الأخ الكريم : لمبة شارع
أنا قدّر الله عليّ وقرّرت أسوي خطة تغيير وانقلاب شاملة على كل ماهو موجود بالبيت ! أغير ديكور بيتي وأعتق الجدران, وأهد بعضها بعد ..... الخ وخسرت فيها سبع كيلو على الأقل من وزني بالإضافة إلى غيرها من الأشيــــــــــــــــاء ! ! >>>>>>>>>>> مقدمة معتادة لتحسس الجيوب من أصحاب القلوب الرحيمة ... هــــه
وقعت طال عمرك فيما وقعت فيه من الحيرة وأكثر وأصبت من حولي ( زوجتي , الدهانين , مهندس الديكور , المتابعين المقرودين اللي ابلشو بي وكأنه بيتهم : متى تخلص ؟ وش تسوي أنت للحين ؟ بيتك طلع له سنون وقرون !) >>>>>>>>>>> حشا صار قصر .. بالقرف والملل من تخبطاتي وعدم استقراري وعدم وضوح رأيي واختلاف مزاجي عن مزاج زوجتي ومهندس الديكور لدرجة تقارب العكس ! فأنا ( باعتباري عصبي وقلق نوعا ما ) كنت أفضل الألوان الهادئة والفاتحة اللي تساعد على تعديل مزاجي بعكس زوجتي ومهندس الديكور اللي كانوا يفضلون الألوان الغامقة والألوان الجريئة وربما الصارخة ! ويبررون هالشي بانه يعطي المكان نوع من الفخامة ...هذا الأمر طبعا ماكان يتعلق بس بألوان الجدران ..... لا ! كل شي ! الجدران , الدرابزين , الأرضية , الأشكال الجبسية , الكهرب والإضاءة , الأثاث المقترح اللي مابعد تم شراؤه للحين بسبب الدجّة
وَضِعت أنا بين قناعاتي الشخصية ومزاجي الفريد وقناعات زوجتي وبين الخوف من إعادة ماتم عمله من أول وجديد نتيجة الزّنّ على الدماغ ( وقولة وع , ولو انك طايعن , وياما قلت لك بس ماتسمع الكلام , واللي مايطيع يضيع وغيرها الكثيرمن عبارات التقريع والتوبيخ الزوجية المعتادة ) وخاصة إنها دايم تستشهد لي بكذا فلة من أقاربها والمهندس اللي يعرض علي اقتراحاته ! >>>>>>>>> للأسف اتفاقي معه كان في وقت لاحق لبداية الشغل علشان كذا ماكان فيه وقت كافي يرسم لي تصاميم وآخذ وقتي أنا وزوجتي باتخاذ القرار ........وكانت زوجتي تهوّن علي اتخاذ القرار وعدم اعتباره مغامرة مثل ماكنت أردد دائما كجملة أخيرة أنهي به حواري معها المتأزم أصلاً بقلقي وحيرتي !
المهم ! قلت مافي إلا أسوي حل وسط بيني وبينها ! ( تسوية يعني ) بس اشلون !؟
وبديت أستعرض أنا وياها الحلول المقترحة ! ونفذت أغلب العمل باسلوب مقارب يجمع قدر المستطاع بين مزاجي ومزاجها بس بشق الأنفس وياما سويت شي ورحت أهدّه مرة ثانية ! ( نتيجة الحلول الوسطية )
ياساتر! بديت أحس بالصداع وزفرات القلق يوم تذكرت ذيك الأيام المليانة بالتخبط والحيرة !
تصدق ياخي لمبة اني كتبت كلام عن مراحل العمل بهالرد ومسحته ؟ مالي خلق والله أتذكّر ولا ودي بعد أوجع راسك بشي مايفيد ! ولا أعتقد ان الاقتراحات المحددة بالألوان وأشكال الديكور ونوعيته راح تكون مفيدة بالنسبة لك .. لأني أظن مهما كان عند الواحد خبرة بهالشي لايمكن تعطيه الحق باقتراح محدد في مكان محدد بقولة حط بالمكان الفلاني كذا والمكان العلاني كذا للأسباب التي راح أذكرها لاحقا . و للأمانة أيضاً أنا كتمت أمر تفاصيل العمل ببيتي لسبب إضافي آخر هو انه فيه ناس معنا بالمنتدى أعرفهم ولايعرفوني , وإذا كشفت التفاصيل راح يعرفوني ....
<<<<<<<<< وش يبي ذا أجل !؟ وش مدخله بالموضوع من أصله إذا كان هذا رأيه !؟
أنا راح أحاول أعطيك بعض النصايح اللي تعلمته من هالتجربة واللي راح أطبقها إذا فكرت أعيد التجربة في بيت ثاني ان شاء الله :
أولا : لازم يكون العمل منظم ومعد له إعداد جيد منذ البداية ولازم يكون فيه تصور شامل لكامل الخطوات بداية من الأرضيات : لونها , نوعيتها , الخ إلى الجدران والأسقف إلى الجبس ومايندرج ضمنها من تشكيلات مختلفة على الجدران والأسقف والزوايا إلى الإضاءة والكهرب إلى شكل الديكور واللمسات الجمالية المقترحة بالزوايا وغيرها ! يعني قبل ما تبدأ الشغل مو مثل ماسويت ! بديت وبعدين قلت وينك يامهندس ! غُلب حماري !
ثانيا : لازم تضبط شغلي على قدر ميزانيتي المادية .
