عيب وشق جيب يارجااال السوق !!!!!!!

[جوجو2007]

انا ودي ادري الرجال الحين ماادري ماعندهم حيا ؟ والا ماعندهم رادع ديني يردعهم والا وش السالفه بالضبط ؟

رحت هالأيام اتسوق مع اهلي والاحظ الشهبان مغير ماسكين ايدين حريمهم والعيون تقزقز من هنا وهناك بأجساد الحريم
واللي قاعدن مع عياله وزوجتة بسفاري لاند ايقاله مندمج معهم وعيونه مغير تدوج بين هالطاولات ورقبته بتنكسر من التلفت وهـ بس الله يعين الارض !!!

استحوا على ارواحكم ياخزياه ترا اللي تسوونه حرام وعيب وشق جيب وقل مروءة ورجولة تهتكون اعراض المسلمات بعيونكم ياجعلهن للبخق !!!

اذا مااحترمت نفسك احترم زوجتك اللي عافتن نفسه وغاضتن بصره يامال العمى اللي يعمي كل اللي عيونهم زايغة وجع

صدز من قال الرجال مايملا عيونهم الا الترااااااب

مير الشرهة على الحريم الخبلات اللي ياخذن رجالهن معهن للسوق

[ليلى..]

رفقاً عزيزتي
كثير من رجالنا ليسوا رجال للأسف
ذكور فقط!
قليل منهم من يستحق ان يطلق عليه اسم رجل
والأسباب واضحه !

[الدمعه الحائره]

يااخيتي تغيرو شباب هذا اليومفاصبحو لايبالون ولاتهمهم الاونستهم وضحكهم الا مارحم ربي

[أبو تهاني]

اقتباس:  المشاركة الأصلية كتبت بواسطة جوجو2007     1/ رحت هالأيام اتسوق مع اهلي 2/ والاحظ الشهبان 3/ مغير ماسكين ايدين حريمهم 4/ والعيون تقزقز من هنا وهناك بأجساد الحريم 5/ واللي قاعدن مع عياله وزوجتة بسفاري لاند ايقاله مندمج معهم وعيونه مغير تدوج بين هالطاولات ورقبته بتنكسر من التلفت وهـ بس الله يعين الارض !!!

[align=center]العيب أنك تروحين للسوق تمشين وتفتنين شباب المسلمين

ومثل ما الرجل مأمور بغض البصر المرأة بعد مأمورة بغض البصر

وإلا حلال لك حرام على غيرك [/align]

[أنـفأإأس أإأللـيل]

اقتباس:  المشاركة الأصلية كتبت بواسطة أبو تهاني     [align=center]العيب أنك تروحين للسوق تمشين وتفتنين شباب المسلمين ومثل ما الرجل مأمور بغض البصر المرأة بعد مأمورة بغض البصر وإلا حلال لك حرام على غيرك [/align]

والله ماادري هل هذا اسلوب نُصح أو قذف ..
اتق الله ..البنت تقول رايحه مع اهلها
وحطيتها رايحه للسوق تتمشى وتفتن شباب المسلمين ..
خاف ربك ومعرفك يبين ان عندك بنت ..
لا تتبلى بنات الناس عشان الله مايبلاك ..

[kinder7193]

أجزم كل الجزم

إنها ما راحت للسوق بس حب هررررج و قرررق و حابه تتكتب موضوع بالي هووبه

معليش بس هذاي الحقيقه لازم تتقبلي الانتقاد بصدر رحب

[صـاحي و رايـق]

[align=center]الرجل لا ينظر للمرأة العفيفه الشريفه المحتشمه في لبسها
تأتي المرأة بلبس عاهرات لايرضي الله ولا رسوله وتقول أن الرجال ينظرون إلي
حتى لا يرضى هذا الشيء من فيه ذرة عقل في هذا الوقت
أجعلي من لباسك ساتر دون تبيان وأظهار أشياء من جسمك
وأتينا هنا وقولي ما قلتيه
والله أمر بالنصح والدعاء لهم
مو بالدعاء عليهم بالبخق عسى عيونك تبخق .. ما هكذا تورد الأبل يا بنت
حشفن وسوء كيله .. تتبرج وتقول لا تنظرون إلي ![/align]

