تسوق!

[هنري]

عندما تأتي الضربة القاضية، تصبح كل الضربات القوية السابقة بسيطة!

في لحظة ما لانتعجب، حينماتتراقص فتاة بخجل وهي فتاة من مجتمع شرقي وفي مدينة محافظة وسط جموع من المتسوقين بالتبرير بربما انها طربت لأغنية عابره!؟
ولانتعجب حينما تنظر بعين ثاقبة بدون اي سبب

وفي لحظة ما لانتعجب حينما تصطدم بكتف احدهم ومن بعدها الإعتذار بإستلطاف مقيت!؟

ولكن أن تعطي رقمها ، كإعتذار وعربون صداقة فهذا شيء يدعو للوقوف وخصوصاً أنه على مرأى الجميع!؟

ماذا دهى بعضهن، فبعدماكانت مبرراتنا للشباب تنتهي ونتعشم خيراً فيهن، أتت "هي" لتصدمنا وتصدمني!؟

لازلت متفاجئً ومن اراد رقمها فهو ممزق بيدي على أرض محل... !

النقاش سوف يكون بعد سماع الرأي عن الموضوع ككل
أريد أن أعرف سبب الجرأة خصوصاً.
لنبتعد عن التعميم..

شكراً

[نبض قلب]

عزيزي هنري

مراهقات وراح يكبرن ويعرفن انهن على خطأ

كذلك غياب الرقيب جعلن اكثر جرأه 00

الانفتاح المفاجئ بكل وسائل الاتصال فضائيات نت جوال ماسن

جعلهن تابعات امعات فقد يردن يجربن على ارض الواقع 0

وبعدين بيندمن لكن للاسف اذا فات الفوت 00

الله يهديهن ويستر عليهن 00

[قـتـالـه]

هه

ماعندها وقت على طول لفزت الرقم
ياانها تفتقد تقنيات الصيد او انها صغيره !
المشكله ان تصرفات الطعشات تعمم على كل من لبست العبايه ..!
ياهوووه وين حنا اعطيه الرقم
والله لو افرك تسبدي بالارض على ابو سكسوكه ماابادر ولا اعطيه لين ..!
يالسحا وانتن يالسحا الرطبه مهما يوقف قلبتس لاتضعفين
صيدي ولا تنصادين !!
وربي قدام عيوني برمضان موقف انا اهتزيت وانا مالي دخل :
سحاة متزكرته تطاير ورا واحد معوه بنت صغيره يلعبها
وياما حدته وياما لبحت له تقل ظلاله !
وحنا نحاسب على طلباتنا وقهوتنا اسمعه يقولها اتركيني يابنت الناس
معي عيالي وزوجتي
اعنبوا بليس وش بقى من كرامه لما يقول لي اتركين
ام ثلاثطعش تطق النقاب وتحسبه كبرت !

[" TWIX "]

بنات الطعــش
الوحدة منهن لكبعت العباءة وطقت النقاب تبي الأنظار تتجه لها بأي طريقة
وإذا ما أتجهت لها العيون ..
أنطلقت من المبدأ الثاني وهو ما لم يأتي بالطيب يأتي بالقوة .. ثم بعدها تشوف
مالا عين رأت ولا أذن سمعت ..!!

[دِيم]

.
.
.


> لهابو هالوجه ...


أعوذ بالله , مم نرتجي من جيل يرى لقطات الحب ليل نهار .. صبح ومسا .. !
حتى وهي ترضع تشوف لقطات حب ..
يعني حابة حابة الله لايعوق بشر ..
عموماً , وإن كانت هاللقطة عابرة ( إن شاء الله ) إلا أنها قد تصبح ظاهرة ..
مع نوم الأم إلى العصر ومن ثم خروجها إلى نصاص الليالي باجتمعات وروحات وجيات ..
والأب , لاتعليق ..
** ملمح / ويمكن مو بنت 13 ولا حتى العشرين ..
يمكن بنت مجوز وكبيرة .. الأمر انفتح ياعالم ..
,


الله لا يعلق قلوبنا إلا به ..

.
.

[دِيم]

.
.
^^ أعوذ بالله .. من كلمةٍ قلتها في حق هذا الجيل ..

.
.

[قـتـالـه]

اقتباس:  المشاركة الأصلية كتبت بواسطة دِيم     . . . > لهابو هالوجه ... أعوذ بالله , مم نرتجي من جيل يرى لقطات الحب ليل نهار .. صبح ومسا .. ! حتى وهي ترضع تشوف لقطات حب .. . .

