قلت ابسافر قالت اشلون شتقـول
عدها ترى ما استوعب العلم فكري
قلت اصبري ماني مسافر على طول
إسبوع إسبوعين أو شهر مـدري
بس اشتهيت استأذنك قبل ما اجول
يم الديار اللـي هواهـا بصـدري
من العام ما شافت عيوني لهم زول
واليوم في قلبي هواجيس تطـري
والمعذره يا بنت ما عندي حلـول
ان ما مشيت الليل ممشاي بـدري
مار اعرفي ما شال قلبي من حمول
اخف من فرقاك يـا كـل عمـري
ودعتك الله يا بعـد كـل مجمـول
اقولها والقلـب باسمـك يهـذري
وتأكدي لا صرت انا عنك مشغـول
اني أحسب الوقت والوقت يجـري
كني أهيم بعالمـن فيـه مجهـول
واصرخ واقول انه نفذ كل صبـري
وان كان عذري لك مقدر ومقبـول
ادعي عسى رب المخاليـق يـذري
العرض الشجري