متى يسمحون لحريمنا تسوق ,,,!!!!! [الأرشيف]

عاشق ديرتي بريده

15-11-07, 07:19 pm

قبل فتره كنت بالكويت وكنت اتمشى انا وصديق لي
وكنت اشوف النساء الكويتيات وهن يقودن السيارات
ماني متكلم عن الحجاب لان خلعه محرم لكن راح اتكلم عن القياده
والله اللي شفته بالكويت نساء تقود السياره ومحترمه نفسها
والناس محترمينها ولايوجد معاكسات ولاشي الا ماندر!!

وقلت ببالي متى يجي الوقت واشوف السعوديات يسوقن !
والله اول كنت معارض قيادة المرأه بس بعد اللي شفته بالكويت
وشفت الحياة طبيعيه هناك تمنيت ان نسائنا تقود السيارات وتقضي حوايجها بنفسها !!

لااحد يقولي حرام وهو مايدري !!!
انا ابي نسائنا تقود السياره وهي متنقبه ومحترمه نفسها !
ادري راح يكون بالبدايه مشاكل لكن مع مرور الوقت راح يكون كل شي عادي !

رجاء اللي يبي يرد على الموضوع يرد ويترك عاشق لان هذي وجهة نظره ,,

’ ŚĀM

15-11-07, 07:28 pm

عاشق ديرتي بريده

15-11-07, 07:30 pm

اختي نجودي
البنت الفاسده فاسده سوا بقياده والا بدون يعني القياده ماراح تفرق شي .

•°سـرىآ اللـيـل°•

15-11-07, 07:30 pm

طيب كم جلست بالكويت ؟؟؟؟؟

أقييمت ندوه بالكويت ,, وكان مع الحاضرين أخوي الله يحفظه

يقول يوم جينا بنطلع جلست مع دعااة كويتين فقالوا لي دكتور عبدالله والوفد اللي معااك

نبغاكم توصلون رساله لأخواننا في السعوديه عارضوا من يطالبون بقيادة السياره للمرأه

حتى وأن ذكروا الفوائد لان النهايه ستصبح وخيمه وسياتي أجيل يدوسون أخلاقيات البلااد تحت أرجلهم..

كما فعل بنا سيفعل بكم ,,

اذا الكويتين يعارضون ياعاشق وش نقول حنا ؟؟

انا بنفسي دخلت في موضوع عن قيادة المرأه للسياره وحوار قوي مره قبل 4 اشهر تفاجأة

بتواجد كويتيات يردون في المنتدى يعارضون .. باسامي صريحه ,,

اذا هم ضد أحنا نجي نقع بنفس الخطأ :(

لاتنظر لوحده وثنتين ,, وشف البلاوي اللي عندنا وحنا ما نسوق وش لو يسمح لنا

الله يهدينا قل آآمين

عاشق ديرتي بريده

15-11-07, 07:34 pm

اختى سرى
وشف البلاوي اللي عندنا وحنا ما نسوق وش لو يسمح لنا

يعني الفساد موجود بدون قياده ليش نقول ان القياده تبي تفسد البنات !!!!

# الزلزال #

15-11-07, 07:41 pm

عآآشقـ...
تفكيركـ يعجبنيـ..ونآآدر مآنلقـى احد يفكر زييكـ وخآآآآآآآآآآصهـ اذآ كآآنـ(بريدآآويـ)..!!:)

امآآ متـى بيسمحوونـ...!!!
معـ وجوود عقليآآتـ متخلفهـ وكلـ تفكيرهآ (انـ البنآآتـ فسآآد مجتمعـ ويجبـ محآآصرتهـ)

مآآظنيـ بيجيـ اليومـ الليـ بتسووقـ فيهـ البنتـ عندنآ....!!!

تبقـى وجهة نظــريـ الخآآآآآآآآآآآآآآصهـ...!

انت ودك الحريم يسوقن وانا ودي هالعضو يغير اللوان الخط من ابيض لا خضر

اللوان غبية ..

