صديقي يعيش في الظل

[أدولف]

لي صديق ماادري هل المفروض أن ألقبة صديق أو أمشي على كلامه اللي يقول فيه لولا الله ثم الصدفة والموقف لما صرت بقربي ولما صرت أمام قلبك.
هذا كلامه ولا حرفت فيه ولاكلمه ولانيب متكلم عن الصداقة كلها بس أبي أتكلم عن الحالة هذي بالذات لإن هذا الإنسان يعز علي موب للصداقة العادية والطبيعية اللي أكنها له وهو يعد مدري عنها لإنه غامض ويعيش في الظل زي مايقول هو, الظلال ضاله الحكيم.
هو يطفشني واجد ولي بدائل عنه ولكن سبحان الله فيه شي يخلي الإنسان يجلس ويثابر ولإني بشر فأنا تعلقت فيه أخو وكرهت فيه غموضه وجفافه للجميع

هذا الشخص اللي أبغى أبعد الظلال عنه وأكشف نوره وسطوعه فيه صفات حسنة كثييير بغض النظر عن الأشياء الصغيرة اللي تخلي الإنسان قطعا موب معصوم.
وبقول الصفات موب رياء فيه لإني متأكد إنه مايفكر ولا واحد بالميه باللي أسويه والصفات السيئة بقولها مو إساءة ولا غيبة بس الغاية تبرر الوسيلة وأنا لجئت لأول الحلول.

عفو وتسامح ولين وحكمه وذكاء وطيبه ولطافة وإصرار وقمه الصفات تجتمع في الإيثار اللي شفته وعشته معاه كثير زهز قمه الأخلاق وزد على هذا المستقبل اللي ينتظره.
وكثير من الصفات الثانية اللي منيب قايلها خوفا من الإسراف والله.

يكفي انه يقرا 10 ساعات باليوم!!؟؟؟؟
والله اني أتفاجئ

ونجي للنقيض. الإنسان هذا يحاول يعزل نفسه عن المحيط بأي شكل بتصنع الجفاف ولخصلة أبغضتها فيه وهي جنون العظمه الي أحسها فيها. مو كبر لإنه مثال للتواضع بس عنده إصرار عجيب على رايه ومعتد بنفسه ومايتزحزح عن اللي يقوله وهذا ينفر الناس منه كثير ..
جنون العظمه فيه خلاه يتضايق من الجلوس مع بعض الناس ممكن بعض أنا أبرر له وأقول ثقافته الكبيرة وعلمه يمنعه بس ولو.

الأصدقاء اللي حاولت أعرفه عليهم واللي ماجازوا له طبعاً سألتهم عن رايهم فيه فقالوا كل الصفات الحسنة اللي قلتها فيه ولكنهم قالوا كلمة قوية وحسيت إنها الكلمة اللي في بالي له . قالوا هذا لايمكن يكون صديق !

كان وصلكم شي من اللي قلته عطون تحليل مبسط وحل مختصر مفيد كافي شافي إن وجد إلا البتر مانيب أحبه.
بنظري حرام إنسان مثله يعيش خلف الكواليس

حفظكم الله من كل شر.

محبكم
عبدالعزيز.

[بحبوحـــه]

أدع له
وربي مستجيب الدعاء

[أدولف]

اقتباس:  المشاركة الأصلية كتبت بواسطة بحبوحـــه     أدع له وربي مستجيب الدعاء

الدعاء بعون الله للمسلمين أجمعين,
بس أخصه بالدعاء بأيش.
بإن الله ينقص من عقله مثلاً أو يزيد من جهله أو يخليه يتنزل على حساب أشياء حسنة فيه

[قيدوم]

أهلاً أدولف /

اقتباس: لي صديق ماادري هل المفروض أن ألقبة صديق أو أمشي على كلامه اللي يقول فيه لولا الله ثم الصدفة والموقف لما صرت بقربي ولما صرت أمام قلبك

قلتها وانتهيت ... والأصدقاء تصنعهم الصدف والمواقف

اقتباس: عفو وتسامح ولين وحكمه وذكاء وطيبه ولطافة وإصرار وقمه الصفات تجتمع في الإيثار اللي شفته وعشته معاه كثير زهز قمه الأخلاق وزد على هذا المستقبل اللي ينتظره. وكثير من الصفات الثانية اللي منيب قايلها خوفا من الإسراف والله

وجاين تشكيه ... حرام عليك

هذا حطه فوق راسك وإن بغى لايشوف الشمس أبد

اقتباس: يكفي انه يقرا 10 ساعات باليوم!!؟؟؟؟ والله اني أتفاجئ

ماشاء الله
هنا مربط الفرس ملاقي صديق أحسن منكم
نيّاله والله

اقتباس: الإنسان هذا يحاول يعزل نفسه عن المحيط بأي شكل بتصنع الجفاف ولخصلة أبغضتها فيه وهي جنون العظمه الي أحسها فيها. مو كبر لإنه مثال للتواضع بس عنده إصرار عجيب على رايه ومعتد بنفسه ومايتزحزح عن اللي يقوله

ربما ثقة وليست جنون عظمة !

