صائمات بلا أجر !!!!

[رحّــال]

دخلت علي أحد الأخوات في ( الماسنجر )
وقالت أنا ( جوعانه ) ..... في نهار رمضان ,,
قلت : ( ليش ماتسحرتي ) ....
قالت : ليس علي صوم ,
قلت : إذاً أذهبي وكلي طالما أنك لم تصومي
قالت : ( فشله أخاف احد يشوفني وأنا آكل !!!! ) ,,,
..................
هذا حال أغلب الفتيات بعدما أخبرتني عن وضعهن في رمضان .
يمنعن أنفسهن من الأكل والشرب خوفاً من أن يراهن أحداً ويعلم بأمرهن ...

هل أصبحت الدورة الشهرية للفتاة جرم حتى تخفيه وتخشى بإن يعلم أحد بها ,,,
ومالذي يجبرها على ترك الأكل والشرب في رمضان إذا لم تصم
وهي بحاجة إليه نظراً للظرف الذي تمر به ,,,


أخيراً يمكن فائده :
قال لي أحد الأصدقاء أن الإستحمام قد يزيد الدورة ....
وأنتم أبخص ,,,

[مدرعمهـ]

احد الاخوات قله تكفى ترى الفشيله وسعة الوجه انك تكلمين مع رجل بهالموضوع

عموما هي صادقة بما تقوله


(رحال ماتلاحظ مواضيع بالفترة الاخير كله حول الوشسمه )

[eivl girl]

[align=center]

_----_
كثر منها ذي
كلنا مانحب ناكل اصلن تنسد نفسك العالم صايمه وانا ادور اكل
مشكور لكنك تأخرت كثيررر[/align]

[عشق الزعامه]

[align=center]ذكرتن بموقف طبيت على أختي وهي تشرب ماء وأستدلخ إقالي ما أعرف

وأعطيه من ذيك المحاضره عنوانها " يستخفون من الناس ولا يستخفون من الله "

لمين طاح وجهه وبعد ما عرفت دعت علي ذيك الدعوه الله يستر ،،

بالنسبه لموضوعك طبيعي الحياء لكن تاصل إنه تصوم ولا تفطر هذي غريبه

تحياتي .[/align]

[رحّــال]

اقتباس:  المشاركة الأصلية كتبت بواسطة مدرعمهـ     احد الاخوات قله تكفى ترى الفشيله وسعة الوجه انك تكلمين مع رجل بهالموضوع عموما هي صادقة بما تقوله (رحال ماتلاحظ مواضيع بالفترة الاخير كله حول الوشسمه )

تعجبني ردودك مدرعمه
لان مافيها مجامله ,,

الجزء الاول .....اممممم الحديث فيه سيطول .. لماذا ولأن ولعل ,,
والنهاية ( قد يكون هناك حاجه للحديث في الأمر مع رجال ) ,,

السطر الثاني ... جميل أن نجد مؤيد لكلامها ,,

الأخير ..... أنا فقط مرآة لواقعنا ’’’
وربما هي الصدفة جعلت تلك المواضيع مجتمعة في الفترة ,,,

شكراً ’’’

[رحّــال]

اقتباس:  المشاركة الأصلية كتبت بواسطة eivl girl     [align=center] _----_ كثر منها ذي كلنا مانحب ناكل اصلن تنسد نفسك العالم صايمه وانا ادور اكل مشكور لكنك تأخرت كثيررر[/align]

تأخرت عليكم

بس يمكن مناسب لغيركم ..... ومايضر الوعد رمضان الجاي ان شاء الله ,,,

[رحّــال]

اقتباس:  المشاركة الأصلية كتبت بواسطة عشق الزعامه     [align=center]ذكرتن بموقف طبيت على أختي وهي تشرب ماء وأستدلخ إقالي ما أعرف [/align][align=center] وأعطيه من ذيك المحاضره عنوانها " يستخفون من الناس ولا يستخفون من الله " لمين طاح وجهه وبعد ما عرفت دعت علي ذيك الدعوه الله يستر ،، بالنسبه لموضوعك طبيعي الحياء لكن تاصل إنه تصوم ولا تفطر هذي غريبه تحياتي .[/align]

وأنا مستغرب من صيامهن مثلك ,,

يعني ياتصوم والا تتسلل مثل الحراميه علشان تآكل !!!!!!!!!!

