قتلتني فكيف صبرتُنَ يا معشر النســــاء...

[جبل عمر]

تعلمت أن أكون في نهاية كل أسبوع في القصيم بين الأهل والأحباب وهروباً من أجواء العاصمة الحبيبة، إلا أن هذا الأسبوع شاء الله وأنا أستعد للسفر أن أبقى في الرياض بعد أن أعزمت كالعادة على الذهاب..

اليوم الخميس وبعد ما أن أنجزت ما كان سبب في جلوسي عُدت للسكن الساعة الثانية والصنف ظهراً حتى الآن الأمر طبيعي تناولت الغداء وصليت العصر ومن هنا بدأ مسلسل القتل ماذا أفعل أين أذهب الزملاء كلهم بالقصيم زملاء الرياض جلهم مشغولون مع أهلهم وزوجاتهم بالذات في هذه الأجواء " طق جولي وين أروح " بالذات ما عندي شغل معين أخلصه ولا شيء معين أزوره أو أشوفه يعني مو معقول أركب السيارة وأنا لا أعلم أين سأتوجه هذا جنوون

ليس هذا مربط الفرس فسويعات وأسبوع طارئ لا يعني أن لا أكيف نفسي ولا يعني أن هناك مصيبة فالأمر بسيط جداً وسهل

بكل أمانة كتبت الموضوع كمدخل حينما أحسست بشيء يسير من ضيقة الجلسة بالبيوت إن لم يكن لديك ما تنجزه أو أي شيء يلهيك

كيف صبرتُن يا معشر النساء كيف تحملتن الجلسة طوال الوقت بالبيوت بين أربعة حيطان وبالذات إن كان السكن بشقة صغيرة أو دور علوي لا يُرى الهواء والضوء إلا بالخروج من المنزل

بعدما قلبت هذه الأسئلة وهذه الحال أيقنت أن هناك تركية خُلقية منحها الله للنساء للتحمل و الانسجام للقرار في البيوت وأن البيت بالنسبة للمرأة تجد فيه ما يُضيّع الوقت من التزام بواجبها لبيتها وزوجها وأطفالها ووو غير تركيبة الرجال الذي مهمته خارج البيت

كيف تشعرن يا معشر النساء وكان الله في عونك

[نـــNAــونا]

هو أمر رباني ( وقرن في بيوتكن )

أليس ما أراده الله لنا هو الأصلح بكل تأكيد

جبلت المرأة على القرار في البيت

لكن هذا ما يمنع إننا نمل ونحب الخروج لكن ليس بدرجة موقفك إنه فقط مر عليك سويعات وشعرت بالملل

يعني نخرج مره كل أسبوع مثلا وهذا يختلف من عائلة لأخرى

وفيه عوائل تأخذ شهور ما تطلع والوضع عادي جدا

أصلا إذا رحنا مثلا للكليه هذا أتوقع إنها كافيه وقاطعه للملل إن شعرنا به

وحتى وإن كنا نخرج كثير لا نرتاح إلا في منازلنا ( كرأي شخصي ) لو سافرنا بالصيف أكثر من إسبوع نحس خلاص إشتقنا للبيت

ما أدري عن البقيه بس هذا رأيي

[سيف وفيصل]

والله غريبة!!!أنا أعرف مشرف منتدى دائما مشغوووول وما عنده وقت حتى لعياله!!

أنا توني جاي من الأسياح والنبقية ولا أروع ياجبل !!يا أخي لوتروح لحالك ترى

اليوم الوحدة أسلم!!!!!

[Queen of buraydh]

شفتو قد ايش العذاب اللي نعيشه ؟
شفتو قد ايش انتم بنعمه كبيرة ؟ اسجدوا شكر لله عليها

>>> وحده موصله حدها ماطلعت من البيت من زمان ..

[مياسة]

حكم الأوى ع الضعيف ,,!

