هل توافق ان يفتح (( سينما )) في السعودية .. وان كنت موافق فما شروطك ؟

[فارس الميدان]

بسم الله الرحمن الرحيم

الاخوه الاعضاء هل تلاحظوا معي ان فكرة السينما غير مطروحه في اعلامنا ولا حتى بالتلميح ؟

مع ان الكثير يتسائل عن عدم وجود سينما في بلادنا

لو افتتح سينما في السعودية كان الشباب يتسلى بدل ماهو يتسلى في اشياء بايخه والاغلبيه من شبابنا مو عارف وين يروح في الكثير من اوقات الفراغ المتفحشه

يمكن بعض الناس لا يرغب وجود سينما في السعودية من اجل الاختلاط بس هذي حلها سهل جداً

حط يوم للرجال ويوم للحريم زي الصناعات الي كل سنه في طريق عنيزه .. او يحطون صاله خاصه بالرجال وصاله خاصه للحريم .

واذا عشان بعض الافلام الي فيها شوي وساخه .. مانبيها لا يجوبونها ، او يجبونها بس يقطعون المشاهد البايخه ..

والغريب ان محلات الفديو منتشره وفيها كل شي بس السينما اوسع صدر وتغيير جو وافلام جديده وحديثه



وش رايكم بالفكره ؟

ياليت تفيدوني في مشاركاتكم



















فارس

[راشد الصليحان]

على فكرة يافارس !

يقولون بالماضي كان فيه سينما بأندية الرياض الهلال والنصر والشباب !

وكان يعرض افلااام وسخة ! وروادها من بعض الشباب وبعض الجاليات العربية !

الله لايعيد ذكراها مرة ثانية !

شكرا لك ,,

[لمبة شارع]

السينما بحد ذاتها وسيلة عرض لجمع كبير من الناس أليس كذلك؟؟؟

طيب



الناس تميل الى الخصوصية في كل شأنها ومن ذلك استعمال السيارات الخاصة بدل وسائل النقل العام كالباصات أليس كذلك؟؟

والأنتجاع بالاستراحات بدل حدائق البلدية العامة أليس كذلك ؟؟

ولأن التلفزيون والفديو والدي في دي لم تكتشف قبل 70 او 80 سنة فقد كانوا يذهبون الى صالات السينما الجماعية لمشاهدة العروض...

اما الان فقد توفر لكل انسان وسيلة عرض وهو في منزله بارخص الاثمان!!أليس كذلك؟؟

وقلنا ان الناس تميل الى الخصوصية في كل شأنها أليس كذلك ؟؟


طيب


س_ماالمنفعة من السينمااااااااااااااااااااااااااااااااا؟؟؟؟؟؟؟؟



ج_ مثل المنفعة من التلغراف والتلكس والتروماي والعربية الكرو وأطر الصعيد ووسائل الاتصال القديمة التي صارت في المتاحف الآن


يعني عشان تتفرج على فلم تروح لصالة السينما ؟؟؟......او تشوفه بالبيت او في الاستراحة او حتى في السيارة وانت ماسك خط!!! وبجنبك براد الشاهي او حتى لو تبي تتن او تشيش ماعندك احد توذيه!!!

والمعنى انه ما بقى من السينما شي إلا اجتماع الناس في صالة واحدة للفرجة على فلم او اي عرض

والناس خلقها ضييييييييييييييق

ولا تحب الحشرة في كرسي ساعة او ساعتين..!!


يعني بالعربي السينما وصالاتها شي من الماضي ماينفع هالايام يصير وسيلة لإغراء الناس بالخروج من بيوتهم والبحث عن موقف للسيارة والرصة في كراسي تقل طلاب في رابعة جيم. يحترون الفسحة عشان يروحون للحمام...



يافارس لو السينما تصلح لهالايام كان ماقصر المرجفون في المدينة

وعلى كل حال كما قال واحد عزيز علي

الارض الصالحة لا تمطر بالنفايات!!!

[المتزن]

اللي ما عنده مشكلة في وجود محلات الفيديو , فيجب أن يكون موقفه من السينما نفس الشيء ..


هذا رأيي اخوي فارس الميدان ,,


وتقبل تحياتي 00
المتزن

[عيون الصقر]

يمكن تكون السينما مرفوضه من مجتمعنا لما التصق بها من سمعة سيئة وكذلك للاعتقاد بان المجتمع محافظ ولايجب افساده بدور السينما لكن الحقيقة ان الفساد تنوعت وسائله حتى غلبت السينما ولايخفى على الجميع صار كل انسان يملك دار سينما مستقله في بيته عبر الدش والفيديو ومحلات الفيديو متابعة لكل جديد ولا حاجة للخروج لدار سينما وحتى في جواله يستطيع متابعة فلم وقناة تلفزيون اذا اراد ذلك وسوف ياتيك عبر الردود من يعلن ارتباط قيام القيامة بانشأ دور سينما ، والسينما كصناعة هي مرتبطة بتقدم المجتمع ثقافياً ودرجة تقبله وبالتالي صياغة شروط اقامته بما تقبله عادات وتقاليد المجتمع ثم يكون الامر عادي اذا كان منضبط بتعليمات يرضاها المجتمع

