[قـتـالـه]

هلا .. هلا
ياحي ماهنا من يرادتس الصوت !
ماغير انا وانتي الاعرابيات هنيآ :/


ديم


خليتيني اشم روايح النفل والنوير !
وريحة نار اهلي ونياقهم ورعيانهم ووايتاتهم !
طفوله تدثرت بالبداوه
ولاتسأل صبية البداوه عن قلبها !
بنت البدو قلبها يسابق نبضه ويقتنص العشق ..
تعشق البر وشمس الظهاري
وعروق الشمال واخاديد ضربها سيل وجرف حصاها الوادي !


كنا عيال وبنات اتراب

ماحبيتهم
لسبب بسيط زعموني عليهم العيال وشلونا ابحبهم ؟
لعبتنا المفضله النط من وايت ابوي على الرمل ..
كنت اطب مرتين وعبيص ابو عيون توه يراوي على اول طبه
يحبني يعطيني من حلاو امي طرفه ويسرقلي علوك من بقالة ابو مطير
ولا حبيته .. المسيكين مايعرف ان البنت تبي من يعذبها ويذوقها المر قبل الحلاو !


ديم
تتذكرين ريحة البواريد..؟
تذكرين الشوازر والسكاتين ورشاش الليل اللي يسندونهن ورا باب ذيك الغرفه؟

كنت انتظر الرجال ينامون الظهر:/
ويتوسدون زنود حريمهم .. علشان اروح امارس شغفي على صاحبات الطخ والطخيخ

كنت اصف فشق الشوزر اللي لونها برتقالي والرصاص الذهبي وارجعها مكانها اذا اوحيته يتنحنح لصلاة العصر !



اهدوني لما نجحت من صف اول عروسه شعرها اصفر

ماحبيتها

ماتشبهني

ولاتشبه احد اعرفوه

قصيت شعرها ورميتوه

تغيرت .. صارت لاولد ولابنت

رميتها ورا شبك غنم امي طرفه..!

لقتها جدتي وقالت طيب وش اجيبلتس؟

قلت ابي بارود والله ماارمي احد



آه ياديم
احكي
او بس ..