[align=center]بسم الله الرحمن الرحيم السلام عليكم ورحمة الله وبركاته وتحية طيبة أبعثها لكم أما بعد ** أمضيت في الانترنت تقريباً سنتين إلى ثلاث سنوات .. جميعا كانت لاتتعدى نطاقات محددة متمثى في الآتي : منتدى بريدة - رقم واحد - البريد - الايميل + الماسنجر مواقع عربية مشهورة .. أمثال : الساحات + بوابة العرب إضافة إلى بعض المواقع الأدبية المتخصصة بالشعر الفصيح ونادراً .. ماأتعدى ذلك إلى موقع ( عربي ) آخر .. حتى في المنتديات نفسها ! ** قبل فترة سألني أحد الزملاء عن برنامج يسمى البالتوك ( هكذا قالها ) جاوبته بأني ماأعرف اللي قـال نظر إلى باستغراب وقــال : فيه أحد مايعرف البالتوك أنا ( ضربت بالذهانة ) وتوقعت بأن البالتوك هو < الماسنجر > بس إنه مايعرف يقول الماسنجر .. راح وَ ولّف من عنده إسم للماسنجر قلت : البالتوك .. البالتوك , ولايصير خاطرك إلا طيب قال : أجل تعرف له ؟! قلت : مايحتاج .. ! قال وش تعرف فيه ؟ قلت : أعرف إني أقدر أضيف أي واحد للماسنجر الخاص بي ,, وأعرف إنه يشبك على الايميـل .. .. قال : ( والله إن ماعندك ســالفة ) !! قلت : السوالف كلها عندك أجــل وراحت الأيــام .. وأنا ودي أسأل عن اللي قاله رفيقي .. بس فيه مشكلة .. وهو إني ماأتذكر ( اسمه = البالتوك ) !! وبرضه .. راحت الأيــام .. وأنا ماادري وش البالتوك !! ** بعد فترة .. جهازي فرمته عند محل كمبيوترات .. وقال : تبي أحمل لك ( البالتوك ) قلت : أبوك للجنّة .. أنا أبسألك وشهو البالتوك اللي صجّنا به رفيقي .. قال ( الهندي ) : أنت مافي يعرف هذا بالتوك .. كله نفر معلوم قلت : والله عاد أنا ماعرفه .. جاز لك .. وإلا بهــواك قال : شوف صديق .. مادام أنتا مافيـه معلوم .. ليش يحمل برنامج مافيه فايده حق أنتا .. هذا برنامج كبير .. وبعدين ثقيل على جهـاز قلت : مادام كــذا .. , أجل لاتحمله على الجهــاز .. ( ويجوز العيد بدون حنّا ) ** بعد فترة لقيت رفيقي اللي قد سألني عن ( البالتوك ) قلت : تراي عرفت وشو البالتوك !! قال : احلف .. وشو البالتوك ؟ قلت : والله حــسب كلام الهندي .. البـ.. قال : أثرك سائلن الهندي .. .. أجل الله لايهينك .. لاتكمل .. , أنا أحسبك تعرفه .. قلت : هو الـ .. قال : ياأخي إذا ماتعرف الشيء .. , وشوله تقعد تولف على .. وأنت أصلاً ماتدري .. قلت : أجل .. رايك وهـداية الله ** - برضه - .. راحت الأيـــام ومرة رحت لمقهى انترنت .. ولقيت على الشاشة ( سطح المكتب ) ايقونة : مكتوب عليها البالتوك .. قلت : بَسْ .. جاك يامهنّا .. ماتِّمتَّى .. حاولت أدخل .. لكن ( أخوكم بالانجليزي .. مامن أمــور ) .. قلت : الحمد لله .. , مادامي مشارك في منتدى بريدة .. وأكيد الشباب هنــاك يعرفون كل شيء عن هـ ( ـالبالتوك ) .. ليش ماأسألهم وأرتــــــــــاح .. ؟؟! ** السؤال الذي أطـرحه .. وأرجو منكم إجـابة شافية ووافيــة هو : مــاهــو البــالتــوك ؟ ---------- مع الشكر الجزيل لكم * آمل أن تكون ردودكم منسقة ( كتعبير عن استخدام إمكانيات المنتدى الجديدة ) تقهو 11/2/1425هـ منتدى بريدة .[/align]