[إلينـ اليوم]

توووووووووووحفهـ ياليت تقرونها ,, تجنن ,



في احد ايام رمضان المبارك كنت ماخذة اجازة من الصيام,و خلصت صلاة الفجر ..وذهبوا افراد العائلة كلٌ إلى مرقده كما أعتقدت
هم راحوا لغرفهم من هينا ..وانا انطلقت للمطبخ من هيناك
أخذت لي فيمتو و شبس و طلعت لغرفة التلفزيون مبتهجة

وبينما أنا في خضم البلع والقحن والكركرة على مسلسل كوميدي كنت اتابعه وداخلة جووو
الا وينفتح الباب واشوف وجه كذا >>>>>>>>>>>

ويطلع أخوي " يونس " -طالب في المرحلة المتوسطة يميل الى الامتلاء يملك عيون عسلية و حواجب كحلية - كان يونس في أشد الدهشة والانبهار والتعجب حتى ظننت انه قد يموت بسكتتن قلبية

يونس : ماصمتييييييييييييي !!!!!!!

أنا وفي يدي كأس مليء بالثلج وكيس شبس كبر وجه أخوي يونس : ليه أنت صايم ؟؟

يونس : وجع ..من جدك تسألين هالسؤال ؟

أنا بكل ثقة وبجاحة: والله انت بعد سألني نفس السؤال

يونس: والله انتي اللي جالسة تبلعين وتشربين موب انا

ممممممم شفت الولد ماعنده نية يفهم ,استوعبت انه يااما انه كان غايب في درس الفقه منهج سادس ابتدائي ..يااما ان مدرسهم طمر الدرس , ولا وش ذا الدلاخة

ومافيه مجال أصير ناسيه وأنا مجهزة العدة,كاس ثلج وسترو ومنقيه الشبس اللي أبيه

المهم قلت في نفسي والله لو يموت مااعلمه انا عن ذا العلوم..مو لهالدرجة انا وسيعة صدر
فما كان مني الا اني فجأة قلت له

: اسمع بقولك سر بس بذمتك لايدرون امي وابوي ولا احد ,أوعدني ماتعلم احد وانك تحفظ سري هذا لين أموت.. ان مت علم اهلي ,عاد خلاص مايقدرون يسوون لي شي


واللللللللللللللللللللللللللله ماأقول لأحد ..اقسم بايات الله وبالقران والكعبة وجعلي اموت اني مااقول لااحد اذا علمتيني < خرجت هذه الكلمات من أخي يونس بحماس مشبع بالسعابيل المتناثرة التي لامست وجهي


:أجل شف بصراحة أنا مسيحيــــــــة

:لا والله !! قولي قسم بالله


:انا مسيحية ولا أقدر أحلف لان ديني غيركم < عشت الدور على طول
بس بقولك القصة يمكن تخف روعتك شوي
وتقدر تتفهمني و تحتويني وتحتضني (حسيتني بخرب الولد)


القصة ومافيها .. أني انا يوم كنت صغيرة ,ترى أهلي ماكانوا مهتمين فيني زيك, كانوا بس يخلوني
عند التلفزيون ويروحون يتمشون..تعرف انا اول طفل لهم وامي وابوي كانوا توهم صغار وطايشين
و طفرانين ببعض وانا حسوني دخيلة بينهم
ماادري ليه جابوني بسرعة اذا هم مايبغوني
فجأة شفت عبرة خنقت يونس ذو القلب الكبير وهو يتابع بصمت وفضول وغباء

طيب ليش أجل تلبسين عبااااااية !! وانتي منتيب زينا < قاطعني أخي يونس بكل دلاخة

رديت بنفس النبرة الكسيرة : حتى الفلبينيات يلبسون عباية..انا كنت البسها زيهم احسبها يونيفورم لسعوديات

ورجع من جديد بسؤال أذكى قليلا من السابق : طيب ماعلموك المدرسة الاسلام ؟!!!

