.•' * `'....بعــض المواقــف .. مــاوراهــا معـاذيــــر .....•' * `'

[شيهانه بـ كف صقار]

[align=center]الوقـت والله مايحشـم المناعـيـر
لاهو على كيفك ..ولاهو بـودّك

تصيربه .. اشيـاء مـاودك تصيـر
والنفس عن شي ٍ يفيدك ... تلـدّك

احذر تهين النفـس لجـل الدنانيـر
حتى لو ان الحـال بالحيـل حـدّك

اصبر على دنياك ... لو مابها خيـر
لاتشتكي حتى لو الوقـت ضـدّك

وان حدتك سود اليالي على الغيـر
لاتطلـب الا واحـد ٍ مـايـردّك

عليك .. باللـي عالـم ٍ بالمقاديـر
اليا تعبت وبيّـح الوقـت سـدّك

وان جات للواجب وجا منك تقصير
مالك نعم .... لو سالم الزير جـدّك

بعض المواقف ..ماوراهـا معاذيـر
اما بخـدّ العـذر .... والا بخـدّك

ومن قدّرك ... لابد تعطيـه تقديـر
ولا تعدّه شي .... مـن لا يعـدّك

ولا تبرر للفشـل ..... اي تبريـر
افهم .. وميّز بين ضحكك وجـدّك

للكل ند .... ولا يجي ندّك صغيـر
اعرف ترى مقياس حجمك بنـدّك

الفكر يطلب عقل والعقـل تفكيـر
والشعر بحر ٍ بيـن جـزرك ومـدّك

والشعر عندي غير كل الشواعيـر
غصب ٍ عليك اليا قريتـه يشـدّك[/align]