ولا تهون العضوة العبري .. اللي تختار حجم خط تمتحنك ما قريت وش مكتوب ..

[..عذآري..]

15-11-07, 07:59 pm

يسعد مسائك أخ عاشق .....

انا من نظري قيادة المراء للسياره شي عادي اكيد راح تكون هناك نظرة فعل عكاسيه

لكن من الايام راح يكون الشي عادي

اطرح إليك مثل السائق عند العائله كان اول ممنوع ومدري إيش

ومسوين زحمه بأن السائق لايمكن استقدامه

واللحين بالعكس صار شي عادي لان الناس تعود ت على هذا الشي

طيب هنا اقول للناس اللي مو مؤيدين طيب إذا صارت المراء هـ ماعندها احد يوديها ويجيبها

ايهم احسن انها تركب مع سائق بدون محرم او ان هي بنفسها تقود السياره ؟

’ ŚĀM

15-11-07, 08:16 pm

انت ودك الحريم يسوقن وانا ودي هالعضو يغير اللوان الخط من ابيض لا خضر

اللوان غبية ..

ولا تهون العضوة العبري .. اللي تختار حجم خط تمتحنك ما قريت وش مكتوب ..

http://www.7oob.net/smiles/5/Q82_197.gif (http://7oob.net/)
يآآآحووبيـ ليـ وألوآآنيـ |||بسـ على فكرهـ انآ (((عضوووهـ)))مو عضــو!!!!http://www.7oob.net/smiles/5/Q82_15.gif (http://7oob.net/)

بنت البدائع

15-11-07, 08:38 pm

قل آمين قبل تنزل تحت

^

^

^

^

^

^

^

^

أماااااااااااااااانه عليك ياعاشق قل أمين.

قلته؟؟

^^

^^

^^

^^

^^

^^

(الله لايجيب اليوم اللي تسمح الدوله بقيادة المرأة فيه)

خلنا على كذا مبسوطين ومستورين
حتى لو ماقضينا حوايجنا ..

الحصان الأسود

15-11-07, 08:44 pm

موضوع أخذ حقه الكافي من النقاش ..

احترامي عاشق

منصورعبدالله

15-11-07, 08:54 pm

والله رحت للكويت كثير وقليل ماشوف معاكسات...
عكس كلامك تماما...
ويكون بعلمك ان اكثر مشاكل بالخليج عند الكويت على انهم قليلين...

فما بالك حنا......؟

ممكن الحريم اللي بالكويت شفت لك متنقبة او وافقت معاك..

والموضوع مستهلك من كثر المناقشة....

واعتقد الاجابة معروفة.. فكل شخص له رؤيته الخاصة...

طيب مثلا ...

ماتخلي احد من اهلك يقود السيارة لتبداء انت ...

واذا كان كل شي تمام حنا نبداء بعدك...

تحياتي ليك..

هامة حاسوبية

15-11-07, 08:57 pm

http://filaty.com/i/710/f3dd562.h---11.gif

عاشق

أعلم أن هذا الموضوع تكرر كثيرا

وكانت - ولازالت - وجهة نظري واحدة وهي أن السماح للنساء بالقيادة ستزيد من المفاسد بسبب قليلي وقليلات المروءة والأخلاق

في حين أن هناك من هي تحترم نفسها وقد يفرج عليها الموضوع الكثير من المشاكل والحاجة ، ولكن كما يقال : البعض يخرب على الكل !

وحقيقة الثلاث أيام الماضية وإلى ماقبل 10 دقائق أحدث نفسي وأقول : ليتني خارج السعودية لأقود السيارة وأتخلص من الرجال الذين (محسوبين علينا رجال بالأوامر بس مانشوف لهم نفع) >> وحده حــــده معصبة

http://filaty.com/i/710/f3dd562.hh----2.gif

ضايع في المحبه

15-11-07, 09:01 pm

والله لو يسمحون للنساء بقيادة السياره ان تشوف البلاوي.
بسم احمد ربك واشكره
وقل يارب ان الدولة ماتسمح بذلك.......................