<< ميته ضحك على لهابو هالوجه لانها تعرف وشلون تنطق :/
وفي روايه لآآبو هالحنوك :/
تتوقعين البلا من لقطات الحب ياشيب عيني ؟
ديم
انتي زيي او لا ؟
انا احس اني مو فسيلة سكريه يركزوني وعلى آبو هالركزه لحد وقت اللقاح والتكريب!
ربي خلقني انثى احتاج الاطراء اكثر من صامولي السلمان
وهذا اللي يخلي ذيك الوجيه تتمادى ..!
يدورن النواقص بمواعين غيرهن
البيوت صارت ناشفه والمعايير اكثر من الطواريب

[دِيم]

اقتباس:  المشاركة الأصلية كتبت بواسطة قـتـالـه     << ميته ضحك على لهابو هالوجه لانها تعرف وشلون تنطق :/ وفي روايه لآآبو هالحنوك :/ تتوقعين البلا من لقطات الحب ياشيب عيني ؟ ديم انتي زيي او لا ؟ انا احس اني مو فسيلة سكريه يركزوني وعلى آبو هالركزه لحد وقت اللقاح والتكريب! ربي خلقني انثى احتاج الاطراء اكثر من صامولي السلمان وهذا اللي يخلي ذيك الوجيه تتمادى ..! يدورن النواقص بمواعين غيرهن البيوت صارت ناشفه والمعايير اكثر من الطواريب

.
.

الله يسعد هآك الوجه ..
أضحكي يامي واستانسي وإحنا ماخذين منها حاجة .. ؟

**
مممم أصبري الظاهر إني استخرت .. وودي أخفف حدة غضب الأخ هنري على تلك الأنثى بغض النظر عن فئتها العمرية ..

,
بداية : يقول الشاعر .. :
عطيتني وجهك وجيت كلّي ** محروم والمحروم ماينعطى وجه ..
وفي بيت شعري لنفس الشاعر .. :
غالي وتبخل علي وتطوّل الصدة ** الله يسامح غلاك ويلعن الحاجة ..

هذا ينبأنا عن نفسية العربي مو بس الأنثى العربية ..
نحتاج للعاطفة أكثر من خبز السلمان .. والصالحية بعد .. > عنصرية هه .. <
الأمر قد تخف حدته عن الذكر العربي بعكس المرأة / الأنثى العربية ..
قد لايلام من فقد الماء أن يطلبه من منابعه ونبعه فإن فقد فقد يطلبه في منابع غيره وإن أدى ذلك إلى السرقة .. /
أو الشرب من المياة الآسنة ..
كذلك الحال بالنسبة للعاطفة ..

,

والمشكل إن ضبطت تلك الفتاة .. سألت بخسة وسوء كيل .. :
وش ناقصك..!
مي ..؟ أكل ..؟ لبس .. ؟ خرجات ..؟
وتبلع ألمها كداجنةٍ , تربى لذلك الثور .. الذي لايأتي .. :
لتقول :
لا ماناقصني شي .. , وهي قبل كلمات الحب أفضل حال من بعدها

,
الشق يا قتولة قلبي أكبر من الرقعة ..
بنات يدورون عاطفة .. وشباب معهم عاطفة يوزعونها بالمجان ..


** عني أنا ياديم .. :
أبداً أموري طيبة , ولله الحمد .. آكله شاربه نايمة ..
وأرقد بدري , وأصحى بدري .. وصحتي كويسة

ملكة بلا ملك > مع ضم الميم وليس فتحها




وعسى الله يعين ..

[قـتـالـه]

اقتباس:  المشاركة الأصلية كتبت بواسطة دِيم     . . ** مممم أصبري الظاهر إني استخرت .. وودي أخفف حدة غضب الأخ هنري على تلك الأنثى بغض النظر عن فئتها العمرية .. , نحتاج للعاطفة أكثر من خبز السلمان .. والصالحية بعد .. > عنصرية هه .. < , وعسى الله يعين ..

ياعين ابوي وانتي مصدقه ان الاخوان يستاؤون من غواية انثى
مع الاعتذار الشديد لك استاذي هنري فلست المقصود انا اتكلم عن الرجل بشكل عام ,,
ياعوينتي ياديم تراهم مايتضايقون الا لصارن زوجاتهم معهم يخافون شر العواصيف
شايبهم وولدهم يبدا يتمسمس اذا حس بريح نظره ورمش هدب غاوي !
وعلى قلوبهم احلى من العسل الدمنهوري ..:/
.
وبالنسبه للصالحيه يافديتهم تعنصري أد مافيتس وانا ابتعنصر معتس
.
الحين حنا وشوله نتعب على انفسنا بزواجات كلها سحا × سحا ونبذل الغالي والنفيس
وننحف وننحرم ونركض للمشاغل والاسواق الا علشان الاطراء
جوعانات اطراء وربي !
اذا خالي ضاري قالي ليتهم مسمينتس مي يامي مانمت ذيك الليله شغف ووناسه :/
واذا قال قربيلي ذيك البارود اللي تشبهتس ماتهاب ..طرب قلبي وغرد وهو شبه بارود
اجل لو انا اشبه القمر والليل وعيون السهر وش ابسوي ..؟

[دِيم]

اقتباس:  المشاركة الأصلية كتبت بواسطة قـتـالـه     اذا خالي ضاري قالي ليتهم مسمينتس مي يامي مانمت ذيك الليله شغف ووناسه :/ واذا قال قربيلي ذيك البارود اللي تشبهتس ماتهاب ..طرب قلبي وغرد وهو شبه بارود اجل لو انا اشبه القمر والليل وعيون السهر وش ابسوي ..؟

ياطربة قلبي أنتِ

ياعزيلي عنتس .. بس ..