:لا كنت أنام في الحصص وفي الاختبارات أغش

واستطرد في القصة..فلما كبرت وجيت أنت ..حبوك أمي وابوي من كل قلبهم وخافوا من أني انتبه لهالحب أو احسدك عليه فقام أبوي يبي يلهيني بشكل أكبر ..حط لي نت وقال لي هذا لك
اما هذا لنا "مشيرا بأصبعه المشعر إليك " وخذوك معاهم ورحتوا تتمشون


يونس >


المهم صرت أحس فيه سر لازم أعرفه وصرت أدور في هالنت و انتشر هنا وهناك واتبعثر واتبخر واتكور الى ان أخذتني رياح الأقدار الى امراءة تدعى الأم تيريزا

وقلت لها قصتي واحتوتني واعطتني الحنان اللي حرموني منه اهلي اللي يكرهوني ويحبونك انت

بعدها صرت أحبها واسميها ماما ..ومع الوقت علمتني المسيحية وقالت اعتنقيها ياابنتي
واعتنقتها وأهلي مايدرون وللحين مايدرون


يونس بلم وهو في حيرة وده يرد ولا هوب عارف خاصة انه حس نفسه السبب وتعاطف معاي
صمت لبرهة وبرهات وفجأة قال
: طيب ماتفكرين تسلمين ؟


لا أخفيكم سرا ..جتني ضحكة كبيرررررررررررة الا أني بلعتها لدرجه صبت دموعي وسويت نفسي أبكي,قلت له بصوت مخنوق : بس ماأعرفه ..أنا ماأعرف في هالحياة الا أمي تيريزا

داخ راسي من كثر الخرط عليه وجاني النوم ..قمت وعطيته كاسي بعد ماشربته كله وقلت خذ رجعه للمطبخ أنا تعبت من الصياح بروح أنام


جاء يوم غد ..وفجأة أسمع شي يخربش تحت باب غرفتي ..حامت كبدي حسبته صارور ..قمت ابشوف مادريت الا كتيب ديني يندعس تحت الباب

واشوف ..الا عنوانه Islam ???!!

وافتح الباب بسرعة بشوف من اللي حاطه , الا واسمع صوت باب غرفة يونس يتسكر بقوة

هههههههههههههههههههههههههههههههههه ياانا ضحكت ضحكة بغت تنكسر شبابيك غرفتي
خلاص معد استحمل ,هالولد تحفة لازم تنحط في متحف اللوفر ,لعنبوا بليسه وش ذا المخ

طيب يوم انك بتدعوني ليه جايب لي كتاب دعوة بالانجليزي ,شايفني شغالة ,على باله يوم صرت مسيحية معد افهم عربي ,ماادري ذا الولد مخه وين


المهم انا عقب هالضحكة نسيت الكذبة ,ولهيت بمشاغل الحياة < مشكلة البزي ومن

ومر كم يوم , وصدفت ان يونس مر جنب غرفتي وانا لابسة جلالي وأصلي,وأنا أسجد
مادريت الا بصوت رجول تراكض متجه نحوي ,واجلس من السجود الا ويونس يصيح ويحب راسي

أنا خلااااااص بفطس من الضحك ,يالله كملت التشهد وسلمت ,الا وياخذني بالاحضان يونس صاحب القلب الكبير

الحمداللللللللله أسلمتي ,الحمداللللللللله أسلمتي

ودموعه تتقاطر على كتفي ( ياكثر مايوصخني ذا الولد يابتفال يابدموع ..الله يصبرني )
بس والله رحمته جاني الصياح صدق ,ماأدري هو أن عشت الدور ولا صياحه صيحني

ويمر أبوي قدام هالمشهد التراجيدي وينهبل
وجععععععع خير انهبلتوا ..وش صاير

ويونس من هول سعادته كب العفش والعشا والقش كله


بنتك أسللللللللللمت أسلللللللمت


وللأسف انجلدت بعدها بس عادي التعب عادي مايجي شي عند هالخرطة اللي كبر حمار ومشت على يونس الفتى صاحب القلب الكبير هو و كتيبه الدعوي ببروزه عندي و اهدده فيه اذا استبثر علي في المستقبل




وكل رمضان وأنتو صايمين

عارف انه طويله بس اضافه للموضوع رساله وصلتني ع الايميل

[سحايب نجد]

