بخصوص الباركيه

[لمبة شارع]

عندي صالات وممرات وغرف معيشة في بيتي الجديد(تحت الانشاء) افكر في تكسية ارضياتها بالباركيه M D F.. ( الخشب المضغوط) وهو من انواع الباركية الرخيصة المتوفرة في بريدة ويتراوح سعره بين 35 و90 ريال للمتر المربع ......





السؤاااااااااااااااااااااااااااااااااال


هل الباركيه عموما كويس وتنصحون فيه

وهل الباركيه M D F يمشي حاله من حيث مقاومة الرطوبة والخدش

ارجو من اللي عندهم تجربة سابقة يفتونا مأجورين


والسلام عليكم

[iiigil]

السلام عليكم
حياك وبأنتظار الاجابه

[الواثقة]

معاك ننتظر

[لمبة شارع]

يعني يآنسة مطنشة حاطة منتدى وقسم ديكور وما ادري ايش...وآخرتها تقولين : حياك وبانتظار الاجابة ومن غيرنفس!!!

وشلون يعني ؟اطلع من هنا؟؟؟

وبعدين هذا اول موضوع ومشاركة انزلها هنا.. على الاقل قولي اي معلومات تفتح النفس وتشجع على الجية ....لكن صحيح من خرج من منتداه...تكسر يداه....

الواثقة...

شكل هالمنتدى مافيه الى الدجة وصور كنبات وستاير...ابروح ادور في قوقل لعل وعسى القى احد يعطينا خبر...

[الملتاعه]

أفا أفا والله يالمبه
والله منوووور القسم كله
وإلتمس لأختك 70 عذرا ماتدري أحتمال تكون راااده عليك وهي عندها ظروف

ولاااااايهمك شوف صراحه خالتي << أخت الوالده حاطه في في ممرات بيتها خشب مضغوط بس مدري

نفس النوعيه هذي أو لا
والله معطيه الممرات شكل مش بطال لكن عن تحملها مع الوقت مدري صراحه أشوف ( السيراميك )
أحسن وهي لها الحين تقريبا عندها 5 شهور ماسمعتها مشتكيه منه
وأأأأسفين ولا تبخل علينا بطلتك

دمت بووود

[لمبة شارع]

شكرا ملتاعة على التجاوب وأنا عارف ليش جاني من اسم آنسة مطنشة نصيب.وأصلا هي ما ردت الا عشان الواجب حق الاشراف بس خليها براحتها ....<<<<<يصير خير !!
ماعلينا....

تكفين ملتاعة إسألي خالتك عن انطباعاتها بعد خمس شهور من التركيب ويبدو ان النوعية هي التي اقصد وهو المتوفر في اسواق بريدة ...

رجاء اسأليها عن النوعية ؟؟ يعني هل ركبو صيني ام الماني ام استرالي..أم ماذا؟؟ واسأليها عن مقاومة الخدش ومقاومة الرطوبة وسلامة الطبقة العلوية من التآكل.. وهل يمسحونه بمساحة البلاط ذات الخيوط القطنية ام بمساحة خاصة.. وهل يحدث صدى في الغرفة وهل هو يتكيف مع الطقس أم انه صاقع في الشتاء مثل السيراميك.. وهل يعطي انطباع بالحيوية والنشاط والتفاؤل ام يعطي شعورا باردا كأنك في مقعد الانتظار في المستوصف كماهو السيراميك...

لأن صراحة السيراميك ارخص بكثير.. والرخام النوع الرديء بشع و الجيد غالي جدا مع التركيب والجلي.. واشعر ان (الباركيه) فيه (بركه)...

[شموع تحت المطر]

من خلال التجربة

الباركية انواع..فيه شي حرام ينحط

لانه مع المويه والمسح تنفصل الطبقات

ويكون داخله هواء

الانواع الفخمة من الباركية رهيبة مرة
ماتتاثر..

على فكرة تراه ادفى من السيراميك

اتمنى اني افدتكم..

[iiigil]

افاافاافا

وشووووووووووووو

وش دعوى وانا قلت ولو ماجربت الباركيه خن ارحب بالشيخ لمبه شارع

هذا جزاي وش اقول تيب

حيااااااااااك عنوني هلا بالغالي >>>تراني ماقوله الا للنسوان

بس وش اسوى

الباركيه ماعمري شفته الا ياعند ناس وصراحه منظره رووووووووعه

او بالمحلات وغالي ...

[الواثقة]

ترى احسن لك قوقل



على الاقل تلقى ناس مستعملينه موب يطهبلون عليك

[iiigil]

الواثقه عفوا اختى من الي ((هطبل ))عليك هنا؟؟

[خـــــــــــــــالـــــــــد]

اخي لمبه شارع

مره كنا في زياره لاحد الاقارب و سالناه في و قتها عن نوعيه الباركيه اللي حاطه و جودته وهل ينصح فيع
لاننا في طور بناء استراحه ..

فاليك المعلومات بالرغم من انها بسيطه..

= افضل الانواع اللي بــ 90 و و يوجد بــ 95 يفرق اللمعه و اغمق ويقولون الجوده

= لاتستعمل الماء لغسله كما تسعمله مع السيراميك ( يفقلع ) لانه اصلا خشب ,, طريقه المسح العاديه

= ادفا بكثير من السيراميك خاصه بوجود مدفاه نار او دفايه زيت


= الخدش .. لهم ثلاث سنين في البيت و الباركيه لم الحظ عليه تشويه او تاثر في لمعته و شكله.
=و نصيحه اخيره مني انا ..

السيراميك انسب و افخم للمرات و الصالات

و الباركيه مناسب لغرف النوم و الجلوس


و منزل مبارك مقدما

[جناان]

ماعندي فكره
لكن رااح اسنفيد من الموضوع
بلاشك
باارك الله في السائل والمجيب

[لمبة شارع]

اشكر الاخوة الذين تجاوبوا وأفادوا بما يعرفون وخصوصا الاخوة شموع وخالد ولايهون البقية حفظ الله الجميع...

بالفعل اخوي خالد الباركية مايصلح للمرات لأنها اماكن مرور وارتياد دائمةولذلك فقد يتخدش ويتأثر برطوبة المسح بسرعة...

يبقى هذا المتصفح بانتظار المزيد من الآراء من الاخوة...

[iiigil]

وش دعوى قل واشكر مشرفتي العزيزه انسه مطنشه

[..روز..]

السلام عليكم...

أنا أؤيد فكرة الباركيه...غرف بيتنا باركيه (بس للأسف ما أعرف نوعه) لكن أذكر يوم نركبه (قبل سنة تقريبا) قال لي صاحب المحل إن
هذا آخر شي نزل ،وقيمة المتر حوالي 100ريال

بس يستاهل...يعطيك انطباع إنك عايش بكوخ خشبي...ومنظره جدا كلاسيكي وخطير ...

ومافيه مشكله لومسحته بمويه (بمنشفة مبللة)..

ما أخفيك إنه بارد بس ما يقارن ببرودة السيراميك والرخام...وعملي وسهل التنظيف (أصلا مايتوصخ) وما يطلّع صوت إذا مشيت عليه

إلا إن كنت لابس كعب>>>>>>تراها تنكت

وبالنسبة للصناعة سألت أخوي ومارد لي ..إذارد بكتب لك...

وأتوقع إنه بالممرات والصالة أحلى من الغرف... ومادام البيت تمليك ترا مو خسارة فيه...

أتمنى إني أفدتك...