عالم الاطفال !!!

[البكيراوي]

السلام عليكم ورحمه الله

احبائي اعضاء وزوار منتدى بريدهـ ....

هذه بعض الطرف التي سمعتها من الاطفال من اقاربي او اصدقائي احببت ان اتحفكم بها ...

وهي نوع من الطرائف المباحة فلا غيبة ولا استهزاء بها ...

ونبدا مع اول طرفة ...

هذه بنت في ثاني ابتدائي قالت لهم الابله كل وحده تجي بكرة وأمه محفظته النشيد ..
البنت رجعت للبيت وهي تصيح تقول لامه الابله تقول بكره لازم تلبسون حفايظ !!!


===========

وهذي بنت اهله راعين سفريات في الخارج ومرة راحوا الى تركيا
عاد يوم رجعت تقص على اقاربة وش شافوا بتركيا وطبعا الامر المذهل عندهم انه الحريم ما يتغطن !!
فجت بنت وسئلته امك فاتشة قالت البنت ايه
قالت له حرام ما يجوز ..
ردت البنت وقالت لا هذا قبل الاسلام

بـــــــــــــــــــــــــــــــراءة اطفال

============================

وهذا بزر باولى ابتدائي يوم جو اهله يحفظونه اللي درسه بالمدرسة قالوا له وش اخذت اي سورة ؟؟
قال لهم :سورة السباع !!
يعني الماعون
ومن بكره قالهم سورة المكرفون
>>>>يعني الكافرون

والله البلشة هالبرز


وهذا اللي اذكره واللي عنده اضافة يحطه واذا ما طلعت معه على طول يجلس يفرك راسه لين يطلع معه شئ

وترقبوا >>>>عالم الشيبان

تحياتي
البكيراوي

[الشقردي]

ههههههههههههههههههههههههههههههه الله عليك يالبكيراوي هذولا البزران اللي صح يعني البراءه كله بكبره هم هذولا 000 صراحه ما اذكر شي هلحين لكن ان لقيت شي ابقوله لكم بعدين 000 شكرا لك على كل مشاركاتك الرائعه 000وتسلم 000 لكن شف عيال الاجناب وش يسوون000

[بقايا نزف]

عاااااااااالم فظييييييييييييييع برائه بما تحمله العبارة من معاني

عالم يدعك تعيش في سلام وحب واطمئنان

لاتسأل عن الحقد فيه لا تسأل عن الكراهيه

كل ماهنالك أحلام في أحلام

وعيون بريئه تأسرك بمجرد النظر إليها

إنه عالمهم نعم عالمهم

عالم الأطفال

لطالما تمنيت بأن يكون لنا نصيب من صفاء القلوب في عالمنا نحن القدوة

الكبار

تسلم يالبكيراوي

تحياتي
بقايانزف

[مسافره بلا زاد]

السلام عليكم ورحمة الله وبركاته ........
اهلين اخوي البكيراوي .....بصراحه عيال اقاربك هذولي مسكتين ....
عاد اسمع ها المواقف من عيال اخوي (بنت وولد البنت في التمهيدي والولد 4سنين ).....
هذي بنت اخوي الله يسلمك تحب تناظر مسلسلات وخاصة الكويتيه ولو تذكرون مسلسلة (الاختيار )...الممثل عبد الرحمن العقل في نهاية المسلسة انهبل ومات في الزبالة _الله يعزكم _....
وبعدها بفترة طلع نفس الممثل في مسلسلة ثانيه ....
عاد البنت انهبلت قالت وشلون رجع وعاش مره ثانيه ....وقعدت تصيح وابلشت امها وهي منجنه تبي تعرف كيف ....
ومره يوم ملت من اخوها قالت يما ابي ارميه بالزباله زي هذاك الرجال ..
.
.
.
مره وحده دخلت على اختها الصغيره وهي قاعده تسوي حركات قدام المرايه وتطالع نفسها من فوق لتحت وتكلم روحها وتقول :بكم هذا ..لا لا ما يصلح ...المهم جت قالت لها وش تسوين قالت :انا اللحين اتعلم كيف اكلم الشباب علشان لما اروح السوق ....
الكبيره انهبلت وقالت لها :ليش حرام عليك عيب اللي تسوينه ...قالت طيب وشحيث البنات اللي في السوق يلبسون عبايه حلوه ويكلمون الشباب كذا ....قالت الكبيره :هذولي كافرات المسلمه ما تسوي كذا .....
مرت الايام وراحت مره الصغيره للسوق وشافت حرمه لابسه عبايه كتافيه وحاطه لثمه مع زوجها ...جت عندها وصارخت عليها وقالت لها :انتي كافره مو مسلمه حرام عليك ما يصلح كذا ...وزوجها طاح وجهه وقال :ايه ايه خلاص يا شاطره... وما تشوفون الا غباره هو ومرته .........
.
والموقف الاخير لوحده يوم انها صغيره شافت اختها مره تصلي وبعد الصلاة سجدت سجود السهو فقالت: الصغيرة ليه سجدتي.. الكبيره جت وعلمتها عن سجود السهو انه اذا نسيتي شيء في الصلاة تسجدينه ,,,الصغيره صلت وسجدت وشافتها اختها الكبيره وقالت لها ها وش نسيت علشان تسجدين سجود السهو ....قالت نسيت اكل الفشفاش حقي ......
.
.
ارجو انه المواقف اعجبتكم .......وتسلم على الموضوع الحلو .....وها تراني احتري مواقف الشيبان ...عاد ما يحتاج اقول لكم عن جدتي ومواقفها مع الغنم حقها ....هذي تجي روايه كامله باسميها (رقيه ودبشها )..
.
.
والسلام مسك الختام

[البكيراوي]

اخوي الغالي والعزيز الشقردي

يا هلا فيك ...وتسلم على صورة هالبزر ...