[فتاااة النهر]

ههههههههههههه

طيب وانتي وش محرقن رزك ؟؟

بس على قولة واحد هنا مالي خلق ارجع اشوف مين هو

اللي تتستر والله مايناظرونه واللي طاقتن هالبرقع والعيون مكحله وعباية كتف او مخصره اكيد بيناظرونه

نعنبوا حيك حنا وحنا بنات نقعد بس نناظر هالعيون وش عاد الرجال ,,

يسلمووو وبردي قلبك شوي الدنياا ماتستاهل كل هالعصبية ,,,

[عبدالله الحلوه]

لو لم يجد الرجال مايغريهم إلى النظر لما فعلوا ذلك

عندما كانت النساء تهتم بالحشمة والستر والرجال احرص منها على سترها لكن عندما تعرض نفسها امامهم فإنهم يتسابقون لأخذ حصصهم منها ؟

ليتكِ تحدثتي عما ينظر إليه الرجال هناك


تحياتي

[جوان2007]

جوجو 2007 قريبه من معرفي بس تراه والله مهوب انا


وبعدين النظر ابلاش خليه يناظر لين توجعه عيونه ويروح يقطر بهن !!

[MATR909]

والله الرجال ماراح يناظرون الوحده المتحشمه ومحرمه نفسهل ما يناظرون الا الوحده الي ودها الرجال يناظرونها بلبسها وحركاتها 0

يا حريم تحشموا زين والله ماحد يناظركم

[النوران]

اذا احتشمت المرأة فلن تجد الا كل احترام وتقدير , وغض البصر للجنسين .
ولو كل رب اسرة راقب نسائه عند خروجهن ,( من باب القوامة للرجل )خصوصا اذا كانت حواء ضعيفة في ايمانها لكنا بخير , , ,

مشكورة اختي جوجو2007 على الطرح , ,

[العريف]

اقتباس: اللي تتستر والله مايناظرونه واللي طاقتن هالبرقع والعيون مكحله وعباية كتف او مخصره اكيد بيناظرونه نعنبوا حيك حنا وحنا بنات نقعد بس نناظر هالعيون وش عاد الرجال ,,

كلام في الصميم

[cool girl]

هي صادقه بعضهم الله يخلف وبعضهم ودك تحب رأسه يمشي ورأسه بالارض مايناظر احد

اما البنات اذا كانت مو محتشمه فقلعتها اصلن كلن بيناظرها وبعضهن الله يصلحهن تلفت النظر بقوة وانا بنت تلفت نظري وربي كانها بزواج من البهرجه اللي بعبايتها وبعيونها استغفر الله

اما المحتشمه اجزم جزم انه ماراح احد يعترض طريقها

دمتم.×.

[أنـفأإأس أإأللـيل]

ابغى اعرف شلون تفهمون !!!
الأخت تقصد في موضوعها الزوج اللي يمشي بالسوق يده بيد زوجته
وعيونه مبققه ببنات خلق الله ..الله لا يبلانا
وانتم نطيتو عليها لو انتي محتشمه لو انتي متستره ماناظروك !!
مشكلة الفتيات المتبرجات مشكلة مستقله ..
هي تطرح هنا مشكلة الزوج اللي عيونه زايغه يروح للسوق مع زوجته ومقصده البحلقه والقزقزه ..
وانتم عارفين وضع الأسواق في هذا الزمن والله المستعان ..
والعارضات بالأسواق مو وحده والا ثنتين للأسف الأغلبيه منهن تأتي للسوق للاستعراض والإغراء ..
فالأولى بهذا الزوج غض بصره ..فكم من مصائب ومشاكل ابتدأت بنظره ..
كيف يرضى على نفسه وزوجته بصحبته على الاقل يحترم وجود الآدميه اللي بجنبه ..!!
وتلقين هالأشكال مربطين زوجاتهم تربيط ..قفازات وشراب وخانقها بغطوه
عشان ماتشوفه زين وهو يأخذ راحته بالقزقزه ..ولا يبيّن منها حتى اصبع وطبعا كل هذا مو دين ..
عشان محد يطالعها وهو يمتع ناظريه بالمخصر والمكسر جعل عيونه للبخق ..