رأيكم ؟

فاهم غلط ! · 10-10-10, 01:21 pm

انا مره خطبت وحده
العائله والنعم فيهم
لكن مدري وش اللي ردني عنها
وانا الحين كل مارحت لناس تجي على بالي مدري ليه
اتخيلها اذا صرت عند ناس واخطب منهم
سؤالي :
هل هذا هو النصب بأن ارجع للفتاة التي تأتي على بالي دائما أو احاول ان انصرف النظر عنها ؟
لايوجد شخص اشكي له او اسئله واذا وجد اخجل احكي عليه مثل كذا
لكن انتم يااعضاء لي القدره ان اشكي لكم واقول كل مافي بالي
ربما انني خلف اسم مستعار

انتظر رأيكم ؟

أبو الريش · 10-10-10, 01:56 pm

[align=center]عادي تصير لغالبية الشباب

واحد اعرفه مثلك بالضبط شاف البنت وجازت له واضغطت عليه اخته لمن يتركه بعد ماحطت به الف عيب وعيب

وهاللحين ودهـ يرجع لهم ومو قادر لكن هاللحين يبحث عن ناس يعرفونهم ويوضحون لهم الموقف السابق بطريقه ترضيهم

فأنت انصحك لاتاخذ إلا اللي ببالك وحاول تصحح الموقف بطريقه جميله حاول تدخل وسطاء من ناس تعرفهم ولا عن طريق الحريم

هذا رأيي [/align]

وافي الخصال · 10-10-10, 03:00 pm

النصيب هو ان تسعى وتعمل بالأسباب

ولن تقترن الا بمن كتبها الله زوجة لك

وانصحك بالأستخارة , ففيها بأذن الله البشارة

وفقك الله وسدد على دروب الخير خطاك

فديكا التميمي · 10-10-10, 04:36 pm

توكل على الله وخذ اللي ببالك وربك يسهل

كــفـايــة · 10-10-10, 04:48 pm

[read]يمكن لأنك مندفع وودك تخلص بسرعة

بس ماعليك كل حبة بناودل او اشرب ينسون وماتشوف الا العافية

لأن اللي فيك مرّ[/read]

أبْغِي السٌمُوّ · 10-10-10, 06:00 pm

نصيحتي لك..

صل الاستخارة.. ثم تقدم لها مرة أخرى

ولاتنتظر أن يأتيك شعور بالارتياح نحو الأمر أو غير ذلك

ربما هي التي تناسبك وأنت تناسبها

أبْغِي السٌمُوّ · 10-10-10, 06:08 pm

كيفية صلاة الاستخارة لمن لايعرفها:

صل ركعتين من غير الفريضة كما بين لنا نبينا محمد صلى الله عليه وسلم

ثم قبل أن تسلم قل:

(اللهم إني أستخيرك بعلمك وأستقدرك بقدرتك وأسألك من فضلك العظيم
فإنك تعلم ولا أعلم وتقدر ولا أقدر وأنت علام الغيوب اللهم إن كان في
هذا الأمر(وتسميه تقول إن كان في زواجي من فلانة) خير لي في ديني
ودنياي وعاقبة أمري أو تقول في عاجل امري وآجله فاقدره لي ويسره
لي وإن كان هذا الأمر شر لي في ديني ودنياي وفي عاجل أمري وآجله
فاصرفه عني واصرفني عنه واقدر لي لي الخير حيث كان ثم ارضني به)

Qassimy · 10-10-10, 06:19 pm

من تسجليك في المنتدى وأنت كل يوم والثاني جايب مشكلة لك تبي حل !!
الله يكون بعون البنت اللي تبي تآخذك شكلك أنت وإياها يبي يجيكم ولد معقد وأول ما يطلع ما يشرب الحليب سادة يبي حليب شاهي

تبي شوري
هذا اللي يقولون عنه وافق شن طبقه أرجع طق بابهم ثانية

| ~ ســمــو ~ | · 10-10-10, 07:07 pm

اولا : الله يعينك
ثانيا : دام هي على بالك وش سر انهاءك للخطبه
ثالثا : الحريم مايصلحن يتدخلن بامور الخطبه >> اذا كانوا متدخلين
رابعا : مايمنع انك تكلم ابوها وتقوله اللي بنفسك

الله يوفقك وييسر لك بنت الحلال

النبراسكية · 10-10-10, 08:05 pm

خذ اللي في بالك

لانه ماراح تروح عن بالك

>ريانه< · 10-10-10, 08:44 pm

اهم شي الاستخاره

والله يكتب فيه الخير

دلوعة حبيبه · 10-10-10, 10:03 pm

اخوي انصحك تصلي صلاة الاستخاره بعدين اذا حسيت انك للحين تبيها توكل على الله ورح شوف البنت سبحان الله الشوفه هي بتحدد لك انت ارتحت لها ولا لا يعني تحس انها دخلت قلبك ولا لا
بس اهم شي تشوفه البنت انت لان بعض الحريم الله يهديهم يهولون الشي ويتشرطون لان نظرة الحريم مو مثل نظرة الرجل يعني النظره الاولى والاخيره لك انت
استخير وتوكل على الله والله يكتب لك كل مافيه خير

(ماخاب من استخار وما ندم من استشار)

أبو الريش · 10-10-10, 10:06 pm

اقتباس:

المشاركة الأصلية كتبت بواسطة البرتقالـــي


	من تسجليك في المنتدى وأنت كل يوم والثاني جايب مشكلة لك تبي حل !! الله يكون بعون البنت اللي تبي تآخذك شكلك أنت وإياها يبي يجيكم ولد معقد وأول ما يطلع ما يشرب الحليب سادة يبي حليب شاهي تبي شوري هذا اللي يقولون عنه وافق شن طبقه أرجع طق بابهم ثانية