السلام عليكم ورحمة الله وبركاتة
حبيت أقولكم اليوم عن خطبتي وبالتحديد أول يوم رحت أشوف فية سعيدة الحظ
طبعاً البنت راقية و سنويا تسافر مع أهلها إجازة أستحمام في سويسرا
وأهلها أغنياء جداً ماشاء الله لكن فيهم تواضع جميل
وماينظرون للمظهر بقدر ماينظرون للجوهر وهذا الي خلان أتجراء
وأخطب بنتهم ,, ووافقوا الحمد الله لأسباب أمنية
المهم جاء اليوم المهبب بالنسبة لي والي هو يوم شوفة البنت
طبعا أنا آخر بنت شفته هي بوسي ايام التلفزيون ألأسود والأبيض بعدين
أنقطع البث التلفزيوني عن حارتنا
وصار مافية صور ترمز للأنوثة في مخيلتي غير أمي وخواتي الله يحفظهم والباقي شنابات 
المهم أنا ما تعود أشوف بنت قدامي بدون عباة أو حتى مطلعتن عيونه
وشلون عاد اذا شفت بنت لابسة فستان من باتشي وتسلم علي طبعا اكيد راح اهبب
وفعلا هذا الي صار
الوالدة الله يحفظها عارفتن زين مالي بالذوق
عشان كذا كانت هي وخواتي كل الليل يعلمونن الأتكيت وفن التعامل مع
الآخرين .. وكيف أتكلم مع البنت الذوق 
طبعا كنت متكشخ على الآخر ,, لدرجة العطر استعملت علبة كاملة حتى النعال الله يعزكم بخيت علية عطر
المهم رحت لبيتهم وقبل ما أوصل بيتهم وقفت عند محطة
وشلت النعال ولبست كنادر أعزكم الله ( كنت مغبيهن آخر شيء لانهن جدد وأخاف يتوسخن والبنت ماشافتن طاقهن )
طبعا أكتشفت أن الكنادر ضيقات بشكل لايطاق 
بس وش اسوي أختي موصيتن تقول لازم تلبسهن ما ابيهم يشوفون
اصابعك الي تقل عراجين 
والله مابهن شيء ومافيه أملح منهن بس هي دقيقة بزيادة
المهم لبستهن ودخلت بوابة القصر بسيارة ودعست الورد 
مادريت أحسبه أسفلت طلع مسطحات خظراء
المهم وقفت السيارة ونزلت ومشيت للباب الداخلي للبيت طبعا الي
يشوفن وانا امشي يقول هذا أكيد عندة أعاقة أو يعاني من عاهه أبدية 
(( طبعا بسبب الكنادر ضيقة مرة وبطلعة الروح أمشي والله بس قلت يالله كلهن كم خطوة وأفسخهن))
استقبلن ابوها عند الباب الداخلي للقصر ورحب بي أشد ترحيب وأصر
علي أني أدخل البيت بالكنادر أعزكم الله وقال هم يسوون كذا لان
أرضية البيت رخام مثل الحرم
طبعا دخلت للبيت وامري لله مجبراً أخاك لابطل ولما وصلت نهاية المجلس
كان الدم متحجر في سيقاني ومجتمع بالركب 
ورجليني ناشفة مافيها دم
طبعا قدمو لي الشاهي والقهوة وكان شاهيهم مررر بشكل لايطاق 
أختي تقول السكر تلقاوة مكعبات في علبة كريستال !! ) << وراة شغاب !!
المهم بعدها قالي ابوها انت مستعد ابي انادي البنت قلت لا والله ماتناديه أجلس يارجال خلن اسمع علومك "طبعا أنا مرره مستحي وابي أتهرب "
قال أنت جاي تخطب ولا تسلم قلت لا أصلي ههههههههههههه
قلت طيب لازم اشوفه عادي ماعندكم نمونة ( أختها الصغيرة مثلا 
) قل لا ما ابيك تقول ماشفته قلت أستحي قال عادي ابجلس معك (قلت بقلبي توي ما أستحي صدق)
طبعا قام ونادها ,, أنا كنت جالس أتأمل في رجليني وأشوف اي وحدة أطول
ومن الحياء ما أسمع الا كعب البنت وكان مع كل طقة للكعب 10 طقات لقلبي ,, لين جلست قريبة عاد قلبي شوي ويوقف
قالت : السلام عليكم
أنا أرتبكت ورديت عليه وقلت : السلام عليكم !! 
طبعا انا من هنا بديت أضيع لاني أشوف سراب فستان بنت على رخام المجلس طبعا هي جالسة قدامي
طبعاً كنت مازلت اتأمل برجولي من الحياء
قام ابوها قالي أتكلم معها عشان تقدرون تشوفون بعض
قلت : أأأأأ
أأأأأأأأأأأأأأ
أأأأأأم م م م م م م م كح كح
ثم سكتت
قال أسئلها طيب
قلت بسرعة : ماعندي أسئلة ولا شروط والله العظيم !! ههههههههههه
قال طيب أسئلها وين تدرس قلت عارف : في ثاني كلية 
قال أسئلية أنتي ,, ماردت علية وكانت مرة مستحية 
قام قال يالله أسئلية عشان يشوفتس
طبعا انا في ها الاثناء جان ضعف حاد في حاسة السمع 
مع فقد كامل لحاسة التذوق
قامت سئلتن أنت : مدرس
قلت لا أنا مدرس 
أحسبه تقول أنت تدرس )
أبتسمت ونزلت راسها
قالها أبوها ارفعي راستس يالله وأسئلية ,, أستحت في البداية بعدين
قالت: كم عمرك
قلت 8 الآف ( أحسبه تقول كم راتبك )
هنا ابوها مات ضحك ,,وهي ضحكت بحياء وصوت خفيف وهي مستحية طبعا أنا ماادري وش السالفة !! 
وكانت تبي تقوم لكن ابوها أجبرها تجلس ,, لانهاكانت مرة مستحية وكاتمة ضحكتها
بعدها قالها يالله كملي ..
قالت : متى أنت متخرج
قلت بالأجازة الجاية أو زي ماتحبون 
(أحسبه تقول متى تبي أنتزوج )
طبعا هنا انفجر أبوها من الضحك 
,, والبنت بعد فطست علي من الضحك 
ثم أستحت وقامت تركض ودخلت البيت
طبعا انا قلت أكيد شكلي فية شيء غلط ( قلت يمكن عقالي يضحك زي العادة "مفتوح أقصد" ,, أو فية صارور رايح جاي على راسي بس قلت لا بيتهم قصر وأكيد مافية صوارير )
لما خلص ابوها ضحك قالي هاه أعجبتك البنت ؟
كانت ودي أقول موت بس أخاف يعطين راشدي على وجهي ,, قلت ارسلك ردي برسالة جوال
ثم أستاذنت وطلعت وأنا ما أدري وراه يضحكون !! لين هي علمتن
بس والله العظيم ياناس مجلسهم ماشاء الله كبير ومترامي الأطراف لدرجة ان
المسافة الي بيني وبين طاولة الشاهي تقريبا مساحة ثلاجة
وبس ان شاء الله أعجبكم الموقف ؟
عاد باقي مواقفكم
الهباب الي صار لي يوم أشوف العروسة
العرض العادي
