أبو فارس .. نقل مدارس .. !!

[الذاهـبـة]

السلام عليكم و رحمة الله ..

قدر الله و جعلني أنثى .. تعيش في المملكة العربية السعودية ..

و من عامة الشعب أيضاً ..

وهذا سبب كافي جداً .. لأخبركم أني لا أمتلك سيارة خاصة ..

ولا يسمح لي بقيادتها ..

لكن .. بين الفينة و الأخرى .. " يبخون " علينا من المسكنات ..

حتى نسكت و نرضى .. هه !!

ماعلينا ..

المهم أنني تورطت _ و عدد لا بأس به من زميلات العمل _ بتعذر وسيلة النقل ..

وحيث أنه يصرف لنا بدلات ( نقل )من المعازيب .. إذن : كل وحدة تبلع العافية ..

و تبحث لها عن " نقل " يتناسب مع كينونتها .. !

فاجتمعنا ننقب و نبحث عن ( نقل ) بمواصفات قياسية ..

فكل واحدة منا .. أخذت قلم و ورقة مفكرة .. و جعلت تكتب شرطها .. هه !!

فمثلاً ..

1. سيارة جديدة واسعة .. و مكيفة !

2. سواق سعودي .. ذكر مسلم عاقل بالغ قادر فاهم ..

3. مــــــــــــايسرع .. * شرطي الخاص *

4. يحترم المواعيد .. * كثر منها *

و غير ذلك ..

بدأت عندنا حالات الطوارئ .. و تحولت جوالاتنا إلى E.R

وذلك لإمتلائها بأرقام .. أرقام .. أرقام .. مسجات و بطاقات اعمال .. هه !!

و البركة في صديقاتنا و معارفنا .. فزعــــــــــــات عسانا ما نعدمهنش ..

لااااا إله إلا الله ..

من بيدق على كل ذولا .. !!

استعرضنا الأرقام ..

أبو خالد نقل سعودي
<<< رفيقنا بالمنتدى .. كااااااااااااااك

ابو محمد نقل
<<< وبالمساء يبيع قرصان ..

ياسر نقل فلسطيني
<<< عووووذه .. قطيعه مانبي متوحشات من هالجنسية !

نقل سوداني 1
نقل سوداني 2

<<< ياحول مالهم أسماء ؟!

شركة نقل .. وكسي
<<< إذا غيروا اسمهم و خففوا سرعتهم .. ركبنا معهم .. هه !!

شركة نقل .. راحة الطريق
<<< راحة طريق .. بس تعب جيوب .. ولازم 12 بنت .. من وين نأمن هالعدد !!

:
:
:

طلبنا أول رقم و كان نقل مصري الــ g ـنسية ..
-السلام عليكم .. تنقل مدرسات يا أخوي ؟
-و عليكم السلام و رحمة الله و بركاته نعم يا أختي الفاضلة أنقل مدرسات إن شاء الله ..

* الصراحة إني لان قلبي من قوة إيمان هذا المصري الله يجزاه خير ..
و كدت أرى دمغة السجود على جبينه .. سبحان الله الورع باين بالتليفون !!

- طيب بكم ؟
- لن أحدد بارك الله فيكي أنتم بأه حددوا و شوفوا ..

* وااااو .. والله انه انسان خيّر .. من جد أمي داعية لي *

- طيب وشي سيارتك ؟
- مرسيدس موديل 40 قبل الميلاد .. و مافيهاش مكيف للأمانة .. !

* ايه عادي .. أصلاً فرصة نسوي ساونا بالطريق .. هه !

- طيب ممكن تعطينا صورة من الإقامة .. و مكان عملك و اسم كفيلك ؟
- إيه ؟ أولي تاني كده ؟

* بسم الله ؟! وش به ذا المسلسل المصري ؟!

