الطلاق العاطفي بين الأزواج الجدد .

[خن بط]

ودي اعرف السبب اللي يخلي ازواج جدد وتوهم معرسين تطفى عواطفهم تجاه بعض بمجرد مرور اشهر قليله على زواجهم .هل كان الغرض فقط من الزواج (الجنس) فقط وبعد الحصول عليه ينتهي كل شيء .
اللي خلاني اكتب هالموضوع شيئين :
الأول عندنا بالإستراحه اربعه شباب متزوجين اللي له سنه واللي ثلاث واللي له اربع والأخير له سبع سنوات .
واستغرب وناستهم وضحكهم بالإستراحه وسهرهم عندنا إلى الساعه وحده بالأيام العاديه والخميس والجمعه يسهرون لين الفجر لكن اللي لاحظته عليهم انه بمجرد مايتصلن زوجاتهم عليهم تتغير وجيههم والاحظ عليهم ان الضحكه والإبتسامه والوناسه تروح وبعضهم اول مايشوف الرقم حق زوجته يقول تلقائيا : وش تبي ذا العله وهمن يكلمها بنفس شينه .
والثاني : لاحظت بعدة قنوات بماإني فاضي لاشغل ولامشغله ماغير متنبل عند هالدش شكوى كثير من الزوجات سواء بالإتصال على المشايخ او بالرسائل يشتكن من سوء معاملة ازواجهن واهمالهم لهن بمجرد مرور اشهر على الزواج وصارن تقل (خدامات) فقط للغسيل والكوي والولاده وبس لكن حب وتغزل فيهن مافيش .
انا تخوفت وماودي اصير مثلهم اذا تزوجت . وش السبب اللي خلاهم يسوون كذا ؟
هل عندهم جهل بالحياة الزوجيه ؟ وهل السبب الزوجات مثلا يطفشنهم وهن مايدرن بطلباتهن وببرودهن العاطفي ؟
خن بط خايف ولا وده يصير مثل هذولا .
افتوني في رؤياي .

[سمو ذات]

اقتباس:  المشاركة الأصلية كتبت بواسطة خن بط     اللي خلاني اكتب هالموضوع شيئين : الأول عندنا بالإستراحه اربعه شباب متزوجين اللي له سنه واللي ثلاث واللي له اربع والأخير له سبع سنوات .

وهالمتزوجين من الخانبيط اللي مشاركين بمعرف الفقر وإلا لا ؟؟!!

اقتباس: واستغرب وناستهم وضحكهم بالإستراحه وسهرهم عندنا إلى الساعه وحده بالأيام العاديه والخميس والجمعه يسهرون لين الفجر لكن اللي لاحظته عليهم انه بمجرد مايتصلن زوجاتهم عليهم تتغير وجيههم والاحظ عليهم ان الضحكه والإبتسامه والوناسه تروح وبعضهم اول مايشوف الرقم حق زوجته يقول تلقائيا : وش تبي ذا العله وهمن يكلمها بنفس شينه . والثاني : لاحظت بعدة قنوات بماإني فاضي لاشغل ولامشغله ماغير متنبل عند هالدش شكوى كثير من الزوجات سواء بالإتصال على المشايخ او بالرسائل يشتكن من سوء معاملة ازواجهن واهمالهم لهن

ماشاء الله صاير محلل نفسي على هالملاحظات

اقتباس: خن بط خايف ولا وده يصير مثل هذولا . افتوني في رؤياي .

( وَمَا نَحْنُ بِتَأْوِيلِ الأَحْلامِ بِعَالِمِينَ )

[البارق]

خن بط
بصراحة ترددت في الرد على موضوعك
لأنه في غاية الأهمية وبحاجة لوقفة متأنية
فالموضوع خطير ومتفشي في المجتمع

واسمح لي أتناول جانب واحد
وأدع غيري يتناول الجوانب الأخرى

برأيي أن الشباب الآن
شباب مستهتر وغير مبالي
ولم يتعود على تحمل المسؤلية
فهو اتخذ البيت شقق فندقية
يأكل فيها ويشرب وينام
ويشبع فيه غريزته
وباقي وقته مخصص للإستراحة والشباب

وهذا أمر كافي لأن يقلب البيت لجحيم
إذ كيف ترضى زوجة بتصرفات زوج كهذا وأمثاله

أخيراً .. أعتذر عن الإطالة
وأشكرك اخوي على روعة طرحك

[التنين الصيني]

طيب ما دام انهم خوياك ...............

