مشاكل زوجة الاخ مع الخوات والا مع حماتها (زوجة اخ زوجها)!!!

[عاشق ديرتي بريده]

مشاكل زوجة الاخ مع الخوات والا مع حماتها (زوجة اخ زوجها)
ليش البنت دايم تتمشكل مع خوات زوجها
مع انها لو دلعتهن اكيد يدلعها زوجها بس المشكله انها توطى النعمه برجليها
ادري ان بعض الخوات هي اللي تتمشكل مع زوجة اخوها بس المفروض
الزوجه تستحمل عشان زوجها

يعني المفروض الزوجه تغمض عن بعض الاشياء لسعادتها



الموضوع الثاني مااشوف انه مهم بس ابشوف رايكم فيه

ليش الاخت تحب عيال اختها اكثر من عيال اخوها !!!

[الذاهـبـة]

مرحبا استاذ عاشق بريدة ..

شوف يااستاذي نبي نتكلم بكل شفافية ..

و لا تستغربون أنتم يالرجال .. ولا تقولون وع ذولا شياطين مو حريم ) !!

من جد ترى أنتم قلوبكم طاهرة و طيبين جداً و لا عندكم حركات حريم و غيرة و نكد و كيد و قهر .. إلخ إلخ

طبعاً ، شي طبيعي جداً أن الرجل _ أي رجل _ يشوف امه أطيب أم بالدنيا

و يشوف خواته .. ياسلام وردات وردات و حمامات سلام ..

و يشوف اهله بشكل عام .. أحسن و أطيب و أجدع أهل بالدنيا كلها ,,

فيستغرب لما تجي زوجته و تقول : شفت أمك وش قالت لي .. ؟!!

طبعاً هنا يكون في حيرة الرجل المسكين .. !

يصدق في امه الطيبة الحنون ؟؟ ولا يكذّب بنت الناس هذي اللي مفروض انه يعزها و يحترمها ؟!

خذوها قاعدة :

الحريم ما يجتمعون مع بعض في مكان واحد .. إلا : يختلفون مع بعض ..

ولا يجتمعون في اسرة واحدة : إلا يختلفون مع بعض ..

و أكثر ما يغيض الأم : اهتمام ابنها بزوجته .. أكثر ما يهتم فيها هي ,,

بمعنى أن امه تشوف كيف يقدر زوجته و كيف يشتري لها و كيف يوديها و يجيبها ,,

هنا تظن الوالده ان ولدها خلاااص عليه السلام نساها تماما و سرقته منها بنت الحرامية هذي !!

فتبدأ الأم بممارسات الغيرة ..

نفس الشيء من الأخوات ..

بس مع الأخوات تزداد الحركات القرعا ,,

يعني مثلاً ,,

ياويل زوجتك لو شافوا عليها ( ساعة ) غالية ..

أو ( فستان ) حلو ..

أو ( صبغة و قصة جديدة )

و طبعاً تتفاوت درجة الحيا ..

بعضهن ما تستحي خير شر ، فتطقها بوجه الزوجة : ( وعععععععع وش هالفستان يوحش .. شوفي كرشك تضحك ) ..

و بعضهن تستحي شوي : ( فترمقها بالنظرات و التكشيرات .. و تجدع عليها كم كليمة خفيفة أجل ) ..

و المشكلة العظمى .. إذا كانت الأخوات متزوجات .. بس بمستوى معيشي اقل من مستوى زوجتك ..

يوووووووه !! تحل عليها اللعنة .. @.@

عموماً لكل قاعدة شواذ .. و الشواذ هنا : هم القلة القليلة اللي ربك راضي عليهن ..

و متصافيات مع حمواتهن و خالاتهن و حمولتهن ,, و صايرة كأنها بنتهم صحيح .. مو ( ضرتهن ) .. !!

نقاط سريعة على هامش القرق :

* من واجبات الزوجة اللي تحب زوجها و تقدره ,, أنها تحترم اهله و تحشمهم .. سواء بالكلام او بالتصرفات ,,

* أهم انسان لازم تحرص عليه الزوجة لما تدخل في عائلة زوجها هي ( التشبيك مع الخالة أم الزوج ) ..

يعني لازم تتقرب لها بكل انواع التقرب ، و تهديها كل ما شافت زولها ، و تعطيها من الرخيص ,,

انتي الغالية و انتي تاج روسنا .. و من هالحكي و الزعط اللي ما يعوّر أبد ولا يكلف .. و بكذا راح تحبها الأم

و تعزها و تحط لها مكانة خاااااصة جداً بين الكنّات

* خذيها قاعدة .. إذا خوات زوجك جدعوا عليك هرج ، أو تريقة ، او حتى تغافلوا يصبون لك قهوة ..

