¸¸.•'´¯*@ دروب الولـــه @*¯´'•.¸¸

[بـدر اليحيى]

](( دروب الوله ))

الهوى لا جاء هبوبه لعن أبو من يخذله
ـــــــــــــــــــــــــــــــــــــ والغلا وإن فز فزت دنيتي وآمالها
والغرام اللي جهلته يوم جاني بأوله
ـــــــــــــــــــــــــــــــــــــ فزت أغصاني تهلي والهوى يبرالها
مرحبا والقلب غر(ن) والهوى ما يجهله
ـــــــــــــــــــــــــــــــــــــ مرحبا به وسط روح(ن) ما شكت غربالها
مرحبا واللي هويته ليل بعده مطوله
ـــــــــــــــــــــــــــــــــــــ أربع أعوام(ن) أراقب نجمته وأرقالها
كنت يائس من حياتي والدقايق مهمله
ـــــــــــــــــــــــــــــــــــــ لين ماجتني يسابق خطوته خلخالها
فزت عروقي تبيها والمشاعر سنبله
ـــــــــــــــــــــــــــــــــــــ رقصه طلت بهاها يوم شفت إقبالها
كامله سبحان رب(ن) في حلاها كمله
ـــــــــــــــــــــــــــــــــــــ ما بها عذروب واحد غير حبة خالها
حبة الخال بشفاته في عيوني ما أجمله
ـــــــــــــــــــــــــــــــــــــ والبقيه كل ميزه بالبشر تشتالها
يا رفيقي وأنت عارف بالمشاعر والوله
ـــــــــــــــــــــــــــــــــــــ يتعب الروح بحضوره لين تلقى فالها
والمشاعر بوح شاعر بالقصايد شـب له
ـــــــــــــــــــــــــــــــــــــ نار من بدع القوافي يا بخت موالها
يا رفيقي هاك بوحي والعروق مهيله
ـــــــــــــــــــــــــــــــــــــ فوق جمر الشوق تغلي روح جيب أحوالها
الهنوف اللي لقاها كل ليل أتئمله
ـــــــــــــــــــــــــــــــــــــ لين عيني مـن بطاها ودعت همالها
إركب اللي لا نخيته يا زبون المرجله
ـــــــــــــــــــــــــــــــــــــ يطربك في عز شانــه والحموله شالها
سوبر(ن) لا صرت فوقه يا رفيع المنزله
ـــــــــــــــــــــــــــــــــــــ يستعز بثقل سايق للمكينه غالها
إركبه والدرب واضح والسحايب ظلله
ـــــــــــــــــــــــــــــــــــــ من يمين القاع وأرضك لا تخاف إرمالها
جيب من صنعة مهندس يوم جابه حط له
ـــــــــــــــــــــــــــــــــــــ بالمكينــة زود قوه بالعنــا غنا لها
قير من خمسه غيار(ن) عزته لا فز له
ـــــــــــــــــــــــــــــــــــــ تشتعل نار السبايــك لا بغى خيالها
والمراتب عرش تاجر بالنعومه دلـــلــه
ـــــــــــــــــــــــــــــــــــــ بالفخامــة ما يراعــي دنيتــه وأموالها
لون ديكوره ضباب(ن) والخشب متبلله
ـــــــــــــــــــــــــــــــــــــ والدركســـون بمثبت للعنـــــا تمثالها
فتحته بأول جبينه تاج عز(ن) جمله
ـــــــــــــــــــــــــــــــــــــ والبروق البيض عينه لا قدح ضوا لها
والبدي باللون لولو يبهر اللي خيله
ـــــــــــــــــــــــــــــــــــــ إصنعوه الفنس لأرض(ن) عزها بإرجالها
وارد النيسان سوبر لا نخيته إزهله
ـــــــــــــــــــــــــــــــــــــ يمتطي رمل الجزيرة والسهل وجبالها
سوبر(ن) معروف وصفه بالنوايف منزله
ـــــــــــــــــــــــــــــــــــــ ما يطوله يا السنـــــافي من يعد ريالها
إركبه والعلم يا صل و الأمانه وصله
ـــــــــــــــــــــــــــــــــــــ فوق متنه يا العصامي والسماء بخيالها
ادعس البنص بجلافه والتوانك فلله
ـــــــــــــــــــــــــــــــــــــ و البوالين العزيزة لا تخاف أهوالها
قلها الوافي تعنا راح جنب منزله
ـــــــــــــــــــــــــــــــــــــ راح شمل عن مكانك للوعر وشمالها
دون عرعر دون لينه والصعاب إستسهله
ـــــــــــــــــــــــــــــــــــــ ما يحسب للخساير والبشر وأقوالها
قله إني في سعاده والشعاب مسيله
ـــــــــــــــــــــــــــــــــــــ مع خوي(ن) لا زهمته للثريا طالها
وسط روض أخضر أغني والقصيد أموله
ـــــــــــــــــــــــــــــــــــــ من حروفي جبت قاف(ن) من سمعها قالها
و النفود أحمر جبينه والسيوف مكحله
ـــــــــــــــــــــــــــــــــــــ والغدير إحتار مايه والزهر يختالها
جالس(ن) والنار حيه والدلال مهيله
ـــــــــــــــــــــــــــــــــــــ والحطب جزل(ن) جمعته قبل أجي في جالها
قله بنعمه و شوفك باللقاء يستعجله
ـــــــــــــــــــــــــــــــــــــ والحياة اليوم دونك طايلات أميالها
قله إني أتمنى شوفته وأتخيله
ـــــــــــــــــــــــــــــــــــــ قدم عيني وسط روض(ن) فايحات دلالها
إنتسامر بالسوالف والغلا في منهله
ـــــــــــــــــــــــــــــــــــــ إنتعاتب لين تصفى بالربيع ليالها
منيت أعيوني أشوفه يوم شوقه ميله
ـــــــــــــــــــــــــــــــــــــ يم ضلوعي في حنانه لا وطت منزالها
تمرح بقلبي عساها كل ليله تدهله
ـــــــــــــــــــــــــــــــــــــ في حنانه لين تغفى وأتحضن شالها
وصل الصورة عساها تاصله مستعجله
ـــــــــــــــــــــــــــــــــــــ من خيالي يا رفيقي و العوض جوالها
بعدها عود تجاهي لا تطول المسئله
ـــــــــــــــــــــــــــــــــــــ فوق جمر الشوق قلبي والغلا فنجالها
هات علمه والبشاير صاحبك لا تخذله
ـــــــــــــــــــــــــــــــــــــ هاتها والراس سالم هات لي أحوالها
بدر اليحيى
11 / 11 / 1429