يا أهل (الشور)دلوووووني..

[فيمتــو]

مساؤكم وصباحكم بااااااااااسم
صديق غالي على جدا ومقرب لقلبي
استشارني في أمر وبصراحة احترت في الوصول إلى قرار فكل ماحسبتها من ناحية أقول قد تكون الناحية الأخرى أفضل
السالفة هي إن هذا الصاحب متزوج ولديه ثلاث أبناء
ويفكر بامتلاك منزل العمر ولكن المبلغ الذي يملكه لايستطيع إلا على شراء شقة أو بما تسمى (وحدة)

السؤال
*هل يشتري الشقة الآن بالمبلغ الذي يملكه ويتخلص من الآجار ومن ثم بعد 8سنوات يعد صدور اسمه من الصندوق العقاري يتملك بيت العمر..

*أم يبقى بالآجار وينتظر 5 سنوات ليتمكن من توفير المبلغ ويستطيع بعدها امتلاك بيت العر

أنيرونا بآرائكم أنار الله قلووووبكم

[انتظرتك]

خله يمد رجليه على قد لحافه
وعلى قولة امي الدنيا ماتجي جميع
على شوي شوي عماير مصر ماعمرت بيوم ..

[مشقاص]

أول شي خله ينفك من الأجار

أنا رأي يشتري شقه بالمبلغ الي معه ويتخلص من الأجار .

وأذا طلع اسمه فيها الف حلال اهم شي يتخلص من الأجار

ويجمع روحه شوي شوي .

الله يرزقنا ويرزقه من فضله ونعيمه...

[رمز الحياة]

يا اهل الشور

[دلوعة حبيبه]

والله ياخوي انا من رأيي انو يتوكل على الله ويشتري الوحده اهم شي ملك ويفتك من الآجار اللي يقص الظهر وبعدين ان شاء الله لآ طلع اسمه يعمر على شوي شوي

والله اعرف ناس كثير ساكنين ببيوت صغيره وصابرين وبعدين يوم رزقهم الله طلعوا لقصور هم عامرينه

[فيمتــو]

اقتباس:  المشاركة الأصلية كتبت بواسطة انتظرتك     خله يمد رجليه على قد لحافه وعلى قولة امي الدنيا ماتجي جميع على شوي شوي عماير مصر ماعمرت بيوم ..

هلا بك انتظرتك
صح لسان أمك ولسانك
أدري الدنيا ما تجي جميع
هو يقول هل أشتري بفلوسي شقة
أو أشتري أرض وشوي اشوي أعمرها
وبعد الحسابات يبي له أربع سنين تقريبا
عشان يخلص من العمار

[رذاذ]

[align=center]من رأيي [/align][align=center]
يبقى على الآجار الشعب السعودي كله جالس في آجار والبترول تحته يجري ويشتري بفلوس الشقة أرض وبمكان استراتيجي وعلى شارعين وتكون شرقية جنوبية وما تبقى من السنوات يجمع كم قرش لبداية مشروع العمر من أجل أن تكون بأجمل صورة أنت قلت بيت العمر والعمرة مرة وحدة

[/align]

[عذبـــــة]

المفروض يشتري الشقة لين ربي يفرجها عليه
على الأقل لو فلوسة ماتكمل لشراء شقه وكملها اقساط على الأقل يكون يدفع في شي ملكه مو شي له سنة ويطلع منه
واذا رزقه الله بعدين يشتري أكبر أو يعمر ويبيع هذي أو يأجرها
الله يرزقه من واسع فضله
يعجبني اللي يفكر بمستقبلة ومستقبل عياله مو طافح بالسفرات وهامل عياله

[قـتـالـه]

اذا افتك من الآجار انا ابشكك بجنسيته!!
مايصير سعودي الا اذا صار مستأجر او عليه قرض !
وبعد يصير سعودي اصل وفصل اذا اجتمعن جميع !
يالله اومااالالي يبي يفتك من الايجار خخخ .. دحكتني وانا مسوي نفسي زعلانه علشان اللي جنبي يوديني للسوق العصر!