أو ما عزموك على حفلة عندهم .. انتي خليك هاااااااااااادية ولا كأن شي صار ,, لا تفرحينهم و تزعلين !!

ولا تفكرين تعاتبينهم .. لان هن بالأساس قليلات أدب .. ولا فيهن رجا حتى مع العتاب .. بس قولي لروحك :

مراهقات أو صغيرات عقل .. ولا تشرهين !!

* أهم نقطة : لاعمرك تشكين ام زوجك ولا خواته عند زوجك .. لأن هذا عيب في حقك .. و راح تضعين

زوجك في موقف حرج ، و تكدرين عليه ..لكن مع الزمن هو يبي يعرف أنك ثقيلة و عاااقلة .. و هذا الأهم !

* و أخيراً أنتم يالرجال : إذا جتك المره تقول شفت امك شفت أختك .. ؟ قل لها : اقطعي و اخسي

و اهلي ما تجيبين طاريهم على لسانك لا أقصه لك ..

ترى إذا سمعت شكواها .. تبتل المره تحش و تسب في اهلك !! ..

و تصير مع الزمن أنت ( حريمه ) مثلها تحب الهرج ..و الحش و النقنقة .. !

لذلك ريح راسك و خل الحريم يحلون مشاكلهم مع بعض ,, و العاقلة راح تكسب .. !

* انت يالرجل .. لاعمرك تجيب لزوجتك شي .. و اهلك يناظرون .. !!

يا تجيب لهم كلهم .. يا أما ما تجيب شي قدامهم ,, بعد لاعمرك تغنجها قدام أهلك .. ترى حركة بايخة ..

بس مو معناته تسفل في اهلها !! .. لا الاحترام و الاعتدال و التقدير هو المطلوب ..

هذا و بالله التوفيق ..

[عاشق ديرتي بريده]

هلا استاذه الذاهبه
اول شي انا لست كفو لان اكون استاذك فأنتي مدرسه نتعلم منها
ثانيا كلامك وربي مفيد لكل بنت ومشكور على الرد الاكثر من رائع
بس عندي سؤال انتي تقول انتم يالرجال ماعندكم حركات الحريم نكد وكيد وقهر
ياليت تتكلمي عن النقطه هذي بالتفصيل الممل خليني انا وغيري نستفيد
فقليل نجد حريم بصراحتك هذي
وشاكر مره ثانيه على الرد المميز

[سـمـا]

عاد تدري ليش لان خوات الزوج نجسات وينقهرن اذا بدا اخوهن يحب مرته ويحسن انها هي اللي ابعدته عنه
وهو تخلف التفكير هذا يعني الرجل تزوج خلاص اكيد بينشغل عنهن ليش تصبر عليهن وتحمل وهن يتحرشن فيها اشوف كثير وشلون معاملة البنات لحريم اخوانهن وقدامي كمان انواع الشر لو امه على عيني وراسي اما خواته اكسر روسهن اذا قالن لي كلمه بعد بعد مابقى الا تسذاتى
<<<<<<الحمدلله ماعندنا خوات زوج مفتكيين
وليش احب عيال اختي اكثر لانهم من اختي وعيال اخوي من بنت الناس
لا عاد والله عيال اخواني وخواتي كلهم سواسيه نحبهم ونموت فيه
وكلام الذاهبه صح ميه بالميه احس انها تقرا تفكيري
كلام سليم ومنطقي الذاهبه الا الامام

[عاشق ديرتي بريده]

اقتباس:  المشاركة الأصلية كتبت بواسطة ام ارجوان     عاد تدري ليش لان خوات الزوج نجسات وينقهرن اذا بدا اخوهن يحب مرته ويحسن انها هي اللي ابعدته عنه وهو تخلف التفكير هذا يعني الرجل تزوج خلاص اكيد بينشغل عنهن ليش تصبر عليهن وتحمل وهن يتحرشن فيها اشوف كثير وشلون معاملة البنات لحريم اخوانهن وقدامي كمان انواع الشر لو امه على عيني وراسي اما خواته اكسر روسهن اذا قالن لي كلمه بعد بعد مابقى الا تسذاتى <<<<<<الحمدلله ماعندنا خوات زوج مفتكيين وليش احب عيال اختي اكثر لانهم من اختي وعيال اخوي من بنت الناس لا عاد والله عيال اخواني وخواتي كلهم سواسيه نحبهم ونموت فيه وكلام الذاهبه صح ميه بالميه احس انها تقرا تفكيري كلام سليم ومنطقي الذاهبه الا الامام

هلا ام ارجوان
عيال اخوك من بنت الناس بس يحملون نفس اسمك وعيال اخوك بعد
يعني عيال اختك من ولدكم!! اكيد من ولد الناس
انا استغرب اشوف خواتي يفرحن بعال اختي اكثر من عيال اخوي ماادري وش السبب ؟