- اسمعي بأه أنا لي بالصعوطية خمسة و تلاتين سنة .. و معروف بين كوووول اهل
بريدة .. آل إيه ؟ عاوزه إيه يختي ؟ بأولك إيه .. خلاص .. موش حــ وصّل حد ..
ماشي كده ؟!

<<< مازالت الكشرة مهجوجة .. أثر الإنقلاب المفاجئ !!

- وع من زينك يا لطعمية .. والله لأبلغ عنك البلدية .. عشان تعرف ترفع صوتك علي .. ويعه بلا ويعه .. عندي 564546 رقم سواق غيرك .. تحسبنا بنموت ؟!

* طبعاً هذا كله بعد ما قفلت الخط .. هه !!


******************

هذي سيارة أبو محمد .. سواق سعودي .. تجاوز عمره 66 سنة ..


ولو .. كشخة هالشيبة .. هه !

بس مشكلة مامعه محرم ..

أمممممممم

الشكوى لله تراه شايب يعني اطمئنوا يا بنات .. لو تنفخ عليه طاح .. !

ركبنا معه أول يوم .. بعد ما اتفقنا على رسم التوصيل ..

الرجل محترم جداً .. و سيارته مهضومة ..

صحيح إننا كأننا ( نكته تجوب الشوارع ) .. بس ميخالف ..

أهم شي نوصل الدوام السعيد .. هماه ؟!

أكثر شي أزعجنا بهذا النقل .. هو سرعته الجنونية .. و مع الدوار يمشي على كفرين ..!

بصراحة مادري ليه الشياب يحبون السرعة .. !!

أجل وش خلوا للكامري .. أبو خشم رملي !

و فضلاً عن ذلك .. لعب في حسبتنا من كثر ما يمسك " بريكات " ..

لدرجة أن وحدة من البنات حامل .. و خفنا عليها تجهض أو ينقلب البيبي .. !!

الله يجزاه خير .. ما ينفع .. أبد ..!!

جرب اللي بعدو .. !


******************

* أبو مرزوق *

ياهوووووو اسمه الصراحة رهيب .. ذكرني بموضي الشمراني و الشلة ..

ابو مرزوق يجيب معاه محرم ..

كل يوم شكل ..

مرة وحدة عصلا .. غبية

و مرة دبية .. تهبل خفيفة دم ..

و مرة عجيّز .. ما تسمع .. وبس نايمة .. أو الله محرم !!

و من أول ما استقلينا سيارته .. ( جمسن حمرا تلاعب الهوى )

و انا قلبي قارصني ..

أممممممممممم

غير أنه على طول مشغل ( أغاني ) .. و لاهو معتبر اللي معاه .. شي !!

حتى شكل أذانيه .. ما يطمن .. كبار و دائرية .. كأنها طيران .. !

و عينه زايغة .. !!

ركبنا معه يوم .. و من بكرا .. جاء بسيارة فورد فيكتوريا مادري من وين زارفها ..

ولو ما عرفناه من أذانيه .. ماكان ركبنا معه .. قال إيش ؟؟ الجمس الملكي عطلان ..

و اضطر أنه يوقفنا بالشارع بوسط الطريق .. و ينقلنا بسيارة ثانية ..

وحنا مثل الشغالات المهربات .. ماغير نهزهز روسنا .. ماندري ليه كذا طيب ؟!

آه .. يا عيشتن قشرا ..!

من عقب العز .. صرنا " ترانزليت " تحت هالشموس !!

ومازالت الاتصالات قائمة على قدم .. و عظم .. هه !!


________________

رسالة لكل من تسمح له نفسه ( وهو قادر ) بــ ترك محارمه عرضه لهؤلاء ..

اتقوا الله في بناتكم .. اتقوا الله في أماناتكم

كيف تنام و أنت ( الرجّال ) .. وما تدري عن اسم الرجل اللي ينقل أختك .. !

الدنيا مازالت بخير .. نعم

و أهل الذمة و الامانة موجودين و باقين .. نعم

لكن الحرص واجب ..