kinder7193

15-11-07, 09:06 pm

هلا بك اخوي عاشق بريده
تصدق الي برا السعوديه يقولو يا سعدكم باشياء كثيره خلك عن سالفه بترول وغيره
اذا بنتكلم حقوق المرأه كثيره ومنها هذا الموضوع انا لست مؤيد لموضوع لكن مره جلست مع إماراتي ويقولي
والله إنكم مبسوطين هنا بالسعوديه . لا حظ المفروض انا اقول الكلام هذا
قلت ليش قال ياخي عندكم الأذان كل الأوقات تسمعها وكل المراكز التجاريه بتسكر . ولا عندكم حريم يسوقن .يعني ما عندكم الفساد الي عندنا بالإمارات
يعني حنا المفروض نستيفيد منهم ولا نغلط غلطهم

خنا الحين بناتنا متوذيات من الشباب وهي مع أهلها بلايا سيارات وش عاد اذا هي تسوق بمفردها هذا مو عدم ثقه بالبنات ولكن الشيطان يغوي الانسان . ولا تقول المشكله إيذاء البنات موجوده قبل قياده السياره ولكن ما نحل المشكله بمشكله ثانيه

يا خي خلنا ندلع حريمنا نوديهن ونجيبهن للي يبغن

ههههه
ارجو تقبل رأيي وانا برضو بحترم رأيك

عجوز سمنسي

15-11-07, 09:18 pm

شكلك ماشفت مقطع الكويتيه اللي صادمة شجرة وشكلها مطينتها بكم كاس ومعها خويها

شخصيا القيادة للمراة بالنسبة لي ولغيري من العلماء

<<< متوهق

شخصيا لا ارى فيها شي بحد ذاتها لكنها وللاخطار اللي تبي تجيبها لنا راح نزيد الطين بله

تبي تقول البنت الفاسدة فاسدة بدون قيادة

صحيح لكنك تفتح لها مجال اكبر واكثر للفساد

نجودي وش رايك بدباب والا سيكل احسن لك من السيارة لابنزين ولاحوادث ولا هموم

اذا تطوروا شعبنا وشبابنا ومابقى الا قيادة المرأة ذيك المرة تعال ياعشقشق خلها تسوق

شبابك الحين مايبون غز بيارق وربي لو تسوق البنات عندنا مثل ماقال ابوي ان يفحجونها عريبيا بشارع الخبيب

خلنا واقعيين وبلاش مكابرة

عريبيا مطولين الشعور ولابسين الجنز المخصر بايعينها بزبيبة

شوري عليك اقضب ارضك ولاتخلي زوجتك تسوق

خذ شوري

قلب الأسد

15-11-07, 09:22 pm

عاشق يوجد في الكويت الكثير من المفاسد نتيجه لقيادة المراءه السياره
فورب الكعبه شاهدت بعيني في الكويت وبعد الساعد العاشره مساء
يكون الشباب عاى موعد مع الغزل عن طريق (ركوب الدباب) بعدة اشكال
والوان لماذا لأن الدباب يعطي راكبه الحريه بالتنقل لاصعب الطرق الى
صاحبة السياره ويبداء الغزل وخاصه عند الأشارات المروريه وامام اعين
الجميع وقد شاهدت هذا وكد لا اصدق عينك عينك ,
فكيف بشبابنا والله بتشوف شي عمر اللي بامريكا ماشافه
لكن الله لايجيب هاليوم .لأن شبابنا وبناتنا مابهم ملح اذا صار هالشي.

عاشق بس اذا صار الله يستر انا اول من يفتح (بنشر)الله لايقوله يارب.

فتاة المستقبل

15-11-07, 10:22 pm

أخ منكم ما تشبعون ولاتروون من الموضوع ...
عساهم إن شاء الله مايوافقون على سواقة الحريم ...
والله أن تنفتح أبواب مسكرة ...حنا في غنى عنها ..
وش بقى للرجل ؟؟
النفقة وهذا الحريم يصرفن على أرواحهن ..
السواقة وهذاكم تزنون وتدندنون حولها ..
بكره لافرضت المرأه سلطتها على الرجل وأستقوت عليه ..ووقع الفاس بالرأس وعجز عنها
لاتقعدون تصايحون فوق رووسنا ..