تحياتي

[ابو ريما الخالدي]

موافق

والشروط هي

ممنوع الدخول لاقل من 18

ليس بسبب نوعية الفيلم فالفيلم الذي في محلات الفيديو سوف يكون نفس الشي المعروض في السينما

وسبب تحديد العمر حتى لايكون فرصه لضعفاء النفوس

والبيب بالأشاره يفهمووووووووو

[لمبة شارع]

اقتباس: والسينما كصناعة هي مرتبطة بتقدم المجتمع ثقافياً ودرجة تقبله وبالتالي صياغة شروط اقامته بما تقبله عادات وتقاليد المجتمع ثم يكون الامر عادي اذا كان منضبط بتعليمات يرضاها المجتمع

يعني انزل تعليقي ثم احدث الصفحة والقى عيون معلق بعدي واشهق من روعة المفاجأة وآخرتها ياعيون تقول السينما كـ صناعة وصياغة شروط ومنضبط بتعليمات الخ من هالكلام اللي يصلح يقال بالقناة الاولى ياعيون وانت تدري بالبير وغطاه!!!!

هذولا عجزوا يحطون قانون لضبط سياقة التكاسي !!!أو قانون لتحديد سعة القاطع الكهربائي في المنازل!!!

تبيهم كفو يحطون قانون لادخال شيء لا وجود له في الذهنية الشعبية المحلية إلا في منطقة الخنبقة والوناسة الممغنطة!!!

ياعيون ياعين ابوي قل شي يصلح للتسويق مهوب مثل حكي احمد الرشيد يوم هو وزير للتربية والتعليم !!تقل يقرا تهنئة بالعيد وراية المملكة خفاقة بالمحافل الدولية والسؤدد وما ادري ايش!!!!

[فارس الميدان]

اقتباس: راشد الصليحاني على فكرة يافارس ! يقولون بالماضي كان فيه سينما بأندية الرياض الهلال والنصر والشباب ! وكان يعرض افلااام وسخة ! وروادها من بعض الشباب وبعض الجاليات العربية ! الله لايعيد ذكراها مرة ثانية !

لا انشاءالله هذي ما تنعاد مره ثانيه .. انا اقصد السينما الدارج في دول الخليج ..

ياليتك تعطيني رايك في تواجدها عندنا بالسعوديه



اشكر لك مرورك












فارس

[فارس الميدان]

اقتباس: لمبة شارع السينما بحد ذاتها وسيلة عرض لجمع كبير من الناس أليس كذلك؟؟؟ طيب

طيب حلو

اقتباس: الناس تميل الى الخصوصية في كل شأنها ومن ذلك استعمال السيارات الخاصة بدل وسائل النقل العام كالباصات أليس كذلك؟؟ والأنتجاع بالاستراحات بدل حدائق البلدية العامة أليس كذلك ؟؟ ولأن التلفزيون والفديو والدي في دي لم تكتشف قبل 70 او 80 سنة فقد كانوا يذهبون الى صالات السينما الجماعية لمشاهدة العروض... اما الان فقد توفر لكل انسان وسيلة عرض وهو في منزله بارخص الاثمان!!أليس كذلك؟؟ وقلنا ان الناس تميل الى الخصوصية في كل شأنها أليس كذلك ؟؟

هههههههه .. لمبة اسمحلي ياحبيلك بسوي نفسي امون عليك شوي واقولك : ( لا احد يسمعك بيقول عنك
< قروي > )

الحين تقارن السينما في شاشة العرض الخاصه الي عندك .. النت صادق

طيب انا بشرحلك

1

السينما لها عرض خاص في ايصال الصوره مختلف تماما عن الشاشه التي في بيتك وقد وصلت التقنيه الحديثه الى ما يسمى بالسينما الثلاثي الابعاد وهذا هو الافضل الان وهو موجود في دبي بالتحديد في سوق ابن بطوطه اذا اردت ان تحضر فلم لكي تعرف طريقة عرضه للصوره مع عدم وجود اي اعراض لعين المشاهد وجعل الاجسام التي بالمشهد وكأنها على الطبيعه
2

السينما له حقوق عرض وارباح مستقله عن الشاشه الخاصه وتسبق التلفاز في( العرض ) في بيتك وله بعض المشاهد التي تكون مصوره خصيصاً لشاشة السينما .