وراك ما سألتهم ......لأنهم ابخص .........

[مـــــــاء]

الحقيقة أن المتزوجين والمتزوجات كرهونا في الزواج ..

واعتقد الجنس بحد ذاته مهو سبب ..

السبب تنافر العقول .. وعدم التفكير في محاولة تقريب المواضيع لنقطة " الوسط " ..

لو بينهم شيء مشترك واحد يحبونه كان الوضع تغير .. بس كل واحد فاقد الأمل في الثاني ..

[بوتميم]

مواضيعك دائما مختارة بعناية وجيدة ويعاب عليك انك تضيفها لاحلامك وقلنا لك ان الكذب بالحلم لا يجوز لو كان على سبيل المزاح او لتوجيه نصح
بالنسبة لربعك طبيعي جدا لانها من بيت وبيئة تختلف عن بيئته وتربيته وهذا ولد وهي بنت وصاروا مع بعض الافكار والهوايات والمتطلبات وحتى الاحلام تختلف
فانت تجد نفسك مبسوط بالكورة والاسهم والسيارات تجدها هي بالفساتين والاعراس والمكياج
كل واحد منهم يصف الاخر بالسخافة لان اهتماماتك غير اهتماماتها
وهنا يكمن العيب مافي ثقافة او توجيه للطرفين بما سيلقى على عاتقه من مسؤليات اهم شي الولد توظف والبنت كبرت يعني لازم عرس اتفقوا لقوا بنت الحلال اللي اهلها اخطبوها له وتزوج وبعد فترة هو ليست هذه لميس وهي هذا ليس بمهند
نعم الفضائيات افسدت التربية وزادت احلام الطرفين
وبعد الأهل عن النصح والتوجية وعن تعريف الطرفين بقدسية الزواج ومالغرض منه

[روح لايسعهآ جسـد]

يعني لازم اللي يتزوج يقابل زوجته 24 ساعه
والحرمه ماورها شغل غير مقابل وجهه
اكيد يطلع ويسهر وينبسط
ويفك عنها شوي

[المميز في القياده]

اشكرك على الموضوع

[العود الازرق]

والله يااخوي مااقول الا الله يعين حريمهم على عيال النيدو
لو فيهم شيء يدفعهم للحريم ماقابلوا خششكم خخخخ

هم يتهربون منهن لأن حاجتهم لهن قليله والباقي يبون يعيشون حريتهم الاولى
والقنوات والتجطل بالاستراحات وبس

الله يخلف على هيك شنبات

[عذبـــــة]

اقتباس:  المشاركة الأصلية كتبت بواسطة خن بط     انا تخوفت وماودي اصير مثلهم اذا تزوجت . .

لاتتخوف ولا شي ... بما انكم سعوديين ومن طينه وحده أأكد لك انك ستصبح مثلهم .. هذا اذا ماكنت أردى منهم
هم مثلك اتخوفو ايام العزوبية لما شافو حالة الأزواج
لكن لما اتزوجو صارو مثلهم وعادت حليمة لعادة خواتها القديمة

اقتباس: وش السبب اللي خلاهم يسوون كذا ؟

الصّرار اللي تحت النخله اللي بإستراحتكم

اقتباس: هل عندهم جهل بالحياة الزوجيه ؟

بالتأكيد لا
لكن الطفّة لاعبة في حسبة السعوديين
وبما ان ايام عزوبيتهم كانت في سوريا ومصر والمغرب وتايلند وكل يوم بحضن وحده واتعودو على التغيير بالتأكيد انهم راح يملون من مقابل زوجاتهم بمرور أشهر قليلة

اقتباس: وهل السبب الزوجات مثلا يطفشنهم وهن مايدرن بطلباتهن وببرودهن العاطفي ؟

غالبا السبب من الزوج لكن اذا توافق الزوج والزوجة في التقصير سيكون منزلهم فقط للنوم والأكل
وسيبحث هو عن من تسكن قلبه وتبادله الحب والحنان
وهي كذلك ستبحث عن من تفرغ عاطفتها فيه
ومن هنا تظهر الفجوات بينهم وتبدأ المشاكل وحتما ستنتهي بالطلاق .