هامة حاسوبية

16-11-07, 12:08 am

http://filaty.com/i/710/f3dd562.h---11.gif

وش بقى للرجل ؟؟

هه بقى له القوامة في بطاقة العائلة

وإذا فرضت البطاقات الشخصية للحريم ماظن بيصير له داعي !

>> تحسون إنه اليوم مهب طبيعية صح

http://filaty.com/i/710/f3dd562.hh----2.gif

علشانك بس

16-11-07, 12:12 am

الرجال الحين طايحين من عيوننا شلون لو نبدا نسوق ,,
كان نبدا مانناظرهم بنص عين ,,
مثل ماقالت هامه يكفون ببطاقة العائله ,,

•°سـرىآ اللـيـل°•

16-11-07, 01:11 am

اختى سرى

يعني الفساد موجود بدون قياده ليش نقول ان القياده تبي تفسد البنات !!!!

هذا بلاء ابوك ياعقاب ,, يعني انت تبينا نزيد النار حطب !؟

ويكون بعلمك الكويت سمحت بالقياده قديما يوم الزمن صالح ومع ذلك شف وش جر عليهم هالقرار بلاااوي وأسأل الكويتين يخبرونك ,,

فما بالك بنا أحنا الزمن صار فساد × فساد ,, وتبغى في هالزمن نسمح !!

يعني العقول ياعاشق تدهورت فإذا فتح المجال للبنات رحنا فيهاا

اللحين بنقول قضاء للحوائج والضرورات بعدين الناس التعبانه بتدهور بلادنا..

لاتقول الفساد موجود وش يفرق؟

صدقني بإعطاء الحريه للمرأه كذا نزيده أضعاف مضاعفه

بعدين بالنسبه للحكم..

واجد أحكام لايوجد دليل قاطع على تحريمها فمايحتاج نسوي أغبياء ونقول أعطونا دليل قاطع ..

صح مافيه دليل يحرم قيادة المرأه لكن تحريمها من باب درء المفاسد ,,

ماأظن ياعاشق تخفى عليك المفاسد اللي بتجرها القياده لكن يبدو أنك تتجيهل والا بتثير الغير :)

خلااص ياعاشق أبدأ بمن حولك وإذا كررت الزياره للكويت أسمح لأختك أو لزوجتك بقيادة السياره :D

أقل شيء تمنى لنا ماتتمناه لأخواتك ولزوجتك ,, صح ياعشووق :) ؟

الرأي الأول

16-11-07, 01:59 am

مستوى ثقافة المجتمع وتعامله مع التجدد يفرض علينا ان نكون حذرين بمثل هذا القرار

صدقني اخ عاشق ان المسئله ليست بقيادة السياره لكن بالتعامل معها

اجتماعيا ونحن نمر بمرحله انتقاليه سلوكيه متغيره لم نعهدها منذ سنين

نظرات مجتمعنا تختلف لكن يبقي الرأي الاصوب هو حفظ حقوق الناس من العبث

بعد اجازته

ومقارنة هذا القرار بدوله اخرى اعتقد ا نها مقارنه متباينه لان تركيبه وسلوك المجتمع تخلف

الموضوع متكرر لكن تبقى نظرة المجتمع هى المسيطره

تحيتى لك

shahd2007

16-11-07, 02:07 am

موضوع ملينا من الحكي فيه ياخي من قالك نبي نسوق حنا مرتاحين كذا مخدومين محشومين مابقى الا يشيلونا للسياره من خوفهم علينا ليش تبي طلعنا من عزنا وبعدين كل مادق عود حصاه قلت حوايجهن الله واكبر ياذا الحوايج اللي ماتخلص