واثر بزراننا بخير عند بزران الاجانب ...

وتسلم يا الغالي

=================

اهلا بالمبدعه بقايا نزف

كلامتك رائعه ..

وفعلا عالم الاطفال رائع وبرئ

واشكرك على حضورك ومشاركاتك ...

======================

اختي مسافرة بلا زاد

صراحة بزارين الرس غطو على بزاريننا

اجل تسجد السهو علشان نست تاكل الفشفاش هههههههه

وعالم الشيبان قريب ان شاء الله

لكن ترانا ننتظر "رقية ودبشتها"

واشكر الجميع على قراءة الموضوع ...

[ابوتركي]

مشكوووووور يالبكيراوي

فعلا الأطفال يجي منهم متخرمات بعض الأوقات واحيانا يفضحون

أهلهم طبعا ببرائتهم ............................................

وعالم الأطفال يشعرك بالعطف والسماحة وطهارة القلب الي

تنقصنا حنا ونحن لها ................................

اكرر شكري لك اخوي البكيراوي وتسلم على هالمجهود

ابو تركي.........

[بقايا نزف]

اوة راحت على البكيراوي

اختي الصغيرة عمرة سنتين

توتو تقلد اي شي يصير قدامها

المهم جدتي مسكت مفتاح غرفتها وحطته بصدرة

جا ابوي عطاها ريال

وبعدها سألتها توتو وين ريالس

توتو:لاح

انا:وين لاح

توتو:اينا>>وتأشر على صدرة ومادريت الا والعمه تدخل يدها وتطلع الريال

*******************

تحياتي

بقايانزف

[مسافره بلا زاد]

معليش وحدة ما تنعطى وجه لكن من جد تعرضت لموقف احب اني اذكره ضمن موضوعك .....
هذا الله يحفظك كنا والعائلة الكريمة طالعين للبر (روضة خريم ) ,واحنا يا البنات على بالنا مسوين معسكر خاص فينا ما يدخل ذا المعسكر احد الا بعد ان يجري عدة اختبارات متى اجتازها بنجاح فحنا نقبله في ها المعسكر .....
الزبدة ....وحنا جالسين طفشانين ذاك اليوم ....عاد انا قلت لبقايا نزف وش رأيك نتخانق اسم إنا نضيع الوقت ....يوم هااا بدينا خلاص كل وحده تبي تجر في شوشة الثانية الا ويمر ولدين صغيرين (يمكن في خامس ابتدائي )...( اعوذ بالله يالا يالا فكينا يديننا من بعض الدعوه مزحه تحولت لجد) ....المهم قلت خليني اطقها سواليف معهم لاني ما شاء الله ما يحتاج قصيميه وانواع اللقافه شفتهم و قمت اهلي وارحب فيهم ..يا هلا والله ومسهلا حياكم الله تعالوا معنا خلونا نسولف مع بعض ......مادريت الا والولد يناظر فينا نظرات ماهي طبيعية وربي ولا نظرات رجال كبير (يعني يقز قز مهوب صاحي)...ناظرني وقال بصوت باين انه مخشنه على باله كبير ...اجي بس بشرط....قلت انا آمر وتدلل طلاباتك اوامر ....انك تقومين تتمشين معي .....الولد قال الكلمه من هنا ,انا خلاص انشليت وبقايا نزف ماتت من الضحك علي وعلى الولد وقالت له :اقول بس رح كمل رضعتك واللي يرحم والديك ...وما درينا الا والولد رايح ..وانا على حالتي مثل الصنم من الصدمه .....شفتوا وربي ما عاد فيه اطفال بها الدنيا ....بقايا حبيبتي وش قالت :تلقينه شايف اخوانه الكبار وبادي من اللحين يطبق .....لكن من جد الله يستر من اطفال القرن ال21 ......
.
.
.
اتمنى اني ما طولت عليك لكن من حرّ ما بي قلت خلني اكتب ذا الموقف في موضوعك حتى نعرف خفايا عالم الاطفال ....
.
.
وبالنسبة لتوتو يا بقايا ما ينشره عليها (من عاشر القوم اربعين يوما صار منهم )....ولا تنسين تزين صينية حلا لطلعة بكره ان شاء الله تراني منيب مدخله احد للمعسكر الا ومعه غنيمه وذخيره ......لووووووووووول ...(:
.
.
تحياتي لك ....
والسلام مسك الختام ...

[الطيف]

سبحان الخالق