وقفة مع مزايين (( حرب )) .. ملكة الجمال ناقة

[خالد الحربي]

أمس الصباح جاني ولد عمي .. وقالي وش رايك نروح لمزايين حرب ؟!
قلت له : وش عندهم هناك ؟!

قالي : عرض أجمل البعارين !

قلت له لا يا شيخ ؟ .. صادز أنت بعارين (( جميلات )) ؟
وبعدين كيف يختارونها ؟!
على الطول ولا على أجمل (( ردف )) ولا أجمل رقبة .. ولا يلبسونها من أزياء(( كريستيان ديور ولا دفنشي ولا إيلي صعب ولا عبد محفوظ ويخلونها تمشي قدام لجنة التحكيم بقدها المياس وخصرها النحيل وردفها الثقيل وصدرها الجميل ))

ولا تجيك الناقة حاطة روج على شفايفها .. ومسوية سيلكون وفخوذها ملفوفة ؟
وبعدين من رايح يحيي الحفلة .. بعير نانسي ولا جمل هيفاء ؟

أتخيل بعير ماسك المكرفون ويغني (( يا ناقة وسط النفود تتمخطر ))

..................

المهم رحنا لمزايين حرب .. لقينا أمة لا أله إلا الله هناك .. زحمة وغبار وتراب (( وبعارين ))
وبما أن ما عندي خلفية عن البعارين جلست أسأل .. وش معنى (( الوضح .. والشقح .. وما أدراك ما مسمياتهم العجيبة الغريبة )) .. انا أعرف الألوان العادية بس مثل مسميات هالألوان أول مرة أدري عنهم

أخذنا جولة على الذود (( ما أدري وش جمعها )) وعرفت أن الذود (( 50 ناقة )) ..
المهم خلال تجوالنا داخل المهرجان .. لقينا مجموعة من الذود .. تمشي معها فوق 100 سيارة
موكب صاحبة السمو البعريني ناقة بنت جمل
(( أستغربت أن مئات الملايين من الريالات تدفع لبعارين )) يقولون عنهن (( مزيونات )) تخيلوا ناقة تعتبر (( جميلة عصرها )) قسمن بالله خبال عجيب ..أم فرة وبراطم ووجه (( سبحان الله في خلقته )) جميلة !

مقاييس الجمال ما أدري كيف عندهم .. لو تسأله عن حرمته قال عنها (( شيفة ))
يقولون فيه واحد مات له جمل قيمته بس 400 ألف ريال

وبما أن (( قبيلة حرب )) من أكبر القبائل في السعودية .. كان حتماً أنا نشوف تجمعات في هالمكان ..
ومع هالتجمعات الكثيفة .. كانت مسيرات وشعارات ترفع .. (( كلها عنصرية بغيضة ومقيتة )) ..
((دخلنا في المسيرات اللي مسوينها وكانت تصرفاتهم مخجلة ومعيبة ومشينة تجاه من لم يكن من قبيلة حرب ))
حتى الدوريات الأمنية ما قدرت عليهم تركتهم (( لهياطهم )) ..

قلت لولد عمي (( خلنا نبعد عن هالغثاء اللي مثل السيل )) ..
أبعدنا ورحنا نتمشى على البقالات والسوبر ماركات .. خيام هه ..
لقينا أسعارهم مرتفعة أرتفاع جنوني (( بكت الدخان بــ 8 ريال )) أصصصصصصصصصصصص لا أحد يعلم
كل شي غالي ودبل ..

مشينا على (( الكثبان الرملية )) وبصراحة أنصدمت بشدة ..
نعمة منثورة بكل مكان .. رز ولحم أكوام فوق بعضها .. كل المخيمات ترمي هالنعمة بدون (( ضوابط دينية رادعة )) على الأرض .. (( طاغيين بالنعمة )) ..
يعني لو خصصوا من التكاليف اللي يتكلفونها بحافظات للأكل ويودونها للجمعيات الخيرية ماهوب أزين لهم ... وأنفع لهم في دينهم ودنياهم ؟
هدر للأموال .. (( وسيسألون عنها )) ..
أنفقعت مرارتي اللي أصلاً ماهيب موجودة معي

أخذنا لنا مكان مرتفع وجلسنا نناظر هالبشرية .. ومع غروب الشمس بدأت ظاهرة (( التطعيس )) الين ما أذن الفجر وهم (( ون رم آآآن )) ..
بعد صلاة العشاء ..
رحنا للمقر الرئيسي للحفل ..
شفنا (( السجالات الشعرية والمهاترات فيها )) .. كلن يقول بيت لثاني ألعن وأشنع من البيت اللي قبله ..
ضاق صدري منهم وطلعت .. ورحت لمكاني ..

أفكر في اللي شفته اليوم ...
مظاهر وتفاخر .. وبذخ وأسراف .. وبالأخير منهي أجمل ناقة
يعني لقب (( ملكة جمال البعارين ناقة تلبس التاج المرصع )) إلى السنة الجاية وخلال هالسنة هالناقة تصير سفيرة النوايا الحسنة بين البعارين .. وتعطى من هالشعير الين ما ينفجر بطنها .. ويصل سعرها لملايين الريالات .. ناقة تخيلوا ! هذا سعرها!
يمكن ناقة متخانقة هي وجملها تصلح ما بينهم

ياحريم .. ما تنقهرن أن اللقب راح عنكن لناقة

عموما ..

المفروض مثل هالمهرجانات توقف نهائياً .. لما فيها من أسراف وبذخ ..
ومزايدات وصرف للأموال بغير وجه حق ..
وبعد عشان العنصرية ما تزيد في المجتمع أكثر واكثر مما هي عليه الآن ...


ملاحظة مهمة ..

كتب هالموضوع واحد من قبيلة حرب ..