المستحيلات ثلاث: الغول.. والعنقاء.. والمسيار...!!!

[مدير خبرة]

اللي يسمع سواليف الناس.. وتعليقات الجرايد عن زواج المسيار..
يتوقع أنه أول مايلف من العاير اللي بعد شارعهم على اليمين..
بيلقى بقالة مكتوب عليها " تخفيضات.. زواج مسيار .. ببلاش.."
وإذا لف من العاير اللي ورا بيت ولد خالة جيرانهم.. بيلقى بنت واقفة
ومعها لوحة مكتوب عليها " البنات .. يبن زواج.. المسيار.." وفيه كم بينة وراها يهتفون معها..

لا...
ومن زود ضمانهم ان زواج المسيار.. شي مفروغ منه
طلعوا زواجات شبيهه..
هذا مسفار... وذاك مطيار.. والثالث وناسة.. والرابع فرند..
ويالله... كل شي ببلاش..!!!

اللي انا متاكد منه ان فيه أحد بيقرأ كلامي هنا ويتشقق من الفرح..
يوم انه يتأكد أن مافيه شي اسمه زواج مسيار.. وانها سواليف مثل سواليف ألف ليلة وليلة
يعني.. توليف بتوليف..!! وأكيد ان الحريم المتزوجات أول من يبي ينسبط بهالشي..

قبل يومين كنت مع رفيقي أبو داقش..
وحنا ندلعه أبو داقش.. لان اسمه عبدالعزيز... صح ان ابو داقش مالها علاقة بعبدالعزيز
بس اصلها كان (أبو داقز) بس حنا غيرنا ال(ز) إلى (ش)
ابو داقش خبري به قبل سنة وشوي.. يوم كان يجي معنا بالاستراحة..
وكان يومه بس يتأووه.. وماعلى لسانه إلا (أويلالالالاه... بس )
واذا قلنا وش سالفتك.. درينا انه يتحلطم على معزبته... اللي مهيتته ولا جابت خبره
لانها ماشاء الله عليه.. موجهة.. وراتبه كثر راتبه مرتين ونص..
وعشان كذا معطيته أشكل.. ولا حطت له قيمة..
وعاد هو من شي يوجسه... وانه متزوج ومو متزوج...
قرر يتزوج مسيار.. لان ظروفه على قده.... وماعنده يفتح بيت ويشيل هم مرة..
وابتدا المشوار..
قصدي رحلة البحث عن (مسيارة).. يسير عليه..

وطبعا لزمته ( أويلالالالالالاه بس...!!)
هي مفتاح طلبه للمسيار... يعني يتأوه عشان يقولون الناس وشبك..
ثم يهد عليهم معاناته... وانه يبي مسيار...
وعلى هالحال..!!!!

يقول أبو داقش...
بعد إحدى التأوهات... مسكن واحد بعد أحد الاجتماعات
وقال له.... عندي لك...!!!!
يقووووووول دورن ماتلقان... قلت له: صادق أنت..؟
واعده ذاك الرجال من بكره... وراح لمه رفيقنا... وقال له عندي لك بنت جلال
صح ان عمره 39 سنة... وعنده كم رجل وكم بنت... بس تراه بتعجبك
فكر أبو داقش... قال يعني أكبر من بأربع سنين..؟
يوم قلب التفكير ثانية.. قال : ايه صح.. أثري محروم من حنان الام... أغديه تعوضن عنه
ووافق ابو داقش....
جاك اخو البنت... قال ترا المهر 20 الف.. وحاول يكاسره ابو داقش.. وسوى له تخفيض خمسة الاف
بعد يومين.. جاء أخو البنت... قال ان مزنة.. تقول صح ان عندي عمارتين.. وعندي راتب..
بس لازم يتحمل أجار الشقة اللي بنقعد به.. مع انها بتسكنه بعمارتها..
وبعد تفكير... وبعد ماسوى له دسكاوند... قال أخوه لها شرط ثاني..
قال ابو داقش.. وشو الشرط..؟
قال انه تقول مهب سامحن خاطري يعطي زوجته الاوله ليلة وانا لا.... أبي ليلة..!!!
أومر يطلع أبو داقش جواله... ويفتح اللوحة حقته.. ويرفعه كنه يبي يكلم...
قال لاخوه... خلاص.. ارد عليك..!!