اقتباس: خن بط خايف ولا وده يصير مثل هذولا

خايف ؟؟
شكلك خن بط رقم ثلاثه

اقتباس: افتوني في رؤياي

كاثره افلامك الهندية
اعذب تحية

[خن بط]

اقتباس:  المشاركة الأصلية كتبت بواسطة سمو ذات     وهالمتزوجين من الخانبيط اللي مشاركين بمعرف الفقر وإلا لا ؟؟!! ماشاء الله صاير محلل نفسي على هالملاحظات ( وَمَا نَحْنُ بِتَأْوِيلِ الأَحْلامِ بِعَالِمِينَ )

شوفي.. الخنابط فيهم واحد متزوج وعاقل والأثنين الباقين عزوبيه .وبعدين ليش الغلط ؟
هذا جزانا يالخنابط نشارك معكم بالمنتدى وتقولين عنا معرف (الفقر) .مئبوله منك ياست هانم.
المسأله مو مسأله تحليل نفسي .واضح اللي سعيد بزواجه من شكله . والغريبه ان اللي اشوفهم ببريده دايم حالتهم حاله..حتى لما اوقف عند الإشاره واشوف واحد معه زوجته اشوفه مكشر وعيونه بس بالإشاره والغريب مايسولفون مع بعض تقل خشب مسنده بعكس السوري والمصري اللي معه زوجته ماتشوف الا ضحكهم وكركرتهم مع بعض ..ترى خن بط يقزقز ..ياستي كرهوني بشيء اسمه زواج .
فيه سر ورى مغثتهم منهن بس وشو؟ هذا اللي ودي اعرف وشو .

[بنت منيره]

>>الله يقلع ابليس

بهالاختبارت ينفق المجلس

و خاصه موضيع خن بط الخونفشاريه

اسمع بس الطلاق العاطفي سببه ان بعض الشباب الله يهديهم

يشبعون غرئزهم العاطفيه مع بنات غير زوجته>>البعض مو الكل

بس بعض رواد الاستراحه وطبعا يكون مهايط بين الشباب وكم بنت عنده يشبع فيها رغبته >>مادري انا صح ولا لا

والزوجته الكمخه بلشتن مع اهلها وحمولتها وصقيقاتها

ماتدري انه العيال الكلاكين عندهم عواطف مثل الطفل على قولت ابوي

دائما وابد يقول الرجل مثل الطفل لازم تحتوينه عشان تكسبينه

يعني الخطاء من الاثنين

يبي لهم ثقافه زوجيه

اذكر وقسم قاهرتن

وحده من صقيقاتي اول ماتزوجت تقول مليت ما يطلع وش اسوي..؟؟

قلت لها انتي وش تسوين ماتسولفين عليه..؟

قالت لي لا عيب وش اقول له كل شئ مايصلح اقوله له>>ماتدري ان القاعده هذي ماتت مع موتي جدتي الله يرحمها لانه ابوي كان يخرط عليها وامي تقهويهم

وايه وتسذا وياكثر خرطي خخخخخخخخ

^^
لو تتركونه كان كملة قرق لـ الفجر

[عاشق الخير]

[align=center]عندما يدرك الشاب ان الزواج نقله جذريه في حياته
لا بد أن يواكبها بفكره وعقله وقلبه وبيئته
عندها ستجد السعاده تلازمه ..
استغرب ممن يعيش حياته الزوجية على نفس النمط الذي كان يسير عليه قبل خوض هذه المرحلة ..
وكان شيء لم يكن ..
ستقول وهل الزواج يغير نمطي و طريقتي في الحياة ..
أقول لك نعم
اذا لم يكن الزواج ومسؤوليته و ما لك وما عليك من حقوق سبب في تغير حياتك والنمط المتبع فيها فما الامر الذي يستحق أن نتغيير من اجله ..
زوجتي و زوجتك في المستقبل ..
تحتاج للزوج المخلص أولاً ..
الواضح والصريح ثانياً ..
المتقبل لها .. و المتجدد معها ..
الزوج الذي ترى فيه مصدر الامان و رمز الحنان و قائدها وربانها لبر الأمان ..
اذا شعرت بان من امامها رجل بمعني الكلمة ..
يقدر الحياة الزوجية
و
يتحمل المسؤولية التي القيت على عاتقه ..
عندها ستجدها تضحي و تقدم الغالي و النفيس لمن امامها ..
فقد وجدت فيه ما يستحق ان تعيش لأجله ..
[/align]

[رونا]

وتلومني يوم ابي اتزوج مسياااار

[عاشق الخير]

8 8 8

من اولده مسياار ذا وانا اقوله يخطبك ...
ترى الربع جااهزين فرغي الرسائل عندك بالخااص ..
وخليكي جاهزه للمناقصه وفتح المضاريف