احلى صلصله ثوم زي طعم صلصله ثوم البيك

[سـمـا]

اليوم جايبتلكم صلصلة ثوم تشبه لصلصله مطاعم البيك

يعني صعبه كل ماشتهيتوها تروحون لمكه وتجيبون المهم مالي خلق اسولف على هالصبح ندش بالموضوع على طول<<<محد قالتس سوالفي


المهم اليكم المقادير والطريقه


1 كوب ماء
ملعقتين نشا ذره
نصف حبة بطاطس متوسطه مسلوقه ومهروسه
ملعقه زبادي
5 فصوص ثوم
رشة ملح
ملعقه عصير ليمون

الطريقه :

- أول شي ندق الثوم قووووووووه مع رشة الملح حتى يصير مثل السائل ( طبعا هذا من تأثير الملح )
2- نذوب النشا في كوب الماء ونرفعه على نار متوسطه ونستمر بالتحريك حتى يثخن المزيج وأول ما يغلي نشيله .
3-نجيب الخلاط ونحط فيه الثوم الي دقيناه والنشا المطبوخ وباقي المقادير كلها وفرررر نشغل الخلاط


الملح حسب الرغبه ويفضل تقديمه بارد


وبالف صحه وهنا على قلبي وقلوبكم


بس اي وحده تصلحها تدعيلي ولا تراه ماراح تنضبط

[أخو رعد الشمال]

يم يم يم
أم أرجوان مبدعة في كل شي ربي يخليك
وصراحة أضفتي للقسم حاجات ماراح ينسنها الحريم
كل شي سويتية لهن من طبخات ووصفات وحلويات
والله ماقصرتي مع الحريم اللي بالمنتدي
كل شي علمتيهن أنا أنصحي أختي أنك
تألفين كتاب وتحطين الطبخات كلها فية
تحياتي

[’ ŚĀM]

مشكووووووره ام ارجوااااان ...انشااء الله بووريها امي تسووويها لنا<<والله من السنــع خخخخخخخخخ

تحيتي لك

[جبل السكر]

[align=center]مشكــووورهـ أم أرجـــوان

أتكـــاسل أعمــلهــا مـادام البيــكــ بجنبــي

الله يعطيكـ العافيهـ إن شــاءالله أجــربها وأشــوف مــاأدري يمكــن أخســر البيكـ

ههههههههههههههههه[/align]

[الوردة]

...مشكوره ام ارجوان ان شاء الله أسويها...

[العصامي]

أم ارجــوان
صحيح إني رجّل ولا لي بهالطبخات والمقادير
ولكن أحياناً أفزع مع المدام وأطبخ بالبيت على قد حالي
المهم الصلصة اللي حطيتي هي اللي لونها أبيض ؟؟ صح ؟؟
ممكن تجيبين اللي لونها أحمــر ؟؟ لأني أحبها بشكل مو طبيعي 00

[سـمـا]

رعد الشمال

نجودي

رواءالروح

الورده

العصامي

مشكوريين على هالطله وتستاهلون اكثر


الصلصله الحمراء ماعرف اعملها بسان شاء الله ابحث عنها واحطها عما قريب بس اتفرغ ان شاء الله

[الحنتريش]

مشكوره ام ارجوان وياسعد رجلتس بتس انتي وطبخاتس الفري قووووود

يانا اموت بصلصة ثوم البيك بس ماعندي احد يحوفه اغديتس تبيعين علينا

[الحنتريش]

مشكوره ام ارجوان وياسعد رجلتس بتس الله يهنيكم ببعض انتي وطبخاتس الفري قووووود

يانا اموت بصلصة ثوم البيك بس ماعندي احد يحوفه اغديتس تبيعين علينا

[رغووده100]

مشكوره ام ارجوان ان شاء الله أسويها...

[سـمـا]

الحنتريش

مشكور

خلاص اببدا ابيع وحط اعلان هنا والطلبات من هنا



رغوده مشكوره حبيبتي على هالطله

[وميضُ البرق]

مشكورة أم أرجوان.
بس سؤال:وش تحط معه هالصلصة؟
<<< لاراحوا لمكة ياخذون عدتهم معهم

[سـمـا]

وميض هلا فيك والله

شوفي حبيتي انا اسويها اذا صار عشانا سندويشات

سواء هبرجر او شاورما وغيرها

وكذلك تجنن مع البروستد

انتي مثلي ماحب اكل المطاعم الا في الحاجه يعني اذا صرت عجازه قوه بذاك اليوم

ومالي خلق اطبخ

ولا كل شي ناخذه معنا

[بدرالوابلي]

على طاري البيك ..... آخر مره بالمدينه دخلنا لمه وكان زحمه وبالأرقام والطعميات يتاغرن بوجيه حراس الأمن عند الباب لاجن يطلعن ؟؟؟؟؟ المهم طلبنا المكعبات واثر الدعوى ماش مهوب مثل اول ؟؟؟ تحس كانك تاكل حلقوم حار!!!!ومانجض (مانضج ) .....أكلنا شوي حق العنوه وخليناه لكم يالطعميات ؟؟

[الافق]

من وصفتها .. أجزم أن طعمها لذذذذذذذذذذذذذذذذذذذذذذذيذ ..
لكن المشكله ..
- هل يأثم آكل الثوم والبصل من الرجال إذا أكلهما واتجة إلى المسجد؟


على ماسمعت من مشائخنا أن عليه إثم لأنه يؤذي المصلين، وإذا كان مبتلى فليمتهما طبخاً،لحديث. - من أكل ثوماً أو بصلاً فلا يغشانا في مصلانا- فيه زجر ونهي له من أكل الثوم والبصل، وليس عذراً له أبداً في ترك صلاة الجماعة. والمساجد يجب أن يحرص المسلم على تنزيهها من الأذى، بل أمر رسول الله صلى الله عليه وسلم أن تنظف وتطيب، وأما حمل الأذى إليها فغير جائز ومثل ذلك رائحة الثوم والبصل ....


تحياتي