ثالثا : الاستعانة بمهندس ديكور داخلي لوضع التصاميم كاملة على الورق المطبوع بالحاسب وبالألوان للعمل المقترح وأخذ الوقت الكافي للتعديل والإضافة بحيث تتخلص من المفاجآت واللخبطة وإعادة التفكير ومن ثم إعادة العمل . ( أستغرب من اللي يستخسرون يدفعون ألف ونص لمهندس الديكور ومستعدين يعيشون بحيرة في اتخاذ شكل الديكور والألوان المناسبة ومستعدين بعد يهدّون اللي بنوه ويعيدون بنائه بمبالغ أكبر بكثير !!! )
رابعا : لازم يكون لشخصيتك ومزاجك ومزاج ورأي اللي يسكنون معك دور بشكل الديكور والألوان ونوعيتها وكل شي..... وتأكد أنك مهما عملت لن تصل إلى القمة حتى أنت وأهلك لن تبقوا على مزاج واحد فلاتشطط على نفسك .... هذا من جهة ! ومن جهة أخرى لاتتكل على رأي مهندس الديكور الداخلي فقط ! حسب خبرتي كل مهندس له نظره مختلفه ويحاول يفرض شخصيته على العمل ! عندك مثلا مهندس الديكور الموجود بمحل لمسات اللي على طريق الملك خالد يحب الألوان الهادية والفاتحة والتعتيق الناعم , غير اللي موجود بمحل رتاج بمحلات الراجحي اللي يفضل الفخم ولايهمه تكاليف العمل والتصميم لذلك يتعامل غالبا مع أصحاب القصور , غير المهندس رضا الموجود بوكالة الحمود للدعاية والإعلان الجريء بطرح الألوان والتصاميم ويفضل دائما الألوان الغامقة والسادة وعنده بعد تصاميم جاهزة للاطلاع عليها _ إذا حبيت _ على سي دي ومن أعماله الخاصة وممكن يمسك تنفيذ العمل والإشراف عليه بشكل كامل , وفيه بعد على نفس صفّة المحلات اللي فيها رتاج محل تجيب له شكل الديكور المقترح مطبوعا على الكومبيوتر أو مأخوذا من مجلة أو موقع انترنت وينفذ لك العمل بشكل كامل ولهم مصنع متخصص بالرياض في تنفيذ الأعمال المطلوبة وعمالة متخصصة خاصة فيهم على حسب علمي .
خامسا : لازم توسع ثقافتك الشخصية في العمل الفني اللي تبي تسويه ! مثلاً التعتيق مو واحد ! فيه القماشي وفيه عن طريق المسدس وفيه عن طريق الفرشة وهذي أشياء يعرفها الدهانين اللي يتفاوتون في مستوى الشغل وأجرة إيديهم وغالبهم يقولون لك نضبط الشغل لكن إذا اطلعت على عملهم تلقى الواقع مختلف عن كلامهم , وخاصة في التعتيق اللي يعتمد بالدرجة الأولى على مهارة اليد والخبرة السابقة في تنفيذ عمل مشابه ! ونفس الشي ينطبق على البوية المكسيكية ( البوية على المعجون ) , والبوية المطبوعة , وورق الحائط وغيرها من أنواع الدهانات والملصقات الجدارية .
سادسا : العمل لازم يكون متناسق بحيث يكمل بعضه بعضا ويكون بالنهاية له فلسفه خاصة وموحدة إلا إذا كان البيت ضخم جدا ( قصر يعني )!............ يعني لاتحط بزاوية الصالة شكل ديكور على النمط الأوربي اللي يعتمد على الفخامة وبالزاوية المقابل لها شكل ديكوري ثاني ناعم وهادي ! مو بس بالصالة... لا ! .. ديكور البيت كامل ! علشان كذا استغربت منك لما طلبت المشورة يا أخي الكريم وش تحط لون التعتيق !! لازم يكون لون التعتيق جزء مكمل لما قبله ومابعده ! ومتناسق مع الديكور العام للبيت ومتداخل معه ! واستغربت أكثر من اللي يقولون حط اللون الفلاني بالمكان الفلاني !!! يعني ممكن هم يعطونك مبادىء أو سياسة عامة لاختيار اللون أو يقولون اللون الفاتح يعطيك مساحة أوسع لكن اللون الغامق يعطيك فخامة بس أنا رأيي انه تحديد اللون صعب إلا إذا كانوا مطلعين على العمل بالبيت بشكل كامل !
سابعا : لو كان الأمر بيدي أو استقبلت من أمري ما استدبرت لكنت غيرت تفصيل البيت بشكل جذري وخاصة الدور الأرضي المليء بالممرات والغرف المقفلة وفتحت الصالة على المقلط ومجلس الحريم على الصالة والمطبخ على مجلس الحريم , وألغيت الممر الفاصل بين مجلس الرجال ودورة المياه , مع الحفاظ طبعا على الخصوصية المطلوبة في حال تواجد ضيوف غرباء ! ولا أخلي شي مغلق إغلاق تام بِباب وجدار وقفل إلا دورات المياه وغرف النوم ! مو مثل بيوتنا وتفصيلها التقليدي ! البيت صاير كنه مخافق حمام على طراز بيوت الأولين أيام كان البيت بيت حموله ... أيامها كان 90% أو أكثر من الحريم اللي بالبيت تغطىّ عن 90% أو أكثر من الرجال ! وهذا التفصيل الحديث يعرفه مهندسين الديكور الداخلي أكثر من مهندسين التصميم المعماري ..
أخيرا : ربما كان من الأولى ترتيب تلك النقاط بشكل أفضل ولكن هذي مشكلة كثرة الهذر .. عاد أنت خذ وخل !
اعذرني كثّرت الهمق فيما لايفيدك أو قد يفيدك .. أتمنى لك اختيار موفّقا ..
تقبل تحياتي ..