8
8
8
ارفقو شوي اكلتو الرجال والا ماصدقتو تلقون واحد تشرشحونه واللي تنصح لاتجلس ترادد الشباب بالمنتدى وتقلب الموضوع سوالف مثل المسن وياطول السنتكن بس اذا فيكن شدة نصح كل وحده تبلس عباتها وتروح للنخيل والعثيم تنصح البلاوي المتلتله

بالنسبه للموضوع هالشي يسبب احرجات للبنت عند اهلها واكيد انها تاكل بس خفايف مو تحط سفره بوسط الصاله هههههههه

يسلمووو رحال

[البـــBADERـــدر B.D.Q]

اخوي رحال

او تدري خلن متابع بس

[الورده النديّه]

رحال

ماشاء الله عليك خبير بأمور البنات !!

اذا سمحت لي

لي عوده المغرب

[عزتي في حجابي]

رحــــــــــآآل ..ومن قالك اننا بلا أجر؟؟
ان شاء الله مفطرات وبأجر..لأننا لو لم نكن كذلك لما تركنا هذه الفريضه والأجر يمشي بإذن الله.
,
الله يستر من مواضيعك القادمه..

[رواسي]

اقتباس: هذا حال أغلب الفتيات بعدما أخبرتني عن وضعهن في رمضان . يمنعن أنفسهن من الأكل والشرب خوفاً من أن يراهن أحداً ويعلم بأمرهن ...

واللهـ الرحآل سوآليف مع البنآت أول النهآر
أشوف الحآلهـ إنعكست برمضآن

موآضيعك مآتنآسب رجل ينزلهآ
وآآهـ بس

اقتباس: [align=center]أخيراً يمكن فائده : قال لي أحد الأصدقاء أن الإستحمام قد يزيد الدورة .... وأنتم أبخص ,,,[/align]

[align=center]قل صآحبك سيب اللقآفهـ وإلآ جيب معلومهـ صحيحهـ


سلآآآآمي
[/align]

[زمن الغرباء]

اقتباس:  المشاركة الأصلية كتبت بواسطة رحّــال     دخلت علي أحد الأخوات في ( الماسنجر ) وقالت أنا ( جوعانه ) ..... في نهار رمضان ,, قلت : ( ليش ماتسحرتي ) .... قالت : ليس علي صوم , قلت : إذاً أذهبي وكلي طالما أنك لم تصومي قالت : ( فشله أخاف احد يشوفني وأنا آكل !!!! ) ,,, .................. هذا حال أغلب الفتيات بعدما أخبرتني عن وضعهن في رمضان . يمنعن أنفسهن من الأكل والشرب خوفاً من أن يراهن أحداً ويعلم بأمرهن ... هل أصبحت الدورة الشهرية للفتاة جرم حتى تخفيه وتخشى بإن يعلم أحد بها ,,, ومالذي يجبرها على ترك الأكل والشرب في رمضان إذا لم تصم وهي بحاجة إليه نظراً للظرف الذي تمر به ,,, أخيراً يمكن فائده : قال لي أحد الأصدقاء أن الإستحمام قد يزيد الدورة .... وأنتم أبخص ,,,

كان صلى الله عليه وسلم احيا من العذراء في خدرها .. واعتقد اننا مانحتاج احد يتفلسف علينا .. وانا اعتبر هذي قلة حياء ( اسفة على الصراحة ) والكلام موجه لك بعد ياصاحي ..

[صـاحي و رايـق]

اقتباس:  المشاركة الأصلية كتبت بواسطة زمن الغرباء     كان صلى الله عليه وسلم احيا من العذراء في خدرها .. واعتقد اننا مانحتاج احد يتفلسف علينا .. وانا اعتبر هذي قلة حياء ( اسفة على الصراحة ) والكلام موجه لك بعد ياصاحي ..

وش أنا قلت عشان أتوصف بـ (( قلة الحياء )) ؟
ليش صاحي مثل حي الله كل من هب ودب بدأ يصفه بـ أبشع الأوصاف
أو شماعه كلً يعلق عليه بلاويه

أحذر الله يعافيك
وأيش هو اللي أنا قلته عشان تصفني بهذه البشاعه ؟