( قصتي مع رجل الأمن ) .. رجل أمن .. إذاً / طــــــس !!

السلام عليكم ورحمة الله وبركاته

( معلومات عن مدرستي : اسم المدرسة / ثانوية ولي العهد ..
تأسست / عام 1421 هـ .. تقع بحي الصفراء جنوب البريد القديم )

بداية قصتي مع رجل الأمن ( العسكري ) كانت أنني في يوم من الأيام وبعد أن خرجت من المدرسة لأنهي اختبار الفيزياء الذي كان في اليوم السابع من جمادي الأولى من السنة 1427 هـ ..


حيث خرجـت من المدرسة واتجهت مباشرة إلى سيارتي التي كنت أركنها بجوار بوابة المدرسة ..

وركبت السيارة وشغلت .. ومن ثم تحركت ,,

المهم . . يوم مشيت لي 10 أمتار وقفت أسلم على أحد أصدقائي الذي كان يقف بجوار الحديقة المجاورة للمدرســـة
( و الذي لم أره منذ أكثر من شهرين ) ونزلت وسلمت عليه واخذت أخباره ..

ترى كل هذا في ثمان دقايق تقريبا . .

وبعدين ودعته وركبت سيارتي متجها إلى حي الربوة .. حيث كان معي أحد أصدقائي ولم يكن معه سيارة .. وطلب مني إيصاله ..

طبعا مشيت من عند المدرسة وطلعت على الشارع العام اللي فيه بوابة دار التربية للبنين ..

واتجهت يمين ..( كأنك رايح لسوق الصفراء )

ويوووم وقفت عند الإشارة اللي فيها العربية للعود يسارك وصيديلة المستقبل يمينك و... و...

المهم .. مادريت إلا اللي ياقف بجواري ويطنب لي ..

وقال : (( اسفط يمين .. ماتعرف وشلون اسفط يمين !! ))

عاد انا قلت : سم سم ولا يهمك


وبعدين رحت وسفطت يمين .. على قوله

المهم وانا أنزل لمه باشوف وش يبي ألا الدورية الثانية ( تسفط ) معنا

يعني الحين صار فيه سيارتي وسيارتين الشرطة

... أنا رحت لمه وعطيته الاستمارة .. وقال وين الرخصة

قلت له : سم هذاه بالسيارة أروح أجيبه

( ورحت جبته وعطيته إياه )

أخذهن وقال : لـيـش تـدور ؟؟

الحجـــــــــــــز .. الحجــــــــــــــــــــــــــز

( أنا انرسمت في وجهي علامات الاستغراب والتعجب !! )

قلت له : مادرت ..!!

قال : ألا شايفك تدور ..

أنا قلت له : متى و وين ؟؟

قال : عند المدرسة شايفك أخذت لك كم لفه حول الحديقة ..

المهم // وانا واياه حلف واقسم برب العالمين اني مادرت ..


ويا طويل العمر .. ومادري شلون .. أحلف لك بالله أني مادرت

وش تبي أزود من الحلف !!

قال : رح سيارتك وانتظر ..

المهم .. (رصني) بالسيارة حول ربع ساعة ..

وبعدين أشر لي بايده / عدل سيارتك عشان السطحة يقدر يشيلها ..!


يوم درى خويي اللي معي أن السيارة بتحجز .. وانا ماسويت شي يستحق الحجز ..


قال .. ( عطني جوالك << هو ما يجيب جواله للمدرسة .. ولا سيما أنه وقت الاختبارات )

المهم / أخذ جوالي ونزل للعسكري ..

ما امداه ينزل إلا العسكري قال له : خذ أغراضك ورح لبيت أهلك

هو مر ياخذ كتابه .. وقال لي أنا باروح الشارع الثاني وماعليك

وبكم مكالمة من صديقي هذا لضابط .. هو يعرفه

المهم // ناداني العسكري .. وقال :

خذ هذي الرخصة والاستمارة .. ولا عاد أشوفك هنا مره ثانية

أنا قلت له : ياطويل العمر أنا مدرستي هنا ..!!

قال أنت تفهم والا لا .. غير اتجاهك من هنا ..



(( يــلـــه طــس ))




وانا بطبيعة الحال // طـسـيـت < < على قوله

وانا الضغط معي اتش ..

لو أرد عليه حرر لي مخالفة التعدي على رجل الأمن ..!!

مشيت .. ورحت .. وبعدين كلم خويي على الضابط ..

وتشكره .. ونبهه الضابط على نقطه

قال لنا : ترى سيارة خويك معمم عليها الحين دوران ..

وممكن تمسكه أي دوريه اليـوم ..

ويوم سألناه عن السبب قال :

يصير العسكري مبلغ الأفراد برقم اللوحة .. !!

وانا ماكان مني إلا أني رحت دخلتها (بحوش) البيت لحد بكرا ..


انتهى






((( س/ ما سبب نشري للقصة هنا ؟؟ )))


[[ حقيقة : الذي خلاني أكتب القصة كاملة هنا بالمنتدى .. هو أخلاق ذلك القدوة ..

