صــاحب لـــي دائمــاً مهموم و دايم مضيقن صدورنا لاجلس معنا وأيدهـ على خدهـ ولاسألناهـ يقول مافيه شيئ , يعني الواحد لاظل جالس وهو يفكر يمكن يحترق بمحله لأن التفكير بهموم وأنت جالس ماتتحرك يزيد الهم همين وتبدأ الشياطين ترقص بداخلك خصوصاً لاصرت لحالك تتصارع مع الأحزان بدون ماتحرك ساكن !
صاحبنا هذا يجلس بيننا مايتكلم ودايم عاقد حجاجه ولو اقوله عطن الفنجال اللي بجنبك ماقدر يجيبه مهوب عجز فيه بس من زود الهم مايقدر يتحرك محبط !
سويت طريقه أني أبتخلص من همومه وبأتفاق مع اللي معي ويالله وافقوا لأنهم مايحسون فيه وأنا اللي حسيت فيه ,
الطريقه كــالتالي: وهي أني جزمت عليه أنه هو يزين العشاء ولو انه مايعرف ولو لايفك الزيت ! بس ابحركه أبخلي اللي بوسطه يتطاير وأخلي هالشياطين تتصدف عنه
قلت له: ابيك تطبخ لنا العشاء ورفض رفض تام قال: ابعد عن لاتقربن مالي خلق ولا أهرج وشلون تبين أطبخ , وأشد عليه وبأصرار ويالله وافق
وهو لاسوى شيئ يتقنه ولا يبي أحد يساعدهـ خصوصاً بأمور ثانيه , وراح للمطبخ وجهّز نفسه وأشتغل وصارت نفسيته زينه وكل شوي يسألنا عن ذوقنا للطبخ والرجال تحرك وصار يقطع خضار ونفسيته زانت حتى أنه وهو يطبخ متحمس وبمثابرهـ وصار نشيط وصار يسولف معنا ويقول كلام دُرر كان مخبيه بداخله
هذا هو المحاربه الحقيقه للهموم هو أن الواحد يحاول أن يتخلص من التزاوج مع الهموم ويصرف نفسه بأي شيئ يحاول يرتب غرفته يحاول يمسح جدران غرفته يحاول يغسل ثيابه حتى لو يفك باب غرفته ويركبه من جديد أهم شيئ لايصير ضحية هم
وفيه شغله ثانيه لكن بالرد التالي