اتعبني خطااااك

16-11-07, 02:11 am

بصرااحه توي قاعده اهوجس لواني اسوق ويعطين ابوي بانوراااما يااااسلام
دااااااااايخه من الفرحه ماابي سواق ولا ابي احد يسوق بي ابي انا اسوق

بس مااادري احس بخوف

عاشق اما الكويت مابه مغازل الغزل عينك عينك معك ابوك اخوك زوجك ماتفرق يبي يغازل الله لايعوق
وع عليهم هم وبناطيلهم

ان شاالله ه اللون معجب الجميع

اميرة الورد

16-11-07, 03:19 am

اتصدق اخوي عاشق بعض المرات ودك تسوق مو عشان انو سياقى وما ادري كيف لا بس من الحراره وقل الصبر مثل يوم الاربعاء دخلت بنت على قاعة الامتحان وكانت متأخره مره قالت لها المشرفه وين الناس قالت البنت لو معي سياره كان جيت قبل ماتفتح القاعه بس وش اسوي جالسه اقوم اخوي ومت منه ماقام يعني لوانا كان من الحراره رحت للكليه مع الجيران>>>اللي سمعك يقول فيه جيران الرشديات مهنا جيران لاتشوفين لان البيت الواحد تقل حي من كبره....
ايه اخوي نسيت اقولك ترى لو سقنا انا سوق شاص لانه اموت عليه ميخالف مابي مرسيديس خلها لابوي لانه ماله منها

The Free Man

16-11-07, 03:05 pm

والله ياعاشق هذا مجتمع غريب جدا

هو نفسه ما يدري وش يبي

كل مافيه متناقض

هذا مجتمع ربي على ان يقول لا

صدق سعيد صالح يوم يقول: لازم اعترض احسن يقولوا عليا حمار

تحياتي

:)Peace

عبدالله الحلوه

16-11-07, 03:17 pm

عاشق ديرتي بريده

احترم رأيك واعتقد بأن الجميع هنا قد وفقوا بالرد عليه

اعجبني الهدوء بالرد

لكن ياترى لو كان كاتب الموضوع الأخ قرطبه كيف ستكون الردود ؟!!

تحياتي ,,,

عجوز سمنسي

16-11-07, 03:43 pm

عاشق ديرتي بريده

احترم رأيك واعتقد بأن الجميع هنا قد وفقوا بالرد عليه

اعجبني الهدوء بالرد

لكن ياترى لو كان كاتب الموضوع الأخ قرطبه كيف ستكون الردود ؟!!

تحياتي ,,,

ابو فهد

ياحبك تدافع عن قرطبة وتجيب طاريه باي وسيلة

معجبك طرحه؟ حط لك شات انت وياه وخله يهذر لك بهرطقاته

لو كان طرح قرطبه باسلوب عاشق لكانت الردود بنفس الوتيرة لكنه يجيبها باسلوب استفزازي

تدري وش يبي يكتب قرطبة لو نزل الموضوع ؟ يبي يقول انا مؤيد لقيادة المراة للسيارة علشان نشوف وجوه حلوة تفتح النفس وترد الروح وتحسن الفاظنا ونستمتع بجمالها وروعة مراسم وجهها

هذا اسلوب خويك يابو فهد

مستميت انت بالدفاع عن قرطبة

فتحـية

16-11-07, 03:48 pm

لو كان طرح قرطبه باسلوب عاشق لكانت الردود بنفس الوتيرة
إيه هيّن .. مير لو اللي كاتب الرد واحد غيرك تسان قلت يمكن
بس أنت صعبة :c7:

•°سـرىآ اللـيـل°•

16-11-07, 04:39 pm

لكن ياترى لو كان كاتب الموضوع الأخ قرطبه كيف ستكون الردود ؟!!

