من يقطع الحبال؟

[ضمير بريدة]

لم ارى أخي من ستة أشهر !!!

اجتمعت مع أخواتي قبل شهرين!!!!

كان لنا اجتماع مع أخواني وأخواتي ونقطع بسبب المشاكل!!!!!

مالنا خبر ببيت أخوي !!!!1

اجتمع مع بعض أخواني ، وباقي أخواني لهم اجتماع أخر !!!!

الله يخلي لنا أمي والا كان ما شفت أحد من أخواني يجي للبيت !!!

من يوم اخذ الله أمانة الغاليين ما شفت أحد دخل بيتنا من أخواني

ما ارغب اجتماعات أخواني بسبب المشاكل بين الحريم !!!!!

هذه نماذج سمعتها ، وسمعت قصتها من أصحابها

كثيرة هي القطيعة بين الأخوان والأخوات وخاصة عندما يودع الوالدين هذه الدنيا الفانية
من خلف هذه القطيعة؟
من المتسبب في افساد الاجتماعات الدورية بين الأخوان؟
ما السر في عدم تبادل الزيارة في البيوت؟
ما السر في مرور الأشهر دون أن يرى أحدهم أخته أو أخيه؟
أين الصلة التي حث عليها الإسلام؟

أسئلة وأسئلة تتعب القلب وتؤلم النفس

أسئلة تحكي الواقع المرير لبعض الأسرة

والمصيبة الكبرى هي عندما تتبدل المحبة بالحقد والكره والقطيعة

والمصيبة عندما تكون هناك مشاكل مالية بسبب الطمع والجشع والاستغلال وحب الدنيا .

لكن هناك والحمد الله نماذج مشرقة ، نماذج جميلة ، علاقات طيبة ، الحب عنوانها والمودة شعارها .

لكن حديثنا عن القطيعة بين الأخوان والأخوات

أسأل الله أن يجمع قلوبنا على المحبة والألفة والمودة والأخوة الصادقة

[صيـدلآنــي]

صِلة الرحِم
لو مآفيهآ إلآ سِعة الرِزق وطول العُمر , لكفآهآ
والقآطع فآتهُ الشيء الكثير

ومِن المُؤسف من يصِل ويحرِص على البعيد دون القريب




أكثر القطيعه تأتي من الحسد , ولنآ بِقصة يوُسُف عليه السلآم مع أخوتِه خيرُ شآهِد
وأيضاً قِل الوآزع الديني والمُكآبرة , هي سبب من الأسبآب

وبآركـ الله فيكـ على التذكير

[بنت العاصي]

غياب الكبير !
واللي مالوش كبير يشتريلوه !
المصريين جابوها بهالمثل
ماعاد للاخ الكبير ذاك الدور بين اخوته الكل نفسي نفسي
لايجمعهم ولاينظم عقدهم ,
ولاننسى ان الامور الان بيدين النساء اشر مخلوقات الله !
لما تكون علاقتها كويسه مع وحده من حمواتها زبطت علاقة هذين الاخوين وكأن الاخوه منوطه بإستلطاف زوجات الاخوان لبعض !

[بريداويهـ]

تبي الصراحه
الاهل هم السبب
بحيث ماعودوا عيالهم على التواصل
وكان اكبر همهم بحياتهم يجتعون عيالهم لهم هم بس
بحيث متى ماتوفاهم الله كان اخر خبر الاخوان ببعض ايام العزاء

والقليه الباقيه
كانوا الاهل فاطنين لهالنقطه بحيث استمروا الاخوان بالاجتماع حتى بعد ان ذهب كبيرهم

اعرف لك اهل اذا اجتمعوا الابناء فيما بينهم وهم غير متواجدون يشجبون هالاجتماع بقولهم تجتمعون من ورانا؟!!!!

وبنفس الوقت اعرف ناس اذا سافروا سواء لعلاج او سياحه او عباده
يحثون ابنائهم على التلاقي
تلقى الام تتصل على بناته وتقول انتبهن لاخوانكن وشوفنهم وايضاً تتصل على الاولاد وتقول لهم انتبهوا لخواتكم يمكن يحتاجن شي



واحسن حل برايي (واشوف انه ناجح جداً مع الكثير)

هو اقامه اجتماع كل شهر
يكون باستراحه محايده ويكون الاجتماع قطيه يدفع الصغير والكبير


هالشي يبعد الكثير من المشاكل مستقبلاً


تحياتي

[رمز الحياة]

المشكله اذا صارت القطيعه بسبب خلافات ماديه بسبب الارث !!
هنا الطامه الكبرى

[عذبـــــة]

