معقول باقي من الشهر .. 4 أيام ؟؟
معقول .. راحت منه .... 26 ليلة ؟؟
شفتوا أجل ..؟؟ .. مرت بنا مثل الأحلام
ما من جديد .. وكلّـن .. يعيش جيله !!
اللي معانا العام هـ العام ... ما صـــام
منهو .. ضمن مستقبله ... وش يجيله ؟؟
في جيلنا .. مادامت لـ جيش صدّام ....!
وفي جيلهم .. وين أبرهة .. وين فيله ؟؟
كذا الحياة .. تمرّ عام ٍ ورى عام !
كم فرّقت ... بين الخليل ... وخليله !!
شف الليالي .. كم تقضـّـت بـ الأعوام ..
وحنـّـا نقول أن الليالي ... طويله !!
ياهوه .. صحصح عندنا لك .. خبر هام
نصّ الأماني .. في الحقيقة .. قتيــله !!
دنياك هذي .. حزن وجروح .. وأوهام ..
ومالك على دنياك .. مكر وحيــله !!
كم واحد ٍ .. ودّع حبيبه وسط خام ..
وعلى حبيبه .. حدّر الدمع ... سيـــله !!
بكى فراقه .. !! .. مرّت أيام ما نام !!
بكى .. وروحه من فراقه عليـــله .!!
لكن .. نسى .. إنه كذا .. بعد أيام ...
نفس الأيادي .. يمّ قبره تشيـــــله !!
يارب عفوك .. قبل تلتف الأقــــدام ...
يوم الخليل .. يخون .. عشرة .. خليله !!
ويا رب ثبـّتنا .. على دين الإســـلام ..
واللي خذاه الطيش تهدي سبيـــــله !!
أقولها .. والعمر .. لو طال ما دام .
وإعرف سنين العمر ياخي .. قليله ..!!
والحين .. باقي من الشهر .. 4 أيام ..
طالبك .. عوّض فيه 26 ... ليله ..!!
العرض العادي
