النت اكبر حنشولي على وجه الارض .

[القلم الصريح]

انا لي كم يوم عندي شد بعضلة الفخذ ومتأثره كل اسلاك بواجي الدفع الكهربائي صاير مثل الشايب اذا قمت وقعدت .. وانا شاك لا تكون حوبة الحريم اللي بالمجلس لاني خربتها معهن يوم اقول الحقيقه عن الحريم الرخمات والسنعات واكتب لهن الوصفات اللي تخليهن حريم سنعات مع رجالهن
لكن الحمدلله ماشي هالحين للافضل وعسى ربي يعدل كل ميله ..

اللي بنشد عنه اليوم هو النت الحنشولي ولكي تعرفون انه حنشولي نمره واستماره اقرأوا مايلي:

1- يسرقك من نفسك .

2- بسرقك من الاسرة .

3- يسرقك من اعمالك.

4- يسرقك من الصلاة بوقتها .

5- يسرق شوف عيونك .

6- يسرق الزوجة من زوجها .

7- يسرق الزوج من زوجته .

8- يسرق دراهمك .

10- يسرق نشاطك وحيويتك .

11- يسرقك من قراءة القران .. وصلة الرحم .

12- خلاص اشوف ممشى الردمية بالمطناج جاز لكم هههه


الحلول ...
1- تبليغ الشرطه ماينفع لان القانون لا يحمي المغفلين .

2- تقول بختصر الوقت .. برضه ماينفع لانه مثل ابليس يهايدك الين يطيحك بخب الاثل .

3- تقول اخليه وسط اهلي واصيد عصفورين بحجر .. برضه مايصلح .. لانه ماجعل الله لرجل من قلبين في جوفه .

4- تخصص وقت محدد يبدا من وقت متاخر بالليل هو الحل المناسب لهذه الاسباب ..


1- ليش اخترت اخر الليل وليس وسط اليوم االظهر او العصر او المغرب لاني احب ان تعيش على امل اللقاء مع الحنشولي ولقاء الاصدقاء وقراءة مواضيعهم ومناقشتها فانت سعيد بأملك
ولذلك الشاعر العربي يقول ..
عدينا في غد ماشئت انا .. نجب وإن مطلتي الواعدينا
فاما تنجزي عدتي واما .. نعيش بما نؤمل من حينا .

2- بيكون لك متسع تروح وتجي وتسولف وتسلم وتاصل وترزق الله وانت سعيد باملك اللي هو موعد مع الحنشولي اخر الليل .

3- العاده بالليل تكون الاسرة هاجعه بستين نومه واللي مانام يثاوب افمه تدخل معه تريله وبكذا يكون عداك العيب لما تروح وتنثبر عن الحنشولي المحترف .

4- خلاص بتله ( اشوف نفس الشيء درهمتوا مع نفس السكه )
مع السلامة .

[* مكفخة عيال الحاره *]

اللي يعرف يستخدمه مآآرآآح يسرقه من شي !!

أومآآ اللي ملصق خشته بالشاشه 24 سآآآأأعه

,,هذآاللي مضيع نفسه
..
..

[فتاة غير]

طيب اذا دخلته بالليل

راح تنام عنهـــــــــــــــــــم بالنهار

<< مارحنا نيــــــــــــــة سارقك سارقك

[ميرنون]

اول سنتين طفيت وحنشلني من كل شيء ،،
والحين ما له أي قيمه عندي
صار لعبه لولدي ان فضيت قريت وطلعت ،‘




تقديري‘

[مدرعمهـ]

منووه لله هالحنشولي شلحنا مع كل جهه
لكن نقدر نقول انه من متطلبات العصر مهما قلنا مالنا غناة عنه
شكرآآآ

[امرؤ القيس]

قال وش حدك ع المرّ


قاااااااااااااال


اللي أمرّ منــــــــــــه



يعني وش فيه شيء بيدينا مازينااااه

[قـتـالـه]

عاد اللي يسمعك يقول صاحب موقع !
كلها كم رد على كم موضوع ..,
الا اذا لك نشاطات غير كذا خلت عصب رجولك
تتصلب ندخل على الله
عن نفسي بعد كل صلاة ومع رب اغفرلي ولوالديني
اقول واغفر لكل من له يد بإختراع الشبكه العنكبوتيه بأسرها
ياخي خلها تسرقنا وش حنا خابرين !
اجتماع سحا اربعاوي وخميساوي
لاستعراض طرق تقديم النستله والحليب المحموس !
واجساد محشوره داخل بناطيل وفوقها فساتين لنص الفخذ
ايقالهم تفتحوا هه

النت فتح لنا افاق وصار لنا ناس نسأل عنهم وعن اخبارهم
والله ياردودي على حدا مواضيعك يالقلم انها احب علي من مقابل
وجه نورة العزيز هي وروجها السحري
على مود ان شفايفها ربانيه

[JησÖ̤̇ση4E̳̐√ΈЯ̤̈̇]

يارجال انت بديرة كلها كسل جاب لنا الله النت والملهيات ولا كان علووم ..

[فديكا التميمي]

انت صادق والله ماجابلنا الامراض غيره هو زينن شين بس وين اللي
يستخدمه صح حنا ان فتحناه ماسكرنه,,
احيانا والمنتدى يجلط افتحه وشوله مادري تقدر تقول صارت عاده بالنسبه لي
مااقول إلا الله يكرهنا به ,,

[التنين الصيني]

والله يا بعدي .... النت زين زين

واللي يقول شين .... يدور له شغل ولا يروح ينام

تخلصنا من البنوك وبعض الدوائر الحكومية مثل المرور وطقتها

ولو بعد يصير الدوام من النت .... يا سلام

......
ادري ان ردي سطحي وبقوة

بس تقدر تظبط وقتك للنت والأهل والأشغال

سي يو ....

[التنين الصيني]

ايه خذ هالرابط شيك على ساهر هو محنشل منك ولا لا ....!

http://www.moi.gov.sa/wps/portal/!ut...50I0UFRDUL10H7

تراه موقع وزارة الداخلية .... مالي دخل