وقت الزرف هالحين لحرمية العيد ...

[ذات]

هلا وغلا ..يالله حيهم جميع ....

وعيد مبارك مقدماً ...وعساكم من العايدين الفايزين ومع أحبابكم سالمين ...

اسبوع الزحمه ها الأسبوع ..وإسبوع الأغراض الأستثنائيه للعيد ..
مليون شغله عشان تنقضي في إسبوع ...ولكم أن تتخيلوا الوقت وسرعته لمن يكون البال مشغول ومزحوم ...
وعلى بالك مافي أحد مشغول الا انت وفجأه تطلع السوق تلقى أربع مليون يفكرون نفس تفكيرك ونفس الزحمه ..
وهاتي حووووسه في كل مكان ومن مجمع لين مجمع وأحيانا نحصل قطعه في مكان ..
ومانلقى لها تركيبه تناسبها إلا في مكان ثاني ...

طبعا جو فنتازي ...وعجقه ...وهناك ناس كثير تحب العجقه ...تدرون ليه لأنه موسم الزرف والسرقه على أصولها ..

خلال ها الأسبوع ...فقط كلما دخلت مجمع أسمع يمكن خمس أو ست حريم يدورون على شناطهم ...
شلون تنسرق ما أدري ....المشكله تكون معاها ...لكن تتفاجأ إنها إنسرقت ...في وسط الزحمه ...
وماذهب لن يعود ....

[gdwl]لفته بسيطه للمتسوقين والمتسوقات ...وأركز على المتسوقات ....[/gdwl]
اول شيء ..
لمن تكونين عند الكاشير وزحمه دور ...انتبهي للشنطه ...حاولي تخلينها قريبه منك ولو تحطينها بحظنك ..
لأنك ما تضمنين اللي وراك وش يسوي ...احيانا ثلاث يوقفون ومتفقين ويسون زحمه وهوشه
وانت تنتبهين لهم وماتدرين إلا والشنطه منسرقه في حين غفله ...
أو تدخل يدها بشنطك وبسرعه البرق وانتي ياغافلين لكم الله ...



ثاني شيء وهو الأهم ...
معظمنا يفكر إنه إذا ماشال فلوس يكون بمأمن عن السرقه ...وهو مايدري إنه ينسرق إلكترونيا ومن الكاشير اذا كان حرامي ....

الحين لمن تجيبين مجموعه من الملابس وتحطينها عند الكاشير ..وتحاسبين بلكارد ...مو تكتبين الرقم السري ..
وهو الكاشير يدخل السعر ويسحب ..هنا مربط الفرس ...
وقت التدخيله للسعر يزيد عليك بلحساب دون ما تدرين اذا كنتي مو نبيها للموضوع يعني بلوزه 150ريال يدقها وقت السحب ميتين ...وكذا على بقية الأغراض ...

ويعطيك العدد الأجمالي وانتي ماغير تسحبين الورقه دون ما تحسبين ...يعني إنزرفتي دون ماتدرين ...
وحده أعرفها لقيت أربعه ألاف مسحوبه من الرصيد ...كلها بلايز ...
شلون ما عرفت إلا بعد مراجعة البنك وعرفت إنها سحوبات محلات ...
يعني ما دققت وهي تاخذ الفاتوره كل مره تشتري ...

طبعا أتوقع فيه أنواع سرقات أكثر وأكثر ....ناهيك عن سرقة الأطفال وسرقت المتسولين ...وقصص كثيره ..
حبيت بس أحط تنبيه بسيط على ها الشيء وإللي بلبنوك يعرفون أكثر مني لأنهم تجيهم ها الوقت إتصالات...كلها سرقة بطايق وأرصده ...


أحبائي الموضوع مفتوح للنقاش ...إللي عنده تجربه عن هاالموضوع أو سمع شيء عن إسلوب جديد بسرقه يكتبه ..
عشان البقيه يستفيدون ...وتعيدون وانتم مبسوطين مو مزروفين ....
نسأل الله للجميع التوفيق ....


اختكم ذات ....