قبل كم يوم جاء أحد الشباب للإستراحه ومعه (كلب الماني) حشا مهب كلب إلا ثور .
المهم بعد ماسهرنا وصارت الساعه ثنتين قال راعي الكلب طالبك ياخن بط أبخلي الكلب عندكم الين بكرا المغرب واجي آخذه .
صراحه الكلب مزعج بس ينبح ..قلت لــ (عبيد) رفيقي واللي ينام معي بالإستراحه وش رأيك ؟؟ قال خله ومنها يحرس الإستراحه .
قلت لراعي الكلب إربطه زين وخله .
بقيت انا وعبيد (بتشديد اليا وكسرها) ودخلنا للغرفه وشغلنا المكيف إستعداد للنوم وبالفعل نمنا .
انا متخرج من الجامعه وماعندي دوام يعني انام ومتى ماقمت .لكن رفيقي عبيد عنده دوام بالجامعه ولازم يقوم بدري حوالي الساعه ست الصبح .
يوم صارت الساعه ثلاث ونصف واقوم وليتي ماقمت ..قمت ابي الحمام وانتم بكرامه وانا رايح للحمام ويوم وصلت للحمام واثاري الكلب ولد الكلب منطلق رباطه ويجي يمشي مليون لمي وينبح نبح غريب وشكله ناوي يبطش بي وعلطول ادخل للحمام واقفل الباب واجلس اصوت واصرخ لعبيد ولاحس ولاخبر واصرخ واصرخ ومافيش فايده
والكلب جلس عند باب الحمام ومااسمع غير صوته اللي يوحش.
والله ياعليه سنون تقل شفرات حلاقه .
وتطق الساعه اربع وانا بالحمام واصوت لعبيد ولاحس ولاخبر وافتح الباب شوي يوم قام ولد الكلب وهجم علي واصك الباب .
المهم جلست بالحمام الين رن منبه جوال عبيد الساعه ست وانا حالتي حاله .
بس اللي برد تسبدي إن رفيقي عبيد يوم قام وطلع يبي يغسل مادري بالكلب ويوم قرب للحمام واومير يشعثه الكلب ويهج عبيد لباب الإستراحه الخارجي يفتح الباب ويهج للشارع والكلب وراه واومير اطلع من الحمام ياناس تقل طالع من جهنم .
وعلطول ازبن الغرفه واتصل على راعي الكلب ولا رد علي .
وأنا ماسمع غير الكلب ينبح وعبيد يصرخ وأثر عبيد بصندوق الهايلوكس .خخخخخخخ
ولا فك عبيد من الكلب غير بنقالي على سيكل . الكلب شاف البنقالي على السيكل ويلحق البنقالي ويطب عبيد من صندوق الهايلوكس ويدخل للإستراحه ويقفل الباب
ويدخل علي وهو منهبل .
ويوم دري عبيد إن الكلب حاجرن من الساعه ثلاث ونصف إلى ست ويطيح مغشي من الضحك علي وانا مغشي عليه من الضحك .
اللي يشوفنا هاكاللحظه وحنا نضحك يقول رايحين فيها .
المهم ركبنا السياره ورحنا ندور الكلب ونشوف عدد ضحايا ه ويوم جينا واثره لعبن بالنقالي لعب ومعضض رجليه وشاقن وزرة البنقالي ورجلين البنقالي كلها دم والبنقالي راقين أثله ومتعنقط فيها والكلب مرابط تحت الأثله
فيلم هندي اللي حصل لخن بط وعبيد والبنقالي . تعبت من الكتب . اكمل لكم البقيه بعدين.
العرض الشجري