كل عام يمرني وأنته عن عيوني بعيد
بالحزن..!؟ (أستقبله) و(أصافحه) و(أودعه)..!؟
وكل عام (أترجم أحساسي) من فراقك قصيد
وأقول ياليت القصيد اللي كتبته( تسمعه)
عل وعسى تشتاق لي .. والشوق في قلبك يزيد
لادريت أن الجروح بقلب (محمد) موجعه..!!
ياكثر من قال (خله) والمحبه ماتفيد
وياكثر ماقلت (أحبه) من يجيه ويقنعه..!؟
علموه أني ذكرته بأول العام الجديد
تكفون من يقدر عقب ماغاب .. لي يرجعه
أشتاق له كثر أشتياق (الجد) لعناق (الحفيد)
وأتحمله كثر أحتمال (السد) موج يدفعه
وأحتاج له كثر أحتياج القلب دايم للوريد
وأنفعه مثل العشير اللي عشيره ينفعه
ذاب قلبي في غيابه مثل ماذاب الحديد
يوم ولعني وخلا نار قلبي مولعه
أشهد أنه مارحمني يوم خلاني وحيد
طاوعه قلبه يغيب .. وكيف قلبه طاوعه
ماسمعت .. ألا .. شطر .. ويحّرك شعور البليد
(ضاقت الدنيا بشاعر طيب قلبه ضيعه)
آتمناه .. وأريده (والله يفعل مايريد)
وكان مكتوب الغياب..!؟ شحيلتي..؟ وكيف أمنعه..؟؟
علموه أني (فقدته) ياعسى عامه سعيد
وعلموه أن (القصايد) في غيابه تتبعه
كل عام يمرني .. يالأسف .. مامن جديد
بالحزن (أستقبله) و(أصافحه) و(أودعه)..!؟
العرض الشجري