المفترض أنه يكون قدوة .. فـ من جفرة لـ دحديره ,,

من بدايتها يوم قال // اسفط !.!

وفي النهاية ختمها بـ طـــس !.!!.

وانا هنا أبيكم تناقشون الموضوع .. وتذكرون المواقف المشابهة التي حصلت معكم ومع رجال الأمن ]]







مع كل الود والاحترام

[TOMB RAIDER]

بصراحه موضوعك جداً مهم بالنسبه للشباب الي زينا.

انت عدة على خير اما قصتي مع جنرال((سلتوح)) الدوريه
كل يوم لي سالفه معهم وكل جخر بالسياره فيه مخالفه واغلبهن على التشميع
لاكن وش نقول مخالفه ولا حجز

ااترك المجال للأخوان الي عندهم قصه مع الجنرالات الدوريه لاني عجز اكتب قصص يوميه لان الحاله تصير معي كل يوم .


تحياتي للجميع

[(منصور)]

ايه هو صادق ليش توقف بالشارع وتسولف ,, اياكم والجلوس في الطرقات ,, لو مافيك شي ماراح يتبلاك ,, ترى اتكلم بجد ,, العيب فينا واذا حصل لنا شي حملنا غيرنا غلطنا ,,

[الذاهبة]

ديز أبي

تبي الصراحة ..!

أسلوبك رائع جداً .. فضلاً عن أهمية موضوعك ..




عموماً مالي خبرة كبيرة .. لكن

أعتقد انه خايف عليك ..

و هذا دورهم المفروض ..

يا ليتهم ينتشرون بالشوارع و يدققون ..

حتى و إن ظلموك ..

أفضل من ترك العابثين و المهسترين

ينتشرون بالطرق و يودون حياتهم بدواهي ..



شكراً لك !

[الرمادي]

اخي العزيز ديز ابي


ليست المشكلة الحقيقيه انه ظلمك فهذا قد يحدث من اي شخص فالخطأ والظلم وارد


لكن المشكلة انه اطلق سراحك !!


لنفترض بأنك مخطئ فعلاً ومخالف وقتها سيطلق سراحك بنفس الطريقه والسبب الواسطه


ظلم الجميع عدل في الرعيه وهذا ماكنا نتمناه لكن ان يطلق سراح احد دون احد فهنا المصيبة فعلا



تقبل تحياتي ,,

[ثامر الناصر]

شكرا لك ..

الصراحة هذا واجبهم .. ولابد من القسوووة مع الشباب والمخالفين

اقتباس: عموماً مالي خبرة كبيرة .. لكن أعتقد انه خايف عليك ..

لايخاااف علي ابدآ لاصار الدعووة فيها حجز الموطأ خخخخخخخخخخخخخخخ

بعدين ياديز ابي .. انت غلططااان وشوله تاقف له لايهمكـ سفط ماسفط اسهجه >>>>> يبي يوهقه خخخخ

وخويك منهو هذا خلنا نتعرف عليه شكله واسطة هههههههههه

ودمتمـ

[العندليب]

اقتباس: بعدين ياديز ابي .. انت غلططااان وشوله تاقف له لايهمكـ سفط ماسفط اسهجه >>>>> يبي يوهقه خخخخ

لا والله اللي عطاه النصيحه .. لا يوهقكـ يا ديز أبي .. بس أهم شئ إنكـــ ما تحرج نفسكــ بتصرفات قد تتسبب في حجزكـ وحرمانكــ من الإمتحانات .. ولا تحط في حسابكــ أي واسطات لأنهم موب مظمونين ها اليومين متشددين أووووي وهذا بجد حل لبعض الشباب وديز أبي ليس منهم إن شاء الله ..

كل دعواتي لكــ بالتوفيق وأن يحفظكــ الله من كل شر ..

تحيتي لكــ

[اهلا وسهلا]

[align=center] السلام عليكم ورحمة الله وبركاته




يعجبني اسلوبك الذي يلمح أنك خايف من السجن والحجز السيارة


ولكن ثقافة الشرطة كبيرة مع اتعامل مع الاخرين ....

واوصيك بقول لكل عسكري سم يا طويل العمر وابشر وان شاء الله ولا تتحرش بهم. [/align]

اقتباس:  المشاركة الأصلية كتبت بواسطة TOMB RAIDER     بصراحه موضوعك جداً مهم بالنسبه للشباب الي زينا. انت عدة على خير اما قصتي مع جنرال((سلتوح)) الدوريه كل يوم لي سالفه معهم وكل جخر بالسياره فيه مخالفه واغلبهن على التشميع لاكن وش نقول مخالفه ولا حجز ااترك المجال للأخوان الي عندهم قصه مع الجنرالات الدوريه لاني عجز اكتب قصص يوميه لان الحاله تصير معي كل يوم . تحياتي للجميع

يله عاد..