[صدى الصوت]

لاتسكن زوجتك مع اهلك وتروح هالمشاكل

ميزتنا القبيحه انا الواحد لاعرس جاب الخدامه قصدي زوجته وسكنه عند اهله


ياخوي المشاكل تجي من ام الزوج هي راس البلاء تنكد على ولده وزوجته والمشكله انه يوم هو نشب بحلقه تقوله يوليدي اعرس واذا اعرس صارت مثل العجوز ام عصى اللي بأفلام كرتون بس تحوم بينهم تناظر وش يسوون وين يبي يروحون وتلقف بكل شي


صراحه بعذر زوجت الولد اللي مانتحرت

احيانا ام الزوج تحسف على القروش اللي يصرفه ولده على زوجته مادري هالعجوز من تبي يصرفه عليه


مايحس بالجمره الا المتزوجين والمتزوجات هم اللي حاسين بهالشي

وهاذا هو الكلام الواقعي

لا للعموميه

تحياتي اخوووووووووووووووووووي

[قصمنجيه]

.............................

[قصمنجيه]

ما شاءالله ... أخونا عاشق ديرتي مواضيع اجتماعية بالصميم دائمًا ...

بالنسبة للي يرمون التهم هنا أو هناك سوى على الأمهات .. أو الزوجات أو أحد الأطراف.... أولاً.. يجب على الرجل فهم خصائص المرأة, فهن يكفرن بالنعم .. أيضًا صاحبات كيد عظيم , و المرأة بطبعها ذات غيرة شديدة (( والغيرة عندها تشتغل على كذا خط .. يعني معنوية و مادية )) .. أنا هنا أتكلم عن المرأة, بشكل عام , و ليس عن زوجة الأخ أو زوجة الولد أو الخالة أو العمة أو الحماة ... فتلك الصفات هي صفاتهن أجمعين .. ليس فيهن مظلوم معروف .. و لا ظالم بيّن ... أقصد لا يقال دائمًا (الخالة ) مظلومة , أو زوجة الولد هي المظلومة ... أو أو ... بل كم زوجة ولد فككت أسر وهي التي قيل بأنها وحيدة يجب مسانتدها , وكم أم فرقت بين الزوج و زوجه, وهي التي يجب أن تكون الركن الشديد لهما .. إذن الخطأ ليس له طرف معيّن ...
و لكني أتفق مع الذاهبة في قولها : يجب على الرجل الترفع عن شؤون النسوان .. فهن لا يصلح لهن حال أبدًا ... فالرجل حينما يعرض عن سماع ما يسوءه فأنه يرتفع بعين زوجته أولاً .. و أهله ثانيًا .. و يريح نفسه بالأخير .. فقد عرفت عن النساء إنها حينما تأتي في مجلس شلته و أعوانه تحش ( حمولته ) , فإن أول شيء تفتخر فيه .. حينما تتباكى بإن زوجها يرفض أن يسمع منها سوأً بأهله , هي تقولها بضيقة و تململ ((كاذبين)) .. قد لا يكون كما تصف ( يعني قد يكون فازع معها ) .. و لكن لزوم التباهي , فإن تظهره بمظهر الشنطوية _ مأخوذة من الشنطة _ فإن ذاك أمر مخجل بعرف النساء ..


.

[the-moon]

هه خلاص قالن لك الحريم وش الطبخة
نعنبو هالحريم مدري وش هاللعانة بهن صدق بنات حراش هع هع
بس أحلى شيء كلام الذاهبة الواحد يبعد وهن يحلن مشاكلهن بأنفسهن

[@ ابتسام @]

تدلع خوات زوجها ؟ ! هي متزوجه واحد والا كل العائلة

احبهم اقدرهم احترمهم بس عاد ادلعهم فيها نظر يعني الاعتدال مطلوب لان بعض الناس اذا دلعته بزياده يضنك ضعيف وتبي تكسب وده ويبدأ يزيد الكيل .

احلى شيء اذا تزوج الولد يسكن بعيد لان اجتماع الحريم مافيه الا المشاكل ويخلقن مشكله من لا مشكله والضحية الزوج .

وهو بعيد يزور امه يبرها يشوف امورها يهدي لها يتصل عليها كل يوم يسمعها كلام طيب وانها الغالية والحبيبه وانه مشتاق لها وبيجي يتقهوى عندها بالوقت الفلاني ’ وبكذا الام ما راح يكون عندها قلق من زوجة ولدها وبترتاح نفسيتها حتى انها ما راح تسمع لبناتها لو حالوا يحوسون كعادة كثير من العوائل .

وبكذا يكون ريح راسه وراس زوجته من المشاكل ’ وما خلى امه تحس ببعده ولا بتقصير .