3

السينما لها هندسة في الاصوات واخراج صوت غير التي في بيتك لدرجه تجعلك تعيش اجواء السينما وكأنك حاضر المشهد على الطبيعه .. مثال : اذا كنت متابع فلم اكشن وهناك اصوات اسلحه واطلاق نار ومرور طائره تسمع الاصوات مختلفه وكأنها موجوده عنك والطائره كأنها مرت من فوق الصاله يعني الاصوات مهمه لكي تتعايش مع وضع الفلم وتكون اكثر حماس ومشدود مع حلاوة الصوت والمؤثرات الصوتيه التي يدفع لها الملايين من اجلك ..

حتى اني سمعت ان هناك في اليبان قد اخترعو سينما وصاله حديثه تجعلك تشم رائحة الاشياء الموجوده بالمشهد



لمبة شارع انت صادق تقارن الكرولا بالبانوراما ؟

كلهم وسيلت نقل بس المواصفات مختلفه تماما .. فهمتني ؟

















فارس

[فارس الميدان]

عيون الصقر
اهلا بك

حبيبي من قالك ان السينما سمعتها سيئه ؟

ليش الناس ما خذه هالفكره .. شي غريب ؟

بالعكس السينما جدا عادي ومافي اي شي عشان يكون هناك ضوابط ومادري شنو


وبعدين لو تلاحظ معي ترا فيه اشياء مشابهه لسينما ولم ينتبه الناس لها

الحين اذا صار فيه مباراه على شاشة art المقاهي كلها تعرضها لناس والناس متقبله الوضع مع ان المباريات انا احسها اقوي من السينما الافلام لان الواحد اذا اتحمس بيلعن ويشتم ويسب .. بس السينما بيضحك وينبسط ويطع فرحان .. صح ؟














فارس

[فارس الميدان]

اقتباس: ابو ريما الخالدي وسبب تحديد العمر حتى لايكون فرصه لضعفاء النفوس والبيب بالأشاره يفهمووووووووو

لضعفاء النفوس ؟

مافهمت ياليتك توضح اكثر عن سبب دخول الي اصغر من 18 سنه ؟

اسف عشان انا مو ذاك البيب




























فارس

[فارس الميدان]

اقتباس: لمبة شارع تبيهم كفو يحطون قانون لادخال شيء لا وجود له في الذهنية الشعبية المحلية إلا في منطقة الخنبقة والوناسة الممغنطة!!!

لمبة باللهي وش ذا الكلام .. وشو خنبقه ؟


ترا المسأله كلها سينما يعني مو محتاج التنظيم او الحجم الي حاطه انت في راسك عشان تقول مو عارفين ينظمو تكاسي وكهرباء .. لمبة تراها مجرد صاله وتذكره تقصها وتدخل تشوف وتطلع .. بالله وش يبي تنظيم عشان تقول يبي ويبي ؟
















فارس

[سامي]

شرطي الوحيد....نسأل اهل العلم والمعرفة من العلماء والمصلحين .

[الذاهبة]

والله مو شينة

بس بشروط :

1 . تحديد يوم رجال و يوم نساء

2 . خضوع المادة المعروضة للرقابة

3 . أسعار التيكت رمزية

4 . منع عرض الافلام المصرية

5 . افتتاح صالات عرض في كل المناطق الرئيسية .. مو وحدة و بس !

6. عرض الأفلام بعد صلاة العصر مباشرة .. و بعد صلاة العشاء .. و بس .. عشان اللي ينامون بدري

[لمبة شارع]

اقتباس: 4 . منع عرض الافلام المصرية

وبيكوز الشيء بالشيء يذكر اقول...

ماعدا فيلم الكيت كات!!!

والكيت كات حارة في الجيزة مهيب بعيدة عن حديقة الحيوان ...مثل فيها محمود عبد العزيز دور عمى الحارة البصير وهو من اروع الافلام في تاريخ السينما المصرية ..وقد حاول نور الشريف مجاراته بفلم البحث عن سيد مرزوق لكنه فشل فشلا ريعا...
وش دعوى حاج متولي والله عاد لو هو البحث عن سميح الذاهل!!!



وبعدين فارس انت تتوقع الناس بتروح للسينما عشان الاصوات المدمجة والتصوير ثلاثي الابعاد والتكنلوجيا الرقمية !!!

الناس اللي ممكن تروح هي الناس اللي تحب الشرافة وشفت فلان وشفت علان ...

وعلى طاري شفت فلان وشفت علان

كان محمود عبد العزيز في فلم الكيت كات عزم له واحد عمى مثله على فيلم في السينما وهم في الصالة قاعد يوصف له اللقطات بحكم انه يشوف والعمى اللي معه مايدري انه اعمى مثله..!!!
المهم الفلم فيه معركة حربية ومحمود عبد العزيز يقول لخويه::بص بص!!! أهو البطل آعد بيبوسها !!!!! وذاك العمى متحمس ويتخيل اللقطة وانواع الابتسامات!!!...

عاد تخيل العمى في الصالة اللي تقول عليها يا فارس مع ذيك التقنية يقدر يشوف بواسطة آذانه