اللهم هل بلغت ؟!

[ابوخالد382]

الحقيقة يالذاهبه ,عيالي قاعدين يناظرونن أقرأ وأضحك ومستغربين وش فيه رمزهم ,إنهبل ,قالوا نجيب لك قران تشربه...اللي مايدري مايدري....
عموما هذه معلقة رائعة تحكي معاناة الكثير من بناتنا كل صباح,,,بس تبين الصدق تراك سويتي لي غسيل مخ ,وبديت أفكر بجد بموضوع قيادة المرأة ,وخصوصا بعد ماقريت عن أبو إذان كبار أبوعيون زايغه ....لاتحرميننا من هذه الدرر الثمينة سيدتي...دمت بخير

[الذاهـبـة]

اقتباس:  المشاركة الأصلية كتبت بواسطة ابوخالد382     الحقيقة يالذاهبه ,عيالي قاعدين يناظرونن أقرأ وأضحك ومستغربين وش فيه رمزهم ,إنهبل ,قالوا نجيب لك قران تشربه...اللي مايدري مايدري.... عموما هذه معلقة رائعة تحكي معاناة الكثير من بناتنا كل صباح,,,بس تبين الصدق تراك سويتي لي غسيل مخ ,وبديت أفكر بجد بموضوع قيادة المرأة ,وخصوصا بعد ماقريت عن أبو إذان كبار أبوعيون زايغه ....لاتحرميننا من هذه الدرر الثمينة سيدتي...دمت بخير

اهلا بك استاذ ابو خالد و مشكور على الإطراء ..

ممكن نفكر بــ حل ؟

ترى عن نفسي و الله ما اسوق ولا أفكر أسوق بحياتي ..

عقب حادث جرى علينا العام الماضي .. الله لا يعيد الشر على المسلمين ..

يعني تبت إلى الله توبة نصوحا ..

بس اعتقد لو المؤسسات الحكومية تأمن للموظفات نقل خاص ..

مو أحسن ؟

مثل الموجهات التربويات .. عندهن جموس تحت الطلب ماشاء الله عليهم ..



حياك الله استاذ ..

[عاشق ديرتي بريده]

استاذتي كاتبه موضوع

لاتعليق لدي لان استاذتي هي اللي كاتبه الموضوع فانا طالب اقراء فقط !!


<< مبسوط مايدري وراه

[الذاهـبـة]

اقتباس:  المشاركة الأصلية كتبت بواسطة عاشق ديرتي بريده     استاذتي كاتبه موضوع لاتعليق لدي لان استاذتي هي اللي كاتبه الموضوع فانا طالب اقراء فقط !! << مبسوط مايدري وراه

فشلتني

شوف استاذ عاشق بريدة ..

ربي ماخلق لي قلبين في جوفي .. ما أقدر أكتب مواضيع و أردرد .. !!

لذلك أنا اخترت أني انشغل بالردود .. و أترك المواضيع للكتاب الحقيقيين ..

وعموماً ..

لي موضوع يطرح كل 6 أشهر .. و تقدر تبحث عن مواضيعي السابقة

في معرفي السابق ( الذاهبة ) بدون مد ..

و تراك بتلاقي تفشيلات واجد .. يعني ردود لي يوم أنا بزر توني ما انفطمت .. هه !



و عساك دوم مبسوط ان شاء الله .. و الجميع ..

