد صديقتها فلانه..


* أنا متحمسة أقول لخالتي سالفة..يدخل الأخ في الله..

لاتصدقينها ! لاتصدقينها!! ترا صديقتها فلانه خافـه عليها بهالسالفة ..أصلاً كل صديقاتها يخفّون عليها.

* أمي / روز ليش ماذاكرتي للحين..؟

أنا / مالي نفس..

هو / تراها ماذاكرت عشانها ناوية تغش من صديقتها فلانه !


وطبعاً ردّة فعلهم دايماً تكون مابين مصدّق ومستملح !!


أول مايدخل من الباب وقبل لايسلّم يلتفت عليّ وهو يقول ((خير!))..

طيّب انتظر لين تطيح عينك بعيني بعدين قل اللي تبي..!


كنت دايم أصيح عند أمي وأقول والله إذا صار عندي أولاد والله لأخليهم خدم عند البنات >>>ياعيني عالإنتقام القوي ، انتبهي بس لايوجع أخوك مرّة !

وأخليهم كل يوم يغسلون الحوش (ماقد غسلت الحوش في ذاك الوقت بس كنت أحس إنها أصعب مهمة منزلية )..



كان يستمرض .. يموت .. يتحكك .. إذا مرّ اليوم وهو ماتنجس عليّ ، لدرجة إنه أحياناً يدخل علي الغرفة ومايلقى شي يتطنز عليه _ فتتعب نفسيته مسكين _

أتخيّله يقول بقلبه يارب وش أقوووووول..آه لقيتها !

((أستغفر الله لابسة أزرق ! الحمد لله والشكر ! ))


كنت دايم أفكر وش يبي هالآدمي !؟ من اللي مواجره على أذيتي؟

يمكن تقولون هذي أشياء عادية تصير بين الأخوان..
لكنكم ماتحسون بأثرها على الفئة المستضعفة في ذاك العمر..

وإذا تمشكلت مع أي أحد يفزّ عرق الأخوّة فيه ويصير (معي؟) لاطبعاً ..مع الطرف الثاني !!

ولد خالتي كان دايم متسلّط عليّ وإذ علّمت عليه أخوي سوبرمان آل زورو يقول ((أحسن !))

حتى إنه يتطنز عليّ قدّام أولاد خالتي ويسميني (حفــريــات)..
أكيد بتقولون مسكينه فيها عنقز ..

لاأبداً وجهي مافيه شي بس بما إن أخوي تخصصه بكالريوس تقبيح العالم ماهان عليه إنه يسمّيها غمــازات فسمّاها حفريات..

حتى إنه كان يقول للشلّة الظريفة اللي معه ((تدرون شلون طلع اللي بوجه روز؟ يوم كانت ببطن أمي دخلت عليها

ومعي دريــل ((((الله أكبـــــــر!!)))) وحفّرتها !!!))

وهم ((هااع هاااع هااااع دريييل هاااااع هااااااع )) >>>>>>الله من ثقالة الطينه..

خفت عليهم يجيهم شدّ عضلي من تغصّب الضحك..

بتقولون أكيد إنك تتحرشين فيه..

بالعكس كنت مسالمة معه (غصب) لأني ماأتجرأ أسوّي له شيء والفارق بيننا كبير ..


كان يكرهني أكثر من كل شيء ويفرّغ مراهقته عليّ..وإن فكّر أحد يمدحني قدّامه يجيب له سجل بكل أخطائي موثقّة ومؤخرة بالميلادي والهجري..
فعلاً كان مسبب لي ربكة بحياتي..


***************************

مرّت السنين.. كبرنا ونسينا وتغيّرت الأحوال..وسبحان الله صار أطيب إنسان عرفته...ومن غلاوتي عنده لو أطلب القمر جابه لي ...
يحترمني وياخذ بشوري كأني أكبر منه ..وإذا دخلت فزّ وقام يسلّم عليّ...

وفي يوم زواجه.. حبيت ألطّف الجو وأنا أسلّم عليه فقلت له وأنا أضحك..((هاه .. من بيوديني الجامعه السبت؟))
احتريته يبتسم .. مادريت إلا صاح !!
أوف..!بحياتي كلها ماشفت دموعه..
بس شفتها هاليوم..
بلحظتها قلت ببالي ( ياروز..ياشريرة شلون كنتي تتمنين أول إنه يصيح قدّامك! )


**********************************

وأنا أقصّ لأمي عن وضعي أوّل والحين..قالت : (( هاه ماضرّك شي..))
وأنا أقول..لا يمّه ماضرّني شي...

ولا يا أنتم ماضرني شي...وماتأثرت حياتي..

بس يحق لي إنه يكون لي ولكل بنت ذكريات حلوة....

لأني شبه متأكدة إن غالبية البيوت اللي يجتمع فيها (بنت وأخو أكبر منها) تكون محل إضطهاد من الطرف _الأقوى_...

بمباركة من الأهل الساكتين...








سوووووووووووووري طولت عليكم...