أرى أنه يعتمد على التعوّد,, من شب على شيء شاب عليه ,,
فـ أصبح الأمر سيكولوجي معنا ,,!!

عاد تصدق يا أخي جبل,,, أزمل إذا صار عندي مشوار أو عزومة ,,<<- بيتوتية حد النخاع
وحدة من صديقاتي عازمتني من اسبوعين مبلشتن,, وأنا اماطل فيها.. مالي مزاج أطلع


المشكلة مو بجلسة البيت,, المشكلة إذا احتجت شي,,
من يومين كنا نتحدث عن الاصدقاء,, والمشاعر اللي بين الأصدقاء
قلت مشاعر الصداقة عند العيال بس... أما البنات حد صداقتهم المدرسة أو الجامعة وانتيهنا ,,
لأن العيال يتلاقون وقت ما يحبون ,,
أما احنا ,,, كم مره اشتقت لصديقتي ولا شفتها ,,
كم مره احتجت صديقتي,, ولا رحت لها ,,
كم مره ودي صديقتي تشاركني فرحتي .. ولا لقيتها معي !
حتى التسامح والتراضي في الصداقة اسمع فيهم وما قد جربتهم, لأن ما عمرنا تخانقنا ولاتزاعلنا ,,
كيف تعرف صديقتي انه ضايق صدري من خلال تعابير وجهي,, وكيف اعرفها أنا ...؟
حدنا اتصالات.. في اوقات مستقطعة من الوقت ,, وبس!

يعني تخيل يا جبل انت محتاج تروح لصديقك,, لكن ما تقدر تتلاقون.. من يوم ولااسبوعين,, ممكن تاصل إلى سنين!
عاد هذي قوية ما يتحملها رجل ينربط بالبيت,, فيها قبــايل

إيه,,, الله ياجرنا ويعوضنا خير..

[الليل موعد دمعي]

ايـــــــــــــــــــــــ اللهم رحماك ــــــــــــــــــــــــــــــــــــه

[الأسترليني]

لي عوده للموضوع اذا رجعت لجهازي

بالمناسبه موضوع خصب يا جبل

[شموع تحت المطر]

البيت افضل من الهجولــة.. خصوصا بالرياض تجي الغلـــقــة..


ومعشر النساء احيانا ينظلمن بالبيت وساعات يظلمن غيرهن بالطلعات اللي مالها آخـــــر..


مع ذلك ودي البس كل الرجـــــــــــال عبايات واحجرهم بالبيوت..<< من زمان ودي اسويها

[عازفة ألحان الليل]

بصراحة تامة

والله اني اموت واحياء من الجلوس بالبيت ومافي احد يطلعني
اطلعة عندنا صعبة
بس احاول اشغل نفسي بأي شي وكذا ينتهي اليوم ومو علشان عندي صبر وتحمل مثل
ماقلت لا لكن وش اسوي ((هذي حياتي وبعض الناس ماترحم))

للمعلومة بالشهر اطلع مرتين ثلاث بالكثير اربع

واحيانا يروح شهر مااطلع

[رايق]

[align=center]
صدقت أخي جبل إذا كنت في الرياض لازم تشغل نفسك ولا بتطفش !!!


بس مالك حق ... كان سيرت علينا اليوم بالثمامة جو روعه وسمره أروع !


وفعلا كان الله في عون النساء ![/align]

[جبل عمر]

اقتباس:  المشاركة الأصلية كتبت بواسطة نـــNAــونا     هو أمر رباني ( وقرن في بيوتكن ) أليس ما أراده الله لنا هو الأصلح بكل تأكيد جبلت المرأة على القرار في البيت لكن هذا ما يمنع إننا نمل ونحب الخروج لكن ليس بدرجة موقفك إنه فقط مر عليك سويعات وشعرت بالملل يعني نخرج مره كل أسبوع مثلا وهذا يختلف من عائلة لأخرى وفيه عوائل تأخذ شهور ما تطلع والوضع عادي جدا أصلا إذا رحنا مثلا للكليه هذا أتوقع إنها كافيه وقاطعه للملل إن شعرنا به وحتى وإن كنا نخرج كثير لا نرتاح إلا في منازلنا ( كرأي شخصي ) لو سافرنا بالصيف أكثر من إسبوع نحس خلاص إشتقنا للبيت ما أدري عن البقيه بس هذا رأيي