[الناقد1]

طبعاً غريبه أصلت الذاهبه ابتداءً لموضوع
ولكن تزول الغرابة إذا عرفنا أن الأمر يتعلـّق بتلك المعاناة
كانت خليلتي تبصُرني باعتراض حينما اقول بأن قيادة المرأة للسيارة مباحة ، وخلال أيـّام مصر الجميلة كنت أقول لها انظري لهذه المنقّبة التي وارت يديها بالجوارب ، إنها تقود سيارتها بكل حشمة واحترام ، هل من الممكن أن اقول أن قيادتها للسيارة حرام ، وأن ذيك التي تزاحم العالم في الميكروباص قد نالت من سبل العفاف مالم تنله تلك ؟
ياسيدتي
لولا مخرجات قيعان الجفاف العاطفي ، لقلت اطلقن يا سعوديات كفرات سياراتكن للريح
لقد رق قلبي لنسائنا بصورة لم ترق لـ" كسافة المصريات "
وأنا أتردد إلى الرس لأشهر معدودة ، كنت أشاهد صوالين وتوبيسات من الفجور تنفر نفور يوم المشهد !
يدعوني الفضول والفراغ أحياناً إلى التطلع بوجوه السائقين فألعن آباء تلك النساء الذين أودعوهن تلك الأيدي " خارج نطاق الخدمه "
لن أنسى ذيك البدائعية التي كنت أشاهدها تقف على طريق سريع تنتظر النقل ، وفي شدة البرد ولمسافة تبعد تقريبا 100 متر عن بيتهم الرابضة لوحدها في ذيك المزرعة
أي شقاء هذا ؟
لقد كدت أن اقول فيها " عصيدة " شعر ولكن الله سلـّم

كنت سأقول بأن الموضوع سيتجه نحو قيادة المرأة للسيارة ، ولكني وقعت فيما حاذرت منه

* كنت سأقول لك ابحثي أي حديث يقوله الرجال في مجالسهم عن هؤلاء السائقين ، فجاء أخينا راشد بالخبر اليقين !

دمت بعيداً عن كسافة النقل

[الذاهـبـة]

اقتباس:  المشاركة الأصلية كتبت بواسطة الناقد1     طبعاً غريبه أصلت الذاهبه ابتداءً لموضوع ولكن تزول الغرابة إذا عرفنا أن الأمر يتعلـّق بتلك المعاناة

أهلا و سهلا استاذ الناقد1 ..

شرفتنا بحضورك .. ولعل التأصيل يحتاج فعلاً إلى المعاناة ..

" يا جمس خبرني عن أمر المعاناه .. هه !! "

اقتباس: كانت خليلتي تبصُرني باعتراض حينما اقول بأن قيادة المرأة للسيارة مباحة ، وخلال أيـّام مصر الجميلة كنت أقول لها انظري لهذه المنقّبة التي وارت يديها بالجوارب ، إنها تقود سيارتها بكل حشمة واحترام ، هل من الممكن أن اقول أن قيادتها للسيارة حرام ، وأن ذيك التي تزاحم العالم في الميكروباص قد نالت من سبل العفاف مالم تنله تلك ؟

جرت العادة أن نرفض بالبداية ..

لكن بعد المفاوضات .. قد يلين راسها شوي .. و تقبل .. !

عموماً المقارنة ظالمة ما بين القيادة في القاهرة .. و القيادة هنا ..

هناك السيارات ما تمشي .. و الطبلون ما يتعدى 40 ..

لكن هنا .. أممممممممممم .. ولو مازلت أنا أيضاً معارضة .. !

اقتباس: ياسيدتي لولا مخرجات قيعان الجفاف العاطفي ، لقلت اطلقن يا سعوديات كفرات سياراتكن للريح

أممممممممم !!

عفواً .. هل أنت من العـــُلمانية بشيء ؟!

اقتباس: لقد رق قلبي لنسائنا بصورة لم ترق لـ" كسافة المصريات " وأنا أتردد إلى الرس لأشهر معدودة ، كنت أشاهد صوالين وتوبيسات من الفجور تنفر نفور يوم المشهد ! يدعوني الفضول والفراغ أحياناً إلى التطلع بوجوه السائقين فألعن آباء تلك النساء الذين أودعوهن تلك الأيدي " خارج نطاق الخدمه " لن أنسى ذيك البدائعية التي كنت أشاهدها تقف على طريق سريع تنتظر النقل ، وفي شدة البرد ولمسافة تبعد تقريبا 100 متر عن بيتهم الرابضة لوحدها في ذيك المزرعة أي شقاء هذا ؟

والله ثم والله .. أن بعض الحالات .. ما يحتملها رجل كامل الرجولة ..