والله لايهم من هو كاتب الموضوع ,,

إذا مااعجبنا بنكون ضد واذا حلووو بنوافقه حتى لو طرحه قرطبه ,,

الشيهانهـ

16-11-07, 06:14 pm

لو يسمحون للسعوديات كان على طووووووووووول البنات يروحن ولا يقعدن بالبيت ابد

يكشتن مع ربعهن ويمكن يدخلون معهن شباب بعد وتصير الحريم سواقات ولوموزين للشباب

عبدالله الحلوه

17-11-07, 12:51 am

عجوز سمنسي

17-11-07, 12:58 am

عجوز سمنسي

انا لا ادافع بل اتساءل

لايهم ان كان معجبني ام لم يعجبني المهم اني اتعجب من اختلاف الردود رغم اتحاد الهدف مما يجعلني اشعر بأن هناك سوء فهم واستيعاب لما يطرح

لكل اسلوبه ويجب علينا ان لانحكم ونتعامل مع ظاهر الكلام وشكله بل يجب ان نكون اكبر من ذلك

تحياتي

وانا ضحت لك يابو فهد وقلت

لو كان الطرح عند قرطبة كما هو الطرح هنا او على الاقل طرح مميز بادب وعدم سوقية في الالفاظ وتعدي على محارم الناس واخلاقياتهم لقنا نفس الردود ونفس الكلام

انا شخصيا لا اعرف قرطبة ولااعرف شكله وليس بيني وبينه اي نقاط خلاف سوى مايكتب هنا

فكيف ترى اننا نخالف الرد هنا عن ماهناك؟

لا اجد شياء اقوله لك الا اننا سنظل نحترم الناس واخلاقياتهم وعادتهم

توتي

17-11-07, 01:05 am

متى الموضوع هنا ؟

اول مره اشوفه زثلاث صفحات :):)

بنت البدائع

17-11-07, 01:10 am

عاشق ديرتي بريده

احترم رأيك واعتقد بأن الجميع هنا قد وفقوا بالرد عليه

اعجبني الهدوء بالرد

لكن ياترى لو كان كاتب الموضوع الأخ قرطبه كيف ستكون الردود ؟!!

تحياتي ,,,

ملاحظه دقيقه وصحيحه 100% من الإستاذ أبو فهد

توتي

17-11-07, 01:44 am

المشاركة الأصلية كتبت بواسطة عبدالله الحلوه
عاشق ديرتي بريده

احترم رأيك واعتقد بأن الجميع هنا قد وفقوا بالرد عليه

اعجبني الهدوء بالرد

لكن ياترى لو كان كاتب الموضوع الأخ قرطبه كيف ستكون الردود ؟!!

تحياتي ,,,

يبي يصير نفس الردود بس اهم شي مايهرج بالرسول صلى الله عليه وسلم
ولا شغالته

وضوح

17-11-07, 02:29 am

عاشق ديرتي بريده

احترم رأيك واعتقد بأن الجميع هنا قد وفقوا بالرد عليه

اعجبني الهدوء بالرد

لكن ياترى لو كان كاتب الموضوع الأخ قرطبه كيف ستكون الردود ؟!!

تحياتي ,,,

صراحة ( شرهت) عليكـ ياعاشق لأني دخلت الموضوع توقعت كاتبه قرطبه بأسلوب آخر ... كانت صدمه !!!

والأخ عبدالله معه حق في سؤاله ... لأن تمنيكـ لقيادة المرأة تحقق لقرطبة مايريده ...وهو جلوسه على البلكونه ومشاهدة مايريد ،،،

...حالات الإغتصااااب والطلاق والزنا ...في الكويت لاتعد والسبب الرئيسي

حرية المرأة وتبدأ الحرية في قيادتها للسيارة ..

ولو تحجبت لأن المرأة ضعيفة ومن السهل الوصول اليها بأي طريقة ،،،

أتمنى أني أكون فهمت الموضوع خطأ !! لأنك ياعاشق دافعت

وردعت أصحاب العقول المريضة في هذا المنتدى،،،

***والعجيب أن ردود النساء أفضل وأعقل من ردود الرجال

في هذا الموضوع رغم أن الموضوع يخصهن ...!!!

هل ذهبت الغيرة على الدين ؟؟!!!

اللهم إن أردت بعبادكـ فتنة فأقبضنا اليكـ غير مفتونين ،،