يعني عجوز.. وتبي ليلة..!!!

بس أبو داقش ما ايس هالمرة...
بس أنه خفف من تأوهاته....
وقرر أنه يروح للشيخ (...............) وهو معروف انه يزوج الناس..
وسالفته مع الشيخ... ومحاولاته الثانية.... بقولها في المرة الجاية...
عشان ما اطول على اللي يقرون السالفة..
>>> كل هذا وماطول...

انتظروا باقي قصة أبو داقش والمسيار....

[| ~ ســمــو ~ |]

هه

والله معلومه ممتازه

فعلا الزواجات هذي مجرد مسميات وهي غير موجوده على ارض الواقع ههه >>> تدري ليش قلت كذا ههه


/


اما ابو داقش *_*
الله يحيره ويديره على قولة جدتي ويبتل يقول اولااااااااااااااه لين يموت بعد عمر طويل




بانتظارك ..

[الهوى ـآ الغــايب]

ايييه وش صااار <~ منسدح ومتحمس هههههه

[جلوي العتيبي]

ياكثر اللي يقولون أويلاه بس

[دِيم]

.
.
أنا خفت ياخذ أم ديسكاونت ... ويتورط مسيار وخوف وشينه ..


/


كمّل كمّل > فرصة نعرف ألاعيبكم ..

[التنين الصيني]

اقووول .... علينا

قل لـ ابوداقش .... اللي يدور زين .... يحصل

والمسيار عالم آخر .... ما انصحه يدخل هالعالم

[دِيم]

اقتباس:  المشاركة الأصلية كتبت بواسطة التنين الصيني     ما انصحه يدخل هالعالم

النصيحة تجي عن تجربة ..

لايكوووون .....

[التنين الصيني]

اقتباس:  المشاركة الأصلية كتبت بواسطة دِيم     النصيحة تجي عن تجربة .. لايكوووون .....

السعيد من اتعض بـ غيرهِ ....

[دِيم]

اقتباس:  المشاركة الأصلية كتبت بواسطة التنين الصيني     السعيد من اتعض بـ غيرهِ ....

لا يكون السعيد أبو داقش وغيره أنت ... ؟

[التنين الصيني]

اقتباس:  المشاركة الأصلية كتبت بواسطة دِيم     لا يكون السعيد أبو داقش وغيره أنت ... ؟

وااااوه .... <<< دمعت عيوني من الضحك ههههه

.....

والله انهم يرحمون .... خلاااص يصير إدمان

من وحدة لـ وحدة .... ويالله !

[To Be]

اقتباس:  المشاركة الأصلية كتبت بواسطة دِيم     النصيحة تجي عن تجربة .. لايكوووون .....

ما قصرتي ديم


طيب اللي عندها عمارتين ام ديسكاونت وعيالين

إلى الحين شاغره ؟



بانتظارك ولا تصيف علينا

[التنين الصيني]

اقتباس:  المشاركة الأصلية كتبت بواسطة to be     ما قصرتي ديم

تسذا .... تسذا

زين .... اوريك

...............

الا يوم انك تسأل هي شاغرة ولا لا... ودك تصير خبرة مثلي ؟

ولا تبي الشقة .... ؟

[القلم الصريح]

نسمع جعجعه ولا نرى طحنا

[باسم الثغر]

اللحين وشو المسيار ؟؟
علمونا تكفون

(( أويلالالالالالاه بس ))


أي شي
كمل سالفة أبو داقش
هالرجال شكله ماينلعب عليه

[بريداويهـ]

متابعه
والتعليق بعد الـ the end

<-- لخلصت القصه بنسخه والصقه ببريدي (للاستفاده)


تحياتي