تجودي بجمرة يا حيي , إلى أن يقضي الله أمراً كان مفعولا ..

[عـــــســـــولــي]

اقتباس:  المشاركة الأصلية كتبت بواسطة قـتـالـه     وربي قدام عيوني برمضان موقف انا اهتزيت وانا مالي دخل : سحاة متزكرته تطاير ورا واحد معوه بنت صغيره يلعبها وياما حدته وياما لبحت له تقل ظلاله ! وحنا نحاسب على طلباتنا وقهوتنا اسمعه يقولها اتركيني يابنت الناس معي عيالي وزوجتي اعنبوا بليس وش بقى من كرامه لما يقول لي اتركين ام ثلاثطعش تطق النقاب وتحسبه كبرت !

سبحان الله . رب صدفة خير من الف ميعاد .
هو أنتي اللي تمشين بالمول وماسكتن ساطور وتدورين وعيونتس يتطاير الشرر منهن .

[قـتـالـه]

اقتباس:  المشاركة الأصلية كتبت بواسطة عـــــســـــولــي     سبحان الله . رب صدفة خير من الف ميعاد . هو أنتي اللي تمشين بالمول وماسكتن ساطور وتدورين وعيونتس يتطاير الشرر منهن .

ايه وانهش قلب ادمي ينبض ويخرخرن الدمامين على نقابي

[افهم قصدي]

وفي الاخير يقولون الذئب البشري ذئب بشري يفترس فتاة

شاب يغرغر بفتاة وفى الفاصيل انة هي متصلة علية وتقول لة احبك واموت فيك وهو المسكين مصدق وعلى طول الشاب وين يفكر ويقول خلاص هذي صيدة ولا تطلع معة وذا شافت الشغل حامي راحت تشتكي

يابنت الناس وهقتى الولد بالكلام الحلو ولا تطلعين معة متزينة زينة

وفى الاخير يطلع ذئب بشري وهي مسكينة لعب علية الشاب واستغل لحظة ضعفة

انا مرة اتصلت وحدة مدري غلطانة مدري وشسالفتة قلت لة وهذا ماجري

انا : الو نعم من معي
البنت : قالت معك سارة
انا : من سارة
البنت : ممكن نتعرف
انا : سارة من
البنت : وحدة تقول لك نبي نتعرف تقول سارة من
انا طبعا سكرت السماعة لاني ماني فاضي متزوج وعندي عيال

رجعت ودقت من جديد بس المرة شابة نااار وشكل شوشتة طايرة من الحمق
الجوال يرن رن رن رن

طبعا رديت

انا : نعم
البنت : ياحيوان ياحمار ياكلب فية وحدة تقول لك ابي اتعرف وتسكر السماعة بوجة
انا : طبعا مسكت ماقلت شي بسمع للاخير
البنت : انت ماعندك احساس انت قليل المشاعر مافية عندك تقدير فية احد يرد بنت
انا : قلت لة اية انا طبعا انا مانب فاضي لك
البنت : رجعت وهدت وقالت لي طيب ليش ماتبي تتكلم معي
انا : قلت انا متزوج عندي اعيال رجال كبير مانب فاضي للخرابيط والحب والمكالمات
تقل هدت شوي وطبعا انا قصدي بحاول امتص غضبة صح الواحد يقول كان سكرت السماعة وماعليك منة . طبعا انا طبعي محب احد ياخذ منى موقف مهما يكون وممكن اكون سبب فى الثاثير علية

المهم انا سكرت السماعة وجلست افكر ليش زعلت كل الزعل وكيف كل الجراءة هذي مقولة البنات وصلو لهذا الحد

اول كان الشباب يضايقون البنات الحين اقتلب الوضع
ولا الخافي اعظم اذا كنت بالسوق ومعك زوجتك ياويلك ويلاة منهن يتفنن فى ربع ضغط الزوجة ..........

[╝◄ ساندرا ►╚]

خلاص الحين مافي شي اسمه حيا او خوف من الله
اغلب الي نشوفهن بالاسواق يطلعن بمناظر ولبس مايدل ابد ع تربيه اسلاميه

في النقاب نص الوجه طالع
هذا غير الكحل والمكياج

وخرته هن الخسرانات
لكن بعد مايفوت الفوت

وين الاب او الاخ شلون يرضى على اخته تاخذ راحته كذا

في شي اسمه 1ربي يحاسب و2شرف و3 سمعه
الحمدلله الذي عافنا بما ابتلاهن
الله يهديهن ويهدينا

[روفه]

الجرأه والتمادي

بسبب الحريه المعطاه لها

او ربما يكون بسبب القمع الزائد

نعرف انه مرحلة المراهقه يصاحبها احيانا بعض التصرفات الخاطئه والافعال الغير موزونه

ويمكن تفاديها بالتربيه السليمه

فالمراهقه ليست عذرا ابدا