[فيمتــو]

اقتباس:  المشاركة الأصلية كتبت بواسطة مشقاص     أول شي خله ينفك من الأجار أنا رأي يشتري شقه بالمبلغ الي معه ويتخلص من الأجار . وأذا طلع اسمه فيها الف حلال اهم شي يتخلص من الأجار ويجمع روحه شوي شوي . الله يرزقنا ويرزقه من فضله ونعيمه...

حياك مشقاص
قلنا نفس الكلام
بس المشكلة يوم حسبناها
قلنا نفترض انه سكن بالشقة 8 سنوات
وبغى يبيعها بتنقص قيمتها وكأنه دافعها بالآجار
لنفترض اشترى شقة بـ300 ألف
وبعد 8 سنوات ماتسوى تقريبا الا 200 ألف
يعني ما من بعايد عن الآجار هذا من ناحية
ومن ناحية أخرى تأخر بامتلاك بيت العمر فبدلا من أن يشتري أرض وينتظر 4سنوات تقريبا عشان يجمع روحه ويخلص من العمار راح ينتظر 8 سنوات فيما لو اشترى الشقة

[الرمادي]

فيمتو

في الوقت الحالي يعتبر الآجار اكثر جدوى من البناء والتملك

لا انصحه بشراء ارض في هذا الوقت خصوصاً ، وأرى بأن شراء وحدة والسكن فيها سيكون افضل بكثير على الأقل ستكون خسارتها فيما بعد مقابل الآجار الذي سيرتاح منه الآن

لكن ربما هناك حل افضل من هذا وذاك لو استطاع استثمار المبلغ بمشروع تجاري مناسب حينها قد يستطيع توفير قيمة الآجار وزياردة رأس المال والنجاح لايأتي إلا بالمغامرات والمحاولات



تحياتي ,,,

[عـــــســـــولــي]

اقتباس:  المشاركة الأصلية كتبت بواسطة قـتـالـه     .. دحكتني وانا مسوي نفسي زعلانه علشان اللي جنبي يوديني للسوق العصر!

ماخلانا داجين وعايشين بالآجارات غير ركضكن بالأسواق .نشفتن مخابي أزواجكن وخليتوهم يتسلفون ويأخذون قروض وبالنهاية ياتجيه جلطه أو سكته قلبيه وأنتن كلها كم شهر ومتزوجات ضحايا جدد.
الحمدلله إني عزوبي وأفتخر إني عزوبي بلا وجع رأس ولا غثى أم قناصيع .

[فيمتــو]

اقتباس:  المشاركة الأصلية كتبت بواسطة رمز الحياة     يا اهل الشور

مرحبا رمز الحياة
ايه يا أهل الشور دلوني
مو ذيك اللي تغني يا أهل العشق دلوني

[فيمتــو]

اقتباس:  المشاركة الأصلية كتبت بواسطة دلوعة حبيبه     والله ياخوي انا من رأيي انو يتوكل على الله ويشتري الوحده اهم شي ملك ويفتك من الآجار اللي يقص الظهر وبعدين ان شاء الله لآ طلع اسمه يعمر على شوي شوي

اقتباس:  المشاركة الأصلية كتبت بواسطة دلوعة حبيبه     والله اعرف ناس كثير ساكنين ببيوت صغيره وصابرين وبعدين يوم رزقهم الله طلعوا لقصور هم عامرينه

أهلين بالست دلوعة

تدرين كيف طلعت الحسبة معنا
إما يمتلك الشقة الآن ويبقى فيها 8 ألى 9 سنوات
ليتمكن بعدها من امتلاك بيت العمر

أو يشترى الأرض الآن ويعمرها
شوي شوي لمدة 4 سنوات تقريبا..
وبعدها يرتاح مرة وحدة ويمتلك بيت العمر
وبين هذه وتلك تكمن الحيرة

[ابو ريما الخالدي]

في رأيي أنا
يشتري الشقة الآن بالمبلغ الذي يملكه ويتخلص من الآجار وهمه ومن ثم بعد 8سنوات يعد صدور اسمه من الصندوق العقاري يتملك بيت العمر

صدقني هذا هو الحل له ولاتنسى وش يضمن ان المبلغ ماراح يطير خلال الــ 8 سنوات هذي