اقتباس: الأصدقاء اللي حاولت أعرفه عليهم واللي ماجازوا له طبعاً سألتهم عن رايهم فيه فقالوا كل الصفات الحسنة اللي قلتها فيه ولكنهم قالوا كلمة قوية وحسيت إنها الكلمة اللي في بالي له . قالوا هذا لايمكن يكون صديق !

أنت تحكم عليه وليس الآخرين بصداقته اولا !
وهل هم منزهون .. عجبي
وترى الزين مايكمل

اقتباس: عطون تحليل مبسط وحل مختصر مفيد كافي شافي إن وجد إلا البتر مانيب أحبه

لايوجد داء أصلا !

عموماً
شف وأنا أختك أنا ولله الحمد لدي العشرات من الصديقات الصدقوات فعلا ولاأستغني عنهن بأي حال من الأحوال
كل وحده لها طريقتها وشخصيتها تختلف عن الأخرى وفيهن بعض الطباع ماتناسبن أبد بس مافيه إنسان كامل
أشوف الجوانب الحلوة وأغمض عن الجوانب اللي ماأحبه وألتمس الأعذار لهن أحبهن كيف ماكانن
وكما لديهن عيوب فلا أخلو أنا أيضا من العيوب والطباع التي لاتناسبهن أيضاً
ومن يريد إنسان أو صديق كامل الصفات لن يجد !


تحيتي ,,

[أدولف]

أنا ماأشكيه أنا أبيله الخير.
حرام إنسان مثله يعيش بالظل ..

المشكلة إنه إذا تكلم مع إنسان أقل منه زي مايقولون "يسلك له" ويقول ما أناقش اللي أعلم مني أو اللي يساويني وهذا جنون عظمة أخاف تجره للكبر.

هو سحرني وممكن يسحر الجميع لولا إنه مايستخدم سحره إلا على اللي يعرفهم 99%

مشكورة أختي

[قلم وردي]

..

يمكن الظل اللي تشوفه انت يكون شمس ساطعه بالنسبة له ..
لا تجبره أو تحزن على ( الظل ) هذي قناعة شخصية .. وقدرة ..
وهو ما عنده القدره على مخالطة الناس بشكل دائم ..


في علاقات صادقة غير ( الصداقة ) لا تحصر نفسك بالمسى هذا ..
ليكن شخص عزيز تحب حسناته .. وتستفيد من علمه .. وتحترمه ..


انا اتوقع ان تاثيره قوي عليك .. وانت تخشى تتطبع باطباعه التي لا تحب ..


موفق دائماً ..

..

[أدولف]

اقتباس:  المشاركة الأصلية كتبت بواسطة قلم وردي     .. يمكن الظل اللي تشوفه انت يكون شمس ساطعه بالنسبة له .. لا تجبره أو تحزن على ( الظل ) هذي قناعة شخصية .. وقدرة .. وهو ما عنده القدره على مخالطة الناس بشكل دائم .. في علاقات صادقة غير ( الصداقة ) لا تحصر نفسك بالمسى هذا .. ليكن شخص عزيز تحب حسناته .. وتستفيد من علمه .. وتحترمه .. انا اتوقع ان تاثيره قوي عليك .. وانت تخشى تتطبع باطباعه التي لا تحب .. موفق دائماً .. ..

أنا يعز علي هو .
مابي الناس يتكلمون عنه ويوصفونه بالغرابة وأحياناً " الإضطراب"
تعرف إذا قالوا لك إنه نهر عذب ولكنه مجمد نفسه بنفسه فحرام أمنع الناس من الماء
شرفت ياخوي

[| ~ ســمــو ~ |]

اهنيك لعلاقتك بمثل هالشخص الذهبي .,’
قد يكون حكي من حولك بدافع الغيره .. لا تلتفت لهم .. و حافظ على صـــديــقــــكـ

[أدولف]

اقتباس:  المشاركة الأصلية كتبت بواسطة ســـــــمـــــــو     اهنيك لعلاقتك بمثل هالشخص الذهبي .,’ قد يكون حكي من حولك بدافع الغيره .. لا تلتفت لهم .. و حافظ على صـــديــقــــكـ

كل شي ممكن بس اللي خلاني أكتب الموضوع هو إنه سألني قبل عشر أيام يمكن
أنت بديت تكرهني!!!!

حسيت إنه يراجع نفسه وحبيت أساعده