والمعروف ان الزوجه اللي تحب زوجها بجد تتغاضى عن بعض الامور حتى تعيش بسعادة هي اولا ومن ثم زوجها ’ وما تكون واقفه للصغير والكبير ومصوره نفسها انها مسكينه وفي غابة ’وتتذكر دايما ان الام بتغادر والبنات بيتغيرون مع الوقت وان الزمن كفيل بالنسيان .

.

النقطه الثانيه مالي عيال خوات لكن عيال اخواااني اموووووووووووووووت فيهم

[عاشق ديرتي بريده]

اقتباس:  المشاركة الأصلية كتبت بواسطة صدى الصوت     لاتسكن زوجتك مع اهلك وتروح هالمشاكل ميزتنا القبيحه انا الواحد لاعرس جاب الخدامه قصدي زوجته وسكنه عند اهله ياخوي المشاكل تجي من ام الزوج هي راس البلاء تنكد على ولده وزوجته والمشكله انه يوم هو نشب بحلقه تقوله يوليدي اعرس واذا اعرس صارت مثل العجوز ام عصى اللي بأفلام كرتون بس تحوم بينهم تناظر وش يسوون وين يبي يروحون وتلقف بكل شي صراحه بعذر زوجت الولد اللي مانتحرت احيانا ام الزوج تحسف على القروش اللي يصرفه ولده على زوجته مادري هالعجوز من تبي يصرفه عليه مايحس بالجمره الا المتزوجين والمتزوجات هم اللي حاسين بهالشي وهاذا هو الكلام الواقعي لا للعموميه تحياتي اخوووووووووووووووووووي

هلا اخوي صدى الصوت انت تكلمت عن فئه معينه قادره على فتح بيت مستقل
ونسيت انه بعض الازواج لايملك قيمة استئجار منزل خصوصا مع ارتفاع الاجارات للشقق

شاكر اخوي مرورك

[بنت بريدة سابقا]

احس ان الزوجه ماتحمل فوق طاقتها في بعض البنات (خوات الزوج) يخططن للايقاع بزوجه اخيهن فينفذ صبرها واحيانا الام لها دور لانها تغار على ولدها وتجي وحده تنافسها فيه --لدرجه اني اتذكر وحده قالت لي بعد زواجي بثلاث شهور حملت وطبعا زوجها طاف فيها واي شيء تتمناه يجيبه لها المهم هذاك اليوم اشتهت همبرغر ويوم جابها زوجها تتوقعون وين مخبيها في جيبه عن امه ينقلها بالتقسيط لان امه اي شيء يجيب لزوجته لازم يقسمه بينها وبين زوجته تخيلوا

[*بدايعيه*]

انا بخلي النقطه الاولى زوجت الاخوو لانه موضوع طوويل ولا ينتهي ...

اما النقطه الثانيه احب عيال اختى << مالها غير ولد يادلبوووووووو
لانه ولد اختى واي شئ اسويه فيه ماراح تزعل << عسل على قلبها

بس اعيال اخووي << مالي غير واحد ياربي يخلييييييييييييه

صح اني امووووووت فيه وهو ولد اختى زي بعض ما في فرررق

لكن
مااموون عليه قووه تعرف اخاف امه تحقد علي والا شئ وهي ماتصدق تلقى على اهله شئ تشكى لزوجها
شوف وش يسون بولدي وشووف ..<< هرج ما يقضى

اتمنى افدتك باللى عندي



ومواضعيك قوووووووووووووووويه

[عاشق ديرتي بريده]

اقتباس:  المشاركة الأصلية كتبت بواسطة *بدايعيه*     انا بخلي النقطه الاولى زوجت الاخوو لانه موضوع طوويل ولا ينتهي ... اما النقطه الثانيه احب عيال اختى << مالها غير ولد يادلبوووووووو لانه ولد اختى واي شئ اسويه فيه ماراح تزعل << عسل على قلبها بس اعيال اخووي << مالي غير واحد ياربي يخلييييييييييييه صح اني امووووووت فيه وهو ولد اختى زي بعض ما في فرررق لكن مااموون عليه قووه تعرف اخاف امه تحقد علي والا شئ وهي ماتصدق تلقى على اهله شئ تشكى لزوجها شوف وش يسون بولدي وشووف ..<< هرج ما يقضى اتمنى افدتك باللى عندي ومواضعيك قوووووووووووووووويه

كلامك مقنع ومفيد الحين عرفت السبب

شكرا على الفائده هذي

[زهرة البراري]

الغيرة متبادلة من جميع الاطراف اذا كانوا تقريبا في سن متقاربة
زوجة /اخوات /حموات /أم الزوج بعد لا تنسونها تغاردائما من زوجة ولدها