فما بالك بــ فتاة عشرينية لم تطرق أبواب الدنيا الكبيرة بعد .. !

اقتباس: لقد كدت أن اقول فيها " عصيدة " شعر ولكن الله سلـّم

فعلاً .. سلمت من العصيد !

اقتباس: دمت بعيداً عن كسافة النقل

جزاك الله خير استاذ الناقد .. و سعيدة لمرورك ..

[سـمـا]

المشكلة القرى لازم سواق


لا واللي عندنا يقول ماراح ادخل الحارة تطلعين براس الشارع هالعجاز عساه للماحي


يعني تخيلي بالهفجور قايم انا وابو الشباب وقاعدين نتحراه براس الشارع علمه


لا وستين كيلو وياخذ الف عساه مايتهنا بهن قولو اميين


لذلك اقولك اللي في القرى لازم نقل

وكذلك اذا صار المسؤول دوامه بعيد يعني صعبة يطلع ويشيله ويرجع


يعني فيه ظروف كثيرة تخلي صاحب البيت يسلم اهل بيته لهسواقيين

بس أن شاء الله ربي يفرجه ونصير نسوق لو دباب

[الذاهـبـة]

اقتباس:  المشاركة الأصلية كتبت بواسطة ام ارجوان     المشكلة القرى لازم سواق لا واللي عندنا يقول ماراح ادخل الحارة تطلعين براس الشارع هالعجاز عساه للماحي يعني تخيلي بالهفجور قايم انا وابو الشباب وقاعدين نتحراه براس الشارع علمه لا وستين كيلو وياخذ الف عساه مايتهنا بهن قولو اميين لذلك اقولك اللي في القرى لازم نقل وكذلك اذا صار المسؤول دوامه بعيد يعني صعبة يطلع ويشيله ويرجع يعني فيه ظروف كثيرة تخلي صاحب البيت يسلم اهل بيته لهسواقيين بس أن شاء الله ربي يفرجه ونصير نسوق لو دباب

هلا بك يا غالية

أم ارجوان بقول لك شي ..

تعرفين حنا السبب في استغلال هالناس ؟

اكيد أنتي تعرفين كم بيكلفك لو تستقدمين سواق خاص بك ؟

أو أحد من البنات اللي معك بنفس القرية

لو كلكم جبتوا سواق واحد .. ترى راتبه 600 ريال أو أكثر شوي

و قدرتوا تدبرون اموركم ..

بس مشكلتنا .. مانعرف ندبر ..

خلاص هو قال 1000 يعني 1000

شوفي الحين الشغالات بكم اجارهم ؟!

3000 ثلاثة آلاف ريال !!!!!!!!

يعني ست أضعاف راتبها الحقيقي

و مع ذلك .. حنا نقول إيه ميخالف ..

مادام كل شي عندنا ايه ميخالف .. خلاص أكيد كلن بيلعب علينا .. !!

حياك الله حبيبتي ..

[امرؤ القيس]

اختي ام هشام <<<<<< اللي مايعرف اسم ولدي ما اعرف اسم ولده خخ

ماعلينا 00المهم


بالامس كنت عازم نفسي عند ابوي الله لا يحرمنا منه ويعطيه طولة العمر

وبعد صلاة المغرب اجرى اتصال بواحد يودي ويجيب ومعه مرته عشان يروح باختي تدرس ورى الشمس بخمس كيلو

تصدقي اننا خمس رجاجيل كلهم شلولخ وكل واحد ياقع على زنده الحمار اعزكم الله بس ماعطانا وجه لانه يدري بالبير وغطاه ولا احد قايم من فجر الله يودي عرضه الى ماوراء الجبال خخخخ