مثلك أنت يا أخ تومب ريايدر .. والله قهررر


المخالفات ذي كله .. بس وش نسوي


--

شكرا لتوجدك بالموضوع

( مع كل الشكر والتقدير )

اقتباس:  المشاركة الأصلية كتبت بواسطة (منصور)     ايه هو صادق ليش توقف بالشارع وتسولف ,, اياكم والجلوس في الطرقات ,, لو مافيك شي ماراح يتبلاك ,, ترى اتكلم بجد ,, العيب فينا واذا حصل لنا شي حملنا غيرنا غلطنا ,,

>> الظاهر أنك جنرال .. مثل ماقال الأخ تومب رايدر <<



لنفرض أنه خطأ اللي سويته ..


بس هو ماقال ليه توقف بالطريق .!!


قال : ليـه تـدور ...


هنا المشكلة .. لأن مثل ماتعرف


الدوران كاثر هالايام .. ويبلون أي أحد ..




بس الشكوى لله

اقتباس:  المشاركة الأصلية كتبت بواسطة الذاهبة     ديز أبي تبي الصراحة ..! أسلوبك رائع جداً .. فضلاً عن أهمية موضوعك ..

اقتباس:  المشاركة الأصلية كتبت بواسطة الذاهبة     عموماً مالي خبرة كبيرة .. لكن أعتقد انه خايف عليك .. و هذا دورهم المفروض .. يا ليتهم ينتشرون بالشوارع و يدققون .. حتى و إن ظلموك .. أفضل من ترك العابثين و المهسترين ينتشرون بالطرق و يودون حياتهم بدواهي .. شكراً لك !

العفوو



والله يخلي لنا العين الساهرة ..


بس لو يثقفونهم شوي ..!

اقتباس:  المشاركة الأصلية كتبت بواسطة الرمادي     اخي العزيز ديز ابي ليست المشكلة الحقيقيه انه ظلمك فهذا قد يحدث من اي شخص فالخطأ والظلم وارد لكن المشكلة انه اطلق سراحك !! لنفترض بأنك مخطئ فعلاً ومخالف وقتها سيطلق سراحك بنفس الطريقه والسبب الواسطه ظلم الجميع عدل في الرعيه وهذا ماكنا نتمناه لكن ان يطلق سراح احد دون احد فهنا المصيبة فعلا تقبل تحياتي ,,

أخي وعزيزي .. الرمادي


يشرفني وجودك بالموضوع ..


وبالنسبة للواسطة تراها ضرورية هالايام ..


ومانستغني عنها ,,


والشاعر العربي وش يقول

( كيف نعيش بلا واسطة !! )





مع كل الود والاحترام

اقتباس:  المشاركة الأصلية كتبت بواسطة سلطانكو المغترب     شكرا لك .. الصراحة هذا واجبهم .. ولابد من القسوووة مع الشباب والمخالفين لايخاااف علي ابدآ لاصار الدعووة فيها حجز الموطأ خخخخخخخخخخخخخخخ بعدين ياديز ابي .. انت غلططااان وشوله تاقف له لايهمكـ سفط ماسفط اسهجه >>>>> يبي يوهقه خخخخ وخويك منهو هذا خلنا نتعرف عليه شكله واسطة هههههههههه ودمتمـ

عاد الا حجز الموطأ !!



<< يسمع عنه ..!



خووووووش نصيحه .. وشو له آقف .. !!


لا ياحبيبي .. خل الهجات لكم .. أنا أوقف قبل مايفكر يقول لي وقف ( اسفط )


النظام أهم شيء << كنه ما استعمل الواسطة !!






سلملم




مع كل الود والاحترام

اقتباس:  المشاركة الأصلية كتبت بواسطة العندليب     لا والله اللي عطاه النصيحه .. لا يوهقكـ يا ديز أبي .. بس أهم شئ إنكـــ ما تحرج نفسكــ بتصرفات قد تتسبب في حجزكـ وحرمانكــ من الإمتحانات .. ولا تحط في حسابكــ أي واسطات لأنهم موب مظمونين ها اليومين متشددين أووووي وهذا بجد حل لبعض الشباب وديز أبي ليس منهم إن شاء الله .. كل دعواتي لكــ بالتوفيق وأن يحفظكــ الله من كل شر .. تحيتي لكــ

صباح الخير أبو فهد ..


لا يهمك ثامر .. أنا من شفت تايمر مدري تايمز غسلت ايدي



شكرا لنصحك .. . بس حلوة ( أوووووووووي )

اقتباس:  المشاركة الأصلية كتبت بواسطة اهلا وسهلا     [align=center] السلام عليكم ورحمة الله وبركاته يعجبني اسلوبك الذي يلمح أنك خايف من السجن والحجز السيارة ولكن ثقافة الشرطة كبيرة مع اتعامل مع الاخرين .... واوصيك بقول لكل عسكري سم يا طويل العمر وابشر وان شاء الله ولا تتحرش بهم. [/align]

هلا وسهلا بك أخي


أولا أنا ما أخاف ألا من ربي ..


وثم من السجن



وهذي هي طريقتي معهم ( ياطويل العمر .. سم انشالله .. تامر أمر )

ومره غلطت وقلت ( ياخلفهم ) << عاد أذكر وقفني عشان سرعة ..



وقلت له : ياخلفهم والله ما تعنيبت أسرع .. .....


مشاني على طووول ..!