من تعلم ومن تفكر بأن الله أعلم بما يصلحها ويحفظها ويصلح شأنها بالقرار بالبيوت
وكما ذكرتي هذا لا يمنع من خروجها لقضاء حاجة ولزيارة ولتلعم ولترفيه مباح

وهذا ماخرج معي بعد تقليب الأسئلة أن المرأة سبحان الله إذا طالت طلعتها أو سفرها تشتاق لبيتها وأن مكوثها بالبيت أمرٍ طبيعي ولا تنزعج منه

دمتِ بعزِ وخيرٍ وفلاح

[جبل عمر]

اقتباس:  المشاركة الأصلية كتبت بواسطة سيف وفيصل     والله غريبة!!!أنا أعرف مشرف منتدى دائما مشغوووول وما عنده وقت حتى لعياله!! أنا توني جاي من الأسياح والنبقية ولا أروع ياجبل !!يا أخي لوتروح لحالك ترى اليوم الوحدة أسلم!!!!!

كلامك سليم بما إني مشرف دايم مشغول ولا عندي وقت لكن شفت إنك طالع للسياح قلت فرصه أرتاح شوي

دمتَ بعزِ وخيرٍ وفلاح

[عبود زمان]

أنا اقول ان النساء عندهن القدر ه على تحمل بعض الاشياء مثل الجلوس بالبيت او مشاكل البزران

ولا عندهن القدره على تحمل بعض الأشياء اللي يتحملها الرجال خارج البيت
مثلاً زحمة الشوارع المزعجه كثير لبعض الرجال وضغوط العمل خاصة إذا كنت تحت اشعة الشمس
وتخليص بعض المعاملات في الدوائر الحكوميه اللي تحتاج احياناً لطولة لسان علشان يخلصون امورك

ومشكوووووووور اخوي على الموضوع اللي تقريباً جاك بالصدفة إلا إنه
رب صدفة لم تلدها امك<<<<< فيه شي خطأ

[جبل عمر]

اقتباس:  المشاركة الأصلية كتبت بواسطة Queen of buraydh     شفتو قد ايش العذاب اللي نعيشه ؟ شفتو قد ايش انتم بنعمه كبيرة ؟ اسجدوا شكر لله عليها >>> وحده موصله حدها ماطلعت من البيت من زمان ..

عاد ما تصدقن يجي أحد يقول ياحول يالحريم وشلون متحملات تراي قلت كذا لأني بالرياض وطول أيام الأسبوع دام شقة شقة دوام يعني على شانه يوم متعود يصير تغير جو وروتين أيام الأسبوع
عاد تراي نزلت الموضوع الساعة ثمان ونص وطلعت بعدها ولا رجعت إلا 12 يعني هالموضوع كظاهره وطريقة قضاء الوقت ومعرفة شعر الآخرين


دمتِ بعزِ وخيرٍ وفلاح

[shahd2007]

اقتباس: كيف تشعرن يا معشر النساء وكان الله في عونك

وفيه احسن من جلسه البيت طلعتنا اسبوعيه الخميس فقط

واحيانا الاربعاء <<<< اللي يبي يعذبنا يعزمنا الاربعاء

بالنسبه لنا تعودنا واكره ماشوف اني البس عباتي واطلع وين نروح البر يالله تمشي 100 كلم طبعا اتكلم عن الرياض عشان تلاقي مكان مناسب
منتزهات اسواق مطاعم مايصلح كل اسبوع
فارحم شي البيت كل شي فيه يونس