صراحة مأساة يعانن منها خواتنا

الله يعينكن

شكرا لك واعانك انت واختي والبقية

[الذاهـبـة]

اقتباس:  المشاركة الأصلية كتبت بواسطة امرؤ القيس     اختي ام هشام <<<<<< اللي مايعرف اسم ولدي ما اعرف اسم ولده خخ ماعلينا 00المهم بالامس كنت عازم نفسي عند ابوي الله لا يحرمنا منه ويعطيه طولة العمر وبعد صلاة المغرب اجرى اتصال بواحد يودي ويجيب ومعه مرته عشان يروح باختي تدرس ورى الشمس بخمس كيلو تصدقي اننا خمس رجاجيل كلهم شلولخ وكل واحد ياقع على زنده الحمار اعزكم الله بس ماعطانا وجه لانه يدري بالبير وغطاه ولا احد قايم من فجر الله يودي عرضه الى ماوراء الجبال خخخخ صراحة مأساة يعانن منها خواتنا الله يعينكن شكرا لك واعانك انت واختي والبقية

اهلا بك استاذ أبو عدي ..

ترى عدي بطل العالم .. من مبطي ..

بس والله أنا أذكر حداكم اسمه ابو مازن .. ولا عاد ادري منهو ..

لا تواخذنا طال عمرك ..

والله يخلي لك الوالد .. و يخليك لــ عدي ..

و مبروك تعيين البنت ورا الشمس ..

ترى قريب بالحيل الحمد لله .. أشوى من بنت جيراننا طلع تعيينها بكوكب الزهرة

بس الظاهر مهب مداومه هناك ..

حياك الله ..

[جمان البحر]

هههههههه... والله موضوعك يمس الوتر الحساس ..

الله يعيننا وياك ... عاد تصدقين لو يخلون على الاقل الحريم يوصلن حريم وتختصر القيادة النسائية على ذلك كان سلمنا من كثير من المشاكل خصوصاً من أمثال ابومرزوق ..مع اني ضد قيادة المرأة الا اني الآن أقول خذوا هالاقتراح السابق فقط ...

[الذاهـبـة]

اقتباس:  المشاركة الأصلية كتبت بواسطة جمان البحر     هههههههه... والله موضوعك يمس الوتر الحساس .. الله يعيننا وياك ... عاد تصدقين لو يخلون على الاقل الحريم يوصلن حريم وتختصر القيادة النسائية على ذلك كان سلمنا من كثير من المشاكل خصوصاً من أمثال ابومرزوق ..مع اني ضد قيادة المرأة الا اني الآن أقول خذوا هالاقتراح السابق فقط ...

اهلا و مرحبا جمان البحر ..

هو الصراحة اقتراح جميل ..

يعني نجيب سواقات .. بس أخاف تزعل أو تضيق علينا .. و تتركنا

تعرفين حريم نفوسهن خايسة .. هه !!

[شموع تحت المطر]

الذاهبــــــــــــــــــــة فديت قلبتس...

ذكرتين بحالنا اللي مضى..تصدقين مافي أحد ببريدة ماركبنا معه..انواع اللعنه...

وومارتحنا الا بالسواق..... بس وين اللي يقتنعون... قسم انهم مهزلة هالنقل وخرابيطهم..

[الذاهـبـة]

اقتباس:  المشاركة الأصلية كتبت بواسطة شموع تحت المطر     الذاهبــــــــــــــــــــة فديت قلبتس... ذكرتين بحالنا اللي مضى..تصدقين مافي أحد ببريدة ماركبنا معه..انواع اللعنه... وومارتحنا الا بالسواق..... بس وين اللي يقتنعون... قسم انهم مهزلة هالنقل وخرابيطهم..

هلا بك عزيزتي شموع

فعلاً اغلب ( النقل ) هنا مهازل ..

و أغلب البنات اللي يركبون معهم ساكتين .. و راضين ..

مثل ما قالت منال ..

الله يعين الجميع ..