صبحكم الله بالخير
الحصان الأسود
قالو قديما اللي مايعرف الصقر يشويه !!
,,,,,,,,,,
لمبــة
والله سالفتك هذي يبغالها سفرة يحبه قلبك نمسك السريع !!
ماندري إلا وحنا واصلين مشوارنا اللي أتفقنا عليه !
أيه ترى اللي مريت به ذيك العصرية يتكرر كل يوم بذاك السوق
المشكلة إذا قلت للي يلبسون ويفصخون الثياب المزركشة ..ماينفع كذ!
لازم يكون الواحد على طبيعته ..! قالوا لك لازم نجاري الناس ..على قولتهم (مشيوف) !!
هم ياويلي يحسبون الحياة تقليد بتقليد ...طيبين على نياتهم لكن مايفكرون بعقولهم صايرين
ينفذون اللي يوصون عليه وبس .!
حراج ابوريالين كاثر بسوقنا ..ومثلك عارف مافيه أشين من العناد بالخصوص إذا صار
من أشخاص مالهم إلا رأيهم ..!
ماعلينا ...
إلا قلي يالمبة ..أنصحك هاليومين لاتقرب الحمام
ماعاد منهن فايدة ..!
لكن خير ماسويت يوم بعت حوش القراشيع اللي بجميعانة
انت تدري موضة إنفلونزا الطيور كثير الهرج عنه هالأيام !
على فكرة
مادريتا ؟؟( عاد هذي كلمة سديراوية بس والله تعودنا عليه )
الله يغربل ابليسهم طاش ماطاش علمونا كلام غير كلام الخبوب !
اقولك انافكرت بشيء !
انا مليت ودي انسحب من هالسوق
لاتقول ورااه . يا اخوي صار حراج المقاصيص
ودي افتحلي دكان جديد ..اجلس فيه لامكدر ولامندر
اللي يبي بضاعتي يجي يشتري مني وابيعله كل شيء اصلي ومضمون!
شغل التلفيق والزركشة والوردات (خلاخل والبلا من داخــل ) ماعاد يناسبني
انا يالمبة احب الصراحة ودي كل شيء على المكشوف حتى لو كانت الصراحة صعبة وقاسية
إذا جت من اخو وجار وزميل اقبلها ...ليش كل شيء يزعل ؟
بعض ربعنا بهالسوق الله يهديهم ...يحبون كلام مكرر اهم شيء امدحن وامدحك .. وعلى هالسيرة
يالمـبة
انت تذكر جيراننا بالحارة الأولة ؟ كل مانطلع وندخل يلزمون عليك بالعشاء والغداء ..!
المصيبة إنهم ماهم صادقين ...لو وافقت راح يعشيك ويغديك وهو مقهور منك !
ياخوي الله لايبارك بهالعزيمة لاصارت للمجاملة بس !
ليش الواحد مايكون على طبيعته ؟ ويتعامل مع جاره وصديقه بدون تكلف ..!
انا ياخوي اللي يبي يكرمن مو بالفخفخة والدناديش وكثر الرز واللحم ..الكل شبعان
وعنده من الخير والنعم الشيء الكثير ..اللي يبي يكرمن يفتح لي حجاجة ويتعامل معي بقلب
ابيض ..حتى لو اخطأ علي مايهم مادام قلب طاهر ونيته صادقة
ماودي اطول عليك وانا اخوك
خل اشوف الباب يطق ...ابفتح وارجع اكمل سويليفاتنا
عن إذنك ,,,
العرض الشجري