وشلون أبنساك ؟ وإنت اللي على بالي
عشره مع الغير نار .. وعشرتـك جنـه
أنا تمنيتـك .. وجيتـك علـى فالـي
ومافيه غيــــرك ضلوع القلـب حبّنـه
وماكل شخص ٍ دخل بالقلب لي غالي
في فرق واضح مابين الفرض والسنـه
أحد ٍ لياشفت زولـه ينشـرح بالـي
و أحد ٍ يضيّق العيون اللي يشوفنـه !!
و أحد ٍ إذا غاب عني , ضاقت أحوالي
و أحد ٍ إذا غاب , قلبي مادرى عنـه !!
و أحد ٍ ليامن عطا يعطيـك بالحالـي
و أحد ٍ ليامن عطى يعطيك بالمنـّه !
و أحد ٍ يخفّي المرار ويبـدي الحالـي
و أحد ٍ يسم البدن لو تستمـع منـه !!
من قبل أعرفك خفوقي بالهوى خالـي
وإنت الوحيد اللي عيونـي تحالنـه
في لحظة الشوق .. لا واعي و لا سالي
وانـا معـك بيـن يمكنّـه .. ولكنــّه !!
وعيني بعينك وأشوف أنواع وأشكالي
من خاطر ٍ منشغـل.. وعلـوم يذنـّه
وسمعت وش ضايقك ياسمح الأقبالـي
وبيّحت من خاطرك كل علم ٍ تكنـه
إن كنت خايف من الهجران يالغالـي؟
إسمع كلام اللي ظنك علـى ظنـه
وشلون أبنساك ياللي شاغل ٍ بالـي ؟
تبيني أنساك ؟ حلم ابليـس بالجنـه !!
مما راااق لي ،،،،،