آآه بس .. ربي يطول بأعمارهم على طاعته ولا يحرمنا وجودهم معنا
هم نور البيت .. وهم اللي يجمعون .. هم ملجأنا عند الضيق قبل الفرح بعد الله
يووووه لما ادخل البيت ولا الاقي واحد فيهم .. تضيق فيني البيت بما رحبت لين اشوفه بخير ويرتاح قلبي


لكن لما ربي يتوفاهم وتفضي البيت تثقل الاجتماعات على الإخوه
وينشغلون بالحياة .. واعتقد السبب الرئيسي الزوجات في الغالب
وحده تقول امك وابوك متوفين لاتربطني بخواتك واخوانك ..
والثانية تقول ماالي خلق حريم اخوانك اروح بس انقهر وارجع ..
والثالثة تقول خواتك مايواطنوني ماودي اروح ..
والرابعه تقول عيال اخوانك يضربون عيالي والله مايشوفوني لين يكبرون عيالي ..
ويالله من هالحكي والإعذار لين تثقل الإجتماعات وتكون بالأعياد فقط ..

واذا هي على المال فهم يختلفون عشانه حتى بوجود الوالدين ..
مااقول الا الله يطول بأعمارهم ويخليهم لنا ولا يحرمنا شوفة عيونهم كل يوم ..

[شميساوي]

البلى كله من تحت رآس الحريم ....

الإجتماعات تنقطع بسبب أن زوجة الأخ ما تبي أحد يجي عندهم و يحوس بيته ..!!

وهذي تقول وش حيثها هذي ما تحط في بيتها عزايم ...

أجل أنا بعد ما أبي أحد يطب بيتي ...

و هلم جرا من التقليد الأعمى ...

...

الحسد هو المحرك الأكبر لـ أية مشكله عائليه ...

تحصل هذي تغار من هذيك ,, هذي يرزقه الله بـ الذرية ...

وهذي ما كتب لهم الله رزق ..!!!

تحسدهم و لا تبي تشوف رقعة وجيههم ,, تقل هم اللي قاطعين خلفهم ..!!

,,,

قعاطه (( مسأله ماليه )) ...

يعني الوحده تلقاه (( صرم )) بخيله ماتبي تدفع ريال علشان صلة الرحم ..!!!

تلقاه تقول لـ رجله و تشيشه ...

وشلون حنا بس ثلاثة أنفار ... و ندفع مثل أخوك فلان اللي له ذرية كبيرة 10 انفار ...؟؟

يعني مسألة بخل حتى ولو كان على حساب صلة الرحم و المتعه ...

و الرجل ما يصدق خبر ,, الدعوى به توفير دراهم ,, على طول يقمط على مخباته ...

ويمد لسانه شبر ....

طيب ما ناظرت لأخوك فلان اللي ماله بزران أبد ,, بس يدفع زي اللي عنده (( دكله )) بزارين ..؟؟؟

يا أخي ما أدري هي نذاله ....؟؟؟

أو نذاله ؟؟؟

أو نذاله ....؟؟؟؟

أختر اللي تبي منهن ...

بس الجواب النهائي أن الناس صايرين منذل بصورة مرعبه ...

تشـــــآآآآو يا حلو


.

[القلم الصريح]

مالها دخل التربية والتعويد ...... الشيطان ينزغ بين القلوب
دايم انشدوا الله الثبات .
كثير اخوان كانوا يتواصلون ونزغ بينهم الشيطان وصاروا شذر مذر
مع قلم صريع تلمس الحقيقة ..........

[بريداويهـ]

طيب ليش نحط للشيطان مدخل ؟

ليش نخلي فلان يعزم ونحوس بيته واخرته هو الي مقصر وحنا ماشاء الله علينا !!!

برايي لو كل واحد مننا يدور عن مداخل الشيطان ويقفل عليه كان كنا بخير


اول هام
ليش البذخ ؟؟؟
المراد اللمه
عشان كذا دجاج وتحته رز وماء عشان محد يغص <-- هذا مدخل المصاريف وسكرناه

وليش كل عائله تدفع ؟!!! (يحط فروقات بين العوائل بحيث يقسم فلوس الاستراحه + العشاء على عدد الحاظرين كلهم من سن المدرسه فما فوق حتى الشغالات يحسبن) <-- هنا سكرنا بابين لابليس يدخل بهن وهو فرق العدد بالعوائل وعدم المساواة + انهم يجون لبيت احد ويخربون واهل البيت ماغير ينظفون ورانا


تدرون الاراده مافيه
وكلهم يسمعون لابليس

وعلى قولتكم الحريم يخربن
من ناحية الطيه صراحه قهر
وهالشي معانيته بحياتي
على فكره لصار شي من ناحية ال زوجي اقول لرجلي ادفع عادي اهم شي اللمه

