السلام عليكم ورحمة الله وبركاته
اعتذر لأنه موضوع ثقيل على الصباح 
راح ادخل بالموضوع ......
طبعا كلنا نعرف انه بالعاده لما تخلص البنت الجامعه تتزوج طبعا اما بعد ثلاث سنين او كثر او اقل على حسب .
لكن بعض الفتيات لهن حاله خاصه او حظ سبحان الله مو مثل الأغلبيه
مثلا ..اعرف وحده ما تقدم لها اي خاطب إلا لما صار عمرها 28سنه وياليت انهم خطاب مثل بقية البنات والخلق ..أما متزوج وله اولاد وبنات او كبير في السن بحدود 50/ 55
وهي مسكينه تضل صابره لين وصلت 34سنه وتزوج من واحد عمره 55سنه معتقده ان هذا هو الزوج المناسب لأنه على حسب كلامه مطلق ولا عنده اولاد .
الطامه الكبرى صار مزواج يتزوج ويطلق وياليت على كذا قال فيها كلام غير صحيح يعني ينمها عند اهلها ويكذب قدامها يعني يزرع الفتن بينها وبين اهلها وبالأخير تطلقت لكن الحمدالله ربي رحمها مالها اولاد منه.
والحين يتقدم لها نفس العينه الأولى ويمكن اقل شوي بحكم انها مطلقه وكبيره بسن ..مسكينه قسم بالله ..
ناهيكم عن نظرة المجتمع لها قبل وبعد الطلاق واهلها الي محتارين فيها.
................................................
سؤالي هنا ....وهو الأهم ....
وش السبب ألي يخلي اغلبية البنات يتزوجون بطريقه سهههههله وعادي ويكون شاب... مو شايب او متزوج وعنده ذر ماشاء الله
ويكون سن زواجها حلو وكل شي ماشاءالله تمام التمام . وبعض البنات مسيكينات .
مع انهن مابهن اي ميزه عن بقية البنات وكل ولها شخصيتها وميولها وووالخ
والبنت الي ذكرت قد تفوق ببعض الميزات عن الي تزوجوا .
ونرجع لنفس السؤال .
يعني هل السبب من الأهل اهل البنت هم السبب في تأخر زواجها؟
ام السبب من الخطابات يمكن بعضهن حسودات على بعض البنات ؟
الصراحه انا احترت مادري وش السبب ..ولا اعرف وش الحل للبنات ذولي ..
وبالأخير تضحي بحياتها وتتزوج واحد كبير في السن وعنده اولاد
لأنها خلاص راح العمر مابقى من العمر شي .
ياليت الاقي جواب او حل لهذه الفئة المضطهده والمظلومه بمجتمعنا ...
اللهم ارحمنا برحمتك ياارحم الراحمين .
العرض الشجري