لكن الي يقهرن اني لطلعت جمعة حريم وخاصه مع قراباتي انا
يحطون القطيه على الحريم المتزوجات بس
فعادي تجي وحده معه درزن بنات تدفع مثل ما ادفع انا الي مامعي غير بزر مابعد طلعن سنونه
وهالنقطه تحرمن من جمعات كثير
والسبب ما اقدر افرض على زوجي يدفع كل ماطلعت قطيه فوق الـ 50 ريال
للمعلوميه هو ماقصر
لكني انا نفسي استحي كل يوم اطلب منه خاصه لجت الاجازه الطويله وجت معه الطلعات الي ماتخلص



تحياتي

[ضمير بريدة]

اقتباس:  المشاركة الأصلية كتبت بواسطة صيـدلآنــي     <b> صِلة الرحِم </b> لو مآفيهآ إلآ سِعة الرِزق وطول العُمر , لكفآهآ والقآطع فآتهُ الشيء الكثير ومِن المُؤسف من يصِل ويحرِص على البعيد دون القريب أكثر القطيعه تأتي من الحسد , ولنآ بِقصة يوُسُف عليه السلآم مع أخوتِه خيرُ شآهِد وأيضاً قِل الوآزع الديني والمُكآبرة , هي سبب من الأسبآب وبآركـ الله فيكـ على التذكير

نعم صدقت الصلة فيها الكثير من الخير ، ويكفي أنها من رضا ربنا

اتفق معك ان بعضها بسبب الحسد ، ولكن هناك قطيعة ليس لها ما يبرردها ، الغالبية يقول : مشغول بالدنيا الله يكفينا شرها !! والقطيعة ماهي من الشر؟

[ضمير بريدة]

اقتباس:  المشاركة الأصلية كتبت بواسطة نبضها انت     غياب الكبير ! واللي مالوش كبير يشتريلوه ! المصريين جابوها بهالمثل ماعاد للاخ الكبير ذاك الدور بين اخوته الكل نفسي نفسي لايجمعهم ولاينظم عقدهم , ولاننسى ان الامور الان بيدين النساء اشر مخلوقات الله ! لما تكون علاقتها كويسه مع وحده من حمواتها زبطت علاقة هذين الاخوين وكأن الاخوه منوطه بإستلطاف زوجات الاخوان لبعض !

نعم متى ما كان هناك الأخ الواعي والحريص والمهتم لاجتماع أهله سوف تستمر بإذن الله العلاقة ، حتى لو لم يكن الكبير ، لكن بالتأكيد الكبير اولى من غيره.

وبالنسبة للنساء اتفق معك تمام الاتفاق ، وهناك اتفاقيات ثنائية بين الزوجات وإقصاء للاخريات، لكن الى متى يبق الأمر بيد النساء؟

[ضمير بريدة]

نعم اختنا بريداوية للاجتماعات الشهرية جميلة ولكن مع الاسف حدثت بسبب النساء مشاكل وانقطاع في هذه الدوريات، وكل واحدة تقول ليش فلانة وليش علانة ، وهناك من تريد الحضور دون تكليف عليها !!!!!

[ضمير بريدة]

اقتباس:  المشاركة الأصلية كتبت بواسطة رمز الحياة     المشكله اذا صارت القطيعه بسبب خلافات ماديه بسبب الارث !! هنا الطامه الكبرى

والمصيبة عندما يأكل أحدهم مال أخوانه ولا يريد منهم الكلام او الشكوى او الاعتراض!!!!!

[ضمير بريدة]

أختنا عذبة الله يخلي لنا والدينا ، هم عمار البيوت

واتفق معك تمام الاتفاق في أمر الزوجات ودورهن بالقطيعة ، وهناك مع الاسف شللية بينهن ، والرجل مع حزب زوجته

[ضمير بريدة]

اقتباس:  المشاركة الأصلية كتبت بواسطة ṃąĞỉ¢ĭặη     قعاطه (( مسأله ماليه )) ... يعني الوحده تلقاه (( صرم )) بخيله ماتبي تدفع ريال علشان صلة الرحم ..!!! تلقاه تقول لـ رجله و تشيشه ... وشلون حنا بس ثلاثة أنفار ... و ندفع مثل أخوك فلان اللي له ذرية كبيرة 10 انفار ...؟؟ يعني مسألة بخل حتى ولو كان على حساب صلة الرحم و المتعه ... .

اكثر ما يفسد الاجتماعات هي مسألة القطة ، وهذا عنده عيال كذا وأنا ماعندي الا كذا ، ومشاكل لا تنتهي
لكن وجود شخص حكيم ولدية القوة سوف يحل الكثير من المشاكل